Mae khuru 8
8
Sol ne choghara nanoni khilo'au re
1Ni ka gaoghathogna mae Sol ie kohlo lui aulana ka magne te falemeza hatimare mae Stivin ie. Ka naga'e teugne, hatimare ne funu choghara nanoni khilo'audi Jerusalem re. Nanoni te fatutu'aniza Jisas re ne kafua sopana pelo ne tei ka chuku nau ka provens Judia ni Samaria. Ni hatimare mae khurure lana teke au fapulo Jerusalem ie. 2Agnoni, keha mae te fatutu'aniza God re ne tahngi fabi'o ni di'agnagnafadiza eu glemegna mae Stivin gne, eume hatimare ne atha thonogna magne ie ne tei giugiluza. 3Euwateuwe, funu ka naga'e te leme mae Stivin gne, mae Jiure ne funu choghara nanoni khilo'au re. Sol ne tei leuleghu suga mala sagura mae ma'ane ni ga'ase teu te fatutu'aniza Jisas re mala nana'ara ka suga sosolo.
U grorogo te keli gne ne dufu Samaria
4Nanoni teke pelo funudi Jerusalem re, ne thuturi ne tei tafiri grorogogna God gne ka nau hia te hia te tei dufu hatimare re. 5-6Mae Filip ne soru ka nau bi'o Samaria ne thuturi neigna Kraes. Kate rogira ni kofira teu kofunaboboi teke eira mae Filip re, nanonidi Samaria re ne kelitadi ne famane farogo fakeli ka hna te lepora magne re. 7Chuku nanonidi Samaria re au na'itu tadi, ni mae Filip ne brue fajiflara na'itu teure. Euwateuwe, na'iture ne aku fabi'o ne jifla mei ka nanonire. Filip eulanauwa fakekeli ra nanoni te leme nenedi ni blughu teu te au ka nau teugne. 8Eume nanonigna nau teugne ne tufuni hneahnegha lui.
9Ni kahe mae nahngagna ie Saemon au lanauwa ka nau teugne. Ame tei na mae Filip ka teuwae teuwe, magne ne favere ra nanonidi Samaria re ka noilaghidi noa na'itu re. Magne kahe mae te lase fahaehaghe lui ni kiloza thaigna kahe mae funei. 10Nanoni te hui, te iko ba te bi'o re ne kafua farogo fakeli ka hna te lepora magne re. Nanonidi Samaria re ne lepo eu'ani, “Ma'igne au noilaghi te kiloza tati ‘noa noilaghi bi'o God.’ ” 11Hatimare ne leghuza mae Saemon, eigna funu tifa te mei ie, magne neke favere ra lui hatimare ka noilaghidi noa na'iture. 12Ni kate mei thuturiza mae Filip u Grorogo te Keli gna Jisas Kraes ie, ni gna nakahra God te funei fruniza ie teuwe, chuku ma'ane ni ga'ase teu ka nau teugne re ne fatutu'ani ne siublahi. 13Saemon thaigna eulanauwa ne fatutu'ani ne siublahi. Magne ne au fathata lui kehreagna mae Filip. Kate kofira magne u kofunaboboi ni puhi te noilaghi lui teu te eira mae Filip re, mae Saemon ne tufuni vere noa lui.
14Kate rogira mae khuru te au Jerusalem re te ne nanonidi Samaria re la fatutu'aniza God teuwe, hatimare ne kuri teira Pita mae Jon mala toghora hatimare. 15-16Nanonidi Samaria re la siublahi hui ka nahngagna Lod Jisas, ni Tharunga te Blahi ie theome soru na me'au tadi euwa. Eume ka dufu laodi Pita ni mae Jon teu Samaria ie, phalumare ne tarai ra mala tangomana nanoni khilo'au re te athiza u Tharunga te Blahi ie. 17Agnoni phalumare ne ta'ofi ra, euwateuwe hatimare ne athiza Tharunga te Blahi ie.
18Saemon ne kofiza te gulao God Tharunga te Blahi ie ka nanoni teke ta'ofi ka phalumae khurure. Agnoni magne ne atha nanugra ne tei ka phalumare ne lepo eu'ani, 19“Phalumae, gumei lanau ka rei u noilaghi teugne malani kate habo lao rei khamegure ke kliagna ihei ie, magne na athiza lanauwa u Tharunga te Blahi ie.”
20Ni mae Pita ne lepo eu'ani ka magne, “Ghoe kaina leme ka kha'aghi baludi nou nanugra re, eigna ghoe ne ghathoza te mala fofoli noa kokofakasa God ie ka nanugra neuwa! 21Ghoe theome tangomana te loku balumi gheati ka noa gloku God gne, eigna gnagnafamu ghoe ie theome kohlo ka nathagna God. 22Eume, kulu ho'i gnagnafauwa ghoe! Ni koko puhi di'a te eira ghoe re. Euwateuwe tarai ka Lod mala atha koko magne gaoghatho te di'a te au ka ghoe re. 23Rei kofu falaseza gnagnafamu ghoe ie fodu lui ka u gogotu gignoa igne ie, ni puhi te di'a ie la funei frunigho hui ghoe.”
24Agnoni, Saemon ne lepo eu'ani ka mae Pita ni mae Jon, “Phalumae, rei ngagughaughamu ghopa te taraighau rei ka Lod, mala theome dufighau puhi te di'a te lepora ghopa are!”
25Euwateuwe Pita ni mae Jon re thuturi ra ka nanonire puhi teke eira Jisas te kofira hatimare re. Agnoni ke leghugna te thuturiza phalumare goeghozegna Lod ie, phalumare neke haghe Jerusalem. Ka pulodi ie, phalumare ne liu Samaria ni thuturiza Grorogo te Keli ie ka nanoni fate'odi nau te dufu phalumare tadi re.
Filip fagriuza kahe maegna Itiopia
26Kahe fata, noa engjel Lod ie ne lepo eu'ani ka mae Filip, “Khegra haghe ni tei leghuza nabrau ke longa te mei funugna Jerusalem te dufu Gaza.” Gignoa igne nabrau teugne gheati la theome leghuza hui.#8:26 (Nagliu teugne ka glamagna nau nagou tei.) 27Agnoni mae Filip khegra haghe ne tei leghuza nabrau teugne. Ka nabrau ie mae Filip ne kofiza kahe mae funeigna Itiopia. Mae funei teugne kahe mae mala koukofu nanugra hariza Kadesi, nakrupe bi'o gna Itiopia. Magne neke tei tarai Jerusalem, 28euwateuwe ke pulo ka naugna ie, me hokro ka noa chariot ie ijuijuza me au noa buka mae profet Aesaea ie euwa. 29U Tharunga te Blahi ie ne lepo eu'ani ka mae Filip, “Ghoe tei kehreagna chariot ae.”
30Agnoni mae Filip chari ne tei kehreagna chariot ie, euwateuwe magne ne rogiza mae funei ie ijuiju te au ka noa buka mae profet Aesaea ie. Mae Filip ne ghuhna eu'ani ka magne, “Ihna, ghoe lasera aunauwa gaoghathodi hna te ijuijura ghoe area?”
31Mae funei gne ne lepo eu'ani, “Tufuni the'o lui. Fahneuwa me laseza rei te the'o kahe mae te mala ruarutha harighau ie euwa?” Eume magne ne toreza Filip mala habra haghe ka chariot ie mala hokro kehreagna.
32Igne u grua Goeghoze Blahi teke ijuijuza mae funei ie,
“Magne jateula kahe sipsip te atha te tei hatimare te mala faleleme ia euwa,
ni jateula suagna sipsip te theome tahngi kate kukuchi hatimare naklagna ie,
eigna magne ne theome ke lepoza kahe goeghoze.
33Hatimare famamazaza ni fakhokoanaza lui magne.
The'o kahe nanoni te tangomana thuturi neigna vikegna magne ie,
eigna magne the'o thugna ka teke falemeza hatimare ie.”#8:33 Aesaea 53:7,8.
34Mae funei ie ne toreza mae Filip, “Ruarutha mei fakeli ba ghoe ka rei hna te lepoza mae profet gne. Magne euza thaigna ba euza kahe mae au nauwa?” 35Agnoni mae Filip ne thuturiza Grorogo te Keli gna Jisas ie fufunu ka grua goeghoze te au ka Buka Blahi igne.
36Kate leghu nabrau soru te soru phalumare ie, phalumare ne posa dufu ka kahe hnimoto te au kho'u. Agnoni mae funei ie ne lepo eu'ani, “Fakofu sonighoe! Igno kho'u ie! Hna te lothighau rei te theome tangomana siublahi rei ie?” 37#8:37 Ka keha Buka Blahi tiatifa re hatimare na'afaruma nabrau goeghoze igne ves 37 Filip ne lepo eu'ani ka magne, “Jame me fatutu'ani ghoe ka gnagnafamu fateote'o ie, ghoe tangomana au lana.” Mae funei ie ne lepo eu'ani, “Rei fatutu'ani, Jisas Kraes gne tufuni Thugna God!”
38Mae funei ie ne lepoza noa mae gloku ie ne fanotoza u chariot gne. Filip ni mae funei gne ne kafua soru ka glama kho'u ie, eume mae Filip ne fasiublahiza magne. 39Kate ghae fajifla phalumare ka kho'u ie, Tharunga te Blahi gne ne atha famaghaniza mae Filip ka hnimoto teuwae. Agnoni mae funei ie neke theome kofiza mae Filip, ni magne hneahnegha neke pulo ka nau Itiopia. 40Agnoni mae Filip megona ne dufu ka kahe nau te kiloza Azotas. Magne ne tei fate'o ra nau te hui ka hnimoto teugne ni thuturiza u Grorogo te Keli ie, ne ghile tei dufu ka nau bi'o Sisaria.
© 2025 SIL Solomon Islands