Mae khuru 10
10
Mae Pita ni Konilias
1Kahe maegna Rom au Sisaria, nahngagna ie mae Konilias. Magne kahe mae funei ka thotoghei te kiloza “Thotoghei gna Itali.” Konilias gne batuza kahe gobi soldiagna Rom. 2Magne kahe mae keli lui, euwateuwe magne ni thabutuagna ie ghatho boheza ni tufru soruza eu God. Magne toghora lui nanoni Jiu te kuma re ni magne tarai koba ka God. 3Kahe naga'e jame tahngi tholuni phile grafigno, mae Konilias ne tufuni kofu nathagna kahe engjel noa God ka mifi ie. Engjel gne mei ne lepo eu'ani ka magne, “Konilias!”
4Konilias ne hmau noa lui ne kofututu ka engjel ie ne lepo eu'ani, “Ihna, mae funei?”
Engjel ie ne lepo eu'ani ka magne, “God la rogira hui nou tharai ghoe re, ni eulanauwa kofira hui hna te eira ghoe te mala toghora nanoni te kuma re. 5Gignoa igne ghoe na kuri ra keha mae mala tei Jopa udi meiza mae Saemon, keha nahngagna ie, Pita. 6Magne au Jopa ka sugagna mae Saemon, mae te mala fagaga'e ni e'ei goifata ka gulidi buluka te leme re. Ni Sugagna magne ie au ka geri kholo.”
7Ke leghugna te jifla te tei engjel ie, Konilias ne kilora phalumae ka noa mae gloku re ni kahe noa mae soldia, mae soldia teugne mae keli lui ni ghatho boheza eu God. 8Konilias ne lepora puhi ire ka tholumare, euwateuwe kuri ra na me tei Jopa mala udiza mae Pita.
9Ka aublathagna keha naga'e kate mei thata tholumare ka gruru Jopa ie, mae Pita ne haghe klia ka phogru suga ie mala tarai. 10Kate au te au ka teuwae ie Pita ne rofo. Euwateuwe kate kaikaliti te au hatimare gea gano magne re, magne ne thurumakofui. 11Magne ne kofiza u manga ie ne thora, agnoni magne ne kofiza kahe goifata ne soru mei funu klia. Kokofugna ie jateula kahe pohe bi'o te louloku fati nanoni ka fati khukrugna re te fahruhru sorura euwa. 12Ke hnuagna pohe bi'o teugne, au soasopa nafnata goifata tautagu te au fati nenedi, ni nafnata goughoru fate'o, ni nafnata pholi fate'o, ni nafnata memeha fate'o, te au ka nauthoglu gne. 13Agnoni Pita ne rogiza kahe naogla ne lepo eu'ani, “Pita, kegra haghe faleleme goifata are mala ngamu.”
14Ni mae Pita ne lepo eu'ani, “The'o, Lod! Rei theome tangomana te ngamu goifata te thona ka nathamu ni theome naba mala ngamu teure.”
15Ni naogla ie neke lepo eu'ani fapulo ka mae Pita, “Goifata te ga'e teu God re, tovi lepoza ne thona teuwe.”
16Tholu fata goifata teugne teke takle ka magne ie, agnoni ke leghugna igne, u pohe bi'o teugne ne pulo haghe klia ka manga ie.
17Kate hiroza te au mae Pita u gaoghathogna thurumakofui teugne, tholumae teke khukhuru mae Konilias re mei ne dufu ka suga mae Saemon ie. Tholumare mei kegra ne au ke kosi ka nathangagna u bara ie. 18Tholumare mei ne ghuhna eu'ani, “Saemon Pita ie au ani?”
19Kate ghaoghathogna thurumakofui teugne te au mae Pita ie, u Tharunga te Blahi ie ne lepo eu'ani ka magne, “Pita, tholumae mei hirogho ghoe au. 20Faghose soru pari, tovi hmau te tei baludi tholumare re, eigna rei au lana teke kuri mei ra tholumae teure ka ghoe ie.”
21Agnoni mae Pita ghose ne soru ne lepo eu'ani ka tholumare, “Rei gne lana mae te mei hiroza ghotolu ie. Hna te ngagughamu ghotolu ie?”
22Tholumare ne lepo eu'ani ka magne, “Mae Konilias, kahe mae ka mae bi'odi amire te kuri meighami ghetolu gne. Magne kahe mae keli lui ni tarai koba ka God. Euwateuwe mae Jiure ghatho boheza lui magne. U noa engjel God ie, neke lepo hariza magne mala mei gheati lepogho ghoe ari ka sugagna magne, mala rogi noara hna te lepora ghoe re.” 23Agnoni Pita ne tore ra tholumare mala au balugna ka sugagna mae Saemon ka bongi teugne.
Ka keha naga'e ie, mae Pita ne tarabana ne tei baludi tholumare, ni keha nanoni khilo'audi Jopa re eulanauwa ne tei baludi hatimare. 24Hatimare ne dufu Sisaria ka keha naga'e ie. Euwateuwe mae Konilias ni vikegna ni kheragna teure ne kafua tukiza ne au meigna mae Pita ka sugagna ie. 25Ka dufu meigna mae Pita ie, mae Konilias tei ne fadeidei ka magne ne turununu soru ke ulugna magne. 26Ni mae Pita ne lepo eu'ani ka magne, “Tovi eiza igne. Kegra haghe, eigna rei gne nanoni lana jateula ghoe euwa.”
27Agnoni, Pita ne vevese ne ruma balugna Konilias hnua suga ne kofira nanoni chuku te kafua krapu te au ka teuwae re. 28Pita ne lepo eu'ani, “Uve, kheragura, ghotolu laseza hui, tufuni blahi lui ka nomi vetula gheati mae Jiure te sighoza ba te fafaudu ka ihei te theome Jiure. Ni God neke falalaseghau rei mala tovi lepoza rei ka ihei, te ghoe thona ka nathagna God ba ghoe theome thokamu te mala fafaudu ka God teuwe. 29Eume kate kuri ari ra ghoe keha mae te mala udi meighau rei ani ie, rei theome huhughuza goeghozemu ghoe ie. Ni gignoa igne ie rei ngagughaugho ghoe te mala lepora hna te ngagugho re.”
30Konilias ne lepo eu'ani, “Uve, gignoa igne la dufiza hui fatolu#10:30 Mae Jiure a'ahedi hatimare naga'e re sapla au ka tati. Hatimare funu a'ahe “Kaheni” ba “Naga'e ulu lahu” eu ka naga'e te dufu meigna puhi teugne. Eume, jame takle engjel ie ka naga'e Made ka mae Konilias ie, ka Soside au jame te dufu meigna puhi igne. Leghuza nodi a'ahe mae Jiure kaina fafati naga'e euza, ni ka puhi a'ahe tati ie tati lepoza fatolu naga'e eu au lana, eigna tati ne funu a'ahe koba ka fapalu naga'e ie. Eigna teuwae ka keha Baebol re hatimare lepoza ka fati naga'e. naga'e ke leghugna teke tarai rei ka sugagu ie, tahngi tholuni phile grafigno jateula gignoa igne euwa, kahe mae te phoko siasigla megona ne takle ke ulugu rei, 31ne lepo eu'ani, ‘Konilias, God gne la rogira hui nou tharai ghoe re ni la kofira hui hna teke eira ghoe te mala toghora nanoni te kuma re. 32Gignoa igne ghoe na kuri ra keha mae mala tei Jopa mala udi meiza kahe mae te kiloza Saemon, keha nahngagna ie, Pita. Magne au ka sugagna mae Saemon, noa gloku ie te mala fagaga'e ni e'ei goifata ka guli buluka te leme re, ni sugagna ie au ka geri kholo.’ 33Eume rei ghoseni ne kuri ari ra keha mae ka ghoe, me tufuni keli lui tela mei ghoe ani ie. Fakofu ba ghoe, gignoa igne gheati te huigne kafua tuku au lana ani ka nathagna God, ngagughami lui te rogiza hna teke lepoza God ka ghoe te mala thuturi harighami gheati ie!”
Noa goeghoze mae Pita
34Agnoni, Pita ne funu lepo eu'ani, “Tutu'ani lui kheragura, gignoa igne ie rei tufuni laseza te God gne theome tangomana te kekepileza ihei ie, eigna nanoni te hui re kafua nanaba lana ka nathagna God ie. 35Ni God keli tagna lui ka ihei nanoni te ghatho boheza ni eiza hna te kohlo ie, neubane hna vike ba khokolo te mei magne ie. 36Ghotolu laseza hui God neke lepo fatakleza ka nanonidi Israel re u Grorogo te Keli ie mala au tati ka u keliphari balugna magne, ka noa gloku Jisas Kraes, mae ihei te funei frunira nanoni te hui re. 37Ghotolu lasera hui chuku puhi te keli Judia re neke fufunu ka naga'e teke ghaghazala mae Jon Siublahi ka nanonire gna siublahi ke hnuagna provens Galili. 38Euwateuwe ghotolu laseza hui lanauwa u thuturigna Jisas gna Naesaret ie. Tutu'ani, God Mada neke kuriza Tharunga te Blahi ie mala toghoza ni gulao hariza magne u noilaghi te bi'o. Ghotolu eulanauwa laseza Jisas gne neke tei fate'o hia te hia Israel eira koba puhi te keli re, ni fakekeli ra nanoni te hui te au ke parigna noa noilaghi mae Satan, eigna God au balugna magne.
39“Gheati mae khurure neke kofu nathami gobigna goifata teke eira magne Jerusalem ni ka keha nau lanauwa ani Israel. Ni gheati eulanauwa neke kofiza teke tupijuruza hatimare magne ka u gazu fafata ie. 40Ni ka fatolu naga'e ie God ne fakegra fapuloza magne ka u gleme. Euwateuwe ke leghu, magne neke takle ka gheati. 41Magne neke theome takle ka nanoni te hui re ni takle lana ka ihei God teke kulu fafatera mala kofiza magne tekeure. Eume gheati neke ngamu ni ko'u eu balugna magne ke leghugna te kegra fapulo magne ie. 42Euwateuwe magne ne lepo faheta ka gheati, mala ghaghazalaza gheati u Grorogo te Keli gne ka nanoni te hui re, ni lepoza lanauwa ka nanonire te magne lana teke fafate God te mala fate ra nanoni te kahra nate au, ba nanoni te leme re. 43Hatimare mae profet te hui re neke thuturiza lanauwa magne, ne lepo eu'ani, ‘Ihei te fatutu'aniza Jisas ie, God kaina ie na atha kokora nakhibodi re ka nahngagna magne.’ ”
Nanoni te theome Jiure ne athiza Tharunga te Blahi ie
44Kate thuturi te au Pita ie, u Tharunga te Blahi ie ne soru ke kliadi nanoni te farogo ka noa goeghoze magne re. 45Mae Jiu te fatutu'aniza Jisas teke mei balugna Pita re ne vere nodi lui, eigna God ne gulao Tharunga te Blahi ie ka nanoni te theome Jiure. 46Mae Jiu teure ne rogira te ghoeghoze hatimare ka keha nafnata goeghozeni, ni lepo fakeliza teu God ie.
Pita ne lepo eu'ani ka mae teke mei balugna re, 47“Tharunga te Blahi gne la soru mei ka hatimare, jateula teke soru mei lanauwa ka tati ia euwa. Ba, ihei te tangomana lothira nanoni ire te mala theome siublahi ie?” 48Eume Pita ne lepora mae teke mei balugna re mala fasiublahi ra, Konilias ni nanoni fate'o teke krapu te au balugna magne re ka nahngagna Jisas Kraes. Agnoni nanonire ne toreza Pita mala ke auwa baludi keha naga'e.
© 2025 SIL Solomon Islands