Mae khuru 7
7
Noa goeghoze mae Stivin
1Agnoni, mae nului pirisi ie ne ghuhna eu'ani ka mae Stivin, “Ba naghe, tutu'ani nauwa goeghoze irea?”
2Stivin ne lepo eu'ani, “Mae magura ni tabusignagura, farogo mei ka rei. Kate augna teke au mae ku'eda Ebraham Mesapotamia tifa ie, ame tei na magne Haran teu ia, noda God te au klia ie mei ne takle ka magne. 3Ne lepo eu'ani, ‘Jifla kokoza nou nau ni kheramu teure ni tei ka nau nate falalase harigho rei ie.’#7:3 Fufunu 12:1.
4“Agnoni, mae Ebraham ne jifla kokoza kaontri Kaldia ne tei au Haran. Ke leghugna glemegna mae magna ie, God neke kuri meiza magne ka nau te au tati gignoa igne. 5Ka naga'e teugne God theome ke gulao kahe hnimoto glose ka mae Ebraham, tufuni the'o lana, the'o kahe hnimotogna glose teke gulao God ka magne ie. Ni neubane the'o thugna mae Ebraham, God neke na'alepo ka magne te nanoni nate kahra mei ka vikegna magne ie nate khotogna nau igne kaina ie. 6Igne hna teke lepoza God ka mae Ebraham ie, ‘Ihei te kahra mei ka vikemu ghoe ie kaina ie na tei au ka nau te theome khotodi thaidire. Hatimare kaina ie seka, ni nanonigna nau teugne kaina ie na fagloku bi'o ra lui, ni na e'ei chuku puhi te di'a harira koba, thokagna fati gobi finogha. 7Ni rei kaina ie na fapaapara ra nanonigna nau te fagloku bi'o ra lui vikemu ghoe re. Eume ke leghugna teugne, vikemu ghoe re kaina jifla ka kaontri teugne mei tufru soru harighau rei ka nau igne.’#7:7 Fufunu 15:13,14. 8Ke leghugna igne, God ne lepoza mae Ebraham mala tohifalalase sua ma'ane re. Igne kahe falalasegna noa na'alepo God, te tati noa nanoni magne. Eigna igne, mae Ebraham ne tohifalalaseza mae thugna ie Aesak,#7:8 Mae Jiure kakahedi hatimare naga'e re sapla au ka tati. Hatimare funu ka kahe “Kaheni” ba “Naga'e ulu lahu” eu ka naga'e te dufu meigna puhi teugne. Eume, jame kahra sua ie ka naga'e Fraide meuwe, ka keha Fraide ae hatimare kaina lepoza te sua ie fehu naga'e gna, ni leghuza puhi ka kahe te eiza koba tati ie, tati kaina fitu naga'e gna euwa, eigna tati funu ka kahe koba ka fapalu naga'e ie. Eigna teuwae ka keha Baebol re hatimare lepoza te sua ie ne tohifalalase ka fafehu naga'e ie, ka tati ie teuwe igne fafitu naga'e euza me au lana euwa me tati lepoza kahe wiki. kate kahe wiki ke leghu kahra meigna ie. Eulanauwa mae Aesak neke tohifalalaseza mae thugna ie Jekop. Ni mae Jekop ne tohifalalasera lanauwa salei phalumae thugnare, te mae ku'eda tati ra.
9“Ni thugna mae Jekop re neke gogotuza mae Josep, kahe mae ka thaidi hatimare salei phalumae tabusignare, te mae ku'eda tati re. Eume hatimare neke sakre laoza Josep ka keha nanonidi maghani mala fofoli hatimare ni udi teiza Ijip. Ni God neke au balugna Josep, 10ne fakahriza ka puhi bi'o te hui teke dufiza magne re. God eulanauwa neke gulao hariza glalase te keli, malani tangomana mae nafanogna Ijip te ngaguza magne. Eume, mae nafanogna Ijip ie ne fafateza Josep mala mae gavanagna Ijip, ni mala koikofira lanauwa nanoni te hui te au ka glamagna noa suga bi'o ie.
11“Agnoni kahe behu bi'o lui ne dufira nau te hui Ijip ni Kenan teure. Eigna teuwae, nanonire ne tufuni paapara lui ka the'ogna gano ie, ni eulanauwa mae ku'eda tati re ne paapara lanauwa. 12-13Kate rogiza mae Jekop te au gano te'au Ijip ie, magne ne kuri ra mae ku'eda tati re mala tei atha gano ka teuwae. Ka fapalu fata thei hatimare ie, mae Josep ne fatakleza thaigna te magne tufuni mae tabusignadi hatimare teuwe. Eulanauwa mae nafanogna Ijip ie mei ne rogiza ni laseza eu lanau thabutuagna mae Josep gne. 14Agnoni mae Josep ne kuri ra keha mae mala tei lepoza mae magna ie Jekop, ni vikegna te hui re, fitu salei glima nanoni kaputudire mala soru au Ijip. 15Eume, Jekop soru ne au Ijip. Ni kate leme magne ni mae thugnare ka teuwae, 16hatimare atha ne pulo hnubradire mala ke tei giugilu Sekem ka gluma teke fofoli Ebraham ka vikegna mae Hemo re.
17“Ka thatai dufu meigna tufuni naga'e teke na'alepo God ka mae Ebraham ie, nanonidi Israel te au Ijip re fua chuku lui. 18Agnoni kahe mae nafano valu te funei fruniza Ijip gignoa igne ie theome laseza lana mae Josep gne.#7:18 Eksodas 1:8. 19Magne fua choghara ni fakhokonoana ra lui eu mae ku'eda tati re, ni huhuru ra mala na'a fajiflara hatimare thudi te kahra valu are ke kosi sugadi re mala leme.
20“Ka miolo teugne au, kahra meigna mae Moses gne. Magne kahe sua ma'ane te fua khuakuda lui kokofugna ie ka God. Hatimare ne koikofiza magne thokagna tholu hnigra ka glama suga. 21Agnoni kate eiza hatimare hna te lepoza mae nafano ie, te athi fajiflaza hatimare Moses ka suga gna ie, thugna ga'ase mae nafano gne mei kofudeiza ne athiza, ni taegoza jateula tufuni thugna thaigna neuwa. 22Euwateuwe maedi Ijip re ne fagriuza Moses goifata te hui te lasera hatimare re. Magne bi'o haghe ne kahe mae noilaghi lui ka goeghozegna ni ka noa gloku teure.
23“Kate dufiza phalututu finoghagna ie, Moses ne ngaguza tei sighora kheragna re, nanonidi Israel te au Ijip re. 24Ka tei sigho teugne, magne ne kofiza kahe maegna Ijip te anu fadi'aza te au kahe maegna Israel ie. Agnoni Moses ne kegra fotiza maegna Israel ie ne magri falemeza maegna Ijip ie. 25Gaoghathogna mae Moses gne jau na kofu falaseza au mae kheragna re te God ne fafateza magne, mala atha fajiflara hatimare kate seka Ijip teuwe, ni hatimare ne theome kofu falaseza lana. 26Ka keha naga'e ie, Moses neke kofira phalu maedi Israel re magra ne'au. Agnoni magne ne fariuriu fanoto ra phalumare, ne lepo eu'ani, ‘Ei, phalumae! Farogo ba ghopalu! Ghopa tabusigna lana, magra gna hna ie ghopa gnea?’
27“Ni mae te ngaguza falemeza keha mae gne ne huju famaghaniza Moses, ne lepo eu'ani, ‘Ba naghe! Mae ihei teke fafategho ghoe te mala funei frunighami ni fateghami teu gheati ie? 28Ba! Ghoe ngagugho te falemeghau rei jateula teke falemeza ghoe maegna Ijip gnora ia fugnea?’#7:28 Eksodas 2:14. 29Kate rogiza mae Moses igne, magne pelo ne jifla Ijip, ne tei au ka kaontri te kiloza Midian. Agnoni, magne ne toilaghi ka teuwae ne au phalu thugna ma'ane.
30“Ke leghugna phalututu finogha te jifla magne Ijip ie, kahe engjel noa God ne takle ka Moses ka glama kha'aghi te hleuhlepu ka kahe gazu ichoni ka hnimoto te gou kehreagna Gukhu Saenae. 31Kate kofiza igne, Moses ne vere noa lui ne tei fathata kehreagna kha'aghi ie mala kofu fakeli noaza. Ni magne ne rogiza goeghozegna Lod gne. 32God ne lepo eu'ani, ‘Rei nodi God mae ku'emi ghotolura, noa God mae Ebraham, mae Aesak, ni mae Jekop.’#7:32 Eksodas 3:6. Moses ne tetekri noa lui balu hmau ne tho'anoa kofu lao ka kha'aghi ie.
33“Ni Lod ne lepo eu'ani ka Moses, ‘Atha koko sadolo ka nenemu are, eigna glose te kegra te au ghoe igne tufuni blahi lui. 34Farogo ka rei. Rei la kofira hui nogu nanoni te au paapara te'au igno Ijip re. Rei rogira hui nodi natahngire, eigna teuwae rei soru mala fakahrira. Eume, gignoa igne ghoe kaikaliti mala ke kuri fapulogho rei Ijip.’#7:34 Eksodas 3:5,7,8,10.
35“Mae Moses gne, nanonidi Israel re neke tho'anodiza tifa ie, ne lepo eu'ani tagna, ‘Mae ihei teke fafategho ghoe te mala funei frunighami ni fateghami teu gheati ie?’ Neubanauwa, Moses gne au lana God teke kuri teiza mala funei frunira ni fakahri ra teu hatimare re. Mae Moses tangomana te eiza gloku igne ka noa tootogho engjel teke kofiza magne ka gazu ichoni teke ngamu kha'aghi ia. 36Agnoni, mae Moses ne batu fajiflara nanonire Ijip. Magne eira kofunaboboi ni falalase eu ka teuwae, ni eulanauwa ka Kholo Chichi'a ie, ni ka nau nagou ie phalututu finogha.
37“Moses gne neke lepo eu'ani lanauwa ka nanonidi Israel re, ‘God kaina ie na fakegra harighamu ghotolu kahe mae profet jateula rei eu ka nomi nanoni thaimi re.’#7:37 Diutronomi 18:15. 38Moses gne neke au baludi nanonidi Israel re ka nau nagou ie. Magne neke thuturi harira mae ku'eda re hna teke lepora u engjel ka magne ka Gukhu Saenae ia. Magne neke rogiza goeghoze te au kahra tagna te mei funugna ka God, euwateuwe ke gumei na u goeghoze teure ka tati.
39“Ni mae ku'eda tati re neke tho'anodi leghuza Moses. Hatimare ne fua huhughuza lui magne ni hatimare ngagura teke puloni lana Ijip. 40Agnoni hatimare ne lepo eu'ani ka mae Eron, ‘Gheati ngagughamigho ghoe te e'ei harighami keha nomi mumuzu, mala tangomana te batughami ie. Eigna mae te kiloza Moses teuza ia, mae teke batu fajiflaghita tati Ijip ia, gheati la theome lase nomiza hna te dufiza magne ie.’#7:40 Eksodas 32:1. 41Agnoni hatimare ne e'ei kahe mumuzu jateula buluka neuwa. Euwateuwe hatimare ne faafara ka mumuzu buluka teugne ne kelitadiza hna teke e'ei thaidi ie. 42Ni God ne figri pogru ra hatimare ne sakrera hatimare ne tufru sorura nathunudi klia, jateula te i'iniza ka nodi buka mae profetre ia euwa. God neke lepo eu'ani,
“ ‘Ghotolu nanonimi Israel ra!
Theome ka rei ghotolu teke faleleme sipsip
ni e'ei faafara tekeu ghotolu phalututu finogha ka nau nagou ie ia.
43Ni ghotolu neke faafara lao ka phalu god te kilora Molek ni Refan,
ni ghotolu pala balumi neke tei noa suga thapuale Molek,
ni thotoghale gna god nathunu Refan.
Eigna teugne, rei kaina ie na kurughamu tei fatifa, ke liuzani Babilon.’#7:43 Emos 5:25-27.
44“Hatimare eira lana nafnata puhi te di'a teure, neubane pala ne tei baludi noa suga thapuale God, falalasegna te God au baludi teuwe. Suga thapuale teugne, hatimare tufuni e'ei leghuza lana thotoghale teke lepoza God ka mae Moses ie. 45Ke leghugna teugne, mae Josua teke batura mae ku'edara teke tei magri athiza noda glose Israel gne, ka keha vike teke kulu au ka teuwae re. God ne toghora hatimare ne brue famaghanira nanoni bongihehe teuware malani ke ruma haghe vikeda tati re. Ka teidi ka nau valu gne, hatimare atha baludi suga thapuale teke atha ka mae madire, euwateuwe kakaliti me au me ghile dufiza naga'e gna mae Nafano Devet. 46God ne tufuni hneghaza mae Nafano Devet. Agnoni mae Devet ne toreza God mala sakreza e'ei kahe suga mala augna nodi God vikegna Jekop re. 47Ni God neke theome sakreza magne mala e'ei suga teugne. Ni thugna magne, mae Nafano Solomon na teke e'ei noa suga God ie.
48“Ni God te au klia ie theome au ka suga te e'ei nanoni, jateula teke lepo eu'ani kahe mae profet ia,
49“ ‘Nogu sape nafano rei ie au klia,
euwateuwe u nauthoglu gne te mala tapladi rei phalu nenegure.
Eume, hna nafnata suga te tangomana e'ei ghotolu malagu rei ie?
Ahia nate eiza ghotolu u hnimoto te mala gnafagu rei ie?
50Eigna rei thaigu au lana teke e'eidi gobigna goifata te hui klia ka manga ie
ni ka nauthoglu pari igne!’#7:50 Aesaea 66:1,2. ”
51Agnoni mae Stivin ne lepo eu'ani, “Ghotolu mae baubatu ire pha'umire tufuni phaupatu lui. Euwateuwe gnagnafamire jateula nanoni bongihehera euwa, eigna ghotolu tho'anomi lui te farogo ka goeghozegna God ie. Leuleghu fata ie ghotolu huhughuza lui Tharunga te Blahi gne jateula mae ku'emi tifa ra euwa. 52Ku'emi ghotolure neke fapaapara ra lui mae profet te hui tifa re. Mae profetre neke kulu lepo takleza meigna noa Mae Gloku God te Kohlo Lui ie, euwateuwe mae ku'emi ghotolure lana teke faleme ra mae profetre. Ni gignoa igne ghotolu teke majoraza ni falemeza teu noa Mae Gloku God te Kohlo Lui ie. 53Ghotolu au teke atha noa vetula God, teke gumei engjelra. Ni neubanauwa ghotolu theome leghura lana euwa!”
Hatimare ne falemeza mae Stivin
54Kate rogira mae bi'odi mae Jiure goeghozegna mae Stivin ire, hatimare ne di'a tadi ne tufuni ngingiri ra lui ka magne. 55Ni Tharunga te Blahi ie au balugna mae Stivin, magne ne kofu haghe klia ne kofiza u siasigla gna noa noilaghi bi'o God ie. Magne ne kofiza Jisas kegra ka phile matugna God. 56Agnoni mae Stivin ne lepo eu'ani, “Fakofu! Rei la kofiza nathangagna klia ie la thora. Ni eulanauwa rei kofiza mae te mei funugna ka God ie kegra ne au ka phile matugna God!”
57Kate rogiza igne, mae bi'odi mae Jiure ne fofoto khulidire ni kafua aku fabi'o chari ne tei ka mae Stivin. 58Hatimare ne atha fajiflaza magne ke kosigna nau bi'o gne ne khale thinaza ne ghile leme magne. Mae teke lepo muamugnaza mae Stivin re ne na'a soru nodi pohe u'uru re ka khamegna kahe mae hnaghevalu, nahngagna ie mae Sol mala koukofu magne.
59Kate khale thinaza hatimare ie, mae Stivin ne tarai eu'ani, “Lod Jisas, atha tharungagu gne!” 60Agnoni, magne ne turununu soru ne aku fabi'o eu'ani, “Lod, tovi ke hoho'i fapulo ra u nakhibodi re!” Ke leghugna te lepoza igne, mae Stivin ne leme.
© 2025 SIL Solomon Islands