Mae khuru 6
6
Hatimare ne fafatera fitu mae mala tootogho ka khilo'au
1Ka naga'e teure, chuku chuku nanoni ne fatutu'aniza Jisas. Ni nanoni khilo'au te lase lepo Griki re, ne theome hneghaza nafnata tufa nanugra te eiza nanoni khilo'au te lepo Hibru re, ne lepo eu'ani, “Goro ga'ase te leme khetodi ka gheati ire the'o tufadi lana ka gano ba nanugra te tufa ghotolu leuleghu naga'e re, puhi igne theome kohlo.” 2Agnoni, saleiphalu mae khurure ne kafua kilofaudu ra thotoghei mae khilo'au re ne lepo eu'ani, “Theome keli jame te hui gheati ka nomi gloku te mala fagriuza goeghozegna God gne te mala koukofu nanugra lana ie. 3Eume te keli ie kheragu ra, ghotolu fafatera fitu mae ka thaimi malagna gloku igne. Ka mae ihei te keli, au glalase te keli ni Tharunga te Blahi ie au baludi. 4Malani gheati ghoe tarai ni fagriuza eu lana goeghozegna God ie.”
5Nanoni te hui re ne kelitadiza u gaoghatho igne. Eume, hatimare ne fafatera fitu mae ire: mae Stivin (kahe mae te fua hneta noa fatutu'ani ie, ni Tharunga te Blahi ie au balugna koba), mae Filip, Prokoras, Nikano, Timon, Pamenas, ni mae Nikolas. Nikolas gne kahe mae gna Antiok. Tifa ie magne neke theome mae Jiu, ni gignoa igne ie magne kela leghura lana nodi fatutu'ani ni nakahradi teu mae Jiure. 6Agnoni, hatimare ne fakegra ra fitu mae teure ke uludi mae khurure, hatimare ne ngafa lao khamedire ka pha'udire ne tarai ni fablahi ra.
7Goeghozegna God ie tei dufu hia te hia ka nanonire. Ni thotoghei nanoni khilo'au te au Jerusalem ka naga'e teuware chuku ke chukuni neuwa, euwateuwe chuku mae pirisi ka mae Jiure eulanauwa te funu fatutu'aniza Jisas.
Hatimare saguza mae Stivin
8God ne fablahiza mae Stivin ni gulao hariza noilaghi bi'o mala eira kofunaboboi, ni falalase teu ka nanonire. 9Ni keha mae Jiudi keha gruru te theome fatutu'aniza Jisas re ne funu tho'anodiza magne. Hatimare au ka nodi suga tharai mae Jiu te kiloza “Suga tharai nodi mae seka te kela sagla.” Suga tharai igne maladi mae Jiu te mei funudi ka gruru Saerin ni Aleksadria, ni ka provens Silisia ni Esia. Hatimare mei ne farifapolai ka mae Stivin, 10ni Tharunga te Blahi ie ne toghoza Stivin mala vevese balu glalase te bi'o. Ni mae Jiure theome tangomana te lepo fapariza magne, eigna noa goeghoze magne re tufuni noilaghi lui.
11Agnoni, hatimare folira keha mae mala mei thuturi phiapita neigna mae Stivin, “Gheati rogiza ma'igne ne lepo fapariza mae Moses ni lepo fapariza lanauwa God!”
12Ka puhi igne, keha nanoni, baludi mae baubatudi Jiu, ni hatimare mae velepuhigna vetula noa mae Moses re, ne tufuni di'a tadi lui ka mae Stivin. Hatimare tei ne saguza magne, ni udiza ne tei ka mae mala fatere mala fateza magne. 13Euwateuwe, hatimare udi mei ra lanauwa keha mae mala phiapita neigna mae Stivin ie. Hatimare ne lepo eu'ani, “Ma'igne lepo fapariza koba noda Suga Blahi tati ie ni lepo fapariza lanauwa noda vetula tati re. 14Ni gheati rogiza lanauwa magne neke lepo eu'ani, ‘Jisas gna Naesaret gne kaina ie na re'o soru Suga Blahi igne, euwateuwe magne kaina ie na hoho'i noda kastom tati teke gumei harighita mae Moses tifa ra.’ ”
15Mae funei fate'odi Israel te hokro ka u faudu teugne ne kofututuza mae Stivin. Agnoni hatimare ne kofiza nathagna ni naflogna teu magne re ne jateula koukofugna kahe engjel neuwa.
© 2025 SIL Solomon Islands