Mae khuru 5
5
Mae Ananaeas ni Safira
1Agnoni, kahe mae ne au lanauwa nahngagna ie Ananaeas, euwateuwe nahngagna khetogna magne ie Safira. Repa ne saisabiri nodi hnimoto glose ie. 2Ni repa ne kahe gaoghatho mala phita ra mae khurure ni nana'a fapulo keha philegna nanugra ie maladi thaidi. Eume, mae Ananaeas ne gulao lana keha philegna nanugra ie ka hatimare.
3Ka teuwae, mae Pita ne ghuhna eu'ani ka magne, “Ba naghe, Ananaeas! Ne fahneuwa ghoe te sakreza mae Satan te batu fadi'aza gnagnafamu ie te mugnaza Tharunga te Blahi ie ni nana'a fapulo keha philegna nanugra teke atha ghoe ka hnimoto glose ie teugnea? 4Tutu'ani, ame saisabiri na ghoe nou glose ie teuwe, u hnimoto glose igne neke kulu nou au lana ghoe. Euwateuwe neubane saisabiri fahui ghoe hnimoto glose teugne, nanugradire ke athani me'au lana ghoe thaimu euwa. Ne fahneuwa te ghathoza ghoe nafnata puhi te di'a teugnea? Ghoe theome phitaza nanoni ie, ni ghoe phitaza God na euwa!”
5Kate rogiza igne, mae Ananaeas ne uthu soru ne leme. Agnoni, nanoni te hui te rogiza puhi igne ne hmau nodi lui. 6Agnoni, keha mae hnaghevalu re mei ne atha thonogna Ananaeas ie pala ne tei giugiluza.
7Tholu aowa ke leghugna igne, Safira neke ruma mei ka suga ie. Ni gne'e theome laseza hna teke dufiza khetogna ie. 8Pita ne lepo eu'ani ka gne'e, “Lepo meiza ba ghoe ka rei, igne lana u nanugra teke atha ghopa mae Ananaeas ka hnimoto glose teke saisabiri ghopa ie?”
Safira ne lepo eu'ani ka magne, “Uve, teuwae lana.”
9Pita ne lepo eu'ani ka gne'e, “Ne fahneuwa ghopa te ghatho dei nomiza puhi te mala fariuriu phiapitaza noa Tharunga te Blahi Lod gnea? Fakofu sonighoe! Mae hnaghevalu teke tei giugiluza khetomu ghoe re kela pulo mei tela kegra te'au ka nathanga ie are. Hatimare kaina ie ke pala fajiflagho la ghoe!”
10Euwateuwe, Safira eulanauwa ne uthu soru ne leme. Agnoni, mae hnaghevalu re ruma mei ne kofiza gne'e tela leme hui ie. Euwateuwe, hatimare palaza gne'e ne jifla ne tei giugiluza kehreagna khetogna ie. 11Nanoni fate'o ka khilo'au ni ihei lanauwa te rogiza u nafnata gleme kaakahra ire ne tufuni hmau nodi lui.
U kofunaboboi ni u falalase
12Hatimare mae khurure ne eira chuku kofunaboboi ni chuku falalase bi'o eu farihotenidi nanonire. Euwateuwe, nanoni fate'o te fatutu'aniza Jisas re ne kahe nodi gaoghatho lana ne salofaudu ka kahe hnimoto te kiloza noa varada mae Solomon teu ka Suga Blahi ie. 13Ni keha nanonire ne hmau nodi ne tho'anodi salofaudu baludi mae khurure. Meuba nauwa, hatimare ne ghatho bohera lui ihei te fatutu'aniza Jisas re. 14Chuku nanoni lui te fatutu'ani ka Lod re ne kafua ruma haghe ka khilo'au ie. 15Kate kofira kofunaboboi teke eira mae khurure, nanonire pala ra ne mei ihei te au fogra tadi re ka sape ni ka gnagru eu ka nabrau ie mala ungo lao naungagna mae Pita ie ke kliadi malani keli nodi. 16Chuku chuku nanoni lanauwa te mei funudi ka nau te chuku te au falithuza Jerusalem re. Hatimare udira ne mei nanoni te fogra ni au na'itu teu tadi re. Nanoni teure mei neke kafua keli fapulo nodi.
Hatimare ne athi haghera mae khurure ka fate
17Agnoni, mae nului pirisi ni mae te loku balugna magne ka thotoghei te kiloza Sadiusi re, ne gogotura lui mae khurure. 18Eume, hatimare sagura mae khurure ne koko lao ra ka suga sosolo. 19Ni ka bongi teugne kahe engjel noa Lod ne thotora nathangagna suga sosolo ie, ne batu fajiflara mae khurure kosi ne lepo eu'ani, 20“Tei kegra ka Suga Blahi ie ni thuturi ka nanonire gna u nakahra valu ie.”
21Kate rogiza igne, hatimare ne leghuza goeghoze igne ne tei ka Suga Blahi ie. Ka ghagragna napasa ie mae khurure ne funu thuturi harira nanonire.
Mae nului pirisi ni mae noa thotoghei ie ne theome laseza lana tela jifla hui mae khurure. Agnoni, hatimare ne kilofaudu ra mae funei fate'odi Israel re mala eiza kahe faudu bi'o ka mae mala fatere. Hatimare eulanauwa ne lepora keha mae soldia mala tei udimeira mae khurure ke uludi mae mala fatere. 22Ni kate tei hatimare ka suga sosolo ie, hatimare ne theome kofira lana ki mae khuru ka teuwae. Agnoni, hatimare neke pulo ne lepo eu'ani ka mae mala fatere, 23“Icho'idogu ie! Ka dufu laomi gheati ka suga sosolo ie, nathangare kafua pige famaku au lana, ni mae mala sedere re ba kafua kegra koukofu au lana. Ni kate thotora gheati nathangare, gheati theome kofiza lana ki mae ke hnuagna suga sosolo ie.” 24Kate rogiza igne, mae funei bi'o te mala koukofugna Suga Blahi gne, ni mae pirisi ulu teure ne fa'ihora lui. Hatimare ne fua vere nodi lui ka hna te eiza mae khurure.
25Agnoni, kahe mae ne ruma ne lepo eu'ani ka hatimare, “Farogo! Mae teke nana'ara ghotolu ka suga sosolo ra, gignoa igne ie kegra fagriura nanonire ka kahe hnimoto ka Suga Blahi ie!” 26Agnoni, mae funei bi'o baludi mae soldiare ne tei ka Suga Blahi ie mala atha fapulo ra mae khuru re. Ni mae soldiare theome huhuru ra mae khurure, eigna hatimare hmau ra nanonire, kihnana eu khale faleme ra ka thina.
27Mae soldiare athira ne mei mae khurure ne fakegra ra ke uludi mae mala fatere. Ni mae nului pirisi ie ne lepo eu'ani ka hatimare, 28“Icho'idogue! Gheati neke lepo faheta hui ka ghotolu mala tovi ke fagriura ghotolu nanonire ka nahngagna mae teugne. Fakofu ba ghotolu, u nomi nafnata fagriu ghotolu igne la tei dufu hia te hia Jerusalem. Euwateuwe ghotolu ngagughamu te fariuriu mala fatoroza ka gheati lemegna mae teugne.”
29Ni mae Pita ni keha mae khuru re ne lepo eu'ani ka hatimare, “Gheati tufuni ngagughami te leghuza goeghozegna God, theome mala leghuza goeghozegna nanoni ie. 30Ghotolu neke falemeza Jisas ni tupijuruza magne ka gazu fafata ie. Ni nodi God mae ku'eda tati tifa ra teke fakegra fapuloza magne. 31Euwateuwe God kela atha hagheza magne me fahokroza ka sape noilaghi ka phile matugna, mala funei frunighita tati ni fakahrighita. Magne eiza igne mala tangomana nanonidi Israel re te ho'ignagnafa ni koko nakhibo mala kahra. 32Gheati lepo fatakle ra puhi ire, ni Tharunga te Blahi ie eulanauwa lepoza te puhi ire tutu'ani teuwe. Ni God gulao Tharunga te Blahi ie ka ihei te leghuza magne re.”
33Kate rogiza igne, mae mala fatere ne tufuni ngingiri ra lui ne ngagura te mala faleme ra mae khurure. 34Agnoni kahe mae velepuhigna vetula, nahngagna ie mae Gamaliel, kegra haghe ne lepora mae soldiare mala atha fajiflarawa mae khurure ka khata hnimoto hmo'eni. Mae teugne kahe mae ka thotoghei te kiloza Farisi ni nanonire tufuni ghatho boheza lui magne. 35Ke leghugna igne, magne ne lepo eu'ani ka mae mala fatere, “Ghotolu mae Israel ra, kulu ghaoghatho fakeli ka hna te ngagughamu mala eiza ka mae ire. 36Ke ghatho fapuloza sonighotolu mae Teudas ka finogha te liu ra, magne mei neke lepoza te magne kahe mae ulu lui teuwe. Agnoni fati gobi mae teke leghuza magne re. Ni keha nanonire ne falemeza magne, euwateuwe mae teke leghuza magne re ne sopana thei lana. Eume hna teke fufunu hagheza magne ie, ari the'o nafugna lana. 37Ni ke leghugna teugne, ka miolo te mala a'ahe nanoni ie mae Judas, kahe maegna Galili mei ne lepora chuku nanonire mala leghuza magne. Ni hatimare ne falemeza lanauwa magne, ni mae teke leghuza magne re ne sopana thei. 38Eume te lepoza rei ka ghotolu gignoa igne ie, lisa lao ra mala ghae nodi lana hatimare. Eigna me nodi gaoghatho thaidi lana hatimare te eiza puhi igne ie, puhi teugne kaina lao the'o nafugna au lana. 39Ni jame me funugna ka God ie, ghotolu kaina theome tangomana te lothira hatimare re. Na euni magra ghotolu ka God thaigna euwa.” Eume, mae mala fatere ne leghuza hna te lepoza mae Gamaliel ie ne theome faleme ra mae khurure.
40Agnoni hatimare ne kilo fapulo ra mae khurure ne ani ra lana ni lepo faheta harira mala tovi ke thuturiza hatimare nahngagna Jisas ie. Ke leghugna igne hatimare ne sakrera mae khurure ne ghae nodi.
41Mae khurure ne jifla ka suga mala fate ie balu hneahnegha, eigna God lasera te hatimare thokadi te au paapara, ni mamaza gna nahngagna Jisas. 42Leuleghu naga'e mae khurure ne theome hui te fagriura nanonire ka Suga Blahi, ba ka sugadi thaidi nanonire. Euwateuwe, hatimare thuturi fatheveza u Grorogo te Keli gna Jisas gne lana Kraes ie teuwe.
© 2025 SIL Solomon Islands