Mae khuru 4
4
Pita ni mae Jon ne kegra ke uludi mae funei re
1Kate vevese te au Pita ni mae Jon ka nanonire, keha mae pirisi ni kahe mae funeidi hatimare mae soldia te mala koukofugna Suga Blahi gne, ni keha mae Sadiusi teure ne mei ka phalumare. 2Hatimare di'a tadi lui ka phalumare, eigna phalumare ne fagriura nanonire gna Jisas te kela kegra fapulo ka gleme ie. Eulanauwa phalumare ne fagriura nanonire teke leghu gleme ie, nanonire kaina ie ke kegra fapulo. 3Agnoni, hatimare ne sagura mae Pita ni Jon ne na'ira ka suga sosolo ie. Hatimare ngagura te fate ra phalumare, eume phalumare ne au ka teuwae ne ghile ga'e fufugho eigna la rafi hui. 4Ni chuku nanoni te rogira nodi vevese phalumare re ne fatutu'aniza Jisas. Eume, mae te fatutu'aniza Jisas re gignoa igne ie dufiza glima thogha.
5Kahe naga'e ke leghu, mae funeidi hatimare mae Jiu, keha mae baubatu, ni hatimare mae velepuhigna vetula teure ne ghonei mei Jerusalem. 6Mae nului pirisi Anas, ni mae Kaefas, ni mae Jon, ni mae Aleksada, ni keha mae lanauwa ka vikegna mae nului pirisi teure neke au lanauwa ka teuwa ie. 7Hatimare ne fakegra ra mae Pita ni mae Jon ke uludi, agnoni hatimare ne funu ghuhna eu'ani ka phalumare, “Ba, ne fahneuwa te keli mae teke leme nenegna ignea? Ka noa noilaghi ihei ba ka nahngagna mae ihei teke eiza ghopa teugne?”
8Tharunga te Blahi ie ne au balugna mae Pita, eume magne ne lepo eu'ani ka hatimare, “Uve, ghotolu mae funeira, ni ghotolu keha mae baubatuda tati ra, 9nginani ia ghotolu neke ghuhnaghami ghepa mae Jon gna puhi te keli te eiza ghepa ka mae teke leme nenegna ie, ne fahneuwa ne kelini magne teuwe. 10Uve, rei ngagughau te lepo harighamu ghotolu mae funei fate'o ra, ni ka ghotolu nanoni te huigna Israel. Mae te kegra ke ulumi ghotolu igne magne neke keli ka nahngagna Jisas Kraes, gna Naesaret. Mae ihei ghotolu teke tupijuruza ka gazu fafata ia, ni God neke fakegra fapuloza magne. 11Euwateuwe u i'ini te blahi gne ne lepo eu'ani gna Jisas,
“ ‘U thina teke tho'anomiza ghotolu mae teke babanagna suga ie ia,
kela kegra haghe ke kahe thina ulu lui ka suga ie.’#4:11 Sam 118:22.
12Jisas lana te tangomana fakahrighita ie. Eigna God neke theome kuru meiza kahe nahnga maghani ka nauthoglu gne te mala fakahrighita ie.”
13Hatimare mae funeire ne vere nodi kate kofira Pita ni Jon eu te theome hmau kate vevese ke uludi hatimare ie. Hatimare lasera phalumae ire neke theome tei sikoluza u glalase gne, phalumare au lana ka nau. Ni kate kofiza te theome hmau phalumare re, hatimare neke ghatho fapulo ra teke tei tei phalumare balugna Jisas ie. 14Agnoni kate kofiza hatimare mae teke keli gne kegra te'au baludi phalumare ie, hatimare ne theome tangomana te lepoza kahe goeghoze. 15Agnoni hatimare ne lepora tholumare mala jiflawa kosi, euwateuwe hatimare ne roghe farithaidi gna igne. 16Hatimare ne lepo eu'ani, “Mae ghoe! Kaina fahneura tati phalumae irea? Eigna nanoni te hui ani Jerusalem re la kofiza u kofunaboboi bi'o teke eiza phalumare ie. Eume, tati theome tangomana te lepoza te igne ne phiapita teuwe. 17Tati kaina lepo faheta ka phalumare, mala tovi thuturiza phalumare Jisas ka nanonire, na euni tei hia te hia nafnata fagriu igne euwa.”
18Agnoni hatimare neke kilo fapulo ra phalumare, ne lepo faheta lao tadi mala tovi thuturiza ba fagriuza phalumare ihei ka nahngagna Jisas. 19Ni Pita mae Jon ne vevese eu'ani ka hatimare, “Ghaoghatho fakeli ba ghotolu, ahia te ngaguza God ie? Leghughamu ghotolu ba leghuza Magne? 20Ni ghepa na theome tangomana te au famuura hna teke kofu nathami ni rogo khulimi teure.”
21Agnoni mae funei bi'o re neke fapalu lepo fahmauhmau ra phalumare, ni ke leghugna ie hatimare ne sakre teira phalumare. Ninigrana harira hatimare te mala choghara phalumare re, eigna hatimare kofu falasera nanoni te hui re la kilo uluza God 22gna u kofunaboboi teke eiza phalumare ie. Mae te kela keli gne la liuza hui phalututu finoghagna.
Nodi tharai nanoni khilo'au
23Agnoni, Pita ni mae Jon ne jifla ka faudu hatimare mae baubatudi Jiure ne tei ka thotoghei nanoni te fatutu'aniza Jisas re. Phalumare ne thuturi harira gobigna puhi teke lepora hatimare mae pirisi ulu ni mae funei teu ka phalumare re. 24Kate rogiza igne, hatimare ne kahe gnagnafa lana ne kafua tarai faudu ka God eu'ani, “God te tufuni noilaghi, ghoe teke vuavuhaza manga, ni glose, ni hnorara, ni gobigna goifata te au ke hnuadi. 25Ghoe neke sakreza Tharunga te Blahi ie mala lepoza nou goeghoze ie ka mae nou gloku, mae ku'emi gheati Devet. Magne neke lepo eu'ani,
“ ‘Gna hna ie te di'atadi lui nanoni te theome Jiu irea?
Gna hna ie nanonire te rogheza lana mala eira hna puhi te the'o nafudi re gnea?
26Mae nafano fate'o gna nauthoglu gne hatimare tarabana mala magra.
Hatimare mae te funei frunira nanonire salofaudu mala magriza Lod ni mae Fakahra teke fafateza ie.’#4:26 Sam 2:1,2.
27Tutu'ani lui Lod, ani Jerusalem ie mae Herod ni mae Pontius Paelat teure neke kahe gaoghatho baludi nanoni te theome Jiu ni nanonidi Israel teure neke falemeza Jisas, nou Mae Gloku Blahi, ghoe teke fafateza ie. 28Ghoe ulu ghathoza hui hna te mala eiza ie, eigna ghoe au noilaghi bi'o. Euwateuwe nanoni ire eira lana nou gaoghatho ghoe re, me tufuni kohlo lui ka hna teke ngagughoza ghoe ie. 29Gignoa igne Lod, rogira nodi goeghoze fahmauhmau ma'ire. Lod, gheati mae nou gloku ghoe. Gumei harighami u noilaghi mala theome hmau gheati thuturiza goeghozemu ie. 30Fatakleza nou noilaghi ie mala fakelira nanoni te fogra re, ei kofunaboboi, ni ei falalase eu ka nahngagna nou Mae Gloku Blahi Jisas.”
31Ke leghugna te tarai hatimare ie, hnimoto te krapu te tarai hatimare gne megona ne hngali. Euwateuwe Tharunga te Blahi ie ne au baludi hatimare. Ke leghugna igne, hatimare ne theome hmau te ghaghazalaza u goeghozegna God ie.
Nanoni khilo'au re ne kahe gaoghatho lana
32Nanoni te fatutu'aniza Jisas re ne kahe gnagnafa ni kahe gaoghatho eu lana. The'o kahe nanoni te lepoza ne thaigna lana tufugna kahe goifata teuwe. Ni hatimare ne tufa gobigna nodi goifatare farithaidi. 33Ni balu noilaghi te bi'o, mae khurure ne ghaghazalaza ka nanonire kegra fapulogna Lod Jisas ie. Euwateuwe, God ne kafua fablahira ne hui hatimare. 34-35The'o kahe nanoni te hmoneza ka goifata ie. Eigna ihei te au nodi hnimoto glose ba nodi suga re, hatimare saisabiri mala atha nanugra ni gulao ka khamedi mae khurure. Euwateuwe, hatimare kaina tufa ka ihei te the'o nodire.
36-37Ka teuwae, kahe mae ka vikegna mae Livae, nahngagna ie Josep, neke kahra ka moumolu te kiloza Saepras. Mae khuru re kiloza magne Banabas, gaoghathogna ie, “Mae mala faheheta gaoghatho.” Magne ne saisabiri noa hnimoto glose ie, ni kate atha nanugragna ie, magne ne gulao ka hatimare mae khurure.
© 2025 SIL Solomon Islands