Mae khuru 3
3
Mae Pita ne fakekeliza kahe mae te leme nenegna
1Kahe naga'e, tahngi tholuni phile grafi, philegna naga'e te mala tarai teu mae Jiure, mae Pita ni mae Jon teure ne tei ka Suga Blahi ie mala tarai. 2Kahe mae te leme nenegna ie, funu kahra meigna hokro ne'au ka nathangagna Suga Blahi te kiloza hatimare, “U Nathanga Khuakuda”. Leuleghu naga'e ie, mae kheragna re pala teiza koba ka teuwae mala tore nanugra magne ka nanoni te tei tarai ka Suga Blahi ie. 3Kate kofira Pita ni mae Jon te mei thatai ruma ka Suga Blahi ie, magne ne tore noa nanugra ka phalumare. 4Phalumare ne kofututu ka magne, euwateuwe mae Pita ne lepo eu'ani ka magne, “Kofu mei ba ghoe ka ghepa!” 5Agnoni, magne ne kofu lao ka phalumare ne rouronu mala atha noa nanugra.
6Ni mae Pita ne lepo eu'ani ka magne, “Rei tufuni the'o nanugra. Ni hna te au ka rei ie kaina gu'ari rei ka ghoe. Te lepogho rei ie, ka nahngagna Jisas Kraes gna Naesaret, kegra haghe, ni zaoza'o!” 7Euwateuwe, mae Pita ne loku lao ka khame matugna ie ne fakegra hagheza. Ka hnimoto teugne lana, nahuli nenegna magne te hui re ne kafua heta. 8Agnoni magne ghasa haghe ne funu zaoza'o. Magne ne ruma baludi phalumare ka Suga Blahi ie ne zaoza'o balu ghasa ni kilo uluza God. 9Nanoni te krapu te au ka u Suga Blahi ie ne kofiza te zaoza'o ni kilo uluza God teu magne ie. 10Hatimare te hui re kafua kofu falaseza magne, eigna magne lana mae te tore nanugra koba tifa ka u nathangagna Suga Blahi te kiloza “U Nathanga Khuakuda” teuza ie. Hatimare ne vere nodi lui kate kofiza teke keli noa mae teke blughu gne.
Noa goeghoze Pita ka glamagna Suga Blahi
11Mae teugne ne theome ke tei kokora Pita ni mae Jon. Agnoni nanonire ne kafua vere nodi lui chari ne mei ka tholumare ka varada te kiloza “noa Varada Solomon.” 12Kate kofiza mae Pita igne, magne ne lepo eu'ani ka nanonire, “Ghotolu nanonimi Israel ra, ne fahneuwa ghotolu te vere nomi lui ka puhi ignea? Gna hnae te kofututu ghotolu ka ghepa gnea? Ghotolu jau gaoghathomire ne fakekeliza ghepa ma'igne ka nomi noilaghi ghepa thaimi fu'auwa? The'o! 13Nodi God mae ku'eda Ebraham, mae Aesak, ni mae Jekop teke eiza hna te kofiza ghotolu igne, mala kilo uluza tati noa mae gloku ie, Jisas. Ni ghotolu neke sakre laoza magne ka khamedi mae funeire. Neuba mae Paelat ne ghaoghatho mala sakre fajiflaza Jisas, ghotolu teke lepoza ka mae Paelat ie, ghotolu theome ngagughamiza magne. 14Tutu'ani, magne kahe mae Blahi ni kohlo euwa, ni te lepoza ghotolu ie, ghotolu theome ngagughamiza magne. Ni ghotolu toreza mae Paelat mala sakre harighamu mae Barabas, kahe mae te di'a teke faleme noni ie. 15Eume, ghotolu teke falemeza mae ihei te mala tusu harighita u tufuni nakahra ie. Ni God neke fakegra fapuloza magne ka u gleme ni ghepa neke tufuni kofu nathamiza igne. 16Ka noa noilaghi Jisas, te fakekeliza ghepa mae teke leme nenegna te kafua kofiza ni laseza teu ghotolu gne. Uve, tutu'ani lui, ghepa fatutu'aniza Jisas, euwateuwe ka nahngagna Jisas ghepa te fakekeliza ma'igne, jateula te kofiza ghotolu gne euwa.
17“Uve kheragura, rei laseghamu ghotolu baludi nomi mae baubatura neke eiza igne ka Jisas, eigna ghotolu theome laseza lana te magne lana mae fakahra ie. 18Ni tifa ie, God neke lepo ka hatimare mae profetre gna Kraes gne, te magne kaina ie mala au paapara. Ka puhi igne God ne fahoroghotoza hna teke lepoza thaigna ie. 19Eume ghotolu atha koko puhimi te di'are, mala ke figri ka God, malani atha koko magne nakhibomire. 20Te eiza ghotolu igne ie noda Lod kaina ie na gu'ari nakahra valu ka ghotolu. Magne kaina ie na kuru meiza Jisas Kraes ka ghotolu, mae ihei magne teke kulu fafateza mala nomi mae fakahra ie. 21Jisas gne mala au klia ghile dufiza naga'e God kaina te na'a fakohlo fapulo goifata fate'o re, jateula teke kulu lepoza God tifa ka mae noa profet te blahi re. 22Eigna mae Moses gne neke lepo eu'ani ka mae ku'eda tati re, ‘Nomi Lod God ghotolu ie kaina sakre meiza kahe mae profet ka ghotolu jateula rei euwa, ni magne kaina kahe mae ka ghotolu thaimi lana euwa. Ni ghotolu mala tufuni farogo fakeli ni leghura eu gobigna puhi te lepora magne ka ghotolure. 23Ihei te theome leghura noa goeghoze mae profet teugne, God kaina ie na atha famaghaniza ka noa nanonire mala leme.’#3:23 Diutronomi 18:15,18,19.
24“Uve, funu ka mae Samuel ni hatimare mae profet te hui teke mei ke leghugna magne re neke kafua lepora puhi te eira gignoa igne re. 25U na'alepo teke lepora God ka mae profetra malami ghotolu nekeuwa, jateula u na'alepo teke eiza God ka mae ku'eda tifa ra. God neke na'alepo eu'ani ka mae ku'eda Ebraham, ‘Ka thumu ghoe rei kaina ie na fablahira nanoni te hui ka nauthoglu gne.’#3:25 Fufunu 22:18; 26:4. 26Eume God neke fafateza Jisas noa mae gloku ie neke kulu kuru meiza ka ghotolu. Magne sakre meiza Jisas mala fablahighamu ghotolu, kate koko ghotolu puhimi te di'are.”
© 2025 SIL Solomon Islands