Mae khuru 2
2
Meigna Tharunga te Blahi
1Ka dufu meigna naga'e Pentikos ie, hatimare au faudu ne au ka kahe suga. 2Euwateuwe kahe naogla jateula naulafa bi'o eu ne mei funu ka manga ie ne rumiza suga thaudolu te au hatimare ie. 3Ka teugne hatimare ne kofira keha goifata jateula hleuhlepu kha'aghi ra eu ne togha ka pha'udi hatimare te hui. 4Agnoni, Tharunga te Blahi ie ne mei au ka hatimare fate'o, euwateuwe hatimare la funu vevese ka keha goeghozedi maghani re, leghuza hna nafnata goeghoze teke gulao harira Tharunga te Blahi ie.
5Uve, ka naga'e teure chuku nanoni Jiure ne mei Jerusalem mala tarai, funudi ka nau hia te hia ka nauthoglu gne. 6Kate rogiza u naogla igne, chuku nanonire ne krapu mei. Hatimare ne kafua vere nodi, eigna hatimare ne sopagna rogiza nodi goeghoze thaidire. 7Nanonire tufuni vere nodi ne lepo eu'ani, “Tholumae, mae te vevese fo'igno ire, maedi Galili re! 8Ne fahneuwa hatimare tela kafua lasera lana noda goeghoze tati irea? 9Tati gne, funuda ka nau Patia, Midia, Elam, Mesapotamia, Judia, Kapadosia, Pontas ni Esia, 10Frijia, Pamfilia, Ijip, ka nohi Libia kehreagna nau Saerin, ni keha ka tati mae Jiu te mei lanauwa funu Rom, 11kehare kahra mae Jiu ni kehare te fite leghura lana nodi fatutu'ani ni nakahradi teu mae Jiure, ni keha ka tatire mei funudi Kriti ni Arabia fu'aure, ni neubanauwa, tati kafua rogira hatimare vevese ka noda goeghoze tatire gnadi puhi bi'o te eira God re.” 12Hatimare ne kafua vere nodi ne fa'ihora, ne ghuhna eu'ani farithaidi, “Tholumae, hna eu gaoghathogna ie ignea?”
13Ni keha nanonire ne ma'e ra lana mae khuru re ne lepo eu'ani, “Mae ire ko'u waen daranga re.”
Mae Pita ne lepo harira nanonire
14Pita ne kegra haghe baludi salei kahe mae khurure ne lepo eu'ani fabi'o ka nanonire, “Uve mae tabusignagu te Jiura ni ihei lanauwa te kafua au ani Jerusalem, farogo fakeli ka hna nate lepora rei ire! Sakreghau mala thuturiza rei ka ghotolu hna te eiza gignoa igne. 15Ma'ire theome daranga jateula te ghathoza ghotolu gne euwa. The'o! Eigna gignoa igne agno tahngi hniani na boibongi fufugho au lana. 16Ni mae profet Joel neke kulu lepo noaza hui tifa ie hna tela kofiza ghotolu gignoa igne ie.
17“ ‘God ne lepo eu'ani,
Ka thatai huigna nauthoglu gne,
rei kaina ie sakre soruza Tharungagu ie ka nanoni te hui re.
Euwateuwe, thumi ma'ane ni ga'ase teu ghotolure kaina ie
na thuturiza goeghozegu rei ie.
Ni mae hnaghevalu ni mae bi'omi teu ghotolure,
rei kaina ie na gulao harira noilaghi te mala mifi.
18Uve, ihei ma'ane ni ga'ase te loku harighau rei ie,
ka naga'e teuwae rei kaina ie gulao u Tharungagu ie ke kliadi mala thuturiza goeghozegu ie.
19Ni rei kaina ei falalase klia ka manga ie,
ni ani pari ka glose mala kofira nanonire.
Kaina ie, chuku nanoni na leme ni kha'aghi ni u gagahu bi'o eu
ani pari ka nauthoglu gne.
20U nadafi ie kaina romo, ni u glaba ie kaina na chichi'a
jateula u dadara euwa.
Euwateuwe, u Naga'e gna Lod te fua ulu tulao ie kaina dufu mei.
21Agnoni ihei te tore ka nahngagna Lod ie,
rei kaina fakahrira. ’#2:21 Joel 2:28-32.
22“Ghotolu nanonimi Israel ra, farogo fakeli ka u goeghoze ire! God neke kuru meiza Jisas gna Naesaret ia ka ghotolu, euwateuwe magne neke tufuni falalase igne ka ghotolu ka u gloku te noilaghi, ni kofunaboboi, ni falalase. God neke eira ire ka magne tela kofira hui ghotolu te magne mei funugna ka God teuwe. 23God leghuza noa gaoghatho teke kulu na'iza hui tifa ie ne sakreza Jisas mala saguza ghotolu. Ni ghotolu ne sakre laoza magne ka khamedi mae te di'a puhidi re mala tupijuruza ka gazu fafata ie. 24Ni God ne atha fajiflaza magne ka noilaghi te mala leme ie, euwateuwe ke fakegra fapuloza ka u gleme. Eigna gleme ie the'o kahe noa noilaghi te mala loku famakuza Jisas ie. 25Mae Devet ie neke kulu lepo eu'ani neigna magne,
“ ‘Rei kofiza koba Lod gne au fatheve ke ulugu,
magne au lana kehreagu rei,
eume rei gne theome ke nanga nogu.
26Eigna igne rei hneahnegha lui,
euwateuwe goeghozegu rei ie fatakleza nogu hneahnegha ie.
Neubane mae mala leme, rei kaina ie au nogu grouronu fatheve.
27Eigna ghoe kaina ie na theome lisa laoza tharungagu rei ie ka nodi nauthoglu mae te leme re.
Ni ghoe kaina theome sakreza lanauwa thonogna nou Mae Gloku Blahi ie bose ka beku.
28Ghoe neke falalase ka rei u nabraugna nakahra ie,
ni rei kaina hneahnegha, eigna ghoe au balugu rei.’#2:28 Sam 16:8-11.
29“Uve, kheragura, rei ngagughau te thuturiza fakeli ka ghotolu gna mae ku'eda tifa mae Nafano Devet ia. Magne leme hui, neke giugiluza hatimare, ni bekugna magne ie au me aulana ka nauda tati ie ghile dufu gignoa igne. 30Mae Devet gne kahe mae profet, euwateuwe magne laseza lanauwa u na'alepo teke eiza God ka magne te kahe mae ka vikegna thaigna magne te mala hokro ka sape nafano jateula magne teu kaina ie. 31Magne ne kulu kofu falaseza hui hna nate eiza God kaina ie. Agnoni magne ne lepo neigna mae Kraes nate kegra fapulo ie, neke lepo eu'ani, ‘God theome lisa laoza magne mala au ka nauthoglu nodi mae te leme re. Ni magne theome sakreza lanau thonogna ie mala bose ka beku ie.’ 32Tutu'ani, God neke fakegra fapuloza Jisas ka u gleme, ni gheati te hui ie tufuni kofiza ka nathamire. 33Ni God neke atha hagheza mala hokro ka sape noilaghi ka khame matugna thaigna. Leghuza noa na'alepo ie, God neke gulao hariza Jisas Tharunga te Blahi ie, agnoni magne gumei ka gheati Tharunga te Blahi teugne. Eume hna te kofira ni rogira teu ghotolu gignoa igne re, noa puhi God. 34-35Mae Devet thaigna theome haghe klia mala hokro kehreagna God, ni magne neke lepo eu'ani,
“ ‘God ne lepo hariza nogu Lod rei ie:
Ghoe hokro ani ka sape noilaghi ka phile matugu rei,
au ghile na'i sorura rei nou naoka ghoe re ke parigna nou noilaghi.’#2:34-35 Sam 110:1.
36“Eume, nanoni te hui Israel re mala lase fakeliza te God au teke fafateza Jisas mae teke tupijuruza ghotolu ka gazu fafata ia, te mala Lod ni Kraes teuwe.”
37Kate rogira nanonire hna te lepora mae Pita ire, hatimare ne kusu gnagnafadire ne lepo eu'ani ka mae Pita ni ka keha mae khuru re, “Kheragura, hna kaina te mala eiza gheati ie?”
38Ni mae Pita ne lepo eu'ani ka hatimare, “Atha koko puhimi te di'are, ni siublahi ka nahngagna Jisas Kraes, ni God kaina ie atha koko u nakhibomire ni gu'ari harighamu u Tharunga te Blahi ie. 39Eigna u noa na'alepo God gne mala nomi ghotolu, ni maladi vikemi ghotolu ni maladi lanauwa ihei te au hia te hia ka nauthoglu gne. Uve, u na'alepo igne maladi nanoni te hui noda Lod te kilomei ra re.”
40Fua chuku puhi lui teke lepora mae Pita ka hatimare re, magne ne lepo faheta eu'ani ka hatimare, “Tovi leghura puhidi nanoni te di'a gignoa igne re, na euni fateghamu God jateula nanoni te di'a teure euwa.” 41Ihei teke fatutu'ani ra noa goeghoze mae Pita re ne siublahi, jame dufiza tholu thogha nanoni te ruma haghe ka thotoghei khilo'au ka naga'e teuwae re.
U Nakahradi nanoni khilo'au
42Nanoni teure ne tufuni kelitadi lui ne farogo koba ka nodi fagriu mae khurure, hatimare farifatotoghoi, ngamu faudu, ni tarai faudu. 43Mae khurure eira chuku kofunaboboi ni falalase eu ka noa noilaghi bi'o God. Kate kofira ire, nanonidi Jerusalem re hmau nodi ne ghatho boheza God. 44Nanoni te hui te fatutu'aniza Jisas re ne loku faudu ni salofaudu eu ka nodi gobigna puhi fateote'o re. 45Hatimare eulanauwa saisabiri nodi hnimoto glose ba hna teke khotodi thaidire mala toghora nanoni te the'o nodire. 46Ni leghu naga'e ie, hatimare salofaudu Jerusalem ka noa Suga Blahi God ie. Ni hatimare tarai faudu ni ngamu faudu eu ka sugadi re balu hneahnegha ni tufa ka gnagnafadi te keli, 47ni kilo uluza God. Eume, nanonire ne ghatho bohera hatimare. Ni leuleghu naga'e ie, God fakahrira keha nanoni ne ruma mei ke hnuagna thotoghei nanoni khilo'au teure.
© 2025 SIL Solomon Islands