Mae khuru 27
27
Mae Pol saghe ka vaka ne tei Rom
1Kate kohlo te mala tei gheati Itali ie, hatimare ne sakre laoza mae Pol baludi keha mae sosolo lanauware ka khamegna kahe mae nahngagna ie Julias, mae teugne kahe mae te batuza kahe gobi noa mae soldia mae Nafanogna Rom ie. 2Gheati saghe ka vaka teke mei funugna ka nau Adramitiam te tarabana mala chara leghu nau tei ka provens Esia. Mae Aristakas, kahe mae khiloaugna nau Tesolonika ka provens Masidonia ne tei lanauwa balumi gheati.
3Ka keha naga'e ie, gheati ne tei dufu Saedon. Mae Julias ne keli hariza lui mae Pol ne sakreza magne mala tei kofira kheragna fafaudu te au ka nau teugne. Hatimare tangomana te toghoza mae Pol ka hna te thokagna magne ie. 4Agnoni gheati jifla Saedon ne tei kehreagna moumolu Saepras eigna naulafa ie ne au ke ulumi gheati. 5Gheati kasa raru ka hnorora, ke kosidi phalu provens Silisia ni Pamfilia. Agnoni gheati ne longa ka gruru Maera ka provens Lisia. 6Ka teuwae mae Julias mae funei bi'odi hatimare mae soldiare ne kofiza kahe vaka funugna Aleksadria mala tei dufu Itali. Agnoni magne ne udighami gheati tei ka vaka teuwae. 7Ni gheati ngagughami fariuriu te tei dufu Nidas ni chuku naga'e vaka ie ne theome ngigru, eigna naulafa ie ne heta mei ke ulumi gheati. Eume gheati theome tangomana te tei faghose ie. Agnoni gheati figri neke tei kehreagna nasogna Salmon ne liu ke longa gna moumolu Krit. 8Gheati ne loku manigra ne chara ne tei kehreagna moumolu ie ne ghile tei dufu ka kahe hnimoto te kiloza hatimare “Naprona keli” kehreagna gruru bi'o Lasea.
9Gheati ne fite chochoghei la chuku naga'e re ka kholo ie, ni nodi naga'e bi'o mae Jiu te mala kohlo ka nathagna God ie la liu hui. Euwateuwe gignoa igne ie, gheati dufiza hui naga'e di'a te theome naba te mala tei ka hnorora ie. Agnoni mae Pol ne lepo eu'ani, 10“Kheragura, rei laseza thei te eiza tati gne kaina theome kohlo. Vaka gne kaina di'a, ni eulanauwa goifata fate'o te au ka glamagna re, ni keha ka tati kaina chochoghei lanau nakahradire.” 11Ni mae funei bi'odi hatimare mae soldiare ne tho'anoa farogo ka hna te lepora mae Pol re. Magne ne farogo lana ka noa goeghoze mae te saghe leghugna vaka gne balugna mae tufugna vaka ie. 12Eulanauwa, naprona te polo gheati gne theome ra'e keli ka hnigra khoburu ie. Agnoni mae ke chuku re ngagura te jifla mala fariuriu tei dufu ka gruru Finiks mala polo. Hnimoto teugne kahe naprona keli lui mala polo te au ka moumolu Krit, ka fei mala plulugna nadafi.
Kahe khoburu bi'o
13Kate funu iu'ifu fa'ichoni mei naulafa ie, hatimare ne lepo eu'ani, “Uve, igne naulafa te ngagughitaza tati ie!” Agnoni hatimare kohro haghe sobo ie ne ghae ni ghigri kehreagna moumolu Krit. 14Theome raugha kahe naulafa bi'o te kiloza “Khoburu” ie ne iu'ifu mei phile moumolu. 15Naulafa igne ne fua hneta lui ne pala famaghaniza vaka gne. Eume vaka gne ne theome tangomana te tei fa'ulu. Agnoni gheati ne lisaza la vaka gne hleleghu lana ka naulafa ie hia te tei ie. 16Kate mei thata gheati ka moumolu ichoni Kaoda ie, gheati ne fariuriu kohro haghe boti ichoni ie mala sosolo famaku, ni fua ninigrana lui euwa. 17Leghu lahugna ie hatimare ne ghile kohro haghe boti ie ne solo famaku ka vaka ie, ni sosolo pruki falithuza vaka ie. Agnoni mae gloku ka vaka re ne hmau nodi lui na eu tei ghohro vaka ie ka khokodo nusu bi'o kehreagna Libia. Hatimare ne lolopo selo ie ne siteni ne tei gheati. 18Naulafa bi'o ie heta gea ne theome noto, agnoni ka keha naga'e ie hatimare ne funu koko fakosi keha goifatare. 19Agnoni ka fatolu naga'e ie, hatimare ne koko fahui goifata fate'o gna vaka ie. 20Chuku naga'e gheati theome ke kofiza nadafi ba kahe nathunu ka grabo ie. Naulafa ie ke heta laoni eu ka hnimoto teugne. Eume, gheati the'o hui kahe nomi grouronu ba gaoghatho te mala kahra teuwe.
21Ka tela fua raugha hui te theome ngamu hatimare ie, mae Pol ne kegra haghe farihotenidi hatimare ne lepo eu'ani, “Kheragura, rei neke lepo hui ka ghotolu mala tovi jifla Krit. Jame farogo ghotolu ie, tati jame theome deiza hoholo igne ba koko noda goifatare. 22Ni te lepoza rei ka ghotolu gignoa igne ie, tovi hmau ni tovi nanganomi euwa, eigna the'o kahe nanoni ka tati kaina te leme ie! Ni vaka gne lana kaina te di'a ie. 23Eigna bongi ia kahe noa engjel nogu God mae ihei rei te loku hariza ie ne mei kegra kehreagu rei 24ne lepo eu'ani, ‘Pol, tovi hmau! Ghoe mala kegra ke ulugna mae Nafano bi'o Sisa. Euwateuwe God kaina keli harigho lui ghoe. Magne kaina fakahrira ihei te tei balumu ghoe ka vaka ie ire.’ 25Eume ghotolu kheragura, tovi hmau! Rei fatutu'aniza God. Goifata fate'o teke lepora noa engjel God ka rei ire kaina tutu'ani. 26Ni neubanauwa, tati kaina ie elo tei ghohro ka kahe moumolu.”
27Salei fati bongi ka glamagna hnorora funu jiflami gheati ka hnimoto te kiloza “Naprona keli.” Ka bongi leghu lahu ie gheati elo ne kasa ka Hnorora Edria. Farihotei bongigno ka bongi leghu lahu ie hatimare mae glokugna vaka gne ne hemiza te mei thata gheati ka moumolu. 28Agnoni hatimare koko soru pruki ie mala laseza nanahmagna ie ne kofiza te thokagna varadaki kamafa thei gna pari ie. Hatimare ke ngigru falongani khata hnimoto neke koko soru pruki ie ne kofiza te salei glima kamafa thei gna pari ie. 29Hatimare mae gloku gna vaka gne ne hmau nodi lui na eu ghohro ka namoja neuwa, eume hatimare ne koko soru fati sobo leghu. Ke leghugna igne, hatimare ne tarai mala ghose mei naga'e ie. 30Keha mae gloku gna vaka re rodi pelo kokoza vaka ie, ne fahruhru soru boti ie ka kholo ie. Euwateuwe hatimare ngagura te mugna ra keha mae gloku re ne lepo eu'ani, “Gheati gne tei koko soru keha sobo ulu.” 31Ni mae Pol ne lepo eu'ani ka mae funei bi'odi hatimare mae soldiare ni mae mala magra teure, “Ne theome au soru na mae gloku re balugna vaka gne ni, God kaina ie theome fakahrighamu ghotolu.” 32Eume mae soldiare re ne kukusu prukigna boti ie ne uthu soru ne elo ne tei.
33Ame ga'e na teuwe mae Pol ne tore ra hatimare te hui mala ngamu. Magne ne lepo eu'ani, “Nabagna salei fati naga'e tela liu ari ra ghotolu neke fite ofo lana, ni au ka nahmau neke theome ngamu. 34Gignoa igne rei te toreghamu lui ghotolu mala ngamu, eigna ghotolu ngagughamu te kahra te'au. Kofu sonighotolu, the'o kaheni ka ghotolu nate frena ni leme teuwe.” 35Ke leghudi goeghoze teure, mae Pol atha bereti ie ne lepo fakeli ka God ke uludi hatimare hui. Magne phipile bereti ie ne ngamu. 36Agnoni kate kofiza igne, hatimare ne kafua kelitadi lui, ne funu ngamu. 37Kaputumi gheati te saghe ka vaka ie phalu gobi fitu salei namno nanoni. 38Ke leghugna ngamu te boho ie, hatimare ne koko fahui baige witre ka hnorara ie mala lofe vaka ie.
Vaka ie ne ghohro ka khokodo nusu
39Boibongi fufugho haghe hatimare mae gloku gna vaka re ne kofiza kahe nau. Hatimare theome laseza ahia teuwe, ni hatimare kofiza kahe naprona ichoni te nusu. Agnoni, hatimare ngagura atha te longa vaka ie ka naprona teugne mala faghohro hagheza. 40Agnoni hatimare ne kukusu prukidi fati sobo re ne plulu ka hnorora ie. Euwateuwe hatimare eulanauwa ne rurutha pruki teke famamakudi phalu gohra bi'o te mala saghe leghugna vaka ie, mala bluse fiifigrigna vaka ie. Hatimare kohro haghe selo te au ulu ie ne longa ghoghodogna nusu ie. 41Agnoni vaka ie kohlo ne tei ghohro ka khokodo nusu ie. Pha'ugna vaka ie ghohro ka nusu ne theome tangomana te ngigru ie. Euwateuwe galo bi'o re ne kloo funu leghu ne choghaza leghugna vaka ie.
42Agnoni mae soldiare ne roghe mala faleme ra mae sosolore, mala the'o kahe mae ka hatimare tao te pelo ie. 43Ni mae Julias, mae funei bi'odi hatimare mae soldiare ne theome sakrera hatimare mala faleme ra mae sosolore, eigna magne ngaguza te fakahriza mae Pol. Agnoni, magne ne kafua lepo harira mae ihei te lase tao re mala lili tao kulu longa guta. 44Mae te hui teke au faleghu ka vaka re, hatimare atha hnimoto thaba ba kahe goifata ka vaka ie, mala pogla longa guta. Igne hna teke kafua eiza gheati teke dufu guta ie, ni the'o kaheni ka gheati te leme ie.
© 2025 SIL Solomon Islands