Mae khuru 26
26
Mae Pol tafriza thaigna ke ulugna mae Nafano Agripa
1Mae Nafano Agripa ne lepo eu'ani ka mae Pol, “Uve, gignoa igne ie rei sakregho ghoe mala vevese eimu thaimu.”
Agnoni mae Pol ne ei falalase ka khamegna re mala farogo hatimare. 2Magne ne funu lepo eu'ani, “Mae Nafano Agripa, rei tufuni hneahnegha lui te kegra ke ulumu ghoe gignoa igne ie. Rei ngagughau te ho'ilepo ra hna fathoro te eira mae Jiure. 3Rei tufuni hneahnegha lui te lepo ka ghoe, eigna ghoe lasera lui nomi kastom gheati mae Jiure, ni ghoe laseza lanauwa gna u nomi magra gheati gne. Eume rei toregho ghoe mala farogo mei fakeli ka nogu goeghoze rei re.
4“Mae Jiure kafua laseza puhigu rei ie. Hatimare laseza lui nakahragu funu bi'o haghegu ka tufuni naugu ie ghile mei au rei Jerusalem. 5Hatimare laseghau rei funu tifa. Jame ngagura hatimare ie, hatimare tangomana te lepoza ka ghoe, te rei gne neke kahe mae Farisi keli. Gheati mae Farisi re tufuni heta lui te mala leghuza noa vetula God ie ke uludini keha thotoghei mae Jiure. 6Ni gignoa igne ie hatimare ngagura te fateghau rei, eigna rei ne tufuni fatutu'aniza u na'alepo teke eiza God ka mae ku'emi gheati tifa re. 7Euwateuwe saleiphalu vikemi gheati re neke tufru soruza God bongi naga'e, eigna hatimare tuku au mala kofiza dufu meigna u na'alepo igne. Nafano Agripa, hatimare mae Jiure fathoroghau rei gignoa igne ie, eigna rei eulanauwa tukiza na'alepo teugne. 8Ne fahneuwa keha nanoni ka ghotolu te theome tangomanaghamu te fatutu'aniza God te fakahra fapulo nanoni ka gleme teugnea?
9“Tifa ie rei eulanauwa neke eira chuku puhi te mala choghaza nahngagna Jisas gna Naesaret gne. 10Teuwae lana hna teke eiza rei Jerusalem ie. Hatimare mae nului pirisi re neke tusu harighau rei noilaghi te mala koko lao ra noa nanoni God re ka u sosolo ie. Euwateuwe kate faleme ra hatimare nanonire, rei neke kahe gaoghatho baludi lanauwa hatimare mala eiza igne. 11Leuleghu nau ie, rei tei ruma ke hnuadi suga tharai are fapaapara ra koba, ni fariuriu mala lepo fadi'aza hatimare Jisas. Rei neke tufuni di'atagu ra lui hatimare, eigna teuwae keha fatare rei tei ka keha nau te au ke kosigna gruru igne hiro ra ni fapaapara ra eu hatimare.”
Mae Pol thuturigna naga'e magne teke funu fatutu'ani ie
(Mae khuru 9:1-19; 22:6-16)
12“Kahe fata mae nului pirisire neke gumei harighau rei noilaghi mala tei rei Damaskas mala sagura nanoni te fatutu'aniza Jisas re. 13Mae Nafano Agripa, farihotei aublatha rei megona ne kofiza kahe nabae ka manga ie. Nabae teugne siasigla lui liuza nadafi ie ne sigla falithughau rei ni mae teke tei balugu rei re. 14Gheati ne kafua uthu soru ka glose ie. Agnoni rei ne rogiza kahe naogla ne lepo mei ka rei ka goeghoze Hibru. Magne ne lepo eu'ani, ‘Sol, Sol, ne fahneuwa ghoe te choghaghau rei gnea? Ghoe fite faparagho thaimu lana kate fariuriu magriza nogu gaoghatho rei ie.’
15“Agnoni rei ne ghuhna eu'ani, ‘Ghoe mae iheiuwa, Lod?’
“Euwateuwe Lod ne ho'ilepo eu'ani ka rei, ‘Rei Jisas, mae hei te faparaghau te au ghoe gne. 16Ghose kegra haghe! Rei takle ka ghoe eigna rei fafategho mala kahe mae nogu gloku. Ghoe kaina mala thuturi ka nanonire gnadi goifata tela kofira ghoe gignoa igne ni puhi nate falalase harigho rei kaina re. 17Rei kaina fakahrigho ghoe ka nou nanoni thaimu re. Euwateuwe rei kaina ie fakahrigho lanauwa ka nanoni te theome Jiure. Ire lana nanoni te mala kuri teigho rei tadi re. 18Rei kuru teigho ghoe mala thotora nathadi ihei te au ka romo mala kofiza hatimare u tufuni nabaegna ie, ni mala jifla kokoza hatimare noa noilaghi Satan ie ke leghuza God. Euwateuwe te fatutu'anighau rei hatimare ie, God kaina ie atha koko nakhibodi re. Ni hatimare kaina ie kaheni baludi nanoni teke kulu fafate God re.’
Pol thuturiza noa gloku ie
19“Eigna teugne, mae Nafano Agripa, rei theome huhughuza hna teke takle mei funugna klia ie. 20Ululahu ie rei neke funu lepo harira nanonire Damaskas mala koko puhi te di'are mala leghuza God, ni eira puhi te falalasera tela tufuni ho'ignagnafa teuwe. Ni rei tei neke thuturira ghoeghoze teure Jerusalem, ni ka hnimoto te hui ka provens Judia, ni eulanauwa ka nanoni te theome Jiure. 21Eigna igne hatimare mae Jiure ne sagughau rei ka glamagna Suga Blahi ie, ni fariuriu mala falemeghau rei. 22Ni God toghoghau rei koba lana ghile dufu ka naga'e gignoa igne. Eume rei kegra ani mala thuturiza u tufuni tutu'ani gna Jisas Kraes harira nanoni te hui te bi'o ba te ichoni. Ni rei theome thuturiza kahe puhi te sapla ka hna te lepora mae profetre, ni mae Moses gna hna kaina te dufu mei ie. 23Hatimare neke lepo eu'ani, ‘Kraes gne hatimare kaina falemeza, euwateuwe magne lana nate kulu kegra fapulo ka gleme ie. Ka puhi igne magne kaina atha mei nabaegna God ka mae Jiu, ni ka ihei te theome Jiu teure.’ ”
24Kate lepora te au mae Pol puhi teure te mala tafriza thaigna ie, mae Festas ne fnaja fabi'o eu'ani, “Pol, ghoe la fanoinoli! Ghoe hiohiro koba ka buka au la ghile fanoinoli hui!”
25Mae Pol ne lepo eu'ani ka magne, “Mae Gavana Festas, rei theome fanoinoli. Nogu goeghoze rei ire tutu'ani lui. 26Mae Nafano Agripa la lasera hui puhi te dufiza Jisas re. Eigna teuwae, rei theome mamaza te vevese ka magne ie. Rei laseza hui te magne lasera puhi teure, eigna puhi teure neke theome eira ka hnimoto te polo. 27Mae Nafano Agripa, fatutu'ani ra au nauwa ghoe nodi goeghoze hatimare mae profet re? Uve, te laseza rei ie ghoe fatutu'ani ra hatimare!”
28Agnoni Nafano Agripa ne lepo eu'ani ka mae Pol, “Ihna, ghoe fahuhurughau rei ka hnimoto hmo'eni igne mala fatutu'aniza rei Kraes fugnea?”
29Mae Pol ne lepo eu'ani, “Neubane hnimoto hmone ba hnimoto theve, rei tarai ka God mala fatutu'aniza ghoe Jisas jateula rei. Ni rei taraighamu lanauwa ghotolu nanoni te hui te farogo ka rei ani gignoa igne re, mala fatutu'ani ghotolu jateu rei euwa. Ni cheni te au ka khamegu rei ire lana te theome ngagughaura rei te ari ka ghotolu ie!”
30Agnoni mae Nafano Agripa, Mae Gavana Festas, Benis ni nanoni te hui te hokro te'au baludi re, kegra haghe 31ne jifla ka chogho ie. Hatimare ne vevese eu'ani farithaidi, “Tati the'o kahe nafugna te mala falemeza, ba te mala fasosoloza magne ie, eigna magne neke theome eiza kahe nasapla bi'o.”
32Euwateuwe mae Nafano Agripa ne lepo eu'ani ka mae Gavana Festas, “Jame me theome toreza magne Nafano bi'o gna Rom gne te mala fateza ie meuwe, tati tangomana au lana te sakre fajiflaza magne gignoa igne ka sosolo ie.”
© 2025 SIL Solomon Islands