Mae khuru 25
25
Festas ne kiloza mae Pol
1Agnoni, tholu naga'e ke leghugna te kegra gavana mae Festas ka provens teugne, magne ne jifla Sisaria ne haghe dufu Jerusalem. 2Ka teuwae keha mae nulu pirisi, ni keha mae funeidi hatimare mae Jiu teure ne atha ne mei nodi fathoro gna mae Pol re ka mae Gavana Festas, ni sagroza magne. 3Hatimare ne lepo eu'ani ka magne, “Mae funei, gheati tufuni ngagughamigho ghoe te kuri fapuloza mae Pol gne Jerusalem.” Hatimare lepoza igne, eigna hatimare roghe poopolo mala falemeza mae Pol ka teigna magne ka nabrau ie. 4Ni mae Festas ne lepo eu'ani ka hatimare, “The'o! Mae Pol la au hui ka sosolo Sisaria. Rei ba kaina pulo dufu lanauwa ka teuwae kaina au. 5Eume ghotolu lepora keha nomi mae funei mala tei balugu rei, malani tangomana hatimare te lepoza hna nasapla teke eiza magne ie ka teuwae euwa.”
6Ke leghugna te au Jerusalem fehuni ba salaghi naga'e baludi hatimare ie, mae Festas neke pulo Sisaria. Ka keha naga'e ie, magne ne hokro ka noa hnimoto mala fate ie, euwateuwe lepora keha mae soldiare mala udi meiza mae Pol. 7Kate ruma mei mae Pol ka chogho mala fate ie, hatimare mae Jiu teke soru mei funudi Jerusalem re lao ne kegra falithuza magne. Hatimare ne funu fathoro chuku puhi te di'a hariza mae Pol. Ni hatimare theome tangomana te fatakleza kahe puhi te tutu'ani ka fathoro teure.
8Agnoni, igne hna teke lepoza mae Pol mala tafriza thaigna ie, “Rei theome ke eiza kahe nasapla hariza nodi vetula hatimare mae Jiu, ba hariza Suga Blahi ie, ba hariza mae Nafano bi'o gna Rom ie.”
9Ni mae Festas ngaguza te mala kelitadi hatimare mae Jiure, eu ne ghuhna eu'ani ka mae Pol, “Ihna, ghoe ngagugho te haghe Jerusalem mala fategho rei ka teuwae?”
10Mae Pol ne lepo eu'ani ka magne, “The'o! Rei gignoa igne la kegra hui ke ulumu ghoe ani ka noa fate mae Nafano bi'o gna Rom ie. Eume igne lana nau te thokami ghotolu te mala fateghau rei ie! Ghoe laseza, rei theome eiza kahe nasapla harira hatimare mae Jiure. 11Jame eiza tutu'ani rei kahe puhi bi'o te thokagna mala leme nanoni tagna ie, rei thokagu au te mala leme ie. Ni te theome tutu'ani fathoro te ei harighau rei mae Jiure me, the'o kahe nanoni te au noa noilaghi te mala sakre laoghau rei ka hatimare ie. The'o! Eume rei ngagughauza thaigna mae Nafano bi'o gna Rom te mala fateghau rei ie!”
12Ke leghugna tela kulu thuturi mae Festas baludi noa mae mala fagriu re, magne ne lepo eu'ani ka mae Pol, “Ghoe ngagughoza mae Nafano bi'o gna Rom te mala fategho ie, keli lui, gheati kaina udigho ghoe tei ka magne!”
Mae Pol ke ulugna Nafano Agripa
13Agnoni keha naga'eni ke leghugna igne, mae Nafano Agripa#25:13 Mae Nafano Agripa te thuturiza te au ka nabrau goeghoze igne, mae Nafano Agripa fapalu gnea, thugna mae Nafano Herod Agripa mae teke funei fruniza teke au Israel ka teke falemeza hatimare Jisas ia. Mae Nafano Herod Agripa fapalu gne, funei frunira keha nau ichoni Galili te kilora Abilin ni Trakonaetis. Kofiza “Herod Agripa (fapalu)” ka diksinari. ni greghagna ie Benis, ne tei sighoza mae Festas ka gruru Sisaria. 14Repa au ka teuwae chuku naga'e, euwateuwe mae Festas ne thuturiza Pol ka mae Nafano ie. Magne ne lepo eu'ani, “Kahe mae au ani ka suga sosolo ie, mae teugne, mae Filiks neke theome sakre fajiflaza ka sosolo ie. 15Kate tei rei Jerusalem ie, hatimare mae nului pirisi, ni mae funeidi Jiu teure neke thuturi gna magne ka rei. Hatimare ngagura te mala fate falemeza rei magne.
16“Ni te lepoza rei ka hatimare ie, theome nomi kastom gheati mae Rom te mala fite fate falemeza nanoni ie. Ni vetula ie sakreza nanoni teuwae te mala kegra ke uludi mae te fatoroza re mala tafriza thaigna. 17Kate mei mae Jiure ani ie, rei ne theome tuku, ni ka keha naga'e ie rei ne hokro ka sape mala fate ie, ne kilora keha mae soldiare mala udi meiza magne ka rei. 18Mae Jiure kegra haghe ne fatoroza magne, ni hatimare theome tangomana te lepoza kahe puhi te sapla lui jateula te ghathoza rei ie. 19Ni puhi te lepora hatimare re, gnadi la nodi God thaidi hatimare mae Jiure lana, ni gna kahe mae la leme hui tifa, nahngagna ie Jisas. Ni te lepoza mae Pol ie, mae teugne kahra au lana gignoa igne ie! 20Rei theome laseza hna te mala eiza te mala deiza tutu'ani gna puhi teugne. Eume rei neke ghuhnaza magne, meula me ngaguza tei magne Jerusalem, mala tangomana rei te fateza magne ka teuwae nekeuwa. 21Ni magne toreghau rei mala koikofiza au lana ani Sisaria. Magne ngaguza mae Nafano bi'o gna Rom te mala fateza ie. Agnoni rei ne lepora mae soldiare mala koikofi fakeliza magne, aughile tangomana rei te kuru teiza magne ka mae Sisa, mae Nafano bi'o gna Rom ie.”
22Mae Nafano Agripa ne lepo eu'ani ka mae Festas, “Rei ngagughau lui te rogiza lanauwa goeghozegna magne ie.”
Agnoni mae Festas ne lepo eu'ani ka magne, “Uve, nauthu'u ghoe kaina rogiza goeghozegna magne ie!”
23Ka keha naga'e ie, mae Agripa ni greghagna ie Benis, ne ruma ka suga bi'o mala fate ie, euwateuwe nanonire ghatho bohera lui repa, ne eira chuku nafnata puhi harira, leghuza nodi kastom thaidire mala kilo ulura repa. Hatimare mae funei bi'odi soldiare, ni mae funeigna gruru ie eu ne haghe hokro baludi repa. Euwateuwe mae Festas ne lepora mae soldiare ne udi meiza mae Pol. 24Festas ne lepo eu'ani, “Mae Nafano Agripa, ni ghotolu te hui te kafua au te'au gignoa igne re, ghotolu kofiza hui ma'igne. Nanoni Jiu te hui ani, ni Jerusalem teure ne buiburiza magne ka rei. Hatimare neke aku fabi'oza te mae igne thokagna te leme ie. 25Ni ka gaoghathogu rei ie, mae igne theome eiza kahe nasapla te thokagna mala fate falemeza ie. Ni magne ngaguza mae Nafanogna Rom te mala fateza ie, eume rei neke ghaoghatho mala kuri teiza magne Rom. 26Ni rei the'o kahe puhi te tufuni kohlo te mala riso tei gna magne ka noda mae Nafano bi'o ie. Eume rei gignoa igne ie udi meiza magne ka ghotolu hui, ni tulao ka ghoe mae Nafano Agripa. Ni kate ghuaghuhnaza tati ie, rei kaina au gaoghatho te mala i'ini gna magne. 27Eigna te ghathoza rei ie, theome kohlo te kuri teiza rei ka mae Nafano Sisa ie, eu te theome lepo fatakle ra rei hna nasapla teke eira magne re.”
© 2025 SIL Solomon Islands