Mae khuru 24
24
Mae Gavana Filiks ne farogo ka fathoro teke eiza hatimare hariza mae Pol
1Glima naga'e ke leghugna igne, mae nului pirisi Ananaeas ne soru balugna keha mae funeidi Jiure, ni balugna kahe mae loea nahngagna ie mae Tetelas. Hatimare ne tei dufu Sisaria mala fateza mae Pol ke ulugna mae Gavana Filiks. 2Kate ruma haghe mae Pol hnua suga ie, mae Gavana Filiks ne sakreza mae Tetelas mala vevese. Agnoni mae Tetelas ne funu fatoroza mae Pol ne lepo eu'ani, “Gavana Filiks, gheati tufuni hneahnegha lui te au ka keliphari funu kate kegra funeimu ghoe ie, ni chuku puhi te di'a ka naudare kela nana'a fakohlo ka nou tootogho ghoe te keli lui. 3Gheati ngagughami ra lui puhi teure ka nomi nau te hui hia te hia, ni tegio ra lui teure ka ghoe. 4Ni rei theome ngagughau te thuturi fatheve ie, na euni ghile hongogho ghoe euwa. Rei toregho mala keli harighami ni farogo eu ghoe ka nomi goeghoze re.
5“Eume te kofu falaseza gheati ie, ma'igne kahe mae mala e'ei puhi farihotenidi mae Jiu hia te hia ka nauthoglu igne. Ni magne au mae baubatu ka thotoghei te leghuza mae velepuhigna Naesaret ie. 6-8Magne eulanauwa ngaguza fariuriu fathonaza u Suga Blahi ie, eigna igne au te lokiza gheati mae teugne. Ghuhnaza magne sonighoe, ghoe kaina ie na laseza te goeghoze te fathoro lao gheati ka magne re tutu'ani teuwe.”
9Mae Jiure kahe gaoghatho ne toghoza mae Tetelas ne kafua lepo eu'ani, “Puhi te lepora magne teuware tufuni tutu'ani lui.”
Pol ne ho'ilepo
10Mae funei ie ne eiza kahe falalase ka khamegna re, ka mae Pol mala vevese noa magne. Agnoni mae Pol ne lepo eu'ani, “Uve, Gavana Filiks, rei lasegho ghoe kahe mae mala fate funu tifa mei ka gheati ani Israel. Eume rei tufuni hneahnegha lui te mala tafraghau thaigu kate ho'ilepo ra nodi goeghoze hatimare ke hnuagna fate igne. 11Gignoa igne salei phalu naga'e au lana ke leghugna teke tei rei Jerusalem teke tufru soruza God ie. Meuni ghuhna ra ghoe nanonire meuwe, ghoe kaina laseza au te igne tutu'ani teuwe. 12Mae te fathoroghau rei ire neke theome kofu deighau rei teke magra balugna ihei ke hnua Suga Blahi, ba fa'ei'ei puhi mala di'atagna ihei. Ni rei neke theome eiza kahe puhi ke hnua Suga Blahi ba ke hnua suga tharai ba ahia ka glamagna nau. 13Eume, hna te lepora hatimare re phiapita lana. Hatimare theome tangomana te fatakleza kahe puhi, te tufuni tutu'ani ke ulumu ghoe, gnadi fathoro te eira hatimare harighau rei gignoa igne. 14Ni te lepoza rei ka ghoe ie igne. Rei tufuni leghuza puhigna Jisas lana. Ni puhi igne, theome kohlo ka nathadi hatimare mae Jiure. Rei tufru soruza nodi God mae ku'emi gheati ra ka puhigna Jisas. Ni rei fatutu'ani ra lanauwa gobigna puhi teke i'ini ra hatimare ka noa vetula mae Moses, ni ka nodi buka mae profetre. 15Rei fatutu'ani jateula te eira mae teure euwa, eigna nanoni te hui, te keli ba te di'are, God kaina ke fakahra fapulo ra ka gleme.#24:15 Jateula te lepoza te au ka nodi buka mae Khuru 10:42 ni mae Khuru 17:31 teure, ke leghugna te leme te hui nanonire, God kaina ke fakegra fapulo ra, euwateuwe magne kaina fate ra nanoni te hui re. Agnoni nanoni te di'a te theome fatutu'aniza Jisas re kaina tei ka kha'aghi, euwateuwe nanoni te fatutu'aniza Jisas re kaina au ka nakahra te the'o ka huigna. 16Eume, rei fariuriu koba te mala eiza hna te kohlo ka nathagna God ni ka nathagna nanoni.
17“Ke leghudi chuku finogha teke ghae kokoza rei Jerusalem ie, rei neke atha keha nanugra neke pulo ka teuwae mala toghora nanoni te chuku ni mala faafara ka God. 18Agnoni, ke leghugna te e'ei hui rei puhi te mala ga'e leghuza noa vetula Moses ie, hatimare mei ne kofighau rei ka glama Suga Blahi ie. Ka hnimoto teugne, rei neke theome eiza kahe puhi. Ni ka teuwae theome chuku nanoni lana teke mei krapu falithughau rei ie, ni eulanauwa the'o ki maamagra. 19Ni keha mae Jiu teke mei funudi ka provens Esia re au teke au ka teuwae re. Hatimare au jame te thokadi te mala mei ke ulumu ghoe te mala lepora nasapla te eira rei re. 20Ne the'o nani, ghuhna ra mae funei ire, mala lepora hatimare hna nasapla teke kofira hatimare ka teke kegra rei ke uludi mae mala fate Jerusalem tifa ra. 21Ni igne kahe puhi teke lepoza rei ke uludi mae mala fatere, ‘Ghotolu fateghau rei gignoa igne eigna te fatutu'ani rei ie, God kaina fakahra fapulo ra nanoni teke leme hui ra!’ Jame goeghoze ire au lana te ngagura hatimare fateghau rei ie.”
22Mae Gavana Filiks kulu laseza hui thuturigna Jisas gne. Agnoni magne ne fahuhuiza fate ie ne lepo eu'ani, “La mei mae Lisias, mae funei bi'odi mae soldiare ame lepo fatakle na rei ho'ilepo gna puhi igne euwa.” 23Magne ne lepo hariza kahe mae funeidi hatimare mae soldiare mala koikofi fakeliza mae Pol. Ni lepoza magne mala fasagliza mae Pol khata hnimoto ichoni, mala blusera kheragna magne re te mei sighoza ni guhariza hna te thokagna magne ie.
Mae Pol ne thuturi harira mae Filiks ni khetogna ie
24Keha naga'e ke leghudi teure, mae Gavana Filiks neke pulo mei balugna khetogna ie Drusila, gne'e kahe nani Jiu. Agnoni, mae Filiks ne kuri teira keha mae mala udi meiza mae Pol. Mae Filiks ni khetogna ie ne farogo ka mae Pol kate thuturigna puhi te mala fatutu'aniza Jisas Kraes. 25Ni mae Filiks ne hmau noa lui kate thuturiza mae Pol nakahra te kohlo ie, ni puhi te mala koikofi fakelira nakahradare, ni naga'e God kaina te fate ra nanoni te hui re. Agnoni mae Filiks ne lepo eu'ani ka mae Pol, “La kohlo hui, tei sonilaghoe. Ne tangomana nani, rei kaina ke kilogho au ghoe ke leghu.” 26Ni mae Filiks eulanauwa ngaguza mae Pol te gulao nanugra polo ka magne, malani tangomana magne te fajiflaza Pol ka sosolo ie euwa. Eume chuku fata mae Filiks toreza Pol mala tei thuturi balugna.
27Ni mae Filiks ne nana'aza mae Pol ka suga sosolo ie, eigna magne ngaguza te kelitadi hatimare mae Jiure. Ni ke leghu phalu finogha, mae Posias Festas neke hno'igna mae Filiks mala funeigna provens teuwae.
© 2025 SIL Solomon Islands