Mae khuru 23
23
1Agnoni mae Pol, ne kofututu ka mae mala fatere ne lepo eu'ani, “Tabusignagura, rei theome mamaza nogu ke ulugna God, eigna funu tifa te ghile dufiza gignoa igne, rei eira koba lana mei gobigna puhi teke lepora magne mala eira tati tekeu re.” 2Ananaeas, mae nului pirisi ie, rogiza igne ne lepo ka mae te kegra te au kehreagna mae Pol re mala potaza naflogna magne ie. 3Pol ne lepo eu'ani ka mae Ananaeas, “God kaina potagho lanau ghoe! Ghoe jateula babara te di'a hui ni ke peda vegha lana teu ia euwa! Hokro ka teuwae sonighoe mala fateghau rei leghuza u vetula ie. Ni ghoe thaimu ba huhughuza la vetula ie, eigna blahi lui ka vetula ie te lepora ghoe mae ire te mala mei potaghau rei ie.”
4Mae te kegra kehreagna mae Pol re ne lepo eu'ani, “Ei! Ghoe theome tangomana te lepo jateula teuwae teu ka noa nulu pirisi God ie! Ghoe gne lepo fapariza magneu gne!”
5Mae Pol ne lepo eu'ani, “Tabusignagura, rei theome kofu laseza ne mae nulu pirisi magne teuwe. Tutu'ani, i'ini te blahi ie lepo eu'ani, ‘Tovi lepo fadi'aza mae ihei te mala funei frunira nou nanonire.’ #23:5 Eksodas 22:28.”
6Ni kate laseza Pol te mae mala fatere au ka phalu thotoghei, keha ie hatimare mae Sadiusi ni keha ie mae Farisi teure, magne ne lepo eu'ani ka hatimare, “Tabusignagura, rei kahe mae Farisi, euwateuwe mae magu rei ie mae Farisi lanauwa! Rei tufuni fatutu'aniza te God kaina ie fakahra fapulo ra nanoni teke leme hui re. Eigna igne au te fateghau rei ghotolu gignoa igne!” 7Kate lepoza mae Pol igne, kahe magra ne fufunu haghe farihotenidi hatimare mae Sadiusi ni mae Farisi teure. Agnoni thotoghei mae mala fatere ne fota phalu. 8Eigna mae Sadiusire te fatutu'aniza ie, ke leghugna gleme ie nanonire theome tangomana teke kahra fapulo, ni the'o kahe engjel ba kahe Tharunga. Ni mae Farisi re ne kafua fatutu'ani ra tholu puhi teure.
9Agnoni kahe nafnaja bi'o ne eiza farihotenidi phalu thotoghei ire. Keha mae velepuhigna vetula noa mae Moses ka mae Farisi re kegra haghe ne lepo faheta eu'ani, “Gheati theome kofiza kahe nasapla ka ma'igne! Kihnana eu kahe engjel ba kahe Tharunga teke lepo mei ka magne ie!” 10Fapoapola igne ne ghile fufunu kahe magra bi'o, euwateuwe mae funei bi'odi mae amire hmau noa, na eu mei hatimare kohri fadi'aza mae Pol. Agnoni magne ne lepora noa mae mala magra re soru udi famaghaniza Pol ka hatimare mae mala fatere, mala udi fapuloza magne ka sugadi hatimare mae amire.
11Ka bongigna teugne, Lod mei ne kegra kehreagna mae Pol ne lepo eu'ani, “Pol, tovi hmau! Ghoe neke thuturi eigu rei ani Jerusalem, ni ghoe kaina ie eulanauwa eiza teugne Rom.”
Mae Jiure ne roghe mala falemeza mae Pol
12Ka boibongi fufughogna keha naga'e ie, keha mae Jiure ne roghe polo mala falemeza mae Pol. Agnoni hatimare ne eiza kahe na'alepo te hneta mala theome ngamu ni ko'u eu au ghile falemeza hatimare mae Pol. 13Hatimare liuza phalututu mae teke eiza u gaoghatho igne. 14Ke leghugna igne hatimare tei ne kofira mae pirisi ulu ni mae funei teure, ne lepo eu'ani, “Gheati neke eiza kahe na'alepo bi'o mala theome ngamu ni ko'u eu au ghile falemeza gheati mae Pol! 15Eume igne hna te ngagughamiza gheati te mala eiza ghotolu ie, ghotolu kaina fatei grorogo ka mae funei ulugna mae amire, mala udi meiza mae Pol ka ghotolu ani. Lepo ka magne te ghotolu ngagughamu teke ghuhnazani mae Pol gna keha puhi teuwe. Gheati na tarabana au mala falemeza magne ame mei dufuna magne ani euwa.”
16Ni thugna ma'ane greghagna mae Pol ie ne rogiza groghe te eiza hatimare igne, ghoseni ne tei ka sugadi mae amire ne lepo ka mae Pol gna puhi teugne.
17Agnoni Pol ne lepo eu'ani ka kahe mae funeidi hatimare mae amire, “Udiza mae hnaghevalu igne tei ka mae funei bi'o ie. Eigna magne au kahe grorogo malagna magne.” 18Agnoni mae funei ie udiza ne tei nebugna mae Pol gne ka mae funei bi'o ie.
Mae funei ie ne lepo eu'ani ka mae funei bi'o ie, “Pol, mae te sosolo ia te lepoghau rei te mala udi meiza mae hnaghevalu igne ka ghoe gne, eigna magne ngaguza te thuturi harigho ghoe kahe puhi.”
19Agnoni mae funei bi'o ie ne udiza mae hnaghevalu gne ne tei ka hnimoto te nagou ie. Mae funei bi'o gne ne ghuhna eu'ani, “Hna te ngagugho thuturiza ghoe ka rei ie?”
20Mae hnaghevalu gne ne lepo eu'ani, “Hatimare mae Jiure, ngagura te toregho ghoe mala sakreza mae Pol gne mala udi soruza ka hatimare mae funei mala fatere nauthu'u. Hatimare kaina ie mugnagho ghoe mala ke ghuhnazani Pol keha puhi neigna magne teuwe. 21Ni tovi fatutu'ani ra hatimare, eigna liuza phalututu mae kaina polo au mala falemeza mae Pol. Hatimare la kulu eiza hui kahe na'alepo bi'o mala theome ngamu ni ko'u eu au ghile falemeza hatimare magne! Gignoa igne hatimare tukiza au lana goeghozemu ghoe ie.”
22Mae funei bi'o ie ne lepo eu'ani faheta ka magne, “Tovi ke thuturiza ka iheina gna puhi te mei lepoza ghoe ka rei igne.” Agnoni ke leghugna igne, magne ne kuri fapuloza mae hnaghevalu gne.
Hatimare kuri teiza Pol ka mae Funei Filiks
23Agnoni, mae funei bi'o ie ne kilora phalumae funeidi hatimare mae soldia, ne lepo eu'ani ka phalumare, “Ghopa kakaliti phalu gobi soldia mala tei Sisaria, tahngi hniani nabongi. Baludi fitu salaghi mae soldia te mala saghe ka hose, ni phalugobi mae soldia te mala magra ka goru. 24Ni atha keha hose mala saghe mae Pol. Rei ngagughaughamu ghopa te koikofi fakeliza Pol ghile dufu ka mae Gavana Filiks.”
25Mae funei bi'o ie ne i'ini kahe letasi, ne lepo eu'ani,
26Harigho ghoe mae Gavana Filiks.
Rei mae Klodias Lisias te i'iniza letasi igne.
Rei kiloulugho ghoe.
27Mae igne neke atha hui mae Jiure neke thatai faleleme. Ni rei neke tei baludi nogu mae soldiare neke fakahriza magne ka hatimare, eigna te rogiza rei ie, mae teugne kahe maegna Rom. 28Rei ngagughau te laseza nefahneuwa mae Jiure ne tho'anodiza mae igne. Agnoni rei udiza magne neke tei ka mae mala fatere. 29Ni hna te kofiza rei ie, fathoro te eira mae Jiure gnadi nodi vetula thaidire lana. Eume the'o kahe fathoro te thokagna te mala sosolo ba te mala falemeza tati magne ie. 30Ni hna te rogiza rei ie, hatimare roghe polo mala falemeza magne, eigna teuwae rei ghoseni kuri ariza magne ka ghoe gignoa igne. Rei la lepo harira hui mae te tho'anodiza magne re mala ari hatimare fateza puhi teugne ka ghoe.
31Agnoni hatimare mae soldiare ne leghuza hna te lepoza mae funei bi'o gne ne udiza mae Pol bongigno ne tei dufu ka gruru Antipatris. 32Ka keha naga'e ie, mae teke saghe ka hosere ne tei balugna mae Pol Sisaria. Euwateuwe keha mae soldia teke zaoza'o lana re neke pulo ka sugadi mae amire Jerusalem. 33Kate tei dufu ka gruru bi'o Sisaria ie, mae te saghe ka hosere ne gulao letasi ie ka mae Gavana Filiks. Ke leghugna igne, hatimare ne sakre laoza mae Pol ka khamegna magne. 34Agnoni, mae Gavana Filiks ne ijuijuza letasi gne ne ghuhna eu'ani ka mae Pol, “Ghoe maemu ka provens hiani nauia?” Pol ne ho'ilepo eu'ani, “Rei maegu ka provens Silisia.” 35Euwateuwe mae funei gne ne lepo eu'ani ka magne, “Kate mei ani mae te tho'anodigho ghoe re, ame kaina rogiza na rei nou puhi ghoe gne euwa.” Ke leghugna igne, magne ne lepo ka mae soldiare mala udi teiza mae Pol ni koikofiza fakeli eu magne ka suga bi'o te au mae gavana teke e'ei mae Nafano Herod ie.
© 2025 SIL Solomon Islands