Mae khuru 22
22
1Agnoni mae Pol ne lepo eu'ani, “Tabusignagu ra ni magu ra, farogo mei ka rei mala ke ho'ilepo ra rei nomi goeghoze ghotolure!”
2Kate rogiza hatimare te ghoeghoze mae Pol ka nodi goeghoze hatimare mae Hibru re, hatimare te hui re ne au famuu.
Agnoni mae Pol ne lepo eu'ani, 3“Rei kahe mae Jiu, ni rei neke kahra ka nau Tasis ka provens Silisia, euwateuwe bi'o haghe ani Jerusalem. Mae funei teke fagriughau rei ie mae Gamaliel, euwateuwe magne neke fagriu fakelighau rei mala leghuza nodi vetula mae ku'edara. Rei tufuni heta lui te mala faduluza God ka gobigna puhi te eira rei re, jateula te eiza ghotolu gignoa igne euwa. 4Rei neke fapaapara ra lui nanoni te leghuza puhi te mala fatutu'aniza Jisas gne. Rei sagura ma'ane ni ga'ase teure neke koko lao ra ka suga sosolo ie. 5Mae nului pirisi ni hatimare mae thotoghei funei mala fatere tangomana te lepora ka ghotolu hna te lepora rei ire tutu'ani teuwe, eigna hatimare thaidi au teke i'ini letasi teke atha teke tei rei ka kheradi te au ka nau Damaskas re. Eume rei neke tei sagura nanoni teure mala udira ke pulo mei ani Jerusalem mala fapaapara ra.”
Mae Pol ghoeghoze gna naga'e teke funu fatutu'ani ie
6“Farihotei aublatha kate tei thata rei Damaskas ie, kahe nabaegna klia te tufuni siasigla lui megona ne bae falithughau rei. 7Rei uthu ne soru ka glose ie, agnoni rei ne rogiza kahe naogla ne lepo eu'ani, ‘Sol, Sol, ne fahneuwa ghoe te choghaghau rei gnea?’
8“Rei ne ghuhna eu'ani ka magne, ‘Mae funei, ghoe mae heiuwa?’
“Magne ne lepo eu'ani ka rei, ‘Rei Jisas gna Naesaret, mae ihei ghoe te choghaza ie.’ 9Mae teke tei balugu rei re, hatimare ne kofiza u nabae ie. Ni hatimare theome rogiza fakeli goeghozegna magne ie euwa.
10“Euwateuwe rei neke ghuhna eu'ani ka magne, ‘Hna nate mala eiza rei ie, Lod?’
“Magne ne lepo eu'ani, ‘Kegra haghe tei Damaskas. Kahe mae ka teuwae kaina ie na lepo harigho ghoe gobigna puhi teke kulu ghaoghaho God mala eira ghoe teure.’ 11Rei theome tangomana te kokofu ie, eigna nabae te tufuni siasigla lui ie ne fadoaghau rei. Agnoni mae teke tei balugu rei re ne batughau rei ne tei dufu Damaskas.
12“Ka teuwae kahe mae nahngagna ie Ananaeas. Magne leghuza lui noa vetula mae Moses, ni mae Jiu te hui te au Damaskas re ghatho boheza lui magne. 13Magne mei ne kegra kehreagu rei ne lepo eu'ani, ‘Mae kheragu ia Sol, ke kokofu fapulo sonighoe nathamure!’ Ka hnimoto teuwae lana rei neke kokofu ne kofiza magne.
14“Mae Ananaeas ne lepo eu'ani ka rei, ‘Nodi God mae ku'edare neke kulu fafategho hui tifa, mala laseza ghoe hna te ngaguza magne ie. Ni mala kofiza ghoe mae te kiloza “Mae gloku te kohlo lui.” Ni mala rogira lanauwa ghoe noa goeghoze te lepo mei ka ghoe ra. 15Ghoe kaina noa mae mala thuturi magne, mala thuturi ka nanoni te hui re hna teke kofira ba teke rogira ghoe re. 16Eume tukiza hnae ghoe ia? Kegra haghe, kiloza nahngagna Lod ni siublahi mala lumi koko God nakhibomure.’
Noa khiokilo Pol mala ghaghazala ka mae bongihehe
17“Ke leghugna igne, rei neke pulo Jerusalem. Kahe naga'e kate tarai te au rei ka Suga Blahi ie, rei ne kofiza kahe mifi. 18Rei kofiza Lod ne lepo eu'ani ka rei, ‘Faghose! Ghoe gignoa igne lana jifla ani Jerusalem, eigna nanonire kaina tho'anodi farogo ka hna te lepora ghoe eigu rei ie.’
19“Ni rei ne lepo eu'ani, ‘The'o, Lod. Eigna nanonire laseza hui teke tei rei ka suga tharai te hui te mala sagura ni anira teu nanoni teke fatutu'anigho ghoe re. 20Kate falemeza hatimare Stivin, nou mae mala thuturi harigho ghoe ia, rei neke au lanauwa ka teuwae neke koikofira nodi pohe mae teke falemeza magne re, eigna rei neke ngagughauza la hna teke eiza hatimare ie.’
21“Ni Lod ne lepo eu'ani ka rei, ‘Ghoe jifla ani gignoa igne! Rei kaina kuru teigho ghoe kate tifa ka chuku nau ahia te au nanoni te theome Jiure.’ ”
22Nanonire farogo ne au ka mae Pol ne ghile lepora magne goeghoze teure. Agnoni nanonire ne funu aku eu'ani fabi'o, “Falemeza! Ma'igne theome thokagna te kahra!”
23Hatimare di'a tadi lui ne aku fabi'o. Hatimare eulanauwa koko nodi phoko u'uru re ni kokohaghe glose ka manga ie. 24Agnoni mae funei bi'odi mae amire ne lepo ka mae mala magra re mala udiza mae Pol tei ka nodi suga thaidi ie. Magne eulanauwa lepora hatimare mala aniza mae Pol, ni ghuhnaza magne mala laseza hna te di'a tadi nanonire te aku fabi'o ie. 25Kate soliza mala aniza Pol teu hatimare ie, magne ne ghuhna eu'ani ka kahe mae bi'odi mae soldia te kegra te'au kehreagna magne ie, “Ihna, kohlo au lana ka noda vetula tati mae Rom re, te anighau rei ghotolu kate theome fateghau na te'au rei gnea?”
26Kate rogiza igne, mae funeigna ami ie ghose ne tei ka mae funei ke bi'o ie ne lepo eu'ani, “Hna te eiza ghoe gnea? Ma'igne maegna Rom gne!”
27Eume, mae funei ke bi'o ie tei ka mae Pol ne ghuhna eu'ani, “Ihna, ghoe maemu Rom tutu'ani gnea?”
Pol ne lepo eu'ani ka magne, “Uve, rei maegu Rom!”
28Mae funei bi'o ie ne lepo eu'ani ka mae Pol, “Rei eulanauwa, maegu Rom. Ni rei neke foli sileni bi'o lui ame kiloghau nate maegu Rom teuwe euwa.”
Ni mae Pol ne lepo eu'ani ka magne, “Rei neke kahra mei tufuni maegu Rom lana.”
29Kate rogiza hatimare te Pol gne maegna Rom teuwe, mae te tarabana mala ghuhnaza mae Pol re ne ghose ngigru famaghani ka magne. Ni eulanauwa mae funei bi'o ie ne hmau noa lui, eigna magne la soliza hui mae Pol.
Mae Pol ke uludi mae mala fatere
30Agnoni, mae funei bi'o ie ne ngaguza lui te mala laseza ne fahneuwa maedi Jiure te eiza puhi teugne ka mae Pol ie. Eume ka keha naga'e ie, magne ne atha koko cheni teke soliza hatimare mae Pol ie. Euwateuwe mae funei bi'o ie ne lepora hatimare mae pirisi ulu, baludi mae mala fatere mala faudu. Agnoni, magne ne udiza mae Pol ne soru mala ho'ilepo ra magne nodi ghuaghuhna hatimare re.
© 2025 SIL Solomon Islands