Mae khuru 1
1
1Harigho ghoe mae kheragu ia Teofilas. Uve Teofilas, ka buka teke kulu i'ini rei tifa ia, rei neke i'ini ra hna puhi teke eira ni fagriura teu Jisas ka nanonire funu ka naga'e teke fufunu gna magne noa gloku ie 2ghile dufu ka u naga'e God teke atha hagheza magne klia ie. Ame haghena klia teuwe, Jisas neke kulu lepo ka noa noilaghi Tharunga te Blahi hna te ngaguza mala eira noa mae khuru teke fafate magne re. 3Ke leghugna teke leme ni ke kegra fapulo teu ie, Jisas neke takle ka hatimare chuku fata ni ka chuku puhi ke hnuadi phalututu naga'e te magne ne tufuni kegra fapulo teuwe. Hatimare ne kofu nathadiza Jisas gne, euwateuwe magne ne thuturiza ka hatimare gna nakahra God te funei fruniza ie. 4Kahe fata kate ngamu baludi noa mae khurure, Jisas ne lepo faheta eu'ani ka hatimare, “Ghotolu tovi jifla kokoza na au Jerusalem. Ghotolu tukiza hna teke na'alepoza mae Magu ie, jateula teke lepo harighamu rei ia. 5Mae Jon neke fasiublahighamu ghotolu ka u khuma'i lana ni keha naga'e ke leghugna teugne, God kaina fasiublahighamu ka u Tharunga te Blahi.”
God atha hagheza Jisas klia
6Kate kafua krapu te au mae khurure balugna Jisas ie, hatimare ne ghuhna eu'ani ka magne, “Lod, gignoa igne ghoe kaina ke tusu fapulo noilaghi ka nanonidi Israel re mala tufuni funei frunira hatimare thaidi ka nauthoglu gne?”
7Jisas ne lepo eu'ani ka hatimare, “Theome nomi puhi ghotolu te mala lasera u naga'e ba u hnigra teke na'a soru mae Magu ka u noa noilaghi thaigna ie. 8Ni ka naga'e soru meigna Tharunga te Blahi gne ka ghotolu ie, ghotolu kaina au nomi noilaghi mala thuturi gnagu rei ani Jerusalem, ni Judia fate'o, ni Samaria fate'o, ghile dufu ka nau te hui ka nauthoglu igne.”
9Ke leghugna te lepoza magne igne, God ne atha hagheza magne klia kate kafua kofututu te au hatimare ie, agnoni kahe gromo ne tooku fruniza magne ka u nathadi hatimare re.
10Kate kafua kofututu te au hatimare haghegna Jisas ka manga ie, phalu engjel te fahaghe phoko vegha megona ne kegra kehreadi hatimare. 11Phalumare ne lepo eu'ani ka hatimare, “Ghotolu maemi Galili ra, gna hna ie te kegra kofu haghe te au ghotolu ka manga ie gnea? Jisas teke atha haghe God klia ie kaina ke pulo mei jateula te kofiza ghotolu ka haghegna magne klia ie euwa.”
Mae mala ke hno'iza Judas
12Agnoni ke leghugna igne, mae khuru re ne tei kokoza gukhu te kiloza Gukhu Gazu Oliv ie, neke pulo Jerusalem. Hnimoto teugne theome tei tifa, thokagna kahe kilomita lana. 13Kate dufu Jerusalem ie, hatimare kohlo ne tei ka kahe nachogho klia, ka kahe suga te krapu koba hatimare ie. Ni ka teuwae:
mae Pita ni Jon, Jems ni Aduru,
Filip ni Tomas,
Batolomiu ni Matiu,
Jems thugna mae Alfius, ni Saemon, kahe mae ka thotoghei te kiloza Zilot, mae te ngagura magra mala fajiflara mae soldiadi Rom re Israel, ni Judas thugna mae Jems.
14Hatimare te hui ne kafua salofaudu ni tarai eu koba baludi goro ga'ase re, ni Mere dogna Jisas, ni hatimare mae tabusigna Jisas re.
15Keha naga'e ke leghudi ire, thatai kahe gobi varadaki nanoni khilo'au krapu fodu ne au. Agnoni mae Pita kegra haghe farihotenidi hatimare ne lepo eu'ani, 16“Uve, kheragu ra, u goeghoze teke lepoza Tharunga te Blahi ie ka mae Devet gna mae Judas tifa ia, la tutu'ani gignoa igne ie. Eigna Judas gne neke baubatu ra mae ihei teke tei saguza Jisas ia. 17Mae Judas gne kahe mae kherami gheati, tifa ie magne neke loku balumi gheati.”
18Judas neke fofoli kahe hnimoto glose ka nanugra teke atha magne ka puhi di'a teke eiza magne ie. Ni ka hnimoto glose teugne magne uthu fajoima ne soru brisa thi'agna ie ne tofa ka glose ie butugnare. #1:18 Thitini mae Judas gne jame neke froro jateula te lepoza ka St Matiu 27:3-8, ni ke leghugna teuwae dogho teke froro magne tagna gne kusu. Agnoni thonogna magne ie ne utu ne soru ne brisa thi'agna ie jateula la te lepoza te au ka nabrau goeghoze igne. 19Nanoni te hui Jerusalem re rogiza hna te eiza mae Judas gne, ne kiloza hnimoto glose teugne ka nodi goeghoze thaidi ie, “Akeldama,” gaoghathogna ie “U hnimoto dadara.”
20Mae Pita ne lepo eu'ani, “Ka u buka Sam ie ne lepo eu'ani,
“ ‘Suga gna magne ie mala gou,
ni kaina the'o kahe mae te au ke hnuagna.’#1:20 Sam 69:25.
Eulanauwa keha noa goeghoze ie ne lepo eu'ani,
“ ‘Kaina kahe mae nate hno'iza magne ie.’#1:20 Sam 109:8.
21-22Eigna igne, gheati mae khuru re na fafateza kahe mae mala ke hno'igna Judas, mala loku balumi ni thuturiza ka nanonire gna u kegra fapulogna noda Lod Jisas ie. Mae te mala fafateza gheati ie, kahe mae teke au fatheve balumi gheati funu ka naga'e teke siublahi noda Lod Jisas dufu ka u naga'e teke tei kokoghita tati magne ie.”
23Eume, hatimare neghathora phalumae. Kaheni mae Josep te kiloza Basabas ba Jastus, ni keha mae ie mae Matias. 24Agnoni ke leghugna igne, hatimare ne kafua tarai ne lepo eu'ani, “Lod, ghoe kafua lasera gnagnafadi nanoni te hui re. Fafate harighami, mae ihei ka phalumae ire 25nate atha sape gna mae khuru Judas tela jifla kokoza hui gloku igne, ni la tei hui ka nau ahia te thokagna magne ie.” 26Ke leghugna igne, hatimare ne nanaeru khale, euwateuwe nodi fafate hatimare ie ne soru ka mae Matias. Eume hatimare ne fafateza mae Matias gne mala kahe mae khuru magne baludi keha salei kahe mae re.
© 2025 SIL Solomon Islands