Mae khuru 19
19
Pol ne au Efesus
1Kate au te'au mae Apolosi ka gruru Korin ie, mae Pol leghu nabrau ne pohlo ne tei dufu Efesus. Magne ne kofira keha nanoni te fatutu'ani re ka teuwae. 2Pol ne ghuhna eu'ani ka hatimare, “Ihna, kate funu fatutu'ani ie, ghotolu athiza nau Tharunga te Blahi ie?”
Hatimare ne lepo eu'ani ka magne, “The'o, gheati theome rogiza kihnana gna u Tharunga te Blahi ie!”
3Agnoni mae Pol ne ghuhna eu'ani, “Hna nafnata siublahi te siublahi ghotolu ie?”
Hatimare ne lepo eu'ani ka magne, “U siublahi teke thuturiza mae Jon Siublahi tifa ia.”
4Pol ne lepo eu'ani ka hatimare, “Uve, kate siublahi ra nanonire, mae Jon neke lepo harira nanonire mala ho'ignagnafa ni nakahra. Ni magne neke lepo harira nanonire mala fatutu'aniza mae ihei nate mei ke leghugna magne ie. Mae teugne lana Jisas ie.” 5Kate rogiza igne, hatimare ne siublahi ka nahngagna Lod Jisas. 6Agnoni mae Pol ne ta'ofi ra, euwateuwe hatimare ne athiza u Tharunga te Blahi ie. Kate soru mei Tharunga te Blahi ie te au ka hatimare ie, hatimare ne funu vevese ka keha ghoeghozeni, ni thuturiza goeghozegna God ie. 7Hatimare salei phalumae kaputudire.
8Jame tholu hnigra, mae Pol ne tei koba ka suga tharai ie ne lepo faheta lui ka nanonire. Magne theome ke hmau ne thuturi ka nanonire mala laseza u nakahra God te funei fruniza ie. 9Ni keha mae Jiure ne phaupatu lui ne tho'anodi fatutu'ani ra noa goeghoze Pol re. Euwateuwe hatimare lepo fadi'aza lanauwa puhi te mala leghuza Jisas ie. Agnoni mae Pol ne jifla ka suga tharai ie baludi nanoni khilo'au re, ne tei ka noa suga sikolu mae Taeranas. 10Ka teuwae magne ne fagriura leuleghu naga'e thokagna phalu finogha. Eume mae Jiu ni Griki eu te au ka provens Esia re ne kafua rogiza goeghozegna Lod ie.
11God ne gulao hariza mae Pol noilaghi bi'o mala eira keha kofunaboboi. 12Keha nanonire ne atha susurunavi ba pohe te patoza thonogna mae Pol re tei na'a lao ke kliadi nanoni te fogra re. Kate eira hatimare ire, nanoni te fogra re ne keli fapulo, euwateuwe na'itu teke au ka nanonire ne pelo.
13Keha mae Jiure eulanauwa ne tei fate'o ka nanoni te fogra re mala fariuriu brue fajiflara na'iture ka nahngagna Lod Jisas. Hatimare ne lepo eu'ani, “Ka nahngagna Jisas te thuturiza mae Pol ie, rei lepo faheta harigho mala jifla mei!” 14Kahe fata, hatimare fitu mae thugna kahe mae nodi pirisi ulu mae Jiu, nahngagna ie mae Skeva, ne fariuriu eiza lanauwa igne. 15Ni na'itu ie ne lepo eu'ani ka hatimare, “Rei laseza Jisas, ni rei eulanauwa laseza mae Pol. Ni rei theome laseghamu ghotolu! Ghotolu mae heiuwa?” 16Agnoni mae te au na'itu tagna igne ne kegra haghe ne magri fapulo ra hatimare, eigna magne mae ke hnetadini hatimare hui. Magne ani ra ne ghile frena hatimare, euwateuwe magne ne rereku koko nodi pohere. Agnoni hatimare pelo sosole ne jifla ka suga ie.
17Kate rogiza thuturi igne, nanoni Jiu ni Griki te au ka nau Efesus re ne kafua hmau nodi lui ne ghatho boheza nahngagna Lod Jisas. 18Agnoni chuku nanoni te fatutu'ani re ne funu ruarutha fajifla nakhibodi re ke uludi keha nanonire ni kafua lepora puhi te di'a teke eira thaidi tifa re. 19Chuku nanoni teke lase faleme nanoni tifa ie, hatimare saosalo nodi bukare ne mei thutunu fahui ke uludi nanoni te hui re. Kate a'ahe hatimare nanugra teke fofolidi buka teure, ne dufiza glimafulu thogha nabrusu nanugra siliva.#19:19 Praes gna buka igne tufuni haghe lui, jame dufiza au fofoligna kahe mae te loku 200 gobi finogha ie. 20Eigna ka puhi te noilaghi lui ire, thuturigna Lod gne ne tei fate'o hia te hia ka nau te hui re. Euwateuwe, chuku nanonire ne fatutu'aniza Jisas.
Magra bi'o Efesus
21Ke leghudi te eira puhi ire, mae Pol ne au gaoghatho#19:21 Ka keha transleson ka Buka Blahi gne lepoza au te Tharunga te Blahi gne au te batuza mae Pol te tei Jerusalem ie. hneta mala tei dufu ka phalu provens te kilora Masidonia ni Akaia teure. Euwateuwe ke leghu, magne ngaguza teke tei dufu Jerusalem. Ni magne ne lepo eu'ani, “Ke leghugna te tei dufu rei ka tholu nau ire, rei kaina ie ke dufu lanauwa Rom.” 22Agnoni Pol ne kulu kuri teira Timoti ni mae Erastas, phalu noa mae tootoghore, mala tei Masidonia. Ni magne thaigna neke au fapulo ne'au khata hnimoto ka provens Esia.
23Ka hnimoto teugne, kahe maamagra ne haghe ka nau Efesus gna puhi te mala fatutu'aniza Jisas. 24Kahe mae ka teuwae, nahngagna ie Demitrias. Noa gloku magne ie mala e'ei suga ichoni ka siliva, jateula sugagna mumuzu god ga'ase Atemis. Ni mae te loku ka gloku igne hatimare tufuni nadedei nodi lui. 25Demitrias ne kilofaudu ra noa mae gloku re, ni keha mae lanauwa te loku ka nafnata gloku igne. Magne ne lepo eu'ani ka hatimare, “Uve kheragura, ghotolu laseza te ka nafnata gloku igne tati fua nadedei noda lui. 26Ni ghotolu la kofira ni rogira eu thaimi hna te eiza mae Pol gne. Magne baubatu fadi'ara lui nanonire, theome ka tati ani Efesus lana, ni ka provens fate'o Esia. Eigna magne ne lepo eu'ani, ‘Nafnata god te hui te e'ei ka khame nanoni ire theome tutu'ani lana.’ 27Meuni theome faghuani meu tati ka hna te eiza magne ie, nanonire kaina ie na lepo fapariza noda gloku tati gne. Keha ie teuwe, nanonire kaina theome ghatho boheza sugagna mumuzu god Atemis gne. Ni nanonire kaina ie na theome kilo uluza, euwateuwe gne'e kaina ie na the'o nafugna lana. Ni nanoni te hui ka provens Esia ni ka nauthoglu gne tufru soruza Atemis!” Euwateuwe, goeghozegna mae Pol gne kaina tufuni choghaza nahngagna noda god te keli tati Atemis gne euwa.
28Kate rogiza nanonire te lepo eu'ani mae Demitrias ie, hatimare di'a tadi lui ne aku fabi'o, “Atemis, god gna Efesus ie fua ulu lui!” 29Agnoni maamagra teugne ghoseni ne tei dufu hia te hia ka gruru bi'o ie. Agnoni nanonire ne sagu ra mae Gaeas ni mae Aristakas, phalu maedi ka provens Masidonia teke tei tei balugna mae Pol re. Hatimare ghose ne kohri ra ne tei ka hnimoto te mala krapu ie. 30Pol ne ngaguza ruma mala vevese ke hnuagna nakrapu ie, ni nanoni khilo'au re ne fanotoza magne. 31Keha mae funei ka provens teugne kheragna keli mae Pol. Hatimare eulanauwa ne fatei grorogo ka magne mala tovi tei ruma magne ka hnimoto te mala krapu ie.
32Ka hnimoto teugne nanonire ne theome ke moana ne fa'ihora lui. Kahe thotoghei ne akuza nauwa kahe puhi, ni keha thotoghei ie ne akuza keha puhini eu hatimare, eigna chuku nanonire theome laseza hna te krapuza te au hatimare ka teuwae ie. 33Mae Jiure ne huju fa'uluza mae Aleksada ke uludi nanonire mala vevese magne. Agnoni, magne ne e'ei kahe falalase ka khamegna re mala farogo fakeli nanonire, eigna magne ngaguza te ho'ilepo ra nodi goeghoze nanonire. 34Ni kate kofu falaseza hatimare te mae Aleksada gne kahe mae Jiu teuwe, hatimare ne kafua fagra fabi'o thokagna phalu aowa, ne lepo eu'ani, “Atemis, god gna Efesus ie fua ulu lui!”
35Agnoni mae sekreteri gna nau bi'o gne ne fanoto ra nanonire ne lepo eu'ani, “Ghotolu maemi Efesus! Nanoni te hui ka nauthoglu gne la ulu laseghita hui tati nau Efesus gne lana te kalitiza te'au sugagna Atemis bi'o gne. Euwateuwe nanonire laseghita lanauwa tati te kalitiza thina te au mumuzu gna gne'e teke uthu soru funugna klia ie. 36Theome tangomana kahe nanoni te lepoza ne theome tutu'ani igne teuwe. Eume, au famuu lana sonighotolu, tovi eiza kahe puhi te tufuni di'a. 37Ghotolu au teke udi mei ra phalumae ire ani ie, ni phalumare theome ke chikoza ki goifata ke hnuagna noda suga blahi tati gne, ba lepo fadi'aza noda god tati gne. 38Ne au nodi puhi na Demitrias balugna noa mae gloku re hariza iheini, hatimare tangomana te athiza mae teugne ka fate. Hatimare laseza lanauwa tufuni naga'e mala fate ie, ni hatimare lasera hui ahia te au mae thotoghei funei te mala fate ra puhi teure. 39Ni ne auna ne'au keha puhi te ngagughamu lepora ghotolureni, tati kaina ie na fakohli ra ka faudu baludi mae funeidi gruru gne. 40Rei lepoza igne, eigna keha nanonire jame kofiza magra bi'o te eiza gignoa igne, eume tati kaina ie na theome tangomana te ruarutha fakohlo ka mae funeidi Rom re gna hna te krapuza tati gignoa igne ie.” 41Ke leghugna te vevese ra ire, mae sekreteri gna gruru gne ne lepora nanonire mala pulo ka sugadi re.
© 2025 SIL Solomon Islands