Mae khuru 18
18
Mae Pol ne tei Korin
1Ke leghugna igne, mae Pol jifla Atens ne tei ka gruru Korin. 2Ka gruru teugne magne ne fadeidei ka kahe mae Jiu, nahngagna ie mae Akuila, magne neke kahra ka provens Pontas. Mae Akuila ni khetogna ie Prisila teure neke mei funudi lanauwa Itali. Repa mei au Korin eigna mae Klodias mae funei bi'o gna Rom gne neke kafua kuri fajiflara mae Jiu te hui re Rom. Kate kofira repa ka teuwae ie, 3Pol ne au haghe ni loku baludi eu repa. Nodi gloku retolure mala phapama thapuale. 4Leuleghu naga'e Sabat ie, mae Pol gne tei thuturi harira mae Jiu ni mae Griki teure ka suga tharai ie, mala fatutu'aniza hatimare Jisas.
5Agnoni mae Saelas ni Timoti teure ne mei funudi Masidonia mala loku balugna mae Pol Korin. Pol ne thuturi harira koba nanoni Jiure u Grorogo te Keli gne leuleghu naga'e mala laseza hatimare te Jisas gne lana mae Fakahra teke na'alepoza God ie. 6Ni mae Jiure ne tho'anodi fatutu'ani ra noa fagriu mae Pol re ne lepo fadi'aza magne. Eume mae Pol ne veivehi koko thona ka noa phoko ie, falalasegna te God theome ngagura nanoni teure, ne lepo eu'ani, “Ne fate falemeghamu na ghotolu God ni teugne nomi puhi ghotolu thaimi, theome nogu nasapla rei! Funu gignoa igne rei kaina ie tei thuturiza u Grorogo te Keli gne harira nanoni te theome Jiure.”
7Agnoni mae Pol jifla ka suga tharai ie ne tei ka sugagna kahe mae khilo'au, nahngagna ie mae Titias Jastus, mae teugne fatutu'aniza lanauwa God. Suga teugne au lana kehreagna suga tharai ie. 8Nahngagna mae funeigna suga tharai gne mae Krispas. Magne baludi nanoni te hui te au ka thabutuagna magne ie ne kafua fatutu'aniza Lod. Euwateuwe chuku nanoni lanauwa Korin re ne farogo ka mae Pol. Hatimare fatutu'aniza Jisas ne kafua siublahi.
9Kahe bongi, mae Pol ne mifi. Lod ne lepo eu'ani ka magne, “Pol, tovi hmau! Ghoeghoze harira koba nanonire sonighoe! Tovi au famuu! 10Eigna rei au balumu ghoe. The'o kahe nanoni nate choghagho ghoe ie, eigna chuku nanoni ka nau igne nogu rei.” 11Eume, mae Pol ne au Korin kahe finogha namno hnigra fagriura nanonire gna u Grorogo te Keli noa God ie.
12Ka finogha te Primia mae Galio ka provens Akaia ie, mae funeidi Jiure krapu mei ne lokiza mae Pol ne athiza magne ka fate. 13Hatimare ne lepo eu'ani ka mae Galio, “Primia, ma'igne fagriura nanonire mala tufru soruza God, ni puhi teugne theome leghuza nomi vetula gheati ie euwa!”
14Pol ne ngaguza mala ho'ilepoza goeghoze igne, ni mae Galio ne kulu lepo eu'ani ka mae Jiure, “Jame eiza magne kahe puhi te di'a lui, ba kahe nasapla bi'o, rei jame ngagughau au te farogo ka ghotolu ie. 15Ni puhi te lepora ghotolu ire fite magrira lana gnadi u ghoeghoze ba nahnga ba gnadi nomi vetula thaimi re lana. Eume thokagna ie ghotolu fakohliza lana thaimi. Rei theome ngagughau te fateza puhi teugne ka ghotolu.” 16Eume, mae Galio ne kuri fajiflara hatimare ka suga mala fate gne. 17Agnoni nanonire neke lokiza mae Sostenes, mae funeigna suga tharai gne ne aniza magne ke ulugna suga mala fate ie. Ni mae Galio ne tho'anoa nangiza lanau puhi te eiza hatimare igne.
Mae Pol neke pulo Antiok
18Pol ne au chuku naga'e Korin baludi nanoni khilo'au re. Ke leghugna igne, magne jifla ne tei ka nau Senkria. Ka teuwae magne ne kukuchi fahmone naklagna ie. Igne falalasegna te noa na'alepo magne ka God ie ari la kaputu teuwe. Agnoni magne saghe ka vaka ne tei Siria. Prisila ni mae Akuila teure ne tei lanauwa balugna magne 19mala tei dufu ka nau Efesus. Agnoni Pol ne ghae kokora repa ka teuwae ne tei thaigna ne ruma ka suga tharai ie ne thuturi harira mae Jiure. 20Kate toreza hatimare magne mala au baludi ka khata hnimoto teuwe, mae Pol ne tho'anoa. 21Ni kate thatai ghae jifla te mala tei ie, Pol ne lepo eu'ani ka hatimare, “Meuni me noa gaoghatho God ie, rei kaina ke pulo mei au lana mala ke kofighamu ghotolu.” Agnoni magne saghe ka vaka ie ne jifla kokoza Efesus. 22Kate tei longa Sisaria ie, Pol ne haghe Jerusalem ne kubae ra nanoni khilo'au re. Ke leghugna igne magne neke pulo Antiok, 23ne roi au faraugha khata hnimoto ka teuwae.
Euwateuwe jifla ka teuwae me tei liu ka phalu provens Gelesia ni Frijia. Magne tei ka chuku nau te au ka teuware mala toghora nanoni khilo'au re mala hneta nodi fatutu'ani re.
Noa gloku mae Apolosi
24Ka hnimoto teuwae, kahe mae Jiu teke kahra Aleksadria ie ne tei dufu Efesus, nahngagna ie, Apolosi. Mae Apolosi gne kahe mae lase vevese lui, ni laseza lui u i'ini te blahi gne. 25Nanoni khilo'au re fagriu fakeliza magne gna puhi mala fatutu'aniza Lod ie. Magne fua ngaguza lui te mala thuturiza u Grorogo te Keli gne, ni fagriu fakeli lui u puhi tutu'ani gna Jisas re. Ni neubanauwa, thuturi te laseza magne ie, gna u lana siublahi te eiza mae Jon Siublahi tifa ia lana. 26Apolosi gne kahe mae frane lui ne tei ka nodi suga tharai mae Jiure ne funu thuturigna Jisas ka hatimare. Ni kate rogira Prisila ni Akuila teu hna te lepora mae Apolosi re, repa ne udiza magne ne tei ka sugadi ie. Euwateuwe repa ne fagriuza magne mala lase fakeliza puhi te mala tufuni laseza God ie.
27Ni kate ngaguza tei ka provens Akaia teu mae Apolosi ie, nanoni khilo'audi Efesus re ne toghoza magne. Hatimare ne i'ini kahe letasi harira nanoni khilo'audi Akaia re mala kaliti fakeliza magne. Kate dufu ka teuwae ie, mae Apolosi ne toghora lui nanoni ihei God te fatakle harira noa nahma ie mala fatutu'ani hatimare. 28Mae Apolosi ne toghora lui nanoni khilo'au re, eigna magne bluseza te lepo fapari ra mae Jiure ka magra bi'o te eiza hatimare ke uludi nanonire. Apolosi ne lepo fatakleza ka u i'ini blahi gne gna Jisas lana mae Fakahra teke na'alepoza God ie.
© 2025 SIL Solomon Islands