Mae khuru 20
20
Mae Pol ne tei Masidonia
1Ke leghugna maamagra teugne, mae Pol ne kilofaudu ra nanoni khilo'au re ne lepo harira mala kegra maku hatimare ka nafnata puhi te eira ire. Agnoni magne ne kubae ra ne ghae ne tei Masidonia. 2Kate tei magne ka nau te chuku ke hnuagna provens teugne, magne ne lepo faheta ka nanoni khilo'au re mala tovi glape. Agnoni magne ne tei dufu ka provens Gris. 3Magne au ka teuwae tholu hnigra. Ke leghugna igne, magne tarabana mala tei ka vaka dufu ka provens Siria, ni magne ne rogira keha mae Jiure ne roghe mala falemeza magne. Eigna teuwae magne ne ho'i gaoghatho neke pulo liu Masidonia. 4Ire nahngadi keha mae teke tei balugna magne re: Sopata mae gna Berea, thugna mae Piras; mae Aristakas, ni Sekadas phalu maedi Tesolonika; mae Gaeas gna Debi; Taekikas, ni mae Trofimas phalu maedi Esia; ni mae Timoti. 5Mae teure neke kulu tei ke ulugna mae Pol, neke tukighami gheati Troas ie. 6Ni gheati neke au fapulo Filipae ne ghile hui u naga'e “Ngahngamu gna Bereti te The'o Isigna e.” Ke leghugna teugne gheati neke saghe ka vaka ne tei ni ke leghugna glima naga'e gheati ne tei fadeidei ka keha mae re, Troas. Euwateuwe, gheati ne au ka teuwae kahe wiki thaudolu.
Noa thuturi leghu lahu mae Pol ka gruru Troas
7Ka grafi Sarere#20:7 Ka goeghoze Griki ie lepoza te, “naga'e ulu lahugna wiki.” Naga'e Sabat gne ari hui ka tahngi namnoni ka naga'e Sarere, eume mae Luk jame gaoghathognae bongi Sarere ne the'o nani bongi Sade. gheati salofaudu mala tarai ni ngamu faudu. Agnoni mae Pol ne thuturi harira nanoni khilo'au re ne ghile farihotei bongi, eigna magne ngaguza teke ghae ka keha naga'e ie. 8Ka teuwae, chuku najuta teke bae ka chogho ke klia te kafua krapu te'au gheati ie. 9Uve, kahe maseni hnaghevalu nahngagna ie Iutikas, hokro ne'au ka wida ie. Kate fua jongi mae Pol noa thuturi ie, mae Iutikas ne funu thuru. Leghu lahugna ie, magne ne tufuni thuru iho lui. Agnoni magne ne oha funu ka wida ie ne dufu ka glose ie pari. U suga igne tholu phapala funu pari dufu klia. Kate tei te kofiza hatimare mae Iutikas ie, magne la leme hui lana. 10Pol faghose ne soru pari ka mae Iutikas. Agnoni, mae Pol ne thuru lao ke kliagna loku famakuza ne lepo eu'ani, “Tovi nanganomi. Magne kela kahra hui!” 11Ke leghugna teugne Pol neke haghe ka chogho ie ne phipile bereti ie ne eiza ngamu faudu blahi hatimare. Pol ne thuturi faraugha harira nanoni khilo'au re ne ghile ga'e fufugho. Agnoni magne ne jifla kokora hatimare ne tei. 12Hatimare udiza maseni gne ne pulo ka sugagna ie. Euwateuwe, nanonire ne fua hneahnegha lui eigna maseni hnaghevalu gne kela kahra fapulo.
Funu Troas tei Maelitas
13Agnoni Pol ngaguza te pohlo mala ke fadeidei ka gheati ka gruru Asos. Eume gheati ne saghe ka vaka ie ne lithu ne kulu dufu ka teuwae. 14Ka teke fadeidei ka gheati Asos ie, magne ne saghe balumi gheati ne tei dufu Mitilini. 15Ka keha naga'e ie, gheati ne ghae Mitilini ne liu kehreagna moumolu Kios. Agnoni keha naga'e ie gheati ne dufu ka moumolu Samos. Kahe naga'e ke leghugna igne gheati ne dufu Maelitas. 16Ni Pol ngaguza te chari liuza Efesus, eigna magne tho'anoa te au ka provens Esia chuku naga'e ie. Magne ngaguza te ghose dufu Jerusalem mala deiza naga'e Pentikos ie.
Goeghoze leghu lahu Pol ka mae funeidi khilo'au Efesus
17Pol au ne au Maelitas ne fatei grorogo harira mae funei ka khilo'au Efesus re mala mei hatimare kofiza magne. 18Kate mei dufu hatimare ie, magne ne lepo eu'ani ka hatimare, “Ghotolu lasera hui hna teke eira rei ka teke au rei balumi ghotolu funu ka naga'e ulu lahu teke mei dufu rei ani ka provens Esia ie. 19Rei eiza noa gloku Lod ie ka puhi te theome ghathoghau thaigu, eigna chuku fata rei tahngi hui lanauwa gna gloku te bi'o igne. Kate ngagura falemeghau rei mae Jiure, rei au paapara lui. 20Ghotolu laseza hui te thuturiza rei ka ghotolu u Grorogo te Keli gne, euwateuwe rei neke fagriughamu farihotei glalaba ka nau bi'o, ba ka sugami ghotolura. Kate eiza gloku igne, rei theome hmau te lepoza ka ghotolu puhi fate'o te mala toghoghamu ie. 21Rei neke kafua lepo faheta harira mae Jiu, ni mae Griki teure mala koko hatimare puhidi te di'are, ni figri ka God ni fatutu'aniza noda Lod Jisas.
22“Ni gignoa igne rei kaina leghuza u Tharunga te Blahi mala tei Jerusalem, ni rei theome laseza hna kaina te dufighau rei ka teuwae ie. 23Te laseza rei leuleghu nau ie, Tharunga te Blahi gne kulu lepo harighau koba rei, te hatimare kaina ie na paraghau ni fasosologhau eu rei. 24Ni rei theome nanga noguza nakahragu ie. Eigna goifata te ulu ie te mala loku fahui rei u gloku mala eiza rei teu teke gumei harighau noda Lod Jisas ie. Gloku igne te mala thuturiza rei ka nanonire gna noa nahma bi'o God.
25“Rei neke tei hia te hia ka ghotolu neke thuturigna nakahra God te funei fruniza ie. Euwateuwe gignoa igne ie rei laseza, the'o kaheni ka ghotolu nate kofighau rei kaina ie. 26Eume te lepoza rei ka ghotolu gignoa igne ie: Ihei te tei ka nabraugna gleme ie puhigna thaigna, theome puhigu rei. 27Eigna rei la ulu lepo hui ka ghotolu gobigna puhi te ngaguza God te mala lasera ghotolure. 28Eume koukofu fakelighamu thaimi, baludi nanoni te hui teke lisa ari mala koukofu ghotolu teu Tharunga te Blahi ie. Ghotolu mala jateula mae koukofu sipsip eu mala koukofu fakeliza noa khilo'au God teke fofoli ka glemegna mae Thugna ie. 29Eigna rei la kulu laseza hui teke leghugna te ghae kokoghamu rei ie, keha nanoni te di'a puhidi re kaina ie mei choghara nanoni ka khilo'au gne, jateula khau nasi te mei te choghara sipsip ra euwa. 30Eulanauwa keha nanoni ka ghotolu thaimi kaina ie thuturi muamugna ra nanoni khilo'au re mala leghura thaidi. 31Eume koikofighamuni eu ghotolu ia! Ni eulanauwa ke ghathoza igne, tholu finogha rei neke lepo faheta ni fagriughamu bongi naga'e balu tahngi.
32“Gignoa igne rei sakre laoghamu ghotolu ka khamegna God. Magne la kulu gu'ari hui ka ghotolu noa Grorogo te Keli ie, ni lepoza te magne nahmaghamu ghotolu teuwe. Euwateuwe magne tangomana te kalitighamu ka goeghoze ire. God lana te tangomana fahehetaghamu ni gu'ari harighamu puhi fate'o te keli teke na'alepora ka noa nanonire. 33Tutu'ani, kate au balumi ghotolu ie, rei neke theome maamagnaza noa nanugra, ba pohe iheina ie. 34Euwateuwe ghotolu thaimi laseza lanauwa te rei thaigu loku heta ka khamegure mala athira gobigna goifata te ngagughaura re, ba te ngagura kheragu fafaudu re. 35Ka nogu gloku te hui re, rei falalase ka ghotolu hna jame te eira koba tati te mala toghora ihei te glape re. Eume tati tovi ghatho ihoza u goeghozegna noda Lod Jisas, teke lepo eu'ani magne ia, ‘Mae ihei te tuatufa ie, magne hneahnegha lui ke tulaognani mae ihei te atha goifata malagna thaigna lana ie.’ ”
36Ke leghugna te lepoza igne, mae Pol turununu soru baludi hatimare te hui ne tarai. 37-38Euwateuwe hatimare ne kafua loku famaku ka mae Pol ne gnahngoza magne balu tahngi, eigna mae Pol ne lepoza ka hatimare, te hatimare kaina ie na theome ke kofizani magne teuwe. Agnoni hatimare ne udiza magne ne tei ka vaka ie.
© 2025 SIL Solomon Islands