Mae khuru 17
17
Mae Pol ni mae Saelas ne tei Tesolonika
1Mae Pol ni mae Saelas ne chari liu ra phalu gruru Amfipolis ni Apolonia ne tei dufu ka gruru Tesolonika. Ka gruru teugne mae Jiure au kahe suga tharai. 2Pol ne tei tarai baludi hatimare jateula te eiza koba magne ie neuwa. Leuleghu naga'e Sabat thokagna tholu wiki, magne ne thuturi ka hatimare gna u i'ini blahi gne. 3Magne ruarutha gaoghathogna ie ne falalase harira gna God te sakreza Kraes mala leme, ni ke leghu God neke fakahra fapuloza magne. Magne ne lepo eu'ani ka hatimare, “Jisas te lepoza rei ka ghotolu igne lana mae Fakahra te na'alepoza God ie.” 4Keha mae Jiure ne fatutu'ani ne leghura Pol ni mae Saelas. Eulanauwa chuku nanonidi Griki te tufru soruza God ni keha nakrupe eu ne leghura lanauwa phalumare.
5Ni keha mae funeidi Jiure ne gogotura lui eigna hatimare ne kofira chuku nanoni ne leghuza mae Pol. Agnoni, hatimare tei ne udi mei ra keha mae te di'a puhidi re ne fufunu kahe magra bi'o ka gruru ie. Hatimare chari ne tei ka sugagna mae Jason ie, mala hiro ra Pol ni mae Saelas. Hatimare ngagura udira phalumare mala tei ke uludi nanoni te hui re. 6Ni kate the'ora phalumare re, hatimare neke saguza lana mae Jason ni keha nanoni khilo'au re, kohri ra ne tei ke uludi thotoghei mae funeigna gruru gne. Nanonire ne aku fabi'o ne lepo eu'ani, “Ma'ire e'ei puhi hia te hia ka nauthoglu gne. Euwateuwe gignoa igne hatimare la mei dufu ka noda gruru tati gne. 7Jason gne kaliti ra phalumare ka noa suga ie. Hatimare te hui ne tho'anodi leghuza noa vetula Klodias mae Nafano bi'o gna Rom gne ne lepo eu'ani, ‘Keha mae nafano ie, nahngagna ie Jisas.’ ” 8Kate rogiza nanonire ni mae funeigna teu gruru gne u goeghoze ire, hatimare ne tufuni di'a tadi lui. 9Agnoni mae funeire ne lepoza Jason ni keha nanoni khilo'au re mala poroulu nanugra. Euwateuwe kate atha nanugragna poroulu ie, hatimare neke sakre fajiflara.
Mae Pol ni mae Saelas ne tei Berea
10Agnoni ka bongi la teugne nanoni khilo'audi Tesolonika re ghose ne kuri teira mae Pol ni mae Saelas Berea. Kate tei dufu ka teuwae ie, phalumare ne tei ka nodi suga tharai mae Jiure. 11Puhidi nanoni Jiu te au ka gruru teugne ke kelidini puhidi nanoni Jiu te au Tesolonika re. Hatimare ngagura lui te farogo ka puhi te lepora mae Pol ni mae Saelas teure. Nanoni teure leuleghu naga'e ie ijuijuza koba i'ini te blahi gne, mala lase fakeliza te tutu'ani ba the'o lana puhi te lepora mae Pol re. 12Eume chuku nanonidi Jiure ne fatutu'aniza Jisas. Ni eulanauwa chuku nakrupedi Griki, ni mae funei teure ne funu fatutu'ani lanauwa.
13Ni kate rogiza mae funeidi Jiu te au Tesolonika re te mae Pol thuturiza lanauwa goeghozegna God gne Berea teuwe, hatimare jifla Tesolonika ne tei dufu Berea. Hatimare fa'ei'ei ra nanonire mala di'a tadi hatimare ka mae Pol ni mae Saelas. 14Agnoni nanoni khilo'au re ghose ne kuri soruza mae Pol ka geri kholo ie. Ni mae Saelas ni Timoti teure ne au ne au lana Berea. 15Mae teke udiza mae Pol re ne tei dufu Atens, ni ke pulo Berea baludi grorogo te funu ka mae Pol maladi Saelas ni Timoti mala ghose ke dufu phalumare ka magne.
Mae Pol ne thuturi ka gruru Atens
16Kate tukira Saelas ni mae Timoti te au Atens ie, Pol ne tufuni di'agnagnafagna lui, eigna magne kofiza gruru teugne fodu ka mumuzu te fatutu'ani ra hatimare re. 17Agnoni mae Pol ne thuturi ke hnuagna suga tharai ie harira mae Jiu, ni mae Griki ihei te tufru soruza tufuni God, ni eulanauwa leuleghu naga'e ie magne thuturi ka nanoni te mei ka maketi re. 18Agnoni keha mae velepuhi ka phalu thotoghei te kilora Epikiuria ni Stoek teure ne fapoapola ka mae Pol. Keha mae re ne lepo eu'ani, “Mae teugne theome laseza lana kahe puhi. Hna ie te ngaguza thuturiza magne gnea?” Ni keha mae re ne lepo eu'ani, “Magne jau ngaguza thuturi ka tati nodi god keha naunire jaugne?” Hatimare lepoza igne eigna Pol ghaghazalaza Grorogo te Keli gna Jisas te kela kahra fapulo ka u gleme ie. 19Hatimare athiza mae Pol ne tei ka thotoghei mae funei te kilora Ariopagas. Mae teure ne lepo eu'ani ka magne, “Gheati ngagughami lui te tufuni laseza gaoghatho valu te fagriuza ghoe gne. 20Puhi te thuturi ra ghoe re tufuni valu lui ka gheati. Gheati ngagughami te lasera gaoghathodire.” 21Hatimare ne lepoza igne eigna nanonidi Atens te hui, ni nanonidi maghani teure mei hokro koba ka teuwae mala farogo ni thuturi ra eu chuku puhi valu.
22Agnoni, mae Pol kegra haghe ke uludi hatimare mae thotoghei funei te kilora Ariopagas re ne lepo eu'ani, “Ghotolu maemi Atens, rei kofu falaseghamu ghotolu tarai koba ka nomi god te fatutu'ani ra thaimi ie. 23Eigna kate tei fathe'oza rei gruru ghotolu gne, rei kofira goifata te tufru sorura ghotolure. Euwateuwe rei eulanauwa ne kofudeiza kahe olta te au i'ini ire,
‘Noa olta kahe god te theome laseza tati’.
God te theome laseza ghotolu teugne lana kaina te thuturiza rei ka ghotolu ie!
24“Teugne lana God teke vuavuhagna u nauthoglu igne, ni gobigna goifata fate'o ke hnuagna ie. Magne lana te funei fruniza klia ni pari teuwe. Eume, magne theome au ka suga tharai teke e'ei ka khame nanoni! 25The'o kahe goifata te nigraza God te mala toghoza tati ie. The'o. Eigna magne thaigna au lana teke gulao nakahra ni phapanga teu ka gobigna goifata te hui re. 26Vike te hui te au ka nauthoglu igne neke funu mei ka kahe mae lana, euwateuwe God gulao harira soasopagna nodi hnimoto glose te mala au ka nauthoglu gne. Magne la kulu na'a naga'edi hui te mala kahra ba te mala leme ie. 27God eiza igne, eigna magne ngaguza te hiroza hatimare magne. Jame fariuriu hiroza magne hatimare meuwe, hatimare kaina tangomana te deiza magne. Eigna God theome au fatifa ka tati te hui ie. 28Jateula kahe mae teke lepo eu'ani tifa ie, ‘Ka God lana tati te kahra ni au teu ka nauthoglu gne.’ Euwateuwe kahe mae glalase ka ghotolu neke i'ini eu'ani lanauwa, ‘Tati te huigne kafua thugna magne.’
29“Tutu'ani lui, tati kafua thugna God. Eume ka gaoghathomire tovi ghathoza te God gne jateula kahe mumuzu teke e'ei nanoni lana teuwe. The'o. Magne theome goifata jateula golu, ba siliva, ba thina. 30Tifa ie, nanonire neke theome laseza God, ni God theome ghose di'atagna ni fapaapara ra eu nanonire. Ni gignoa igne ie, magne lepo faheta lui ka nanoni te hui ka nauthoglu gne mala ho'ignagnafa ni nakahra euwa. 31Eigna God la kulu fafateza hui kahe naga'e te mala fate ra nanoni te hui ka nauthoglu gne. Magne kaina ie fate ra ka puhi te kohlo lui. Euwateuwe God eulanauwa neke kulu fafate kahe mae te mala fate ra nanoni te hui re. Tati te hui ie kafua laseza igne, eigna God neke fakahra fapuloza mae teugne ka gleme.”
32Kate rogiza nanonire ka mae Pol te God neke fakahra fapuloza kahe mae ka u gleme teuwe, keha nanonire ne ma'eza magne. Ni keha mae re ne lepo eu'ani, “Gheati ngagughamigho ghoe mala ke thuturigna puhi teugne kaina ie.” 33Agnoni mae Pol ne jifla kokora hatimare. 34Ni keha nanonire fatutu'aniza Pol ne tei balugna magne. Mae Dionesias kahe mae te au ka thotoghei funei te kiloza Ariopagas, ni kahe ga'ase nahngagna ie Damaris, ni keha nanonini eulanauwa te fatutu'aniza magne re.
© 2025 SIL Solomon Islands