Mae khuru 16
16
Mae Timoti ne tei baludi mae Pol ni mae Saelas
1Pol ni mae Saelas ne tei dufu Debi. Euwateuwe ke leghugna igne phalumare jifla ka teuwae neke tei Listra. Kahe mae khilo'au nahngagna ie mae Timoti ne au lanauwa ka teuwae. Dogna mae Timoti gne nani Jiu ni gne'e fatutu'ani ka Jisas. Euwateuwe mae magna magne ie maegna Griki.
2Nanoni khilo'audi Listra ni Aekoniam teure tufuni ghatho boheza ni lepo fakeliza eu lui magne. 3Mae Pol ngaguza mae Timoti mala tei balugna. Ni mae Jiu te au ka hnimoto teugne kafua laseza magna mae Timoti gne kahe mae Griki. Eume mae Pol ne tohifalalaseza magne mala kelitadi mae Jiure. 4Agnoni mae Pol ne udiza Timoti ni keha mae lanauwa eu balugna ne tei leghu nau mala thuturi harira nanoni khilo'au re mala leghura u fagriu teke nana'a mae khurure ni mae funei ka khilo'au Jerusalem. 5Agnoni nanoni khilo'au ka teuwae re ne heta ni bluara eu leghu ga'e.
God ne kiloza Pol mala tei Masidonia
6Agnoni mae Pol ni mae te balugna re ne liu ka provens Frijia ni provens Gelesia, eigna Tharunga te Blahi ie theome sakrera hatimare te ghaghazalaza u Grorogo te Keli gne ka provens Esia. 7Kate dufu hatimare ka tahogna provens Misia ie, hatimare ngagura mala ke tei ka provens Bitinia, ni Tharungagna Jisas ie ne theome sakrera hatimare te tei ka teuwae ie. 8Agnoni hatimare liu lana Misia neke tei ka nau Troas. 9Ka bongi teuwae Pol ne mifi. Ka mifi teugne mae Pol ne kofiza kahe maegna ka provens Masidonia mei ne kegra ke ulugna magne, ne lepo huhuruza eu'ani, “Ghoe na ari Masidonia mala toghoghami gheati!” 10Ke leghugna te mifi mae Pol gne, gheati ghose ne tarabana mala tei Masidonia. Gheati eiza igne, eigna gheati tufuni laseza God teke kiloghami gheati mala ghaghazalaza u Grorogo te Keli gne ka nanoni te au ka provens Masidonia re.
Lidia ne ruma ka khilo'au
11Gheati jifla Troas ka vaka, kohlo ne tei ka moumolu Samotres. Ka keha naga'e ie gheati ne longa Niapolis. 12Funu ka teuwae gheati lilihi ne tei ka nau Filipae, kahe nau te fua ulu ka hnimoto ke hnuagna provens Masidonia. Gheati ne au keha naga'e ka nau teugne. Nau teugne chuku nanonidi Rom te au tagna ie.
13Ka u naga'e Sabat ie, gheati ne jifla ke kosigna nau ie ne soru ka geri kho'u ie, eigna gheati ne ghathoza hnimoto teugne jame kahe nodi hnimoto mae Jiure mala tarai. Gheati kofira keha ga'ase krapu ne au ka teuwae, agnoni gheati hokro soru ne thuturi baludi. 14Kahe nani ka teuwae nahngagna ie Lidia. Gne'e nanigna Taetira ni mei au Filipae. Noa gloku gne'e ie mala saisabiri pohe chichi'a ngoangosa ni gne'e eulanauwa tufru soruza tufuni God. Kate farogo te au gne'e ka mae Pol ie, God ne thotora gnagnafagna ie ne fatutu'aniza Jisas. 15Gne'e ni nanoni te hui te au ka noa suga gne'e re ne kafua siublahi. Agnoni Lidia ne toreghami gheati mala tei ka sugagna ie. Gne'e ne lepo eu'ani ka gheati, “Ne tufuni nanoni khilo'au rei neuna ghotolu ka gaoghathomireni, mei ghotolu me au balugu rei euwa.” Gne'e ne lepo huhurughami gheati, eume gheati ne tei au balugna gne'e.
Pol ni mae Saelas ne au ka suga sosolo
16Kahe naga'e kate tei gheati ka hnimoto te mala tarai ie, kahe ga'ase gloku mei ne deighami gheati. Kahe na'itu au ka ga'ase teugne, eume gne'e tangomana te kulu lepo fatakle ra hna puhi te theome dufu mei na te'aure. Eigna teuwae, noa mae funei gne'e re tufuni atha nanugra bi'o lui kate eiza gne'e puhi teugne. 17Ga'ase igne leghughami gheati mae Pol, ne lepo eu'ani fabi'o, “Ma'ire noa mae gloku God te au klia ie! Hatimare thuturi harighamu ghotolu noa puhi God te mala fakahrighamu ghotolu ie!” 18Gne'e eiza koba igne leuleghu naga'e. Agnoni Pol lao au ne ghile hongoza, eume magne figri fapulo ne lepo eu'ani ka na'itu ie, “Ka nahngagna Jisas Kraes rei te kuri fajiflagho ghoe!” Agnoni na'itu ie ghoseni ne jifla kokoza ga'ase teugne.
19Agnoni kate kofiza mae funeigna ga'ase gne tela keli, ni the'o huila puhi te mala dedei nodi nanugra bi'o ka gne'e ie, hatimare ne lokira Pol ni mae Saelas, kohri ra ne tei ka glalabagna nau ke uludi mae funeire. 20Hatimare ne athira Pol ni mae Saelas tei ka mae mala fatere, ne lepo eu'ani, “Phalu maedi Jiu ire, ei chuku puhi bi'o te theome kohlo ka noda nau tati gne. 21Phalumare fagriura puhi te theome keli ka noda vetulare. Tati maeda Rom ni tati theome mala leghura puhi teure.”
22Nanoni fate'o teke au ka teuwae re ne kafua di'a tadi ne hui ka mae Pol ni mae Saelas. Agnoni mae mala fatere ne lepora keha mae pulisire mala atha koko nodi pohe phalumare re malani ani ra ka gazu. 23Ke leghugna te ani fadi'ara phalumare re, hatimare ne koko lao ra phalumare ka suga sosolo ie. Agnoni hatimare lepo hariza na mae koukofu suga sosolo gne mala koukofu fakekeli ra phalumare. 24Kate rogiza goeghoze igne, magne ne nana'ara phalumare ka nachogho te ichoni te au hnua lahu ka suga sosolo ie. Ni magne ne faruruma lao nenedi phalumare re farihotenidi phalu thaba bi'o.
25Farihotei bongigno, mae Pol ni Saelas ne tarai balu koze kilo uluza God. Ni keha mae te sosolore ne farogo ka phalumare. 26Agnoni kahe nakheu bi'o megona ne fahngali fabi'oza nathotoghagna u suga sosolo ie. Euwateuwe nathanga fate'ogna suga gne ne kafua thora ni cheni teke solira hatimare mae sosolo fate'o ka khamedire ne kafua kusu ne uthu soru. 27Kate dofra haghe mae koukofugna suga sosolo gne te kofira nathanga tela thora re, magne gaoghathogna ie ne kafua pelo huila mae sosolore neuwa. Agnoni magne ne atha noa naflahi mala magra ie ne mala falemeza thaigna neuwa. 28Ni mae Pol ne aku fabi'o eu'ani ka magne, “Tovi falemegho thaimu! Gheati kafua ani au lana!”
29Agnoni, mae koukofugna suga sosolo gne ne kilora keha nanoni mala atha mei najuta. Euwateuwe, magne chari ne tei hnua suga sosolo ne turununu soru balu tetekri ke uludi mae Pol ni mae Saelas eigna magne ne tufuni hmau noa lui. 30Ke leghugna igne, magne ne udira phalumare ne jifla kosi ne ghuhna eu'ani ka phalumare, “Phalumae funei ra, hna nate eiza rei te mala fakahrighau God ie?”
31Phalumare ne lepo eu'ani ka magne, “Fatutu'aniza noda Lod Jisas, ni God kaina ie fakahrigho ghoe ni nanoni te hui ka thabutuamu ie.” 32Agnoni Pol ni mae Saelas ne thuturiza goeghozegna Lod gne hariza magne ni nanoni te hui ka thabutuagna magne ie. 33Ka hnimoto teugne farihotei bongigno mae koukofugna suga sosolo gne ne kaliti fakelira phalumare ne lulumi nafrena ka thonodi phalumare re. Agnoni magne ni nanoni te hui ka thabutuagna magne re ghose ne kafua siublahi. 34Ke leghugna igne mae koukofugna suga sosolo gne athira phalumare ne tei ka sugagna ie ne fangamu ra. Magne ni thabutuagna ie ne hneahnegha lui eigna hatimare gignoa igne ie la fatutu'aniza God.
35Boibongi fufughogna keha naga'e ie, mae mala fatere ne kuri teira keha mae pulisi mala lepo ka mae koukofugna suga sosolo gne mala atha fajiflara phalumare. 36Agnoni mae koukofugna suga sosolo gne ne lepo eu'ani ka mae Pol, “Hatimare mae mala fatere ne lepoza te, ghopa mae Saelas tangomana te jifla ie. Ghopa gignoa igne tangomana te jifla ka taglosa.”
37Ni mae Pol ne lepo eu'ani ka mae pulisire, “Tholumae! Ghepa maemi Rom, ni hatimare theome athighami na ghepa au ka fate ie euwa. The'o lana. Hatimare fite anighami la ghepa ke uludi nanonire, ni koko laoghami ka suga sosolo ie. Euwateuwe gignoa igne ie hatimare ngagura te megona te atha fajiflaghami ghepa. The'o theome teugne! Keli au mala mei hatimare thaidi atha fajiflaghami ghepa ka suga sosolo gne.”
38Agnoni mae pulisire pulo neke lepoza teugne ka mae mala fatere. Kate rogiza te Pol ni mae Saelas re maedi Rom teuwe, hatimare ne hmau nodi lui eigna hatimare ne fite ani ra lana phalumare. Igne ka nodi vetula mae Rom re tufuni sapla. 39Agnoni hatimare mei ka mae Pol ni mae Saelas ne lepoza ka phalumare nodi di'agnagnafa re. Hatimare ne atha fajiflara phalumare ka suga sosoloe, euwateuwe tore ra lanauwa mala jifla kokoza nau ie. 40Agnoni kate jifla mei ka suga sosolo ie, phalumare ne kulu tei ka sugagna Lidia. Phalumare ne deira keha nanoni khilo'au ne thuturi harira mala ke faheheta gnagnafadire. Ke leghugna teugne, phalumare ne jifla kokoza nau ie.
© 2025 SIL Solomon Islands