Mae khuru 15
15
Faudu bi'o Jerusalem
1Agnoni, keha maedi Judia re ne mei dufu Antiok. Hatimare fagriura nanoni khilo'au re ne lepo eu'ani, “Te theome leghuza ghotolu noa vetula mae Moses te tohifalalase ie, God kaina ie theome fakahrighamu ghotolu.” 2Pol ni mae Banabas ne tufuni theome ngagura nafnata fagriu te eiza hatimare igne ne lepo faheta lui ka hatimare. Agnoni mae khilo'au re ne fafatera mae Pol ni Banabas, ni keha mae lanauwa mala tei Jerusalem, mala tangomana hatimare te vevese gna puhi igne baludi mae khurure, ni ka keha mae funei ka khilo'au. 3Nanoni khilo'audi Antiok re ne toghora ka ghaedi hatimare te tei ie. Hatimare tei ne liu ra provens Fonisia ni Samaria, ne thuturi gnadi ihei te theome Jiu tela fatutu'aniza Jisas re. Nanoni khilo'au ka phalu provens ire ne hneahnegha lui kate rogiza igne. 4Kate dufu hatimare Jerusalem ie, mae khuru, ni mae funei ka khilo'au, ni nanoni te fatutu'ani teure kubae ra ni kaliti fakelira eu hatimare. Agnoni, mae Pol, mae Banabas ni mae teke tei baludi phalumare re, ne thuturi ra hna God teke toghora phalumare ka teke tei loku phalumare ka nanoni te theome Jiure.
5Ni keha nanoni khilo'au teke au ka thotoghei Farisi re tifa ie, kegra haghe ne lepo eu'ani, “Ihei te theome Jiure jame kulu tohifalalasewa ame ruma haghena hatimare ka khilo'au ie euwa. Hatimare mala tohifalalase ni tufuni leghura eu noa vetula Moses re!”
6Agnoni mae khurure ni mae funei ka khilo'au teure ne hokro faudu te rogheza puhi igne. 7Ke leghugna chuku goeghoze te eiza hatimare gna puhi igne, mae Pita kegra haghe ne lepo eu'ani, “Uve kheragura, ghotolu laseza hui ka naga'e tela liu ra. God neke fafateghau rei farihoteinimi ghotolu mala ghaghazalaza u Grorogo te Keli gne, harira nanoni te theome Jiure mala fatutu'ani. 8Euwateuwe God mae ihei te lasera gaoghathodi nanoni te hui re, tufuni falalaseza te magne ngagura nanoni ire. Tati te hui ie kafua laseza igne, eigna God neke gulao harira u Tharunga te Blahi jateula teke eiza magne ka tati ia euwa. 9Ka God ie nanoni teuware theome hno'i ka tati. Kate fatutu'aniza hatimare u Grorogo te Keli gne, God gne atha koko nakhibodi re mala tufuni ga'e gnagnafadire jateula teke eiza magne harighita tati ia euwa. 10Eume, ne fahneuwa ghotolu te ngagughamu eiza hna te di'a tekeu hui God gnea? Ne fahneuwa ghotolu te ngagughamura ihei te theome Jiure te mala leghuza noa vetula Moses re, te mala kohlo hatimare ka nathagna God teugnea? Ni vetula teugne mae ku'eda tifa ra ni tati eu theome leghuza lana. 11Ni tati fatutu'aniza te ka noa kokofakasa God ka Lod Jisas te fakahrighita tati ie, jateula te fakahrira lanauwa magne mae te theome Jiu are.”
12Ni ke leghugna teke ghoeghoze mae Pita ie, thotoghei mae funeire ne theome ghagri kahe goeghoze ne farogo lana ka mae Pol ni mae Banabas, gnadi u kofunaboboi ni falalase eu teke eira God harira nanoni te theome Jiure ka phalumare. 13Ke leghugna te ghoeghoze te hui phalumare re, mae Jems ne lepo eu'ani, “Uve kheragura, farogo ka rei. 14Saemon la thuturiza hui ka tati gna noa nahma God harira ihei te theome Jiure. God ie la kulu fafatera hui keha nanoni te theome Jiure mala noa nanoni thaigna. 15Igne ne tufuni faraija lui ka nodi goeghoze mae profet re, 16Lod ne lepo eu'ani,
“ ‘Ke leghudi puhi ire, rei kaina ie ke pulo mei,
euwateuwe rei kaina fakekegra fapulo vikegna mae Nafano Devet gne,
gignoa igne vike teugne la jateula suga te gre'o hui euwa.
Ni rei kaina ke na'afapulo hnimoto fate'o teke gre'o re ka tufuni hnimotodi re.
Rei kaina fakekegra kahe mae ka vikegna mae Devet nafano mala ke atha fapulo vike teugne noilaghi ie.
17-18Rei kaina eiza igne,
mala mei nanoni fate'o ka nauthoglu gne hiroghau rei.
Ire baludi nanoni te theome Jiu teke fafate hui rei mala nogu nanoni thaigu tekeu re.
Teugne hna teke lepoza Lod mae ihei te falalase ka nanonire puhi fate'o ire,
funu tifa te mei ie.’#15:17-18 Emos 9:11,12.
19“Eume ka gaoghathogu rei ie, tati jame tovi faninigrana ra ihei te theome Jiu te funu leghuza God re. 20Te mala au tati ka khelipari baludi mae te theome Jiure, tati jame i'ini kahe letasi harira hatimare, ire puhi jame te mala lepora tati ka hatimare re, ‘Tovi ngamu gano teke faafara ka mumuzu. Tovi ei puhi di'a ka nani te theome khetomu ie, tovi ngamu gano te lalahmo faleme, ni tovi ko'u dadara.’ 21Eume puhi ire hatimare lasera hui te mala tovi eira re, eigna mae Jiure la lasera hui funu tifa te mei ie, nanoni leuleghu naure thuturiza koba noa vetula mae Moses re. Euwateuwe leuleghu naga'e Sabat ie hatimare ijuijura koba goeghozegna mae Moses re ke hnua suga tharai.”
Letasi funugna ka khilo'au Jerusalem
22Agnoni hatimare mae khuru baludi keha mae funei, ni nanoni te hui ka khilo'au ie, ne kahe gaoghatho mala fafate phalumae mala tei Antiok baludi mae Pol ni Banabas. Eume hatimare ne fafatera mae Judas (te kiloza Basabas) ni mae Saelas. Nanoni khilo'au re tufuni ghatho bohera phalumae ire. 23Hatimare ne gulao letasi igne ka phalumare:
Gheati, mae khuru ni mae mala baubatu ka khilo'au, ni kherami fafaudu ka khilo'au ani Jerusalem, ngagughami te lepora nomi nahma re ka ghotolu nanoni khilo'au te theome Jiu te au ka nau Antiok ni ka phalu provens Siria ni Silisia.
24Gheati rogira hui keha mae ka thotoghei gheati gne ne ari ne fagriura keha puhi te theome kohlo ka ghotolu ne fanolira gaoghathomi ghotolure. Ni gheati neke theome fagriura hatimare mala eiza teugne! 25Eume gheati te hui, ne kahe gaoghatho lana ne fafatera phalumae mala kuri ari ra ka ghotolu. Phalumare kaina ie na ari baludi phalumae kherami keli gheati Banabas ni mae Pol. 26Phalumae teure neke thatai leme chuku fata kate loku hariza noda Lod Jisas Kraes ie. 27Eume, gheati kuri ari ra mae Judas ni mae Saelas ka ghotolu mala tufuni thuturi ra hna teke i'ini ra gheati ka letasi igne. 28-29Ka u noa baubatu Tharunga te Blahi ie gheati ne kahe gaoghatho mala tovi nana'a chuku vetula bi'o ke kliami ghotolu. Ni mala au tati ka keliphari ie, puhi ire lana te mala tovi ke eira ghotolure: tovi ngamu gano teke faafara ka mumuzu; tovi ko'u dadara; tovi ngamu gano te lalahmo faleme; ni tovi ei puhi di'a ka nani te theome khetomu ie. Te keli ie ghotolu leghura fakeli vetula ire.
Teuware lana, me hui.
30Agnoni fati maire ne dufu Antiok. Hatimare salofaudu ra nanoni khilo'au te hui re ne gulao u letasi igne. 31Kate ijuijuza hatimare u letasi igne, hatimare ne kelitadi ne hneahnegha lui. 32Judas ni mae Saelas teure, phalumare mae profet lanauwa, ne lepora chuku puhi mala toghora ni faheheta ra eu nanoni khilo'au re. 33-34Ke leghugna te au phalumare ngiha naga'e na Antiok ie, nanoni khilo'au re ne kubae ra phalumare ka keliphari. Euwateuwe phalumare neke pulo Jerusalem ka nanoni teke kuru teira re. 35Ni mae Pol ni mae Banabas teure ne au fapulo Antiok. Euwateuwe phalumare baludi keha mae lanauwa ne fagriura ni thuturi harira eu nanonire goeghozegna Lod ie.
Mae Pol ni mae Banabas ne sopa tei
36Keha naga'e ke leghugna igne, mae Pol ne lepo eu'ani ka mae Banabas, “Tapa kaina ke pulo mala ke sighora kherada ka nau te hui ahia teke ghaghazalaza tapa goeghozegna Lod ie, ni mala kofira lanauwa hna te eira hatimare gignoa igne ie.” 37Banabas ne ngaguza te udiza mae Jon Mak mala tei baludi, 38ni gaoghathogna mae Pol ie jame theome keli te udiza mae Jon Mak te mala tei baludi ie, eigna magne neke tei kokora phalumare tifa ie Pamfilia neke theome loku fatheve baludi. 39Ka teuwae Pol ni mae Banabas teure ne eiza kahe fapoapola bi'o farithaidi gna igne. Agnoni, phalumare ne sopa tei. Banabas ne udiza mae Jon Mak balugna ne saghe ka vaka ie ne tei dufu ka moumolu Saepras. 40Ni mae Pol ne fafateza mae Saelas te mala tei balugna ie. Agnoni nanoni khilo'audi Antiok re ne tarai ra phalumare ni sakre fajiflara ka noa kokofakasa Lod ie. 41Phalumare ne tei liu ka phalu provens Siria ni Silisia, neke faheheta ra khilo'au ka teuwae re.
© 2025 SIL Solomon Islands