Mae khuru 14
14
Mae Pol ni mae Banabas au Aekoniam
1Ka nau Aekoniam, Pol ni mae Banabas eulanauwa ne tei ruma ka nodi suga tharai mae Jiure ne ghaghazala. Chuku nanoni Jiu ni mae te theome Jiu teure ne fatutu'aniza Jisas. 2-3Pol ni mae Banabas ne au faraugha Aekoniam, ni phalumare theome hmau te thuturiza goeghozegna Lod ie. Agnoni Lod ne gulao harira noilaghi te mala eira kofunaboboi ni fafalase, fatakleza te igne tutu'ani teuwe. Ni keha nanoni Jiu te theome fatutu'ani re ne thuturi phiapita ka nanoni te theome Jiure, mala di'a tadi ni tho'anodira eu hatimare nanoni khilo'au re. 4Ni nanonigna nau teugne ne phipile ka phalu thotoghei. Kahe thotoghei leghura mae bi'odi Jiure, ni keha thotoghei ie leghura mae khurure. 5Keha mae Jiu, ni keha mae te theome Jiu, ni keha mae funei lanauwa teure ne roghe mala khale faleme ra Pol ni mae Banabas ka thina. 6Kate rogiza groghe igne, phalumare ne pelo ne tei Listra ni Debi phalu nau ire au ka provens Laekonia. Agnoni phalumare ne tei fate'o ke hnuagna hnimoto teugne. 7Phalumare ne thuturiza u Grorogo te Keli gne ka nanonire.
Ka nau Listra ni Debi
8Ka nau Listra gne, kahe mae te kahra blughu ni theome tangomana te zaoza'o teuwe au ka nau teugne. 9Magne hokro farogo ne'au ka mae Pol. Mae Pol kofu lao ka magne, ne kofu falaseza te magne fatutu'aniza God te tangomana fakekeliza magne ie. Pol kofututu ka magne 10ne aku fabi'o eu'ani lao ka magne, “Kegra haghe ka phalu nenemu are!” Ka teuwe lana, magne ghasa haghe ne zaoza'o tafiri.
11Kate kofiza nanonire hna te eiza mae Pol gne, hatimare ne aku fabi'o eu'ani ka goeghoze Laekonia, “Ichoi dogu, phalu god re la mei jateula nanoni euwa! Phalumare la mei au baluda tati!” 12Agnoni, nanonire ne kiloza mae Banabas, “Zeus,” nahngagna nodi god bi'o mae Griki. Euwateuwe hatimare kiloza mae Pol, “Hemes,” nahngagna lanauwa kahe nodi god mae Griki re, eigna magne au mae te mala atha ghoeghoze ie. 13Suga te mala tufru soru hariza god Zeus gne au ke kosigna nau ie. Euwateuwe kahe mae pirisi gna god Zeus gne atha ne mei keha buluka ni keha sisi khuakuda eu ka nathangagna bara ie. Mae pirisi baludi nanonire ne ngagura te faafara lao ka Pol ni mae Banabas.
14Kate lao au te laseza phalumare hna te ngagura eira hatimare re, phalumare ne tufuni di'agnagnafadi ne rereku nodi pohere, chari ne tei farihotenidi nanonire ne aku eu'ani fabi'o, 15“Ne fahneuwa te eiza ghotolu puhi ignea? Ghepa nanoni jateula ghotolu eu lana! Ghepa mei mala thuturiza Grorogo te Keli gne ka ghotolu, mala koko ghotolu god teke e'ei lana nanoni te the'o nafudi ire, mala ke figri ghotolu ka tufuni God te kahra ie. Eigna magne teke vuavuhagna u manga, u nauthoglu, u kholo, ni gobigna goifata te au ke hnuadi teure. 16Tifa te mei ie God neke sakrera vike fate'o re mala leghura nodi gaoghatho thaidire. 17Meuba nauwa, magne leuleghu fata ie kokhonira nanonire ni fatakleza thaigna harira hatimare. Uve, magne teke gu'ari harighamu ghotolu nahani te soru mei ka u manga ie, ni miolo mala fablua ra gano. Magne eulanauwa gu'ari harighamu ghotolu chuku gano, ni fahneahnegha ra gnagnafami ghotolure.” 18Meuba phalumare goeghoze ire, nanonire heta gedi mala faafara ka phalumare neuwa. Eume phalumare ne gloku bi'o ka mala fanoto ra nanonire, ni leghu lahugna ie phalumare ne tangomana ra.
19Keha nanoni Jiure ne mei funudi Antiok i Pisidia ni Aekoniam. Hatimare mei ne lepo famaemahe ra nanonire mala tovi leghuza mae Pol. Eume hatimare ne khale thinaza Pol ne kohri fajiflaza magne ke kosi nau ie. Hatimare gaoghathodi re jau ne leme hui mae Pol neuwa. 20Ni nanoni khilo'au re ne krapu mei kegra falithuza magne, euwateuwe magne kegra haghe neke pulo ka nau bi'o ie. Ka keha naga'e ie, mae Pol ni mae Banabas jifla neke tei Debi.
21Phalumare ne ghaghazalaza u Grorogo te Keli gne Debi, ni chuku nanonire ne fatutu'aniza Jisas. Agnoni mae Pol ni mae Banabas teure neke pulo Listra, Aekoniam, ni Antiok i Pisidia. 22Phalumare ne thuturi ni faheaheta ra eu nanoni khilo'audi tholu nau teure mala hneta nodi fatutu'ani re. Pol ni mae Banabas ne lepo eu'ani, “Ghotolu fatutu'aniza fatheve lana ka Jisas. Eigna tati nanoni te leghuza magne re, mala rumira chuku nafnata nakahra paapara, ame tangomana na te athiza u tufuni nakahra God te funei fruniza ie euwa.” 23Pol ni mae Banabas, ne fafatera keha mae te fatutu'aniza Lod mala mae baubatu ka soasopagna khilo'au. Ka puhi lugu ni tarai, phalumare ne sakre lao ra ka khamegna Lod, mae ihei hatimare te fatutu'aniza ie. 24Pol ni mae Banabas ne liu ka provens Pisidia neke pulo ka provens Pamfilia. 25Ke leghugna te ghaghazalaza Grorogo te Keli ie ka nau Pega, phalumare ne soru Atalia.
26Ka teuwae phalumare ne saghe ka vaka ne pulo Antiok. Igne nau teke gulaora phalumare nanoni khilo'aure ka noa kokofakasa God mala koikofira phalumare, mala eiza gloku tela mei fahuhui gignoa igne. 27Kate dufu Antiok ie, phalumare ne salofaudu ra nanoni khilo'au re ne thuturi harira hna teke eiza God harira phalumare re, ni hna puhi te eiza God te mala fatutu'aniza Jisas nanoni te theome Jiure. 28Agnoni phalumare ne au faraugha ka teuwae baludi nanoni khilo'au re.
© 2025 SIL Solomon Islands