Mae khuru 13
13
Tharunga te blahi ie ne fafatera Banabas ni mae Sol
1Ire mae profet ni mae velepuhi eu te au ka khilo'au Antiok re: mae Banabas, ni mae Simion (keha nahngagna ie Naeja, gaoghathogna ie Dodofu), ni mae Lusias gna Saerin, ni mae Manaen (mae te bi'o haghe balugna mae Nafano Herod Antipas), ni mae Sol. 2Kate tarai ka God ni lugu eu te'au hatimare ie, Tharunga te Blahi ie ne lepo eu'ani ka hatimare, “Ghotolu fafatera mae Banabas ni Sol teuware mala loku ka gloku mala eiza phalumare teu rei gne.” 3Agnoni ke leghugna te tarai ni lugu teuwe, hatimare ne ta'ofira phalumare ne kuru teira ka gloku mala eira phalumare teuwe.
Banabas ni mae Sol ne tei Saepras
4Ka teke kuri fajiflara mae Sol ni mae Banabas teu Tharunga te Blahi ie, phalumare ne soru dufu Seleusia. Euwateuwe funu ka teuwae phalumare neke saghe ka kahe vaka ne tei dufu ka moumolu Saepras. 5Ni mae Jon Mak ne tei lanauwa baludi phalumare mala toghora ka nodi gloku ie. Kate dufu Salamis ka moumolu Saepras ie, tholumare tei ne ruma ka nodi suga tharai mae Jiure ne thuturiza u Grorogo te Keli noa God ie.
6Tholumare pohlo ne leuleghu nau ne tei dufu Pafos ka keha philegna moumolu ie. Ka teuwae hatimare tei ne fadeidei ka kahe mae Jiu, nahngagna ie Bajisas. Mae teugne kahe mae profet phiapita, eigna magne loku ka noilaghidi noa na'iture. 7Magne kahe noa mae gloku Sejias Polas, mae Primia gna moumolu Saepras. Sejias Polas gne kahe mae glalase lui. Magne tore ra Banabas ni mae Sol mala mei toke ka magne, eigna magne ngaguza te rogiza goeghozegna God gne ka phalumare. 8Ni mae Bajisas te keha nahngagna ie Elimas gne (gaoghathogna ie mae te loku ka noilaghidi noa na'iture) ne tho'anoara Banabas ni mae Sol ne ei keha puhi harira phalumare. Eigna magne theome ngaguza mae Primia ie te fatutu'aniza Jisas ie. 9Ni mae Sol, te keha nahngagna ie Pol gne, Tharunga te Blahi ie au balugna magne. Magne ne kofututuza ka Bajisas, 10ne lepo eu'ani ka magne, “Ghoe thugna mae Satan! Ghoe tho'anoura puhi fate'o te keli re. Ni ghoe fodu liuza ka nafnata puhi mala muamugna ni puhi te di'a mala batu fadi'ara nanonire. Ghoe leuleghu fata ie lepo fadi'aza koba tufuni goeghozegna Lod gne mala jateula thuturi muamugna ra euwa. 11Gignoa igne ie Lod gne na fategho ghoe, eume ghoe kaina doa. Ka khata hnimoto ghoe kaina theome kofiza nadafi ie.”
Ka hnimoto teuwae lana phalu nathagna magne re ne doa. Magne ne taotabo tafiri mala deiza ki nanoni mala faloku khameza tei. 12Kate kofiza mae Primia hna te eiza igne, magne ne fatutu'aniza Jisas. Ni magne tufuni vere noa lui lanauwa ka u noa fagriu Lod te eira mae Pol ni mae Banabas teure.
Pol ni mae Banabas ne tei Pisidia
13Pol ni ihei teke tei balugna re ne saghe ka vaka funu Pafos tei ne longa Pega, kahe nau ka provens Pamfilia. Ka teuwae mae Jon Mak ne ghae kokora hatimare neke pulo Jerusalem. 14Ke leghugna igne hatimare jifla Pega ne tei dufu Antiok kahe nau kehreagna provens Pisidia. Ka u naga'e Sabat gne hatimare ne tei ka nodi suga tharai mae Jiure. 15Kate ijuiju mae funeidi suga tharai re noa buka mae Moses ni nodi buka mae profetre, hatimare ne lepo eu'ani ka mae Pol ni kheragna re, “Kheragura, gheati ngagughamu ghotolu te lepo harira nanonire, eu te au keha nomi thuturi ghotolu te mala toghorare.”
16Pol ne kegra haghe ne eiza kahe falalase ka khamegna ie mala farogo fakeli hatimare, ne lepo eu'ani, “Ghotolu maemi Israel ni ghotolu nanoni te theome Jiu te mei ka tarai te mala tufru soruza God, ghotolu farogo fakeli ka rei. 17Nodi God mae Israel re neke fafatera mae ku'eda tifa re, euwateuwe magne ne fablua ra ka nau Ijip. Ni ka noa noilaghi te bi'o magne ne atha fajiflara hatimare Ijip. 18Ka phalututu finogha ke hnuagna nau nagou ie, God neke toghora koba, neuba hatimare ne huhughu ne eira chuku puhi bi'o te di'a lui re. 19God neke re'o fahuira fitu khokolo teke au ka nau Kenan re, euwateuwe ke sakre lao nau teugne ka noa nanoni thaigna re. 20Gobigna puhi ire neke eira ke hnuadi fati gobi glimafulu finogha.
“Ke leghugna igne, God ne fafate keha mae mala fate mala koikofira nanonire au ghile dufiza naga'e gna mae profet Samuel. 21Ka hnimoto teugne, nanonire ne toreza mae Samuel mala fafate kahe mae nodi nafano. Agnoni God ne fafateza mae Sol thugna mae Kis, magne kahra ka khokologna mae Benjemen. Magne ne mae nafano dufiza phalututu finogha. 22Ke leghugna igne, God ne atha famaghaniza mae Nafano Sol ka sape teugne, euwateuwe ke fafateza mae Devet mala ke mae nafano hno'igna magne. Igne hna teke lepoza God gna magne ie, ‘Rei fafateza David thugna mae Jese, igne lana mae te tufuni ngagughauza ie. Magne kaina eira puhi fate'o te mala eira magne teu rei re.’
23“Agnoni God ne atha kahe mae ka vikegna mae Devet gne mala nodi mae fakahra mae Israel re, igne te mae Jisas ie! Eigna God neke kulu na'alepoza hui igne. 24Ame mei na Jisas teuwe, mae Jon Siublahi teke kulu tarabanaza meigna magne ie. Jon neke kulu ghaghazalaza ka nanonidi Israel re mala ho'ignagnafa ni siublahi. 25Euwateuwe kate thatai huigna noa gloku ie, mae Jon neke lepo eu'ani, ‘Ghotolu ne mae hei eughau rei? Rei theome mae Kraes te tukiza ghotolu gne. The'o, magne kaina mei na au ke leghugu rei. Ni rei theome gizagu te rurutha noa sadolo magne re.’
26“Uve, kheragura, ghotolu khokologna Ebraham ra, ni eulanauwa ghotolu nanoni te theome Jiu te mei ka tharai te mala tufru soruza God gne, farogo fakeli ka rei! Te laseza tati ie, God neke sakre meiza u Grorogo te Keli gna u tufuni nakahra ie ka tati. 27Euwateuwe mae ihei teke au Jerusalem ni nodi mae mala baubatu teure, theome kofu falaseza lana te Jisas gne la mae fakahra teke na'alepo God ie. Hatimare theome lasera lanauwa nodi goeghoze mae profet te ijuijura koba leuleghu naga'e Sabat re. Ni goeghoze ire ne tufuni mei tutu'ani kate fate falemeza hatimare Jisas ie. 28Neubane theome kofiza hatimare kahe nafugna te mala falemeza Jisas ie, hatimare ne toreza Paelat mala falemeza magne. 29Ke leghugna te eira hatimare gobigna puhi teke lepora mae profet ka u i'ini blahi ie. Hatimare ne atha soruza magne ka u gazu fafata ie neke giugiluza ka gluma ie. 30Ni God neke fakahra fapuloza magne ka u gleme! 31Chuku naga'e ke leghugna igne, nanoni teke tei tei balugna magne tifa funu Galili te dufu Jerusalem re neke kofiza magne. Euwateuwe gignoa igne ie, hatimare thuturiza magne koba ka nanonidi Israel re.
32“Gheati thuturi ka ghotolu u Grorogo te Keli gna na'alepo teke eiza God ka mae ku'eda tifa ra. 33U na'alepo igne ne mei tutu'ani ka tati thudi hatimare re. Magne eiza igne kate fakahra fapuloza Jisas ka u gleme, jateula te lepoza ka fapalu Sam ia,
“ ‘Ghoe mae Thugu rei.
Funu gignoa igne, rei mae Mamu ghoe.’#13:33 Sam 2:7.
34God ne fakahra fapuloza Jisas ka u gleme, mala theome ke bose thonogna magne ie ka glose. Eume God neke lepoza hui,
“ ‘Tutu'ani lui, rei kaina ie na gu'ari ka ghotolu u tufuni fablahi
teke na'alepoza rei ka mae Devet ia.’#13:34 Aesaea 55:3.
35Ni ka keha hnimoto ka I'ini te Blahi re God neke lepo eu'ani,
“ ‘Ghoe kaina ie na theome sakreza nou Mae Blahi ie
mala bose ka glose.’#13:35 Sam 16:10.
36“Uve, kate kahragna teke au mae Devet ia, magne neke eiza hna teke ngaguza God ie. Ni kate leme magne ie, hatimare ne giugiluza magne baludi mae ku'egna re, euwateuwe thonogna magne ie neke bose lana ka gluma ie. 37Ni mae Jisas, God teke fakahra fapuloza ie neke theome bose ka gluma ie jateula mae Devet.
38-39“Uve, kheragura, rei ngagughaughamu ghotolu te lase fakeliza hna te lepoza gheati ka ghotolu gna Jisas gne. God tangomana atha kokora nakhibomi ghotolure ka Jisas lana. Euwateuwe mae ihei te fatutu'aniza Jisas ie, magne kaina kohlo lui ka nathagna God. Ni God kaina atha kokora nakhibogna re mala sagla magne. Ni noa vetula mae Moses re theome tangomana te atha fasaglira nakhiboda re. 40Eume koikofighamuni ghotolu ia, na euni khale ka hna te lepoza mae profetre euwa,
41“ ‘Ghotolu nanoni te ma'eza God ra, ghotolu fakofu! Ghotolu kaina vere nomi,
ni ke leghu ghotolu kaina ie leme!
Eigna nogu fate rei te tufuni hneta ie, rei kaina eiza gignoa igne.
Ni meuba hatimare ne lepoza ka ghotolu gna igne,
ghotolu kaina ie na theome fatutu'ani ra hna te rogira re.’ #13:41 Habakuk 1:5. ”
42Kate jifla mae Pol ni mae Banabas ka suga tharai ie, nanonire ne tore ra phalumare mala ke pulo mei ke thuturi harirani puhi ire ka keha naga'e Sabat ie. 43Ke leghugna teke tei ka suga tharai ie, mae Jiu ni mae te leghura nodi fatutu'ani mae Jiu teu te tufru soruza God re ne leghura mae Pol ni mae Banabas ne tei ka nabrau ie. Phalumare lepo harira hatimare mala au maku ka noa nahma bi'o God ie.
44Ka keha naga'e Sabat ie, thatai nanoni fate'o gna gruru ie ne krapu mei mala rogiza goeghozegna Lod ie. 45Kate kofira mae funeidi mae Jiure chuku nanoni te mei ie, hatimare ne fua gogotura lui ka mae Pol ni mae Banabas. Hatimare ne lepo fadi'ara gobigna goifata te lepora mae Pol re ni eulanauwa ne lepo fapariza magne.
46Ni mae Pol ni Banabas teure ne theome hmau ne lepo eu'ani, “Ghepa ngagughami te kulu thuturiza ka ghotolu mae Jiure u goeghozegna God ie. Ni eigna te tho'anomi farogo ghotolu ka goeghozegna God ie, ghotolu fatakleza te ghotolu theome gizami te athiza nakahra te fei auwe. Eume ghepa gignoa igne na tei kokoghamu mala ke tei ka nanoni te theome Jiure. 47Eigna Lod neke lepo faheta eu'ani ka ghepa,
“ ‘Rei neke fafategho ghoe mala jateula kahe nabae mala fabae ra nanoni te theome Jiure,
mala tangomana rei te fakahrira nanoni te huigna ka nauthoglu gne.’ #13:47 Aesaea 49:6. ”
48Kate rogiza te lepo eu'ani mae Pol ie, nanoni te theome Jiure ne tufuni hneahnegha lui. Hatimare ne lepo fakeliza Lod gna u noa grorogo te keli ie. Ni ihei God teke fafatera te mala athiza u nakahra fei auwe ne fatutu'aniza lanauwa Jisas.
49Agnoni goeghozegna Lod gne ne tei fate'o hia te hia ka nanoni te au ka hnimoto teugne. 50Ni thotoghei mae funeidi Jiure ne lepo faheta ka thotoghei naufa'a ni nakrupe eugna hnimoto teugne, mala tovi leghura mae Pol ni mae Banabas. Hatimare funu e'ei chuku puhi harira mae Pol ni Banabas ni brue fajiflara phalumare ka nodi hnimoto ie. 51Agnoni mae Pol ni mae Banabas ne kegra ke uludi nanonire ne ghiha koko gnagnapa ka nenedire, falalase gna te God kaina fate ra hatimare teuwe. Ke leghugna igne, phalumare jifla Antiok ne tei Aekoniam. 52Ni nanoni khilo'audi Antiok re ne kelitadi lui, eigna Tharunga te Blahi ie au ke hnuadi hatimare.
© 2025 SIL Solomon Islands