Mae khuru 12
12
Nafano Herod Agripa choghaza khilo'au ie
1Ka naga'e teuwae lanauwa mae Nafano Herod Agripa ne funu choghara keha nanoni khilo'au re. 2Magne ne lepora keha mae ne falemeza Jems tabusigna mae Jon ka naflahi mala magra. 3-4Kate kofiza magne te kelitadi mae Jiure ka lemegna mae Jems ie, magne ngaguza lanauwa te saguza mae Pita ie. Agnoni, ka naga'e Ngamu gna Bereti te the'o Isigna ie hatimare ne na'ilaoza Pita ka suga sosolo ie. Ni mae Herod ne sakre laoza Pita ka khamedi salei namno mae soldia te tufara thaidi ka fati thotogheire mala sedereza magne. Herod ngaguza te athiza Pita mala fateza magne ke uludi nanonire ke leghugna naga'e Ngahngamu Pasova ie.
5Eume, mae soldiare ne koikofi fakeliza mae Pita ka suga sosolo ie. Ni eulanauwa nanoni khilo'au re ne tarai tore lao ka God mala toghoza mae Pita.
God ne udi fajiflaza Pita ka suga sosolo ie
6Bongi ame naga'e nate ghathoza Herod mala fateza mae Pita teuwe, mae Pita ne thuru farihotenidi phalumae soldia. Hatimare sosoloza magne ka phalu cheni, ni keha mae mala koukofure dofra kegra ne au ka nathangagna suga sosolo ie. 7Kahe engjel noa God megona ne kegra ka glamagna suga sosolo ie, ni kahe najuta bi'o te bae lao ka hnimoto teugne. Engjel gne ne habo laoza mae Pita ne fadofraza, ni lepo eu'ani ka magne, “Pita, faghose kegra haghe!” Agnoni, phalu cheni teke sosoloza khamegna mae Pita re megona ne kusu ne uthu soru.
8Agnoni engjel gne neke lepo eu'ani ka magne, “Famamaku fakeli nou hnugha ie ni nou sadolo re euwa.” Pita ne leghuza goeghozegna engjel gne. Ni engjel gne neke lepo eu'anini ka magne, “Fahaghe nou phoko u'uru ie ni mei balugu rei.” 9Agnoni mae Pita ne leghuza engjel ie ne jifla ka chogho ie. Ni mae Pita gne jau ne mifi lana eume theome ghathoza ne puhi tutu'ani teugne teuwe euwa. 10Phalumare ne tei liuza thotoghei mae doadofra ulu lahu ie ni eulanauwa ne liuza ka fapalu thotoghei mae te dofra re. Ni leghu lahugna ie phalumare ne mei ka u nathanga aean bi'o te malani la jifla tei lana ka gruru ie teuwe. Kate mei phalumare ka teuwae ie, u nathanga teugne megona ne thora lana thaigna. Agnoni phalumare jifla ne leghuza ne tei kahe nabrau, ni engjel ie megona ne the'o kofiza ka teuwae.
11Ka hnimoto teugne mae Pita neke sagla gaoghathogna ie, ne lepo eu'ani, “Tutu'ani lui, agnola tufuni laseza na rei te sakre meiza God noa engjel ie mala fakahrighau rei ka khamegna mae Nafano Herod ie, ni ka gobigna puhi teke mala ei harighau rei teu mae Jiure.”
12Kate laseza igne, magne ne tei ka sugagna Mere dogna mae Jon Mak. Chuku nanoni krapu ni tarai eu ne au ka teuwae. 13Agnoni, mae Pita ne mei ke kosi ne rueruge ka nathanga ie. Kate rogiza igne, kahe ga'ase gloku nahngagna ie Roda ne mei mala thotora nathanga ie. 14Agnoni kate rogi falaseza gne'e naoglagna mae Pita ie, gne'e ne hneahnegha lui ne ghatho iho noaza mala thotora nathanga ie. Gne'e chari neke pulo ne aku eu'ani fabi'o, “Ghotore, Pita kegra au ke kosi nathanga ie!”
15Nanonire ne lepo eu'ani ka gne'e, “Ghoe jau noliuwa!” Ni gne'e ne lepo eu'ani, “Tutu'ani, rei te laseza ie mae Pita au lana.” Agnoni hatimare ne lepo eu'ani, “Jame noa engjel mae Pita jauwa!”
16Ni Pita ne rueruge fatheve ne au lana ka nathanga ie. Kate thora hatimare nathanga ie, hatimare ne kofiza magne, ne tufuni vere nodi lui. 17Agnoni mae Pita ne eiza kahe falalase mala au famuu hatimare ni farogo, agnoni magne ne thuturiza hna te eiza God hariza magne te atha fajiflaza ka suga sosolo ie. Ke leghugna igne, magne lepo ka hatimare mala thuturi hariza mae Jems ni keha nanoni khilo'au re. Agnoni magne neke ghae kokora hatimare neke tei ka kahe nau maghani.
18Boibongi fufughogna keha naga'e ie, hatimare mae soldiare ne fa'ihora lui, ne lepo eu'ani farithaidi, “Mae ghoe! Hiani au mae Pita gnea?” 19Herod ne lepo faheta ka hatimare mala hiroza magne, ni hatimare ne theome ke deiza lana magne. Agnoni Herod ne kilomei ra mae soldiare ne ghuhna ra hatimare, euwateuwe lepoza te hatimare kaina leme teuwe. Eume magne ne faleme ra hatimare.
Glemegna mae Herod Agripa
Euwateuwe ke leghugna igne Herod ne jifla Judia ne tei au Sisaria. 20Kate au te'au magne Sisaria ie, mae Herod ne di'atagna lui ka nanonidi phalu gruru bi'o Taea ni Saedon teure. Agnoni mae funeidi phalu nau teure ne loku faudu mala tei kofiza mae Nafano Herod. Ululahu ie, hatimare ne kulu famaemaheza mae Blastas, mae funeigna noa thotoghei mae gloku Herod re mala togho ra, eume magne ne toghora hatimare. Ke leghugna igne, hatimare ne toreza u keliphari ie ka mae Herod, eigna funu tifa te mei ie, nanonire tei foli gano koba ka nau te funei fruniza mae Herod gne.
21Ka dufu meigna naga'e teke kulu fafateza ie, Herod ne fahaghe noa phoko funei ie, ne hokro soru ka sape nafano ie ne lepo harira nanonire. 22Agnoni nanonire fahaehagheza magne ne aku eu'ani fabi'o, “Tutu'ani lui, theome nanoni te ghoeghoze igne, god gne!” 23Euwateuwe Herod ne sakrera nanonire mala lepo fakeliza lana thaigna, ni theome lepora mala kilo uluza God. Ka teuwae lana, kahe engjel noa God ne fafograza mae Herod. Euwateuwe phoipoli ichoni re ne ngamuza thonogna magne ie, au ne ghile leme.
24Ni goeghozegna God gne faghoseni lana tei fate'oza hia te hia, eigna teugne chuku chuku nanoni ne fatutu'ani.
25Ka huidi mae Banabas ni mae Sol nodi gloku Jerusalem re, phalumare neke pulo Antiok. Ka teuwae phalumare ne udiza Jon Mak baludi.
© 2025 SIL Solomon Islands