Mae khuru 11
11
Pita neke pulo Jerusalem
1Hatimare mae khuru ni keha nanoni khilo'au te au hia te hia Judia re, ne rogiza te nanoni te theome Jiure la fatutu'aniza goeghozegna God teuwe. 2Agnoni kate dufu lao mae Pita Jerusalem ie, nanoni khilo'au te hneta lui ka puhi tela tohifalalase ame noa nanoni God na teure, ne lepo fadi'a eu'aniza magne, 3“Ghoe tei ka sugadi nanoni te theome Jiure! Ni ghoe eulanauwa ngamu baludi hatimare!”
4Agnoni Pita ne thuturi harira gobigna puhi teke eira re, ne lepo eu'ani, 5“Rei neke au ka gruru Jopa. Euwateuwe kahe fata kate tarai te'au rei ie, rei ne thurumakofui. Ka thurumakofui teugne, rei kofiza kahe goifata jateula pohe bi'o eu ne soru mei funu ka manga ie. Kokofugna ie jateula te louloku fati nanoni ka fati khukrugna re ni fahruhru soru, eu ne mei thata ka rei. 6Rei kofu lao hnua ka pohe teugne ne kofira soasopa goifata te tautagu ka nauthoglu gne jateula goughoru, goifata te nasi fate'o ni nafnata pholi fate'o ni nafnata memeha fate'o. 7Agnoni, rei ne rogiza kahe naogla ne lepo eu'ani, ‘Pita, kegra haghe faleleme goifata are mala ngamu.’
8“Ni rei ne lepo eu'ani, ‘The'o Lod! Rei theome tangomana te ngamu goifata te thona ka nathamu ni theome naba mala ngamu teure.’
9“Ni naogla te mei funu klia ie neke lepo eu'anini ka rei, ‘Pita, goifata te lepora God ne ga'e teure ghoe tovi lepora ne thona teuwe!’ 10Tholu fata te eiza teugne ie, ni ke leghugna teugne goifata teuwae neke haghe ka manga ie.
11“Ka hnimoto teuwae lana, tholumae ne mei ka suga te au rei ie. Mae teure kahe maegna Sisaria au teke kuri mei ra ka rei re. 12Euwateuwe Tharunga te Blahi ie ne lepo harighau rei mala tovi hmauza rei kahe puhi, ni mala tei rei baludi. Namno nanoni khilo'audi Jopa lanauwa teke tei balugu rei re. Gheati tei ne dufu ka sugagna mae Konilias i Sisaria. 13Magne ne thuturi harighami gheati gna teke kofiza magne kahe engjel kegra teke au hnua ka suga ie. Ni engjel gne ne lepo eu'ani ka magne, ‘Ghoe kuri ra keha mae mala tei Jopa udi meiza mae Saemon, keha nahngagna ie Pita. 14Magne kaina lepo harigho ghoe kahe grorogo, te mala fakahrigho ghoe ni thabutuamu fate'o re.’
15“Kate funu ghoeghoze te au rei ie, u Tharunga te Blahi ie ne soru mei ka hatimare jateula teke soru mei ka tati ka fufunugna ia euwa. 16Ka teuwae rei neke ghatho fapuloza hna teke lepoza Lod ia, ‘Jon neke siublahighamu ghotolu ka u kho'u lana, ni rei kaina ie na fasiublahighamu ghotolu ka u Tharunga te Blahi.’ 17Tutu'ani, rei kofiza God ie neke gulao Tharunga te Blahi ie ka nanoni te theome Jiure, jateula magne teke gumei ka tati nanoni te kulu fatutu'aniza noda Lod Jisas Kraes ra euwa. Eume rei theome tangomana te lothiza noa gloku God ie.”
18Kate rogiza igne, nanoni khilo'au re ne theome lepoza kahe goifata ka mae Pita. Ni hatimare lepo fakeliza God ne lepo eu'ani, “God eulanauwa sakrera nanoni te theome Jiure mala figri ka magne te mala athiza nakahra ie.”
U khilo'au Antiok
19Ke leghugna teke falemeza hatimare mae Stivin ie, chuku nanoni khilo'au re pelo ne jifla Jerusalem. Keha nanonire pelo ne tei dufu ka provens Fonisia, ka moumolu Saepras, ni ka gruru bi'o Antiok. Ka teuwae hatimare ne thuturiza u Grorogo te Keli gne ka nanoni te Jiure lana. 20Ni keha nanoni khilo'au te mei funudi Saepras ni Saerin teure, hatimare ne thuturi gna Jisas Kraes ka nanoni te theome Jiure Antiok. 21Noilaghi noa Lod gne ne au baludi, euwateuwe nanoni chuku re ne fatutu'ani ne leghuza Lod.
22Grorogo igne ne tei dufu ka nanoni khilo'au gna Jerusalem. Agnoni hatimare ne kuri teiza Banabas Antiok mala togho ra. 23-24Banabas gne kahe mae keli ni Tharunga te Blahi ie au balugna magne, ni noa fatutu'ani magne ie fua hneta lui. Ka dufu gna magne ka nau ie, magne ne hneahnegha lui, eigna magne laseza God gne la kulu fablahira hui nanonire. Chuku naga'e mae Banabas ne faheheta ra gaoghathodi nanoni khilo'audi Antiok re mala tufuni leghuza noda Lod. Eume, ka naga'e teuware chuku nanonire ne fatutu'aniza Lod.
25Ke leghugna igne mae Banabas ne tei ka nau Tasis mala hiroza mae Sol. 26Kate deiza mae Sol ie, Banabas ne udiza magne ne pulo Antiok. Agnoni Phalumare ne au Antiok kahe finogha baludi nanoni khilo'au re. Phalumare ne fagriura chuku nanoni ka teuwae. Antiok gne lana nau ulu lahu teke funu kilora hatimare nanoni te fatutu'aniza Jisas re, nanoni khilo'au teuwe.
27Ka naga'e la teuware keha mae profet re ne jifla Jerusalem ne tei dufu Antiok. 28Agnoni kahe mae profet ka mae teure nahngagna ie Agabas. Magne kegra haghe ne ghoeghoze ka noa noilaghi Tharunga te Blahi ie ne lepo fatakleza u hnigra nate dufu mei behu hia te hia ka nauthoglu gne. Puhi teugne ne mei tutu'ani kate kegra funei ulu te au mae nafano Klodias, Rom ie. 29Agnoni mae farogo re ne kahe gaoghatho mala fatetei nanugra leghuza hna te tangomana ra re mala toghora nanoni khilo'au te au Judia re. 30Hatimare ne eiza igne, ne saosalo keha nanugra ne gulao ka mae Banabas ni mae Sol. Agnoni phalumare atha ne tei nanugra teure ka thotoghei mae baubatu ka khilo'au te au Jerusalem re.
© 2025 SIL Solomon Islands