Luka 9
9
i Yēsu pakarun kana papulu' zi zazuwa na sito
(Matay 10.5-15; Maruko 6.7-13)
1i Yēsu puwazuk kana papulu' zi zazuwa na sito, veray kanazu za kezang venawi kana palrar zi paka'inava kana kuwalengan, 2zi pakarun kanazu mukuwa palenaka kanantu vati kana kanatal na Viruwa i itras, pawnung paka'inava kana kuwaaleng. 3marengay kana temakesi: <<kazu mu i dadalan mu, i aurung za emaeman: i aurung za surekuzan, i aurung za lravatr, i aurung za aekanen zi za paisu, zi iranganger za mipakesavak za zuwaya. 4anu mukuwa lra i iyan mu, na i iyan na ruma' nu muwai kiyatrevung kanmu, zi kikazu mu i kazu, palru za muveruk mu i kazu. 5nu kiretrevung mu kana 'azi tematara kanmu na trau, nu muwaveruk mu kanizu na kazekalran mu, tapetapu na trevulr i dapalr, pakanu pataranapaw kanazu.>>
6zi mupatraran na temakesi, kemakawang makazekazekalr palenak kana fukuing, paka'inava kana kuwalengan makaiyaiyan ziyan.
tu kina'ulid mavangavang ni Hērodē
(Matay 14.1-12; Maruko 6.14-29)
7na yawan i Galili i Hērodē kinger kanini na inupanayan na lremak peniya, salaw ka'uli'ulid mavangavang tu anger, 'alrana ulra a trau marengay: <<marevaaw lra na semasuwap i Yohanē.>> 8zi ulra a trau marengay maw i Ēliya kurepana'u lra; ulra ziya a trau marengay maw a awatr ziya a sasa na patralritralri marevaaw lra. 9marengay i Hērodē: <<ku selretevaw lra nantu tranguru' ni Yohanē, mawmu ini na trau maw i eman awa? zi kinger ku sazu za kireeman kanantu lremak.>> zi kemazu i intaw maranger mena'u kani Yēsu.
i Yēsu pakavetreker kana luwatra kuzulr na trau
(Matay 14.13-21; Maruko 6.30-44; Yohanē 6.1-14)
10muruma' na sito, nazu pakalrazam kani Yēsu kanantu kinikarunan na lremak peniya. i Yēsu tu pilralrangaw nazu, marapengan mukuwa i Bētsayta na kinakuwa na kazekalran. 11a malrazam na zinekalranan, zi kurelrang kantaw mukuwa. uvalringay i Yēsu kanazu, venavati kanazu tu pinitrepa na kezang kana Viruwa i itras na lremak, zi paka'inava ziya kana maranger kipaka'inava za kuwalengan na trau.
12a mulusu na kadaw a azu mu, zuwa kirepana'uwa kani Yēsu na papulu' zi zazuwa na sito, marenagay kantaw: <<'alrazi rengay paruwadadayu na zinekalranan, maruwaya mukuwa i dalrep kana zekalr miya'a za aekanen zi kaazuwan nazu, 'alrana mudawilr i zekalr i kani na kinazuwan.>>
13mawmu marengay i Yēsu kanazu: <<veray za eman paekan kanazu i inmu!>>
marengay nazu: <<mawmau ulra mi za lruwatra pang zi zuway vulraw. kamelriya lra pauwa u kaniyam mukuwa tremima'a za aekanen paekan kananni na mulepun na trau ziyamaw?>> (14a azu mu, tu pinitrawan na ma'inayan mu kararuwa za lruwatra kuzulr.)
marengay kana temakesi i Yēsu: <<rengayu sasevasevangu kemayan na lepun na trau, na sasevanganan karuwa makalruwatr na trau.>> 15paturus kanantu ngay kemakuda lra na temakesi, pakayan lra kana zinekalranan mapiya. 16melak kana lruwatra pang zi zuwaya na vulraw i Yēsu, mena'u piyaitras, lrayuwan kana Viruwa i itras, zi penisa', temuluz veray kana temakesi, na temakesi tu paniniyanay kana zinekalranan. 17mekan mapiya, pawnung vetratrekeran mapapiya lra. na temakesi tu azukaw na sama' na karekitekiteng, muavak matemuy kana muketrep zi zuwaya 'arayan.
i Pētēro pakanumaw kani Yēsu za maw i Kiristo
(Matay 16.13-19; Maruko 8.27-29)
18ulra a paresan, kazu sasa kiyaanun i Yēsu, zuwa kirepana'uwa kantaw na temakesi. kiyumalr kanazu i intaw marengay: <<marengay na zinekalranan i eman kema kaninku?>>
19temuvang nazu: <<ulra na marengay za maw na semasuwap i Yohanē; ulra na marengay za maw i Ēliya; ulra ziya na marengay maw a awatr ziya na sasa patralritralri marevaaw lra.>>
20kiyumalr i Yēsu kanazu: <<i inmu mu? rengay i inmu za i eman ku?>>
temuvang i Pētēro: <<maw u pinatikezir na Viruwa i itras i Kiristo.>>
i Yēsu putralri marengay kanantu kikuwaatreng zi kiyanatrayan
(Matay 16.20-28; Maruko 8.31--9.1)
21kemuzu zi, i Yēsu kemaaluzung semeratr kanazu irarengay kani emaeman kanini na lremak. 22marengay ziya i intaw: <<Alrak na trau 'azika'azi uwaelep za sazu za ulepan, ki'atelr kana ciyoro, na ma'izang na rahan, zi na sinsi kana Sēsiyo, pawnung kipinatray, katatelu wari kavavaaw.>>
23i Yēsu marengay ziyan kanazu mapiya: <<nu ulra a trau kuwarelrang kaninku mu, zi tra'an i inu kannu, kana wariwari penazek kanantu ziyuzika alamu kurelrang kaninku. 24'alrana izu na maranger venaaw kanantu uwavaawan i intaw mu, muveliyas uwalremes tu uwavaawan; izu na muramawan kaninku malremes tu uwavaawan mu, muveliyas aelak za uwavaawan. 25na trau nu kiseker melak lra kana punapunan peniya mu, mawmu mulremes i intaw zi za savunganay lra tu uwavaawan i intaw mu, ulra a eman ka'inavayan nay? 26nu ulra a trau pakanu kasamazan kema kaninku zi kananku vati mu, Alrak na trau kazu kanantu lihu i savakan, zi tu lihu ni Temamataw zi na vangesar na tēnsi nu meredek mu, kemazu kemasamaz kantaw. 27penazangala ku marengay kanmu, na matikezir kani na trau mu, ulra na nu kiyanatray pakangawayan nana'u kanantu kezang na Viruwa i itras za mula'esi lra.>>
muvalis za pinizazekan
(Matay 17.1-8; Maruko 9.2-8)
28a marengay kananni na ngay kararuwa za kawalu wariyan, i Yēsu tu pilralrangaw i Pētēro, Yohanē zi i Yakob mukuwa i zenan kiyanuna. 29a kiyaanun i Yēsu mu muvalis nantu pinizazekan lra, tu kavang kemazu muvalis vulretri' semenan. 30maherareher za mupana a trau zazuwa kimazayar kantaw, ini na zazuwa na trau maw i Mosē zi i Ēliya. 31nazu kazu kurena'u kana lihu i savakan, kimazayar kani Yēsu za uri kaazu i Yērusalem pakalrang za kiyanatrayan kemipiya kanini na rilreng na lremak. 32i Pētēro zi tu lralrang alralrupe'an lra; a masenkin nazu mu, mena'u kanantu lihu ni Yēsu zi na mukasa matikezir tu lralrang na zazuwa. 33nazu na zazuwa a muwaaday kani Yēsu mu, i Pētēro marengay kani Yēsu: <<sinsi, kazu ta i kani tatena' za 'inava! patalraviyaw mi i kani za teluwa, vaveray kannu na saya, vaveray kani Mosē na saya, vaveray kani Ēliya na saya.>> (tatena' za 'azi malrazam za mararengay za eman i intaw.)
34a mararengay ziya i intaw mu, ulra a kutrem mupana, metrav kanazu, a muwadalrep na kutrem mu, salaw makaud na temakesi mapiya. 35maherareher za mupana a lrengaw kemay kana kutrem, marengay: <<ninku Alrak i ini, ninku pinalimi', i inmu kingeri iturus kantaw!>>
36maziyazi lra izu na lrengaw mu, mawmau i Yēsu sasa na kazu i kazu. kanazu na wari mu, i ini na lremak marapengan na temakesi, 'azi marengay kani emaeman kanantu nina'uwan ziyan na lremak.
paka'inavayaw na pinalrar na alrak
(Matay 17.14-18; Maruko 9.14-27)
37a kazuwa wari, mulusu kemay i zenan nazu mu, ulra mulepun a trau zuwa kiyatrevung kani Yēsu. 38i savakan kana lepun na trau maherareher za ulra a trau 'emuy'uy marengay: <<sinsi, kiyami ku kannu vaawaw ku alrak, maw a saverasan ku alrak i intaw! 39na palrar marayas temengez kantaw, paherareher kantaw kematamuni 'emuy'uy, zi tu pararutrengaw ziya, mutamuta' venure' i udung; na palrar 'azi maziyaazi kemuwatreng venuli' kantaw, 'azi muwai meretra'! 40kiyami ku kanannu temakesi za venerelrang puveruk kana palrar, mawmu 'azi maruwa kemakuda nazu.>>
41marengay i Yēsu: <<i inmu kanini na ziday na trau kemuda kana iniyan za pakutena'an, kemuda kana kuwatreng a! kaazu ku ziya kanmu i kani manueman za kasawariyan ziyamaw? saseker ku ziya kanmu palru nu aidan ziyamaw?>> kemazu zi marengay kanizu na trau: <<pukuwaniyu nu alrak i kani.>>
42a zuwa izu na alrak mu, na palrar tu tapelra'anay i dare', pararutrengaw i intaw. i Yēsu maselru kanizu na palrar, paka'inavayaw lra na alrak, tu tuluzanay kani temamataw. 43salaw pakumelri mapapiya kana Viruwa i itras kanantu kezang na ma'izang.
i Yēsu masalr putralri marengay kanantu kiyanatrayan
(Matay 17.22-23; Maruko 9.30-32)
a pakumelri kanantu kinakuda peniya na lremak ni Yēsu mu, masalr ziya marengay i Yēsu kanantu temakesi: 44<<ikalalup kananku nirengay kanmu: Alrak na trau uri tatuluzanay i lima kana trau.>> 45mawmu 'azi patulre'ay malrazam kanantu pauwayan ini na ngay nazu; 'alrana tu pauwayan muvulri 'azi kurekalrazaman, 'azi maruwa patulre'ay malrazam nazu. zi makaud kiyumalr za kemuda ini na lremak nazu.
i eman na maraayawayawan
(Matay 18.1-5; Maruko 9.33-37)
46na temakesi masakisaki za i eman na maraayawayawan i savakan kanazu. 47malrazam i Yēsu kanazu za kemiyaanger za eman, zi venina za sasa za alrak pazuwa, tu patikeziraw kantaw i trapingiran, 48zi marengay kanazu: <<izu na muramawan kananku ngadan zi temara kanini na alrak mu, mawna temara kaninku; izu na temara kaninku mu, mawna temara kana pazuwa kaninku kanizu na sasa. kanmu i savakan i eman na 'azi kirungerungetr mu, maw i eman na maraayawayawan.>>
kima'etrev zi za paturus
(Maruko 9.38-40)
49i Yohanē marengay kani Yēsu: <<sinsi, mena'u mi za ulra a trau pakalrang kanannu ngadan venerelrang kana palrar, zi paziyazi mi kantaw, 'alrana 'azi muwai kurekasa kaniyam kurelrang kannu.>>
50zi i Yēsu marengay kantaw zi na zuma na temakesi: <<amanan na paziyazi kantaw, 'alrana 'azi semuveli kanmu mu mawna paturus kanmu.>>
na 'azi muwai temara kani Yēsu na zekalr
51na kiyatuluz kani Yēsu mukuwa kana kanatal i itras na wari adalrep lra, kemuret lra i anger i intaw za auwain i Yērusalem, 52kemazu zi pakarun za trau piyanguwayan mukuwa. a meredek i Samaliya kana saya zekalr, paruveli kani Yēsu penadang za eman ziya. 53mawmu na trau i kazu 'azi uvalringay kantaw, 'alrana i intaw kurekalrazam za makuwa i Yērusalem. 54tu temakesi i Yakob zi Yohanē mena'u kanini na nirekudayan, zi maregay: <<Luzu a, pavavina u kaniyam#9.54 <<pavavina u kaniyam>> pakazuma ulra pidaya na awatranan lulun vinavalray za <<nu i kiresanaw mi kani Ēliya venina>>. kana apuy i itras za zuwa venatri'a palremes kanazu ziyamaw?>>
55marepiles i Yēsu, maselru kanazu#9.55 ulra pidaya na awatranan lulun kazu i <<maselru kanazu>> makalikuzan puwayay za <<marengay: <'azi mu malrazam i inmu za muravak kana iyen na lu'em; 'alrana zuwa tu pauwayan na Alrak na trau mu, maw na venavaaw kanazu.> >>. 56zi mukuwa lra nazu kana zuma na zekalr.
na kuwarelrang kani Yēsu na trau
(Matay 8.19-22)
57kazu ziyan i dadalan nazu mu, ulra sasa a trau marengay kani Yēsu: <<anu mukuwa u lra i iyan mu, kuwarelrang ku kannu.>>
58marengay i Yēsu kantaw: <<ulra nantu vuwang na kungkung, ulra nantu ruvu na 'ayam, mawmu Alrak na trau arusay iniyan za salrazanan.>> 59marengay kana zuma sasa a trau: <<alamu kurelrang kaninku!>>
mawmu marengay izu na trau: <<Luzu a, 'alrazi piyanguwayanaw ku ziya puruma' mukuwa tremevelra kani amalri.>>
60marengay i Yēsu: <<pauwayu na minatray na trau tremevelra kanantu trau na minatray mu! kema ta kannu mu, auwa u palenaka kanantu fukuing kana kanatal na Viruwa i itras.>>
61ulra ziya a sasa marengay: <<Luzu a, kuwarelrang ku kannu, mawmu puruma'aw ku ziya mukuwa kipatunun za niruma'enan.>>
62marengay i Yēsu kantaw: <<na demikes kana kangkang zi mena'una'u piyalikuzan na trau mu, iniyan za pakakudayan kanantu kanatal na Viruwa i itras!>>
Currently Selected:
Luka 9: TPN
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023
