Luka 10

i Yēsu pakarun za makapitun zi zazuwa za trau

1a melavat lra za pida wariyan, i Luzu palimi' lra za zuma makapitulr zi zazuwa#10.1 1 zi 17 vatras <<makapitulr zi zazuwa>> ulra pidaya na awatranan lulun vinavalray za <<makapitulr>>. za trau. pakarun pauwa kanazu, na sasevang mu zazuwa na trau, iyanguwayan mukuwa kanantu awayan mumalra na zazekazekalr. 2marengay i intaw kanazu: <<sazu na sinaleman, kaytayan na kiyakarun na trau. semeneng, uwa kiyami kana mi'a'uma kani Luzu i inmu puwapuwa pakarun kana kiyakarun na trau mukuwa mare'aniya kanantu sinaleman. 3uwa a! pakarun ku kanmu mukuwa, kamawan kana makiteng na siri iretra' kana suwasuwan i alalas. 4i aurung za pupaisuwan; i aurung za lravatr, i aurung za kuse, zi i paziyaazi i dalan kimazayar za trau. 5nu mukuwa mu kana iyaiyan na ruma', kiyangawayan marenagay za: <kiyalriman kanmu saruma'enan ping-an!> 6i kazu nu ulra a sahar za pareka'iyanava na trau mu, nanmu kiniyaami na ping-an mu kaya kantaw; nu 'azi mu izu na i'aperez mareveliyasa kanmu. 7kikazuwa mu kanizu na ruma', ekan zi trekel kanantu ipangara veray, 'alrana na kiyakarun kiveray za inuvalesan mu penauwa za pauwayan. iuwasasalr za ruma'. 8nu mukuwa mu lra kana iyan na kazekalran, nu kazu a trau uvalringay kanmu, penadang veray kanmu za eman aekanen, zi ekan za eman i inmu, 9pawnung paka'inava kana kuwaaleng na trau i kazu, rengayu nazu: <na pinitrepa tu kezang na Viruwa i itras adalrep lra mula'esi kanmu i savakan.> 10mawmu, nu mukuwa mu za saya kazekalran, na trau i kazu nu 'azi kiyatrevung kanmu, zi uwa i dalan marengay pakalrazam i inmu: 11<arusay nanmu trevulr i kazekalran izu na zemeketr kananiyam kuy mu, mi tapetapaw puelak i ngawayan kanmu na trevulr i dapalr. mawmu piangeru, tu kezang na Viruwa i itras adalrep lra mula'esi!> 12marengaya ku kanmu, kazu kana kasayvangan na wari, tu kinisavungan na Sotoma na trau paraatra'alr ziyan kanantu kinituluz kanizu na kazekalran!>>

na 'azi pukutatena' na kazekalran

(Matay 11.20-24)

13<<Korazin a, uwaelep u lra za kuwatrengan! Bētsayta a, uwaelep u lra za kuwatrengan! ku kinakuda na karepalripalri kanmu i savak anu ku kakudayanay i Taēr zi Siton mu, na trau i kazu kemayan lra aidan ziya i dare', mitraruv za muwa zi 'emavu, temara nu 'ematelr kana kuwatreng zi muwasalr patezelr lra! 14kana kasayvangan na wari, i Taēr zi Siton tu kinisavungan paraatra'alr ziya kananmu kinisavungan! 15kema ta kannu, Kabēnum a, puwaitras u kannu mukuwa i itras ziyamaw? uwatani u mukuwa i zikok!>>

16marengay ziya i Yēsu kanantu temakesi: <<i eman na kinger kanmu mu mawna kinger kaninku, na 'emazi kanmu mu mawna 'emazi kaninku, na 'emazi kaninku mu mawna 'emazi kana pazuwa kaninku kanizu na sasa.>>

muruma' na makapitun zi zazuwa na trau

17kasemangalan muruma' nazu na makapitun zi zazuwa na trau, marenagay pakalrazam: <<Luzu a, pakalrang mi kananu ngadan semerat, arusay na palrar mukinger kaniyam!>>

18marenagay i Yēsu kanazu: <<mena'u ku kana satang kamawan kana truli' kemay i lingatr mutani. 19kingeri inmu a! ku putrepayay mu lra za kezang, maruwa mu demupa' kana unan zi pangatrip, zi karuwa mu kiseker kana 'alra kanantu kezang ziyan, zi iniyan lra za emaeman karuwa pakakuwatreng kanmu. 20mawmu, amanan na semangal 'alrana muilus lra na palrar kanmu, zi kasemangal kana ipuvalray lra i itras mu ngadan.>>

na semangalan ni Yēsu

(Matay 11.25-27; Matay 13.16-17)

21maw a azu, tu redekay za Vangesar Lu'em#10.21 <<Vangesar Lu'em>> zuma ulra pidaya na awatranan lulun iniyan za <<Vangesar>> na valray; pakazuma ulra pidaya na awatranan lulun vinavalray za <<tu lu'em i intaw>>. i Yēsu zi kasemangalan, marengay: <<Ama i itras a, na Luzu i itras zi i dare', lrayuwan ku kannu; 'alrana kana 'elrepat zi mitinakesiyan na trau nannu vinulri na lremak, mawmu nu panadamaw kana 'azi mitinakesiyan na trau. ai, Ama i itras a, na kinuwani ziya mu maw kemay kanannu nirangeran na 'inava!

22<<i Amalri tu verayanay lra na eman ziya kaninku. pakazuma kani Ama mu, iniyan za trau malrazam kana Alrak za i eman; pakazuma kana Alrak zi na Alrak muwai panadam na trau mu, kuwaazu iniyan za trau malrazam kani Ama za i eman.>>

23kemazu zi marepiles i Yēsu, temawar marengay kana temakesi: <<maruwa mu mena'u kanini peniya kemuda kana 'inava a! 24marengaya ku kanmu, kazuwan na patralritralri zi na yawan maranger mena'u kananmu nina'uwan, mawmu 'azi pakana'u; maranger kinger kananmu kiningeran mu, mawmu 'azi pakakinger.>>

na paruwalruwan kana 'inava na Samaliya na trau

25ulra a sasa sinsi kana kuret zuwa melralrimaw kani Yēsu, marengay: <<sinsi, kemudaya ku zi karuwa ku kiveray kana uwavaawan munayun awa?>>

26marengay i Yēsu: <<a eman tu nirengay na valray kana kuret? kemudakuda u venavati pakapauwa ziyamaw?>>

27temuvang izu na trau: <<peniya nu anger, peniya za ikalraman, peniya za kezang, peniya za nirangeran sahar kani Luzu -- nu Viruwa i itras, zi kalramanu na 'udar, kamawan za lraman u kannu.>>

28marengay i Yēsu kantaw: <<pamau nu iyatuvang, iturusi kemani kemakuda, zi karuwa melak za uwavaawan munayun.>>

29izu na sinsi kana kuret panana'u za penauwa ku kema i intaw, zi kiyumalr kani Yēsu: <<i eman nanku 'udar'udar awa?>>

30marengay i Yēsu: <<ulra a sasa trau kemay i Yērusalem makuwa i Yēliko, i dadalan muelep za male'es. tu lritrelritray tu kavang nazu, tu tengezay za kiyanatranatray, 'atelranay i kazu. 31penauwa ulra sasa a rahan makalrang kanizu na dalan; mena'u kanizu na trau mu kemay i sannin muveruk. 32mararesan, ulra sasa a Lēvi na trau makalrang i kazu; mungawayan mukuwa mena'uwa kanizu na trau, maw kemazu makalrang i sannin muveruk. 33mawmu ulra a sasa Samaliya na trau makalrang kanizu na trau i trapingiran, mena'u kantaw mu, payas purelraman i anger. 34mungawayan i intaw 'emilra kanantu vuli' za lrawlraw zi kutra, puwalrangay meliputr, zi tu rakazaw puitras kanantu rova, murung kantaw mukuwa za saya kiyaulrayan, tu na'uway i kazu. 35kazuwa wariyan, i intaw melak za zuwaya ginpiya veray kana kiyaulrayan na tawki, marengay: <'alrazi na'uwi ziya i intaw, ngara za nu mareveliyas ku makalrang i kani mu, ku i putrima'ay peniya tu puwatrima'an.> >>

36kemazu zi kiyumalr i Yēsu: <<pakalranganay kanannu iyana'u, ini na tatelu i savakan, maw na i iyan tu 'udar na muelep kana male'es na trau awa?>>

37temuvang na sinsi kana kuret: <<maw izu na melraman kantaw na trau.>>

marengay i Yēsu: <<nu kemazu mu, uwa i inu, paturus kemakuda mu!>>

i Yēsu mukuwa mena'uwa kani Maruta zi Maliya

38i Yēsu zi na temakesi patrutru kanantu kakawangan nazu, meredek za saya zekalr. i kazu ulra a sasa vavayan mingadan kani Maruta, temara kani Yēsu mukuwa i ruma' kantaw. 39i Maruta ulra i waditaw na vavayan i Maliya tu ngadan, i Maliya zuwa kemayana i ngawayan kani Luzu, kinger kanantu vinavati. 40mawmu sazu tu kakudain ni Maruta, mavangavang i anger, zi mungawayan marengay: <<Luzu a, i wadilri pakikarun kaninku sasa sazu za kiyakarunan, 'azi eman kema nu anger? 'alrazi vinayu i intaw zuwaya puwalranga kaninku mu!>>

41temuvang i Luzu: <<Maruta! Maruta! mavangavang u i anger sazu za lremak, 42mawmu mawmau a sasaya na 'azi ta parainiyan. i Maliya palimi' lra kanizu na mara'inavanava; iniyan za trau kararuwa 'emaraw kemay kanantu lima.>>

Currently Selected:

Luka 10: TPN

Highlight

Copy