Luka 11

venavati za kiyanun

(Matay 6.9-13; Matay 7.7-11)

1ulra paresan, i Yēsu kazu za saya kinazuwan kiyaanun. piya lra kiyanun, ulra a sasa temakesi marengay kantaw: <<Luzu a, 'alrazi panadamaw mi kiyanun, kamawan kani Yohanē panadam kanantu temakesi.>>

2marengay i Yēsu kanazu: <<kemaniya mu kiyanun:

Ama a:

kiyalriman pakavangesaraw nannu vangesar ngadan;

kiyalriman kazuwa u demikes mena'u i punapunan.

3verayay mi za niyam aekanen kana wariwari#11.3 <<wariwari>> karuwa marengay za <<nu 'emanan>>..

4lapusay mi naniyam pinamelriyan,

'alrana melapus mi kana mipamelriyan kaniyam na trau.

amanan paelepaw mi kana 'azi mi kararuwa semangalr na lralrimaw.>>

5tremungulr ziya, marengay i Yēsu kanantu temakesi: <<anu kazu a trau kanmu i savakan parekazuwa 'esungan mukuwa kanantu ruma' ni ali'etaw, marengay kantaw: <ali, pavulasay ku ziya za teluwa pang; 6'alrana ulra a sasa ku 'ali'an muzazangi zuwa kaniyam, iniyan ku za emaeman temara kantaw.> 7anu temuvang nannu 'ali'an kemay i savak: <iraringiz kaninku, 'inalrev lra na 'alrevan; inku zi na lralrak mu ulra mi lra i sa'sa', 'azi ku karuwa marahan melak za eman veray kannu.> 8kuwadakuda awa? marengaya ku kanmu, anu 'azi maw i ali'etaw izu na trau zi marahan melak za pang veray kantaw, zi auwa kanizu na trau za masamasalr kiyaami zi marahan, verayay kanantu niranger. 9semeneng marengaya ku kanmu, nu kiyanun mu, zi kiyaveray mu; nu maaya', zi kaatrevung mu; tremunetrun kana 'alrevan mu, zi truwalranay mu za 'alrevan. 10'alrana kiyanun ziya mu, zi kiyaveray; na maaya' mu, kaatrevung; na tremunetrun kana 'alrevan mu, mutruwalr na 'alrevan lra. 11kanmu i savakan na mutu temama, ulra i eman nu kiyaami za vulraw na alrak mu, melak za unan veray kantaw? 12kiyaami za vetrinun mu, melak za pangatrip veray kantaw nay? 13ara kuwatrenga mu, malrazam mu ziya melak kana 'inava na eman veray kananmu lralrak; nu kemazu mu, nanmu Temama i itras kamelriyalra 'azi puwapuwa veray za Vangesar Lu'em kana kiyanun kantaw na trau ziyamaw?>>

i Yēsu zi Bēlēzēbu

(Matay 12.22-30; Maruko 3.20-27)

14venawi lra a sasa kana ma'umuy na palrar i Yēsu, a mupana na palrar mu, izu na trau maruwa lra marengay, salaw maherareher na lepun. 15mawmu kanazu i savakan ulra a trau marengay: <<i intaw kuretalrima kana yawan na palrar i Bēlēzēbu venawi kana palrar.>>

16ulra papida na trau maranger pakakuwatreng kantaw, kiyami kantaw pupana za karepalripalri pana'u kanantu kinakuda mu maw kemay kana Viruwa i itras. 17malrazam i Yēsu kanazu za kemiyaanger za eman, zi marengay kanazu: <<na i iyan lra na kanatal nu maziyakuzikul nazu mu, 'azika'azi muranak; na saruma'enan nu maziyakuzikul mu, kemazu 'azika'azi mutepi'. 18nu maziyakuzikul na satang mu, tu kanatal kuwadakuda arekez matikezir awa? marengay mu venawi ku kana palrar mu maw kuretalrima kani Bēlēzēbu. 19nu maw kemani mu, nu venawi kana palrar nanmu temakesi kuretalrima kani i eman ziyamaw? nanmu temakesi uwasay kanmu za maw pamelri mu! 20mawmu, nu kuretalrima ku kanantu kezang na Viruwa i itras venawi kana palrar mu, i ini mu uwasay lra kana Viruwa i itras za ulra demikes za kezang i savak kanmu.

21<<na mipinadangan lra za buki na samuray nu ki'alra'alra kanantu ruma' mu, nantu piniemanan mu ka'inava 'azi kikuwadakuda. 22mawmu nu zuwa lra a sasa maramikezang kantaw na samuray mu, demepel kantaw, tu i 'araway kanantu tinalrima na buki, pawnung sepadaw tu trinakaw na eman.

23<<izu na 'azi kurekasa kaninku mu, mawna semuveli kaninku; izu na 'azi puwalrang kaninku mepetr mu, mawna maivas patatepi'.>>

mareveliyas na palrar

(Matay 12.43-45)

24<<na palrar muveruk lra kana pinalrar na trau, paketrep lra kemakawang kana maruwarum na dare', maaya' kana talaulepan za kaazuwan mu, 'azi pakaaya', zi marengay: <uwaveliyas ku mukuwa kana ruma' na mawziya.> 25kemazu zi muveruk i intaw, mena'u kana ruma' i savak za 'inelresapan mukirungetr zi inepetran. 26mupatraran ziya i intaw, murung za papitu na marakuwatreng kantaw na palrar zuwa, mukasa kantaw kikazu. kemani mu, i likuzan lra i izu na trau tu nirekudayan marakuwatreng lra kana aziyu ziyan.>>

tatena' za mika'inavayan

27a mararengay i Yēsu kanini na ngay mu, ulra a sasa vavayan kemay kana mulepun na trau kematamuni marengay kantaw: <<izu na malii kannu zi na pasusu paekan kannu mu tatena' mika'inavayan!>>

28marengay i Yēsu: <<izu na mukinger zi miturus kanantu ngay na Viruwa i itras na trau mu maw na tatena' mika'inavayan ziyanay!>>

kiyami za karepalripalri

(Matay 12.38-42)

29a azu na zinekalranan mulitrung kani Yēsu, i Yēsu patrutru venavati marengay: <<ini na ziday na trau kemuda kana kuwatrengan a! maruwaruwa kiyami za nana'u za karepalripalri nazu, mawmu nu amelri tu karepalripalri ni Yona mu, iniyan za zuma a karepalripalri za panana'u kanazu lra. 30i Yona kemudakuda mutu karepalripalri kana iyana'u na Ninivē na trau, na Alrak na trau kuwazazu mararesan mutu karepalripalri kanantu iyana'u kanini na ziday na trau. 31kana kasayvangan na wari, na vavayan na yawan i kedet kararahan kokso kanini na ziday na trau, 'alrana i intaw kemay dawilr zuwa kingera kanantu vati na misayhuwan ni Solomon yawan. marengaya ku kanmu, i kani mu ulra a marama'izang kani Solomon na lremak ziyanay! 32kazu kana kasayvangan na wari mu, i Ninivē na trau kararahan kokso kanmu, 'alrana kinger nazu kanantu i palenak na vati ni Yona mu 'ematelr kana kuwatreng zi muwasalr patezelr lra. marengaya ku kanmu, i kani ulra a marama'izang kani Yona na lremak ziyanay!>>

na lrawlraw i zazek

(Matay 5.15; Matay 6.22-23)

33<<iniyan za trau nu pasenan za lrawlraw mu tu lrasezaw i savakan kana kerutr i ruma' zi za tra'anay i makalusu kana vitaw; muveliyas, 'azika'azi meretra' i itras kana pulrawlrawan i intaw, maruwaya mena'u kana senan na muwasavak na trau. 34nannu matra kamawan kana lrawlraw i zazek. nu 'inava nu matra mu, kasenan nannu zazek peniya; nu kuwatreng nu matra mu, ka'aremeng nu zazek peniya. 35semeneng, taranapaw, munu 'aremeng nannu senan i savakan. 36nu matemuy za senan nu zazek peniya mu, kainiyan za 'aremengan, zi sasenan i paliyus, kamawan tu senan na lrawlraw pasenan kannu.>>

maselu kana Palisay na trau zi na sinsi kana kuret

(Matay 23.1-36; Maruko 12.38-40)

37piya lra marengay i Yēsu kananni na ngay mu, zuwa a sasa Palisay na trau temara kantaw mekan, zi musavak kemayan kipalrang i intaw. 38ini na Palisay na trau mena'u kani Yēsu nu maekan pakangawayan 'azi mauras za lima, salaw pakumelri. 39zi marengay kantaw i Luzu: <<i inmu na Palisay na trau kemirungetr melrisaw kana takilr zi na sara i panayan, mawmu i savakan kanmu iavak matemuy za alengatran zi na kuwatrengan. kana takilr zi na sara, i inmu i savak pinatemuyan za alengatran zi kuwatrengan. 40na iniyan za lrazaman na trau a, izu na demaway i panayan na Viruwa i itras 'azi demaway i savakan ziyamaw? 41na eman i savakan kana takilr zi na sara verayan kana kalramalraman na trau, kema ta marengay kanmu mu, mukirungetr lra peniya.

42<<i inmu na Palisay na trau uwaelep mu za kuwatrengan lra! i inmu melak kanazu na zazaul, kamawan kana hakka, koming, zi na zuma na pakaulringulr, sunanan za saya kana pinakamuketrep veray kana Viruwa i itras, mawmu 'azi milingaw lra kana patezelran zi na lramanan kana Viruwa i itras. tatena' mu, i ini mawna 'azi mu ka'azi miturus; kema ta kana zuma mu, kemazu 'azi ta 'azi milingaw.

43<<i inmu na Palisay na trau uwaelep mu za kuwatrengan lra! sahar mu kana waazukan ruma' i savakan kana kirekamelri na kakayanan, sahar i inukasakasayan za trau kisungal kimumalr. 44uwaelep mu za kuwatrengan lra! 'alrana kamawan mu kana iniyan za kalrazaman na trevelran, 'azi malrazam na makawang i tras na trau.>>

45ulra a sasa sinsi kana kuret marengay kani Yēsu: <<sinsi, kemani u marengay, arusay kemazu mi kisiri lra!>>

46temuvang i Yēsu: <<i inmu nanni na sinsi kana kuret uwaelep mu za kuwatrengan lra! na kakuwalengan penazek na aluzun mu pasangalranay kanantu 'iyav za trau, mawmu 'azi mu muwai i inmu pahuwahu kana tatimus za sasaya mukuwa pulaelaka pakaatra'alr kanantu aluzunan. 47uwaelep mu za kuwatrengan lra! paruveli mu kana patralritralri temulre'ay demaway za trevelran, zi nazu na patralritralri mu maw ninmu temuwamuwan na pinatray. 48nu kemani, wawasay mu lra za paturus kananmu temuwamuwan tu kinakuda; pinatray lra kana patralritralri nazu, zi paruveli mu kana patralritralri temulre'ay demaway kana trevelran. 49semeneng, kemani lra marengay na misayhuwan na pakarunan na Viruwa i itras: <pakarun ku kana patralritralri zi na sito mukuwa kanazu i kazu; ulra na kipiyanatray kanazu, ulra na kikuwatreng kanazu.> 50-51mawna kemani, kemay kana inudawayan i punapunan mu, na pinatray kana patralritralri na pinamelriyan ziya, mawna kemay kana kipinatray i Abēl, palru za kipinatray i Zakaliya i patavangan zi kana vangesar kaazuwan tu dara' na pinamelriyan, papuwatrima' peniya kanini na ziday na trau. ai, marengaya ku kanmu, kanini na ziday na trau 'azika'azi kipasavung kanini peniya!

52<<i inmu nanni na sinsi kana kuret uwaelep mu za kuwatrengan lra! mu dikesay na tatusuk na tratruwalr kana iraretra' za lrazaman, 'azi mu muwai musavak i inmu, zi 'azi mu muwai pusavak kana maranger musavak na trau!>>

53muveruk lra i Yēsu i kazu, na sinsi kana Sēsiyo zi na Palisay na trau kemirakaz pakirev parevativati kantaw, pupana za sazu kana kakuwalengan na kiyaumalran kantaw. 54mengarangara, maaya' za ngangay pakakuwatreng kantaw.

Currently Selected:

Luka 11: TPN

Highlight

Copy