Sito 24
24
Yodaya na trau kokso kani Pawlo
1melavat lra za lruwatra wariyan, na tinuma'izang na rahan Ananiya zi papida na ciyoro, mukasa kanizu na mingadan kani Tērtulus na bingkosi, zuwa i Kaysaliya. kazu i ngawayan kana sotok Fēlis kokso kani Pawlo. 2kipavina i Pawlo mukuwa i hoing; i Tērtulus kokso kantaw marengay:
<<Fēlis tayhin! mukuwa nannu lrazaman demikes paretulre'ay, maruwa mi pa'inavanava sawariyan kazu za ka'inavayan, na kuwatreng i savak na kanatal sēfu kituluz za venalis za pauwayan. 3kemata zannu inana'u 'inava na pauwayan, karayas mi lrayuwan kannu 'azi mi maziyazi. 4'azi ku malemu palavat meringiz kannu, mawmau kingeri naniyam i parevavati na lriketri: 5patulre'ay mi lra mena'u, ini na trau maw na kaherenarenas a trau. kazu i punapunan kani Yodaya na trau demawadaway za lremak tremiyur intaw, zi maw a ayawan i Nazalē na sevang, 6arusay na vangesar ruma' semiri, zi mi 'evangaw intaw.#24.6 ulra pidaya awatranan lulun puwayay za pukaenem i makalikuzan vatras palu pukawalu i makangawayan na vatras <<6 ... kemazu maranger mi miturus kananiyam kuret sayvang kantaw, 7 maherareher na demadikes kana hitay i Lisiya puwapuwa venativut, kemay kana niyam lima 'emaraw kantaw, 8 zi kuretaw na kokso na trau mukuwa i kannu i kani mapapiya.>> 8nu kiyumaumalr u kanini na trau mu kalrazam u zaniyam i kokso kantaw na pa'alangan ziya.>> 9na kazu i kazu na Yodaya na trau mukasa kokso, pakanumaw tatena' tu nirengay peniya.
muramawan kantaw melriput za ngay i Pawlo
10a azu, pakalrazam kanantu anger na sotok kani Pawlo, pararengay kantaw. zi marengay i Pawlo: <<malrazam ku kazu u i kanini na kanatal za pida'ami demikes kana kuret, mawna kemani, muwai ku kazu i ngawayan kannu muramawan kaninku melriput za ngay. 11'azi u kakuwalengan patulre'ay malrazam, kemay zanku inuwayan i Yērusalem semungal palru harem mawmau pulu' zuwa wari ziya. 12'azi mena'u za kazu ku kana vangesar ruma' zi za zuma na pinidare'an i zinekalranan nazu za kimatatuvang kana trau ziya, zi 'azi mena'u kaninku za kazu i waazukan ruma' zi i kazekalran zi i iyan ziya pusuwasuwan za zinekalranan. 13kokso nazu kaninku 'azi maruwa pupana nazu za wawasayan veray kannu zi kokso kaninku. 14kemazu zi, ulra a saya lremak 'azi ku ka'azi pakanumaw: kurelranganay kanantu kinakuwa na kirekamelri na dadalan kanazu semungal ku kana tu Viruwa i itras na temuwamuwan. zi pakutatena' ku kana kuret ni Mosē zi na vinavalrayan ziya kana patralritralri. 15maresan kanazu miinpetr ku za kiyalriman kana Viruwa i itras, mawna kiyalriman kana trau ziya, nu kuwatreng nu 'inava lra, marevaaw kemay kana minatray mapiya. 16mawna kemani, marayas ku pukezang kaninku, kazu kana Viruwa i itras zi kana trau i ngawayan, marayas pakalranganay kana vulay na anger.
17<<muwaday ku i Yērusalem za pidaya lra 'ami. harem miinurung ku za paisu mukuwa puwalrang kana mawan, nu azu uri patatavang ku. 18a mena'u kaninku nazu mu kazu kana vangesar ruma', piya ku lra kikirungetr, penauwa za patatavang; zi 'azi ku puwazuk za zinekalranan, zi 'azi trematriyur. 19mawmu ulra a papida kemay Asiya siyo a Yodaya na trau zuwa i kazu, nazu na trau nu ulra tu i kokso kaninku mu, kararuwa zuwa i ngawayan kannu parevavati. 20nu 'azi mu, zi parengayu na kazu i kani na trau, a kazu ku i gikay parevavati mu ulra a eman ku pinamelriyan. 21matikezir ku i ngawayan kanazu mawmau kematamuni marengay za saya ngay, mawna: <kisayvang ku kanmu harem kana wari. maw muramawan pakutatena' za vati kana marevaaw na minatray na trau.> >>
22i Fēlis salaw malrazam kanini na kazu lra na dadalan, kemazu zi maziyazi lra kinger kana parevavati, marengay kanazu: <<ngangara ziya za meredek na demadikes kana hitay i Lisiya, zi sayvang ku kanmu.>> 23semeratr intaw kana ma'izang kana hitay paki'alra'alra kani Pawlo, ka'inavayu i intaw, paturusi tu wadadiyan zuwa veray za tu a eman kana wariwari.
kazu i ngawayan kani Fēlis zi Drusila i Pawlo
24melavat lra za pidawariyan, i Fēlis zi nantu 'azin -- na Yodaya na vavayan i Turusila -- marelrang zuwa. i intaw tu pazuwayaw i Pawlo, kinger kantaw venavati kani Kiristo Yēsu za tu singko. 25parevavati ziya i Pawlo za kireeman kana 'inava i anger, kana paruwaruwayan, zi nu aziyu lra na sayvang tu i pananadam; purumakakaud i Fēlis, marengay kani Pawlo: <<uwa i inu harem mu, nu miwari ku kanu rengayaw lra pazuwa.>> 26kiyalriman ziya intaw kani Pawlo veraya za paisu kantaw, semeneng marayas pazuwa kantaw, kimazayazayar kantaw.
27melavat lra za zuwa 'ami, i Porekius Fēsetu venulas lra kani Fēlis, mutu sotok. i Fēlis muramawan 'emunu'unus kana Yodaya na trau, tu vilinaw ziya i imengan i Pawlo.
Currently Selected:
Sito 24: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023