Sito 25
25
pusavak za valray i Pawlo kana Hongti i Roma
1kikarun za katelu wari i Fēsetu, kemay Kaysaliya mukuwa i Yērusalem. 2na ma'izang na rahan zi tu ayawan na Yodaya na trau kokso kani Pawlo. kiyami kani Fēsetu nazu, 3kiyami kantaw za aatezan mukuwa i Yērusalem kani Pawlo, mianger mulrek meraung i dalan pinatray kantaw. 4temuvang i Fēsetu kanazu: <<harem inimeng i Kaysaliya i Pawlo, 'azi kasawariyan karevelaliyas ku mukuwa i kazu. 5nanmu ayawan karuwa kurelrang kaninku mukuwa, izu na trau nu 'azi piyamelri kana kuret tu paelrangan mu, kazu i kazu kokso kantaw.>>
6i Fēsetu kazu ziyan za waluwa wari palru za muketrep wari kanazu, zi mareveliyas mukuwa i Kaysaliya. kazuwa wari mu kemayan kana sayvangan, semeratr pazuwa kani Pawlo. 7zuwa lra i Pawlo, na Yodaya na trau kemay Yērusalem kazu matikezir paliyus kantaw, mimanay za sazu pasalaw panana tu pamelriyan kokso kantaw, mawmu 'azi maruwa pupana za tatena' uwasay. 8muramawan kantaw melriput za ngay i Pawlo, marenay: <<'azi ku ziya kemakuda za emaeman semuveli tu kuret kana Yodaya na trau, semiri kana vangesar ruma', zi za pamelri kana Hongti i Roma.>>
9mawmu i Fēsetu muramawan kisahasahar kana Yodaya na trau, zi kiyumalr kani Pawlo: <<kawai u mukuwa i Yērusalem, kazu i kazu kituluz za kananku i sayvang kanini na valray ziyamaw?>>
10marengay i Pawlo: <<harem matikezir ku tu hoing na Hongti; i kani maw nanku karuwayan kisayvang. malrazam u inu, 'azi ku ziyan mipamelriyan kana Yodaya na trau. 11anu pamelri ku za kuret, nu ulra aeman kakiyanatrayan a pinamelriyan, 'azi ku i papusar kana pasasavung. tu i kokso kaninku nazu nu amelri tatena' peniya, nu i eman lra 'azi karuwa temuluz kaninku kanazu. auwa ku parevavatiya kana Hongti.>>
12i Fēsetu kimazayar kanantu sevang kikarun mu, zi marengay: <<anu auwa u kana Hongti parevavatiya, zi uwa kana Hongti i inu.>>
parevavati i Fēsetu kani yawan Akilipa tu lremak ni Pawlo
13melavat lra za pida wariyan, na yawan Akilipa zi Bērenikē mukuwa i Kaysaliya kiyatrevung kani Fēsetu. 14kikazu i kazu za pidawariyan mu, i Fēsetu pakalrazam kani yawan Akilipa kanantu lremak ni Pawlo, marengay: <<i kani ulra a sasa trau, maw vinilin ni Fēlis na inimeng. 15a ngawayan mukuwa ku i Yērusalem, na ma'izang na rahan zi na ciyoro i Yodaya kokso kantaw, kiyami kaninku za kakuretan zantu pamelriyan. 16marengay ku kanazu, iturusay tu kakuret na Roma na trau, nu 'azi marepatuvang kana kokso mu, iniyan ziya za wari melriput za ngay kantaw pakangawayan mu 'azi maruwa kemuret za pamelriyan. 17mengara kanazu za meredek i kani mapiya mu, 'azi ku meringiz za wari, kazuwa wari mu kemayan kana sayvangan, semeratr kezengaw pupana kanizu na trau kiyumaumalr. 18na kokso matikezir mapiya kokso kantaw, aramawana nantu i kokso 'azi kamawan zanku nirangeran na pamelriyan. 19tu pinasakisakiyan nazu zi intaw mu maw kireeman kana siyukiyo na kiyaumalran, zi a sasa mingadan kani Yēsu na trau; ini na trau minatray lra, marengay i Pawlo mu vaaw ziya i intaw kema. 20i ini na valray tatena' ma'ulid ku za kuwadakudayan. kiyumalr ku kani Pawlo za wawai nay mukuwa i Yērusalem, kazu i kazu kisayvang. 21mawmu, kiyami i Pawlo za kiyavilinan, na Hongti na sayvang. mawna kemani zi semeratr ku venilin i imengan kantaw, mengangara za pupanayaw intaw mukuwa kana Hongti.>>
22i Akilipa marengay kani Fēsetu: <<inku maranger ku kinger kanini na trau tu vinavatiyan.>>
marengay i Fēsetu: <<karuwa u kinger nu 'emanan lra.>>
23kazuwa wari mu, i Akilipa zi Bērenikē muwayar a kazuwan, mukasakasa musasavak kana ma'izang na rawang; na kurelrang kantaw ulra na demadikes kana hitay ziya zi na mingangadan i kazekalran. a semeratr i Fēsetu, tu pilralrangaw i Pawlo musavak. 24marengay i Fēsetu: <<yawan Akilipa zi na ulra kemayan mapiya! 'alrazi na'u kanini na trau; na kazu i kani Yodaya na trau zi na Yērusalem kokso kaninku, kiyami za piyanatrayan. 25mawmu, 'azi ku pakaatrevung za eman tu pinamelriyan zi kisayvang za kiyanatray; zi kemazu mu tratrepa kana Hongti parevavati i intaw, kemuret ku za pilralrangan kantaw mukuwa. 26mawmu kireeman kanini na trau mu, iniyan ku za mutulre'ay na valray karuwa pakalrazam kana Hongti, mawna kemani zi ku pilralrangaw i intaw zuwa i ngawayan kanmu, paramamaw kana yawan Akilipa i ngawayan, maruwaya patulre'ay malrazam tu pinakalrangan zi i likuzan lra mu kaulra a pakalrazaman. 27'alrana zanku iyana'u, murung kana inimeng 'azi mupatezelr zantu pinakalrangan 'azi penauwa za pauwayan.>>
© The Bible Society in Taiwan, 2023