Sito 23
23
1tremeketrek mena'u kana trau i gikay i Pawlo, marengay: <<mawan a, nanku kinatrauwan pinakalrangan na lremak, kazu i ngawayan kana Viruwa i itras 'inava vulay za anger, palru harem.>> 2na tinuma'izang na rahan i Ananiya temuru kana pakarunan semelretra' tu udung ni Pawlo. 3marengay i Pawlo kantaw: <<inu na dinilrang na liveng, tu i raranakaw u kana Viruwa i itras! kemayan u i kazu maw a kuwarelrang kana kuret sayvang kaninku, zi semuveli u kana kuret, patalru kanazu semelretra' kaninku!>>
4na matikezir i trapingiran na trau marengay: <<melrimus u tu tinuma'izang na rahan kana Viruwa i itras!>>
5marengay i Pawlo: <<mawan a, 'azi ku malrazam kantaw maw na tinuma'izang na rahan; marengay na Sēsiyo: <amanan kemuwatreng kana kemirungetr za zinekalranan na ma'izang.> >>
6pakumaw mena'u i Pawlo kanani na salepun na trau ulra a papida maw tu sevang na Satukay, ulra a zuma maw a Palisay na trau; kemazu zi kazu i gikay kematamuni marengay i intaw: <<mawan a, maw ku a Palisay na trau, maw a alrak za Palisay na trau. harem kazu ku i kani kisayvang 'alrana kiyalriman ku kana minatray na trau marevaaw!>>
7mawziyan pupana kanini na ngay i intaw, na Palisay zi na Satukay na trau masakisaki, na zinekalranan mu maresepad marekazuwa sevang. 8'alrana na Satukay na trau 'azi pakutatena' kana marevaaw, zi 'azi pakutatena' kana tēnsi zi lu'em, aramawana Palisay na trau pakutatena' kanini na marekatelu. 9na zema'uza'ung na lrengaw marekatamuni, ulra papida na Palisay sevang zi na sinsi kana Sēsiyo matikezir, kemakerevat kimarakez marengay: <<'azi mi pakaatrevung kanini na trau za ulra a eman tu pinamelriyan! kaulra tatena' za ulra a lu'em zi na tēnsi mararengay kantaw!>>
10marepakirev na masakisaki, na demadikes kana hitay makakaud za munu tu pakulrakulratray i Pawlo, zi semeratr kana hitay mukuwa, 'emarawa kemay kana lepun na trau pupatraran kani Pawlo, pusavak kana hēsiya.
11a azu za 'aremeng mu, i Luzu matikezir kani Pawlo i trapingiran, marengay: <<ka'uringetr i inu! kazu u lra i Yērusalem muramawan wawasay kaninku. zi 'azika'azi kuwazu uwasay i Roma.>>
kuwatreng na niranger piyanatray kani Pawlo
12kazuwa wari za 'emanamanan, i Yodaya na trau mukasa kemianger, kemakuret i anger nu 'azi pininatray i Pawlo mu 'aziya ta mekan 'emaw. 13na mukasa kemuwaatreng tu anger ulra makapetelr misama' na trau. 14mukuwa kirepana'uwa kana ma'izang na rahan zi na ciyoro, marengay: <<piyami lra kemapazangal kemuret: nu 'azi pininatray i Pawlo mu 'azi mi aekan za eman! 15harem, inmu zi na gikay kiyami kana demadikes kana Roma hitay, pukuwaniyu i kani i Pawlo, kitukiyumaumalr za marapatulre'ay tu lremak; uri paadang mi, pakangawayan tu raredekan pinatrayaw i intaw.>>
16kinger kanini na kuwatreng na piniangeran tu alrak ni waditaw na vavayan ni Pawlo, zi musavak kana hēsiya pakalrazam kani Pawlo. 17kemazu zi demaulr za sasa kana ma'izang kana hitay i Pawlo, marengay kantaw: <<pilralrangu ini na vangesaran mukuwa kirepana'uwa kana demadikes kana hitay; ulra tu ngangay kantaw.>> 18izu na ma'izang kana hitay tu pilralrangaw izu na vangesaran mukuwa kirepana'uwa kana demadikes kana hitay, marengay: <<izu na inimeng i Pawlo padaulru kaninku mukuwa, kiyami za milralrang kanini na vangesaran zuwa kirepana'uwa kannu, ulra tu ngangay pakelrazam kannu.>>
19na demadikes kana hitay tu kezengaw tu lima na vangesaran, tu pilralrangaw mukuwa i saninin, kiyumalr kantaw: <<ulra a eman nu pakalralrazam?>>
20temuvang i intaw: <<piya lra mazayazayar na Yodaya na trau, zi kiyaami kannu milralrang kani Pawlo mukuwa i gikay nu 'emanan, kitukiyumaumalr za marapatulre'ay tu lremak. 21'alrazi i inu amanan temuvang kanazu, 'alrana ulra melavat za makapetelr a trau meraung kantaw. kemuret lra nazu za pinatray kani Pawlo, nu 'azi mu 'azi aekan 'emaw. harem mu piya lra padang nazu, mawmau mengara kannu za kemuret.>>
22na demadikes kana hitay temuru kantaw: <<amanan marengay za trau za piya u pakelrazam kanini na lremak kaninku lra.>> zi tu puverukaw intaw.
tuluzanay kani Fēlis sotok i Pawlo
23kemazu zi, na demadikes kana hitay demaulr za zazuwa kana ma'izang kana hitay, zi patalru marengay: <<padang za zuwa leman kana kahitayan, zi makapitulr na mieva na hitay, zi zuwa leman na miilrus, harem kana karauvan iwaywaya tuki kasikasik mukuwa i Kaysaliya; 24maresan a azu padang tu uwaitrasan ni Pawlo na eva, zi i'elawi atezan i intaw meredek kani Fēlis Sotok.>> 25na demadikes kana hitay venavalray ziya za valray, pauwayan na valray kemani:
26<<Kelawti Lisiya venavalray za valray veray kani sotok Fēlis, semungal za 'inavayan: 27na Yodaya na trau tu 'evangaw ini na trau, penauwa za piyanatray kantaw mu, marulrazam ku intaw maw a zinekalranan i Roma, zi milralrang ku za hitay mukuwa kima'arawa venaaw. 28maranger ku patulre'ay malrazam aeman nantu pauwayan nazu zi kokso kantaw, mawna kemani zi pilralrangaw i intaw mukuwa kanantu gikay. 29marulrazam ku kantaw iniyan za eman tu pinamelriyan zi za kiyanatrayan za aimengan; nazu nantaw i kokso kantaw nu 'azi meraringiz kanantu kuret. 30likuzan lra ulra a trau pakelrazam kaninku za na Yodaya na trau mianger pinatray kantaw, payas ku kemuret za aatezan pukuwa kannu, a azu rengayaw na kokso ziya na trau mukuwa i ngawayan kannu parevavatiya.>>
31na hitay tu iturusay na seratr, tu pilralrangaw i Pawlo, 'emaremengan mukuwa i Antipatris. 32kazuwa wari, na kemakawang na hitay muruma' i hēsiya, na mi eva na hitay i'elaway matez kani Pawlo. 33meredek lra i Kaysaliya nazu, tu tuluzanay na valray kani Sotok, zi tu tuluzanay i Pawlo kantaw. 34a maip kana valray i Sotok, pawnung kiyumalr kani Pawlo a trau i iyan kana siyo, marulrazam kantaw maw a Kilikiya na trau. 35zi marengay: <<ngangara u za meredek na kokso kannu, zi ku i papatezelraw nannu valray.>> kemazu zi semeratr intaw paimeng kani Pawlo kana kinaazuwan ni Hērodē.
Currently Selected:
Sito 23: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023