Sito 22
22
1marengay i Pawlo: <<na ma'iza'izangan na wadadiyan, 'alrazi kingeri ziya muramawana ku kimasaki i'elaw 1 i inku.>> 2a kinger nazu kani Pawlo temara Hēburu marengay kanazu, zi marapengan, patrutru marengay i Pawlo:
3<<maw ku a Yodaya na trau, pinialrak i Kilikiya kana Taresus, zi ma'izang ku i Yērusalem, kipatakesi kani Kamaliēl, kipanadam lra zantu kuret na temuwamuwan peniya za salaw 'uringetr, penakasa i anger kikarun kana Viruwa i itras, maresan kanmu na kazu i kani harem. 4pakakuwatreng ku lra a aziyu ziyan kana miturus ziya kanini na dalan na trau, pinatrayaw nazu, zi ku aya'aw 'evangaw na ma'inayan na vavayan na sinziya, imengaw i imengan nazu. 5na tinuma'izang na rahan zi i gikay mapapiya maruwa wasay zanku irengay na ngay za maw tatena'. kemay kanazu kiveray ku lra za tigami vaveray kana Yodaya na mawan i Damaseku, mawna kemani zi mukuwa ku i kazu, 'emevang kanazu na trau, dadikusaw nazu, urungaw mareveliyas i Yērusalem kipasavung.>>
parevavati i Pawlo zantu pinakutena'an kani Luzu
(Sito 9.1-19; 26.12-18)
6<<a mahelrahelr ku uri raredek i Damaseku mu, kararuwa lra kare'alriyan, maherareher za ulra a kakerevatan a senan kemay itras pasenan paliyus kaninku, 7mureve' ku i dare', kinger ulra a lrengaw marengay kaninku: <Sawlo, Sawlo! kemuda zi pakakuwaatreng u kaninku?> 8zi kiyumalr ku: <Luzu a, i eman u?> marengay i intaw: <maw ku nannu pinakakuwaatreng i Nazalē na trau i Yēsu.> 9na kurelrang kaninku nazu na trau mena'u kanizu na senan, mawmu 'azi kinger kanizu na mararengay kaninku na lrengaw. 10kiyumalr ku ziya: <Luzu a, kemakudaya ku za eman?> marengay i Luzu kaninku: <karahan, uwa i Damaseku i kazekalran, i kazu ulra a trau rarengay kannu za pakikarun kana Viruwa i itras na lremak peniya.> 11mawna kakerevatan izu na senan, 'azi maruwa mena'u nanku matra, nanku lralrang tu kezengaw ku lima, pilralrangaw ku mukuwa i Damaseku.
12<<i kazu ulra a sasa trau mingadan kani Ananiya. salaw penakasa i intaw, pakirungetr miturus za kuret, tu kairayaw kana Yodaya na trau ziyan i Damaseku. 13zuwa mena'uwa kaninku i intaw, matikezir kaninku i trapingiran, marengay: <wadiyan i Sawlo a, kiyalriman mareveliyas nu iyanau'!> zi maw a azu, mareveliyas lra nanku iyase'er, mena'u ku lra kantaw. 14marengay i intaw: <tu Viruwa i itras nanta temuwamuwan palimi' lra kannu, maruwaya u patulre'ay malrazam zantu nirangeran, zi mena'u kanantu i paresaresan tu pakarunan, zi kinger ziya za mupana kanantu udung na lrengaw. 15'alrana muramawan u wasay kantaw, nannu nina'uwan, kiningeran pakalrazaman kana tratrautrau ziyan. 16kemazu, muwaringiz u ziya za eman? karahan, vavina kiyami kanantu ngadan, kituluz kisuwap, maruwaya u kikirungetr zannu pinamelriyan!> >>
kipaiz i Pawlo palenak za vati kana sizumayan na trau
17<<likuzan lra, mareveliyas ku mukuwa i Yērusalem; kazu ku kana vangesar ruma' kiyaanun mu kituluz ku za saya kirekamelri nirekudayan, 18kazu kana kirekamelriyan mena'u ku kani Luzu. marengay i intaw kaninku: <pakunamun muwaday i Yērusalem, 'alrana na trau i kani 'azi muwai kituluz zannu i kakuda wasay kaninku.> 19marengay ku: <Luzu a, malrazam mapapiya nazu za mukuwa ku i makaiyaiyan kana waazukan ruma', 'evangaw zi tengezay na pakutatena' kannu na trau. 20na mutuwasay kannu na trau i Setifan a kipinatray mu, kazu ku i kazu, paturus ku kana kemuwaatreng, paruveli ziya milran kanantu kaytu na pinatray kantaw na malemu kuwatreng na trau.> 21marengay i Luzu kaninku: <uwa! pakakarun ku kannu mukuwa i dawilr, mukuwa i kaziyu kana sizumayan na trau.> >>
22kingkinger na zinekalranan za venavati i Pawlo; kinger kanini na ngay nazu mu pakirev 'emuy'uy: <<pinatrayu intaw! pinatrayu intaw! maw intaw na kiyanatray!>> 23zema'uza'ung nazu, 'ema'atelr za kavang, 'emapiyar kana trevulr. 24na demadikes kana Roma hitay semeratr za pilralrangu i Pawlo musavak i hēsiya, pakarun kana hitay melrepit kantaw, kiyumaumalr kantaw, maaya' za kemuda zi na zinekalranan kemani 'emuy'uy kantaw. 25a demadikus nazu kantaw uri lralrepit mu, i Pawlo tremepa kana kazu matikezir i trapingiran na ma'izang kana hitay marengay: <<na trau i Roma, nu 'azi ziya kemuret za mipamelriyan zi ta lrepitaw mu penauwa za kuret ziyamaw?>>
26na ma'izang kana hitay kinger kanini na ngay mu mukuwa kirepanau'wa kana demadikes kana hitay, tu kuwayaw marengay i intaw: <<kemianger u mu kuwadakudayan? i izu na trau maw a zinekalranan i Roma!>>
27na demadikes kana hitay mukuwa kirepana'uwa kani Pawlo, kiyumalr kantaw: <<rengayaw ku, maw u a zinekalranan Roma ziyamaw?>>
temuvang i Pawlo: <<ai.>>
28marengay na demadikes kana hitay: <<melremes ku za sazu paisu, zi maruwa ku mutu zinekalranan.>>
marengay i Pawlo: <<a pinialrak ku mu maw ku lra.>>
29kemazu zi nazu na kiyumaumalr kani Pawlo na trau payas musannin. na demadikes kana hitay maherareher purekaud lra; 'alrana malrazam kani Pawlo maw a zinekalranan i Roma, pawnung mawna demadikus kantaw.
kazu i gikay parevati pakalrazam i Pawlo
30izu na demadikes kana hitay maranger pakumaw kana Yodaya na trau kokso kani Pawlo a eman nantu pauwayan, mawna kemani, kazuwa wari, tu vuwaray nantu kusali ni Pawlo, puwazukaw pukasa tu ma'izang na rahan zi na gikay mapiya, kemazu zi tu pilralrangaw pupana i Pawlo, tu patikeziraw i ngawayan kanazu.
Currently Selected:
Sito 22: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023