Sito 11
11
i Pētēro pakalrazam i Yērusalem kana Kiyokay
1na sito zi na kazu i Yodaya ziyan na sinziya kinger za ulra papida na sizumayan na trau kituluz lra kanantu vati na Viruwa i itras kanini na lremak. 2mawna kemani, i Pētēro a meredek i Yērusalem mu, na mianger kana sizumayan na trau za 'azika'azi kituluz kana kakuwayanan za kikeret mu parevativati kantaw marengay: 3<<kemuda zi kazu u mutu lavang kanantu ruma' na sizumayan na trau na 'azi kituluz kana kakuwayanan za kikuret, arusay mukasa kanazu mekan!>> 4zi i Pētēro tu kasaesayaw marengay pakapauwa tu pinakalrangan na lremak.
5marengay i intaw: <<a kazu i Yopa na kazekalran kiyanun mu, kituluz ku saya kana kirekamelri na nirekudayan. mena'u ku a saya za eman kemay i itras muwalusu, kamawan za saya a ma'izang na inuwan, vinetevet na pata kapuyungan na inuwan, mulusu maziyazi i trapingiran kaninku; 6patulre'ay ku mena'una'u, ulra a 'aya'ayam zi na dobuc i alalas, zi ulra ziya na haramehaman. 7patrungulr, kinger ku ulra a lrengaw marengay kaninku: <Pētēro, karahan, truwaku ekanu!> 8marengay ku: <Luzu a, ka'azi'aziyan! na kaduwaresiresi na eman, 'azi ku ziyan mekan.> 9na kemay i itras na lrengaw marengay ziya: <na mukirungetr kema na Viruwa i itras mu, amanan kamawanaw kana militra' i innu.> 10kemani paretelun. talikuzan mu, izu na eman mu tu lrasezaw pareveliyas puitras lra. 11penauwa a azu, na kipakarun kemay Kaysaliya zuwa miya'a kaninku na tatelu na trau meredek lra kananku kinazuwa na ruma'. 12pakalrazam na Vangesar Lu'em kaninku za kurelrang kanazu mukuwa, amanan na malrivak. na kemay Yopa na aanem na sinziya kurelrang kaninku mukuwa. meredek mi lra mapiya kanantu ruma' ni Konēliw. 13marengay i Konēliw kaniyam. kemuda tu iyana'u kana tēnsi za kazu matikezir kanantu ruma' i savak, marengay kantaw: <pakakarun u za trau mukuwa i Yopa, demaulr pazuwa za sasa kana mingadan kani Simon Pētēro. 14ulra tu ngangay kannu, maruwaya u zi inmu saruma'enan muvaaw.> 15a kemirakaz ku marengay mu, redekey na Vangesar Lu'em kanazu. kamawan a aziyu ziyan za meredek kanta. 16kemazu zi paranger ku za marengay lra i Luzu: <semuwap za zanum i Yohanē, mawmu kiyasuwap mu kana Vangesar Lu'em.> 17kurekalrazaman, tu iputrepa na Viruwa i itras kemazu veray kana sizumayan na trau, kamawan kanta a pakutatena' lra kani Luzu Yēsu Kiristo mu, maresan tu iyaveray kanta. i eman ku, karuwa penelret kanantu kiyakarunan na Viruwa i itras ziyamaw?>>
18a kinger lra kanini na ngay nazu, zi 'azi lra parevativati, semenay pulihu mapiya kana Viruwa i itras marengay: <<'alrana muwaasalr pakavekal zi aelak za uwavaawan na wari na Viruwa i itras kuwaazu veray kana sizumayan na trau!>>
na kiyokay i Antiok
19a azu, na sinziya 'alrana kipinatray i Setifan na lremak zi mureha za pakakuwatreng zi mutatepi' na sinziya mukuwa i iyan ziya, ulra na padawilr mukuwa i Finiki, Saypurus zi Antiok; na fukuing mawmau tu palenakanay kana Yodaya na trau nazu. 20mawmu, ulra zuma na Saypurus zi na Kulinay na sinziya meredek lra i Antiok; zi nazu palenak kana kireeman kanantu fukuing ni Luzu i Yēsu kana Gilisiya na trau. 21kezang ni Luzu mukasa kanazu; ulra kazuwazuwan na trau mareveliyas pakutatena' lra, kurelrang kani Luzu.
22ini na vati mupalenak palru i Yērusalem kana kiyokay, zi pakarun kani Barenaba mukuwa i Antiok nazu. 23a meredek i Barenaba mu, mena'u kana Viruwa i itras e'maperez kana i kaziyu na trau, zi kasemangalan; i intaw pukezang kanazu, mukasaya mapiya penakasa kuretalrima kani Luzu. 24maw a 'inava na trau i Barenaba, kitemuy za Vangesar Lu'em, kerevat tu pakutatena'an. kemazu zi ulra kazuwan a trau pakutena' lra kani Luzu.
25i likuzan lra, i Barenaba mukuwa i Taresus miya'a kani Sawlo. 26atrevungay lra, zi tu pilralrangaw mukuwa i Antiok. kazu za sa'ami, nazu na zazuwa kurelrang kana wadadiyan i Kiyokay muwazuk, panadam kana kazuwan za trau, na temakesi kinuwa za <<Kiristo sinziya>> maw kemay i Antiok kemirakaz.
27a azu, ulra papida na patralritralri kemay i Yērusalem makuwa i Antiok. 28i savakan ulra a sasa mingadan kani Akabus; kipanadam kana Vangesar Lu'em, matikezir putralri marengay za uri kaazu a pakirev na 'ameninan savelawan i punapunan. (ini na lremak palru za kazu ziya i Kelawti na wari mu tena' mula'esi.) 29kemazu zi na temakesi kemuret za paturusanay kanantu kezang i intaw, paranuv za paisu puwalrang kana kazu i Yodaya na sinziya. 30zi kemani kemakuda lra nazu, pakarun kani Barenaba zi Sawlo murung kana inazuk na paisu veray kana ciyoro i kiyokay.
© The Bible Society in Taiwan, 2023