Sito 10
10
i Pētēro palenak za fukuing kani Konēliw
1ulra sasa a trau i Kaysaliya, mingadan kani Konēliw, maw a Roma hitay <<Italiya hēsiya>> na ma'izang kana hitay. 2maw penakasa kemaira a trau i intaw; i intaw zi tu niruma'enan mapiya kemaira kemakaud kana Viruwa i itras, marayas puwalrang veray 'azi ma'itril kana kalramalraman na Yodaya na trau, zi marayas pakirungetr kiyanun kana Viruwa i itras. 3ulra a saya wari a alusu kadaw, kararuwa za teluwa tuki, kipuanger za saya kana kirekamelri na nirekudayan; kana kirekamelri na nirekudayan i savakan mena'u patulre'ay kanantu pakarunan a sasa na Viruwa i itras musavak, venina kantaw: <<Konēliw!>>
4tremeketrek mena'u kana tēnsi i intaw, salaw mare'alav makaud, zi marengay: <<Luzu a, a eman?>>
marengay na tēnsi: <<kinger lra na Viruwa i itras kanannu ikiyanun, zi mena'u lra kanannu ipuwalrang kana kalramalraman. 5harem pakakarun u za trau mukuwa i Yopa, demaulru pazuwa izu na mingadan kani Simon Pētēro. 6i intaw ulra mutu lavang kana kiyakarun kana kalritr kanantu ruma' i Simon; tu ruma' ni Simon kazu i ngaydiran kana lrevek.>> 7izu na kimazayar kantaw na tēnsi a muveruk lra mu, i Konēliw venina pazuwa za zazuwa na pakarunan zi na marayas temara kantaw a sasa kemaira penakasa na mailran, 8na muelep ziya na lremak marengay kanazu, zi pakarun kanazu mukuwa i Yopa.
9kazuwa wari, nazu mahelrahelr mukuwa adalrep i Yopa. kararuwa za kare'alriyan, mukuwa i sa'usa'uv kiyanun i Pētēro. 10savelaw lra i intaw, maranger mekan za eman. izu na ruma' tu trau a paadang za kara'alrien mu, i intaw kipuanger za saya a kirekamelri na nirekudayan, 11mena'u za mutruwalr na lingatr, ulra a saya eman muwalusu, kamawan kana ma'izang na inuwan, na pata i kapuyungan na inuwan vinetevet, pulusu pudare', 12i savakan ulra a marekamelrimelri na 'aya'ayam zi na dobuc i alalas, zi ulra ziya na haramehaman. 13ulra a lrengaw marengay kantaw: <<Pētēro, karahan, truwaku ekanu!>>
14mawmu marengay i Pētēro: <<Luzu a, ka'azi'aziyan! 'azi ku ziya mekan za emaeman kana kaduwaresiresi na aekanen.>>
15izu na lrengaw karepapuwan marengay kantaw: <<na mukirungetr kema na Viruwa i itras, amanan kamawanaw kana militra' i innu.>> 16kemani patrutru paretelun, izu na eman mu ilrasez pareveliyasaw puitras lra.
17kana malrivak ziya i Pētēro mu, 'azi malrazam tu pauwayan za a eman kanantu nina'uwan na kirekamelri na nirekudayan; a azu, pinakarun ni Konēliw na trau mu atrevung lra kanantu ruma' ni Simon, matikezir kana sulray i patraran. 18kematamuni kiyumalr: <<ulra a lavang mingadan kani Simon Pētēro kaazu i kani?>>
19maranganger ziya kanizu na kirekamelri na nirekudayan za a eman tu pauwayan kema i Pētēro mu, na Vangesar Lu'em marengay kantaw: <<ulra tatelu a trau#10.19 <<ulra tatelu a trau>> zuma ulra awatranan lulun vinavalray za <<ulra zazuwa a trau>>; zuma ulra pidaya awatranan lulun vinavalray za <<ulra papida a trau>> zuwa maaya' kannu a! 20karahan i inu, ulusu, kurelrang kanazu mukuwa, amanan malrivak, 'alrana maw i inku na pakarun kanazu pazuwa.>> 21zi mulusu i Pētēro, marengay kanazu na trau: <<maw ku nanmu inaaya' na trau. muramawan mu za eman zuwa?>>
22temuvang nazu: <<maw niyam ma'izang na hitay i Konēliw na pazuwa kaniyam; i intaw maw a kemaira kemakaud kana Viruwa i itras na penatezelr na trau, kikaira kana Yodaya na trau ziya i intaw. kipanadam kana vangesar na tēnsi i intaw, 'alrazi alamu kantaw i ruma' kema kannu, maruwaya kipanadam kannu.>> 23zi pusavak kanazu i Pētēro, temara kanazu payulray.
kazuwa wari, i Pētēro masikasik salrangan kanazu mukuwa; na kemay i Yopa na sinziya kurelrang kantaw mukuwa. 24katelu wari, meredek lra i Kaysaliya nazu. i Konēliw piya lra demaulr kanantu niruma'enan zi 'ali'an kazu i ruma' mengangara kiyatrevung. 25a muwasavak i Pētēro mu, mungawayan i Konēliw, mihelrep semungal kantaw i kakuyan. 26pakunamun parahan kantaw i Pētēro, marengay: <<'alrazi karahan, maw ku a trau i inku.>> 27i Pētēro kimazazayar kani Konēliw, zi muwasavak i ruma'. mena'u i savak ulra kazuwazuwan a trau muwazuk, 28zi marengay kanazu: <<malrazam mu mapiya, kurelranganay kananta kakuwayanan, na Yodaya na trau 'azi mauwazangi kana zuma na 'inalrayan; mawmu na Viruwa i itras panadam lra kaninku, amanan pakanu 'azi mukirungetr kana trau elra. 29semeneng, nu pakarun mu za trau demaulr kaninku mu, 'azi ku 'emazi'azi zuwa. harem kiyumalra ku, muramawan za eman zi pazuwa mu kaninku?>>
30marengay i Konēliw: <<pakangawayan za pata wari, a alusu kadaw kararuwa za teluwa tuki mu, kazu ku i ruma' kiyanun. maherareher za ulra a mikavang za meleni' a trau matikezir kaninku i ngawayan, 31marengay: <Konēliw! na Viruwa i itras kinger lra kanannu ikiyanun, zi patuanger lra kanannu ipuwalrang kana kalramalraman. 32papakarun u za trau mukuwa i Yopa, demaulru pazuwa izu na mingadan kani Simon Pētēro. i intaw ulra mutu lavang kana kiyakarun kana kalritr kanantu ruma' ni Simon; tu ruma' ni Simon kazu i ngaydiran kana lrevek.> 33mawna kemani, payas ku pakarun za trau pazuwa kannu; muwai u zuwa, tatena' iniyan za mara 'inava lra, harem kazu ta mapiya i ngawayan kana Viruwa i itras, kiyaanger kanantu ipatalru kannu ni Luzu na ngay ziya.>>
venavati i Pētēro
34kemirakaz marengay i Pētēro: <<harem tatena' ku lra malrazam, maresaresan tu iyana'u na Viruwa i itras kana trau mapiya. 35nu maw na kemaira kemakaud kantaw, na penatezelr tu paelrangan na trau, nu maw lra kana iyaiyan na 'atayan mu, tu kasaharaw mapiya. 36malrazam mu, i intaw pakalrang kana tratrautrau ziyan tu Luzu i Yēsu Kiristo palenak veray kana Iseraēl na trau na vati, maw na pareka'iyanava na fukuing. 37i Yohanē kemay za venavati kana semasuwap na fukuing mu, izu na kemay i Galili kemirakaz paketrepay palenak i Yodaya kana pinidare'an na ma'izang na lremak malrazam mu mapiya. 38zi malrazam mu kana trau i Nazalē i Yēsu; na Viruwa i itras kemuda semelretrah veray kantaw kana Vangesar Lu'em zi na kezang, maruwaya paketrep mukuwa i iyan ziya, kemasazu kemakuda za 'iyanavayan, paka'inava kana mupalrar na trau ziya, 'alrana na Viruwa i itras mukasa kantaw. 39maw mi na uwasay na trau kanantu kinakuda peniya na lremak kazu i Yērusalem zi na zuma i Yodaya na trau tu kinazuwan. nazu tu trehetrehanay i ziyuzika i intaw. 40mawmu, katelu wari, na Viruwa i itras parevaaw kantaw, pawnung pakurena'u kana trau; 41amelri pakurena'u kana mapapiya, mawmau pakurena'u kaniyam na pinalimi' na Viruwa i itras zuwa uwasay na trau. marevaaw kemay kana minatray i likuzan mu, mukasa mi lra kantaw mekan zi tremekel. 42semeratr kaniyam i intaw palenak za fukuing kana zinekalranan, uwasay kantaw za mawna pinatikezir na Viruwa i itras, izu na sasayvang kana vaaw zi na minatray na trau. 43muramawan kantaw uwasay na patralritralri mapiya; marengay nazu mapiya, na pakutatena' ziya kantaw, karuwa pakalrang kanantu ngadan kilapus za pinamelriyan.>>
kituluz kana Vangesar Lu'em na sizumayan na trau
44a palalenak ziya kana vati i Pētēro mu, na kituluz ziya kana vati na trau mu tu redekay za Vangesar Lu'em. 45nazu na kurelrang kani Pētēro kemay i Yopa zuwa na Yodaya sinziya, mena'u kana Viruwa i itras tu iputrepa na Vangesar Lu'em kemazu semelretrah veray kana sizumayan na trau, salaw maherareher; 46'alrana kinger lra kanani na trau mararengay za ka'ulasan na ngay, pawnung semenay pulihu kana Viruwa i itras kanantu kaayawan. kemazu zi marengay i Pētēro: 47<<nanni na trau kituluz lra kana Vangesar Lu'em, kamawan kaniyam, ulra i eman na karuwa penelret kanazu kisuwap za zanum ziyamaw?>> 48mawna kemani, i intaw patalru kanazu pakalrang kanantu ngadan ni Yēsu Kiristo kisuwap. nazu kiyami ziya kani Pētēro kurekasa kanazu kikazu za pida wariyan.
© The Bible Society in Taiwan, 2023