Sito 9
9
pakutatena' kani Luzu i Sawlo
(Sito 22.6-16; 26.12-18)
1malemu patrutru temariyakaud za ngay kana temakesi ni Luzu i Sawlo. mukuwa kirepana'uwa kana tinuma'izang na rahan i intaw, 2kiyami za vaverayan za valray kana Damaseku i Yodaya kana waazukan ruma' ziya, za muwai paturus 'emvang kana kureturus tu dalan ni Luzu na trau, nu ma'inayan nu vavayan lra, urungaw mapiya mukuwa i Yērusalem.
3a makuwa i Damaseku i dadalan, uri raredek i kazekalran mu, maherareher za ulra a senan kemay i itras mulusu, pasenan paliyus kantaw. 4mureve' i dare' i intaw, kinger ulra a lrengaw marengay kantaw: <<Sawlo, Sawlo! kemuda zi pakakuwaatreng u kaninku?>>
5zi kiyumalr i intaw: <<Luzu a, i eman u?>> temuvang izu na lrengaw: <<maw ku nannu pinakakuwaatreng i Yēsu. 6karahan, uwa i kazekalran, ulra a trau rarengay kannu zanu kakudayan.>>
7na kurelrang kani Sawlo na trau matikezir mapiya, 'azi maruwa marengay; kinger za lrengaw nazu, mawmu 'azi mena'u za trau. 8marahan kemay i dare' i Sawlo, meli'atr, 'azi mena'u za emaeman; zi nantu lralrang kezengaw tu lima, pilralrangaw i intaw mukuwa i Damaseku kana kazekalran. 9teluwa wariyan 'azi maruwa mena'u za eman i intaw; 'azi mekan, zi 'azi 'emaw.
10i Damaseku kazu a sasa temakesi, mingadan kani Ananiya. mena'u i intaw za kirekamelri za nirekudayan; venavina i Luzu kantaw kana kirekamelri na nirekudayan: <<Ananiya!>> temuvang i intaw: <<Luzu a, 'aulray ku i kani.>>
11marengay i Luzu: <<payas uwa i Patezelr na dadalan, kazu kana ruma' ni Yoda miya' za sasa Taresus na trau, mingadan kani Sawlo. ulra kiyaanun i intaw. 12kana kirekamelri na nirekudayan mena'u lra za sasa a trau, mingadan kani Ananiya, musavak demikes kantaw, nantu iyanau' mareveliyasa.>>
13temuvang i Ananiya: <<Luzu a, kazuwan lra a trau marengay kaninku, ini na trau kemuda kana kemuwatreng kanannu sinziya i Yērusalem. 14harem zuwa i Damaseku i intaw, miinurung kanantu iveray na kezang kana ma'izang na rahan, 'a'evang kana semasungal kannu na trau ziyan.>>
15marengay i Luzu kantaw: <<pakarasa mukuwa i inu! 'alrana palimi' ku kantaw zuwa kikaruna kaninku, kaazu i sizumayan na trau i intaw, yawan, zi kana Iseraēl na trau i savakan palenak kananku ngadan. 16pananadam ku kantaw i inku, 'azika'azi muramawan kaninku muelep kana marekamelrimelri na ulepan i intaw.>>
17kemazu zi mukuwa lra i Ananiya. musavak kanizu na ruma' lra i intaw, demikes kani Sawlo, marengay: <<Sawlo wadiyan a, a zazuwa u i kani dalan na pakurena'u kannu i Luzu Yēsu na pazuwa kaninku, maruwaya papana'u masalr kannu, pawnung katemuyay u kana Vangesar Lu'em.>> 18payas, ulra kamawan za 'urip kemay kanatu matra ni Sawlo mutani, nantu iyanau' maveliyas 'inava lra. kemazu zi marahan i intaw, kisuwap; 19piya lra mekan mu, mareveliyas lra mikezang.
palenak za vati i Damaseku i Sawlo
kaazu i Damaseku za pidaya wariyan mukasa kana temakesi i Sawlo. 20payas mukuwa kana waazukan ruma' ziya palenak kani Yēsu i intaw, marengay: <<mawna Alrak kana Viruwa i itras i intaw.>>
21na kinger ziya na trau salaw pakumelri, marengay: <<ini na trau amelri izu na kazu i Yērusalem pakakuwatreng kanantu sinziya ni Yēsu ziyamaw? zuwa i kani i intaw, amelri a ma'evang kana sinziya, 'evangaw nazu tuluzanay kana ma'izang na rahan ziyamaw?>>
22mawmu, muveliyas puwapuwa mikezang tu vinavati ni Sawlo; melak i intaw kana arekez na vavatiyan uwasay kani Yēsu za maw i Kiristo, 'aziya maruwa semuveli marepakuda za ngay na Damaseku i Yodaya na trau.
23melavat lra za pidaya wariyan, na Yodaya na trau maranger mulrek pinatray kani Sawlo. 24ulra a trau pakalrazam kani Sawlo kanantu inaulrek pakakuwatreng kanazu. muramawan za piyanatray kani Sawlo, nu 'uninan zi nu 'aremeng kazu milran i salikiz kana kazekalran. 25mawmu, ulra a sa'esungan, nantu temakesi tu avakaw kana ma'izang na 'ara tu pulusuwaw kemay kana liveng i kazekalran.
i Sawlo kazu i Yērusalem
26i Sawlo meredek lra i Yērusalem, maranger mauwazangi kana temakesi. mawmu, nazu 'azi pakutatena' kantaw za maw a temakesi; makakaud mapiya kantaw. 27mawmau i Barenaba zuwa puwalranga kantaw, murung kantaw mukuwa kirepana'uwa kana sito, marengay pakapauwa kanazu kani Sawlo za kazu i dadalan kemudakuda kiretrevung kani Luzu, i Luzu kemuda kimazayar kantaw. i intaw marengay ziya kanazu za i Sawlo kemuda kana 'uringetr kazu i Damaseku pakalrang kanantu ngadan ni Yēsu palenak za vati. 28kemazu zi i Sawlo mauwazangi lra kana sito, kazu i Yērusalem pakalrang kanantu ngadan ni Luzu ka'uringeringetr palenak za vati. 29i intaw venavati kanazu na temara Gilisiya na Yodaya na trau, matuvatuvang, mawmu nazu maranger pinatray kantaw. 30na sinziya malrazam lra kanini na lremak, zi murung kantaw mukuwa i Kaysaliya, matez kantaw mukuwa i Taresus.
31a azu, na Yodaya, Galili, Samaliya na kiyokay i iyan ziya ulra lra a ping-an na wari. na kiyokay kemaira kemakaud kani Luzu, kazu kanantu ipuwalrang na Vangesar Lu'em zi mupatikezir, marekakazuwan na pinitrawan kana wariwari.
i Pētēro kazu i Lita zi Yopa
32i Pētēro paketrepay kemakawang i iyan ziya; ulra paresan, mukuwa mumalr kana kaazu i Lita na sinziya i intaw. 33i kazu, mena'u za sasa a trau, mingadan kani Aynēas; mutuwalre'ap lra ini na trau, i'ezeng i sa'esa' za waluwa 'ami lra. 34marengay i Pētēro kantaw: <<Aynēas, paka'inava lra kannu i Yēsu Kiristo. karahan, apetru nannu kini'ezengan!>> payas marahan i Aynēas. 35na kaazu ziyan i Lita zi Saron na trau mena'u kantaw, zi pakutatena' lra kani Luzu papiya.
36i Yopa ulra a sasa vavayan a sinziya mingadan kani Tapita (na ngay i Gilisiya a Torekas kinuwa, tu pauwayan mu a takulris kema). sazu tu kinakuda a 'iyanavayan na lremak i intaw, semangal puwalrang kana kalramalraman na trau. 37ulra saya wari, kuwaleng i intaw, minatray lra. nantu zazek na minatray tu panimunay lra za trau, iretra' i makatras kana ruma' a saya na rawang. 38i Yopa zi i Lita 'azi maredawilr, na kazu i Yopa na temakesi kinger kani Pētēro za ulra i Lita, zi pakarun za zazuwa mukuwa kirepana'uwa kantaw, kiyami kantaw: <<'alrazi kadika alamu kaniyam i ikani.>> 39payas masikasik i Pētēro, salrangan kanazu mukuwa. meredek i Pētēro, ulra a trau murung kantaw mukuwa i makatras kana ruma' na rawang. na inavangulr mapiya mulitrung kani Pētēro trematrangis, zi tu trina'iyan a vaaw ziyan i Torekas na pakesavak zi na kaytu pana'u kantaw. 40i Pētēro patalru kanazu upatraran mapiya kema, zi malrituzu kiyanun, zi marepiles trempa kana minatray, marengay: <<Tapita, karahan!>> meli'atr i Torekas, mena'u kani Pētēro, zi kemayan. 41mungawayan i Pētēro parahan kantaw, zi venina ziya kana sinziya zi na inavangulr pusavak, na vaaw i Torekas tuluzanay kanazu. 42ini na vati mupalenak lra i iyan ziya i Yopa, ulra kazuwan a trau pakutatena' lra kani Luzu. 43i Pētēro kazu i Yopa kaazu kana kiyakarun za kalritr i Simon kanantu ruma' za pida wariyan lra.
Currently Selected:
Sito 9: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023