Sito 1

1Tēofilus yawan:

kazu kananku vinavalrayan a ngawngaway na valray mu, tu pinakalrangan ni Yēsu zi tu ipanadam ziya, kemay kemirakaz kikarun 2palru za i intaw mukituluz puitras kanizu na wari, nirengay lra peniya. a ukaitrasan pakangawayan mu, i intaw pakalrang kanantu kezang na Vangesar Lu'em veray sazu za panadam kanantu pinalimi' dinaulr na sito. 3kipakakuwatreng i likuzan kana makapetelr wari, kurepana'u lra kanazu za parepidan i intaw, manay kana marekamelrimelri na kudayan uwasay kantaw za maw vaaw i intaw, zi venavati ziya kanazu za lremak kana kanatal na Viruwa i itras. 4a mukasa nazu mu,#1.4 <<a mukasa nazu mu>> karuwa marengay za <<a mukasa i intaw zi nazu maekan mu>>. temuru kanazu i intaw: <<iuwaveruk i Yērusalem, iturusi ku nirengay kanmu, ngangara kani Amalri tu iyatuvang. 5semuwap za zanum i Yohanē, mawmu kiyasuwap mu kana Vangesar Lu'em nu daman kana wari.>>

i Yēsu mukituluz muitras

6na sito a muwazuk mukasa kani Yēsu mu, kiyumalr kani Yēsu: <<Luzu a, maw nay harem nu parevelaliyasaw tu trepa mikezang na Iseraēl?>> 7marengay i Yēsu kanazu: <<izu na tuki zi na wari mu maw i Amalri pakalrang kanantu pinitrepa na kezang kemuret i intaw, amelri i inmu na kalralrazam. 8mawmu tu redekay mu kana Vangesar Lu'em mu, katemuy mu za kezang, kaazu i Yērusalem, Yodaya zi i Samaliya na pinidare'an ziya, arusay za patarisesek, uwasay kaninku.>> 9piya lra marengay kanini na ngay mu, i Yēsu kazu za tremeketrek menana'u nazu mukituluz muitras; ulra a saya kutrem melingez lra kanantu iyana'u nazu. 10a kirewaday i intaw mu, penauwa za menana'u piyaitras nazu. maherareher za, ulra a zazuwa mikavang za vulretri' matikezir kanazu i trapingiran, 11marengay: <<na Galili na trau a, kemuda zi kazu i kani piyaitras mena'u awa? ini na kiruwaday kanmu, na mukituluz muitras i Yēsu, nu mena'u mu kantaw za kemudakuda muitras mu, kuwaazu mareveliyas zuwa i intaw.>>

na venulas kani Yoda na trau

12kemazu zi, na sito kemay Olēv zenan mukuwa i Yērusalem kana kazekalran; i Olēv zenan tu kaadawilr i kazekalran mu kararuwa saya kiro. 13a mukuwa i kazekalran nazu, muitras kanantu kaazuwan na ruma'; i kazu ulra i Pētēro, Yohanē, Yakob, zi i Antēlē, Filip zi i Tomas, Batolomay zi i Matay, tu alrak ni Alefē i Yakob, zi na 'uringetr na sevang i Simon, zi alrak ni Yakob i Yoda. 14nazu marayas mukasa za anger kiyanun; i savakan ulra papida na vavayan zi tainataw ni Yēsu i Maliya, zi tu wadiyan.

15melavat lra za pida wariyan ulra a uwazukan za sinziya, kararuwa saleman zi makavetra'an na kurelrang na trau. matikezir i Pētēro, marengay: 16<<'ali'an a! na Vangesar Lu'em pakalrang kanantu udung ni Davidē, kazu i Sēsiyo putralri marengay na kireeman kani Yoda milralrang 'emevang kani Yēsu na lremak mu 'azika'azi mula'esi. 17i Yoda maw ziya mu kipalimi' zuwa puwalranga kananta kikarun, maw a sasa kanta i savak.>> (18i Yuda melak kanantu kinikuwatrengan na etan tremima' za saya dare'; zi kazu i kazu, mutani i intaw, mupalretruk na yavavak zi minatray. 19na kaazu i Yērusalem na trau ziya kinger kanini na lremak, semeneng tu pu'avalray kanantu piningayan Akēludama kinuwa izu na dare', tu pauwayan mu mawna <<'uma za dara'>>.)

20penauwa kamawan kana Sihēng tu vinavalrayan:

kiyalriman kanantu ruma' mutu alalas,

iniyan za trau kaazu i savak.

ulra ziya i sannin vinavalrayan za:

kiyalriman za zuma a trau venulas kanantu kiyakarunan.

21-22tremungulr marengay i Pētēro: <<mawna kemani, 'azika'azi ulra zuma a sasa zuwa mukasa kanta, salrangan uwasay kani Luzu Yēsu tu nirevaaw. ini na trau 'azika'azi maw a kazu ziya i Luzu Yēsu kanta muwa'ivat mu -- kemay kani Yohanē semuwap kemirakaz palru mukituluz muitras i Yēsu a azu -- na miyawari kazu mukasa kanta na trau.>>

23kemazu zi, semukun mapiya za zazuwa, maw i Yosēf (ipu'avalr kani Parsapas, zi mingadan ziya kani Yustus) zi i Matiya. 24kiyanun marengay nazu: <<Luzu a, malrazam u tu anger na kurisaesa; kiyami mi kannu panadamaw mi, ini na zazuwa maw na i iyan nannu pinalimi' 25zuwa venulas kanini na sito tu kiyakarunan. ini na kiyakarunan tra'anay lra ni Yoda, mukuwa lra kanantu auwayan.>> 26a piya marengay kanini na ngay mu, maivuivus nazu, kana zuwaya na ngadan mivus pupana kani Matiya; zi zuwa mukasaya kana papulu' zi sasa na sito.

Currently Selected:

Sito 1: TPN

Highlight

Copy