Maruku 9
9
1Ki Yésu ka lapsobakadria, <<Nuptapɨdrɨngɨ makmwa tilila, ingɨdɨlɨ iké kɨné na ico, nukéma na nikamdu lacɨnglɨ ku prevké kɨcɨngadra ki Ticomtia pubuelɨ.>>
Ubréthé ku tumanɨdra
(Matai 17.1-13; Luka 9.28-36)
2Ku spaknɨmlɨ na vienɨ, ki Yésu ɨmɨcɨ Pitiru, Yakobu, si Yuhani, uthulungu mtamo mragre sesa na rgɨrgɨ. Sukéngadria ku tlucbungadra, ki Yésu ka ubréthé ku tumanɨdra. 3Iku kpingdra angépelanga mpuli drorpasɨ; ikainga déda na ico tédra nuduruma mra mamɨne lɨmrɨ ptuménia skaplidra. 4Ku taturu séto ka pakcimonga cɨnglɨ Éliya na si Mosi na tresɨ mabka ki Yésu. 5Ki Pitiru ka masobka Yésu na, <<Singsi, tékanɨme kɨné ka sakura margi, nipéthaknamɨ ngituru na tovna, sesa ka bwi swa, sesa ka bwi Mosi na, sesa ka bwi Éliya na.>> 6Ki Pitiru si druma na ico ka rɨsalia akuludru, irigu kupsobakayiadra si lasakragi.
7Iké na kurungu olɨkebe krukrungudria. Pakcimonga, sliké adringi krungu mbuelɨ uririengɨ, masobka, <<Kɨné ka amani ku matharialinga na Vlakɨ, mumu ka mubciringa kingiarodria!>> 8Rɨsamia ibungu ngipringlu cɨnglɨ, si icɨnglɨ druma na ico, tkathadra ki Yésu iké terɨsɨdria.
9Ku mrodrudranga rgɨrgɨ, ki Yésu lapta pɨdrɨngɨdria tila, <<Vlakɨdra na Ico nislikaila tkamudɨnadra siela, acɨngɨlamuka tililangamu na makaiconga.>>
10Kingiaro pasobké ni Yésu, si makmanemani mbakbaka, <<Salɨké mamudu siela ka aciku tlunɨdra?>> 11Lakbuburu driala Yésu na, <<Nakuni ku ubrubru Sésio na singsi palaléma ki Éliya mukunémia?>>
12Labri ki Yésu, <<Ki Éliya matkadrɨngé palaléma mukné kula pingcɨgɨ; makasi, nakuni Sésio musobaka Vlakɨdra na Ico nukéma ku spatérbuadra si bongu pigiadria mia? 13Kutilila mwa, mukaninga ki Éliya, tlunɨdra madria tormane, tumé ku Sésio spasobkéni poké bɨkédra.>>
Pakragragidria modɨrapɨ na gɨralɨ ku vlavlakɨ
(Matai 17.14-21; Luka 9.37-43)
14Ku gidra sviri mwa tékadra druma sétodra, cɨnglɨ ku isarbu madro na ico tɨpainguludria, iké ku ubrubru Sésio na singsi icngɨcngɨ ikédria mokakdre mbakbaka. 15Ku makaiconga cɨnglɨdra Yésu na rɨsaliya sukura mrɨkmɨ; langurubua pidke dresɨngɨdria. 16Ki Yésu ka lakbuburu ku sétodra, <<Aci ku porkanemu mokakdre mbakbaka?>>
17Ku isarbu na ico iké sesa ico masobka, <<Singsi, mukanikɨkɨ ɨmɨcɨ vlakɨli cɨnglɨswa; tumanɨni ka iké manglu na gɨralɨ modɨrapɨnia, iduru msobakbaka. 18Naknéni gɨralɨ mdrape, obangɨdria pké déda, laptutadria apacɨpacu, paktɨkɨtɨ vlésini, mtɨkɨ boetɨni. Si kitubikɨ séto su pigiania gɨralɨ mia, makasi isuduru.>>
19Ki Yésu lapsobakadria, <<Mumu kɨné iké boala na ico ka nakuni tédra na tékabkanɨ! Nutathatharali lamwaa ikékné? Nutathatharali parepɨlamua? Mra vlavlakɨ ɨmcɨmwan kwa kné!>> 20Sumɨcɨngadria vlavlakɨ mwakné.
Ki gɨralɨ cɨnglɨdranga Yésu na ka, pakcimonga ku vlavlakɨ lɨglɨgrɨ, iké déda mbababɨnge, ututa pacɨpacu. 21Ki Yésu lakbuburu mamidria, <<Tathanɨninga kné tkacemnani?>>
Labri, <<Sakvalɨvalɨke ikénia. 22Ku makurathɨ pɨlɨngɨ ka ukpipielɨ dranga kuptémudu miania, labongunia pwa tapurua, udrurdrurnia pwa tacɨclara. Makasi ina durusu depɨ, kitbikswa mgagucanɨma, psopranɨma!>>
23Ki Yésu ka masobka, <<Masobkamusu <Nudurumi su,> ikédria tékabɨkanɨ kdrɨdrɨmɨ na ico, ina makadepɨnga ka nudurma!>>
24Ku mamidria vlavlakɨ suribungunga psakoranga koko, <<Tékabɨkanɨkɨkɨ, makasi tékabkanali ka isovaktɨla, kitbikswa psoprangkwa!>>
25Ki Yésu cɨnglɨdra madro ico mukné ngipringlu dria, sugaucunga dria ku gɨralɨ, <<Musu ka macɨclɨ mangulu na gɨralɨ, mugiamakɨswa slikia kɨné vlavlakɨ ku tabotɨnani mboelɨ, adra iyuvanga sviri modringi!>>
26Ku gɨralɨ ka supsakoranga ngingiecɨ, iku vlavlakɨ supronavnenga lɨglɨgrɨ, si suboelɨnga. Iku vlavlakɨ amé na mamudu, rɨsaliya msobaka, <<Mamudunga kini!>> 27Makasi ki Yésu lablibli rimédra, rodrengedria picikle, sungɨdlɨnga.
28Ki Yésu ku mdanɨdra danɨ, sétodra ka lapthuthulungudria tila, <<Nakunɨme iduru pigiadria gɨralɨ?>>
29Ki Yésu masobka, <<Tkathani na ptalusukbu ka nuduruma pigia kɨné gɨralɨ, tédra na druma nupsa tumarata.>>
Ki Yésu ka ukula la palalé msobaka ku nusakamudadra
(Matai 17.22-23; Luka 9.43-45)
30Ku gidranga svagé tékanidria, uribatɨ Galrilri. Ki Yésu ikdalɨme pirigu na makaiconga ku nuvétharadra, 31ki Yésu ka icɨngɨcɨngɨ buburu ku sétodra. Masobka, <<Ku Vlakɨdra na Ico iké garɨ norama bwi lrimédra ico; nuptémudumania, mamdudranga spkturlu vienɨ, lasiela modripi.>>
32Makasi irigu kɨné babka ku tlunɨni, lakuludru kbuburunia.
Aciku maragrenga
(Matai 18.1-5; Luka 9.46-48)
33Iku muknédranga mua Kaparnaum, mdanɨdranga danɨ Yésu ka kibrubru ku sétodra, <<Ikému dadɨranɨ aci ku mokakdramu mbakbaka?>>
34Rɨsaliya kcibne, iku ikédra dadɨranɨ mokakdre mbakbaka ka aci ku maragrenga. 35Ki Yésu lanunu, nangalia ku mengesle kdrusa sétodra mua tlucbungadra, msobakadria, <<Aci ku nutatarsɨma, nukmanima ibrila, nuksékoluma na makaiconga.>> 36Suslapɨ ngɨsa na vlavlakɨ nanga mia, ikia bcerka ingɨdɨlɨ, lakpélédria, msobaka, 37<<Ina kiakénkwa lara ktormanɨ tumékɨné vlavlakɨ ka, amani ku patormanɨ pingcɨgɨkwa. Ina patormanɨ kwa, ikmanɨmani ptoromanɨ kwa, tumai patoromanɨ ku urukwa mwamia kidri.>>
Patilirikwanɨ si marsodo
(Luka 9.49-50)
38Ki Yuhani ka masobka Yésu na, <<Singsi, ucɨnglɨ knamɨ na ico potlo ku aracɨsu pigiya na gɨralɨ, si adramaknamɨ dria, sukédra ka ikmani ska dɨrɨdɨrɨta.>>
39Ki Yésu ka masobka, <<Adra itumainia; sukédra tédra na ico potalu ku aracɨli sidepɨ depɨdra Pɨlɨngɨ, suribungunga rikudru msobaka tkorthengkwa. 40Iku iptalikwanɨ mtia ka amani ku iyotatménia (marsodo) ma. 41Kuptapɨdrɨngɨ mwa tilila, kumidra, imumu ka tulunedranga ki Kirisito si labémwa ngɨsa na kopu acɨlé, nuké miya ku aramu spakrɨvé.>>
Mranga musu ɨmcɨ ico psarli
(Matai 18.6-9; Luka 17.1-2)
42Ki Yésu masobka, <<Kumidra mra tkabɨkanɨ sinzia ngɨsa tédra tlulurnɨdra na ico svagékwa, morngé sarké tɨradro srɨdrɨdrɨ alapi ɨbkɨ pké ɨrɨdra, bongu pthɨnɨ tɨbaru adringi. 43Iku sesa rimésu mrénisua psarli, tɨktɨka nia bongu! Mvrénisua sesa na rima loramusu ktormanɨ na skodridripi, si drusa na margi rima luva zikoku, mudidedra iké ikodrɨdrɨpɨ na apuru margilaa.#9.43 Iké burenɨ na sulatɨ 44 pabki, <<Ikédria ka, ikamudu na kelɨnge, apuru ka dudria medrɨbɨ.>> 45Iku sesa kukusu mrénisua psarli, tɨktɨkania bongu! Movrénisua sesa na kuku laktormanɨ na skodridripi, ikédra adrusa kuku ka kragimalaa bongudria pwa zikoku.#9.45 Iké burenɨ na sulatɨ 46 pabɨki, <<Ikédria ka, ikamudu na kelɨnge, apuru ka dudria medrɨbɨ.>> 47Iku sesa mcésu mrénisua psarli, mrania kukuru buelɨ! Ina tatédréni sesa mɨca luva mdanɨ dédadra ki Ticomtia, ikédra adrusa mɨca ka kragimalaa bongudria pwa zikoku. 48Ikédradria, ikamudu na akɨlenge, iku urdidapɨ na apuru ka ikedrɨdrɨpɨ.
49<<Makaiconga nusakémamtia na apuru saptikɨcɨngɨ, tumé na sarké tmusu verngɨ. 50Ina tmusu tlunɨni ka margi, makasi ina tatédréni na mathɨmɨ, nudurumala mradria kula ptithɨmɨ? Mumuka mutumia tmusu sarkéni, terɨsɨ mrasudu makragagi.>>
Currently Selected:
Maruku 9: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
