Maruku 8
8
Yésu ka pakanɨ pakului thɨpatɨ kzulu na ico
(Matai 15.32-39)
1Itkalɨmanɨ, si iku druma icico isarubu. Tédra ku nukanadra; ki Yésu nangalia ku sétodra, lapsobakadria, 2<<Magɨlogévéngkwa nia kɨné iciconga; sukédra trunga na vienɨ terɨsaning kwa, knénga ka tédra ku nukanani. 3Ina milimua sivri abésimia ka, nukéma dadɨranɨ srimu, ikini ka iké na salɨké médavli mukné.>>
4Ku sétoni lakbuburudria, <<Iké kɨné rborbo, nuwata silɨpe pɨktɨ na kne pkanɨ pkalui kɨné madro na ico?>>
5Ki Yésu lakbuburudria, <<Apidra iké mwa na pang?>>
Labri, <<Pitu mia.>>
6Ki Yésu larudria ku makaiconga muwa iké déda, laradria ku pitu na pang, takdrɨngésu liya Ticomtia, piciri, bwi sétodra, sétodra ka lapvalɨvala bwidria ku makaiconga. 7Ikédria ikipiyia titkici na akangɨ, ki Yésu laptaumana takdrɨngésu miya, larudria séto pavalɨvala bwidria ku makaiconga. 8-9Rɨsama kuenɨ ngurbua, mluinga, iku ukanɨ na ico ka nuvama na thɨpatɨ kzulu. Séto ka lasurobudria ku songkanadra, ngiculunga ka psɨtɨ pitu na sboro, ki Yésu ka pagia pvagvagé makaiconga. 10Laribungu ngeresɨ sétodra mragre avangɨ avétha tilikia Dalemanutha.
Ku Hualrisai na ico ka kitubi depɨ ni Pɨlɨngɨ
(Matai 16.1-4)
11Iké ku ikpiya na Hualrisai na ico mukani kcnglɨ Yésu na, mokakdre mbakbaka. Pakdrɨdrɨmɨ taptikurathɨ niamia, laktubi nia puboelɨ depɨ ni Pɨlɨngɨ, si tkabkanɨrigu ku makasarké ninga ka salɨké Ticomtia. 12Ki Yésu ka lapusosoro suringo mnanekɨ, msobaka, <<Kɨnénga zidai na ico nakuni taktubimia ku depɨ ni Pɨlɨngɨ? Kuptapɨdrɨngɨ mwa tilila, iknénga zidai na ico iragienɨ cɨnglɨ depɨ ni Pɨlɨngɨ!>>
13Sugia sɨvagédria, mragre avangɨ ribte tɨbaru msavakle.
Hualrisai na ico si Hirudi ku spasmismakɨ
(Matai 16.5-12)
14Ku séto maimuru ɨmcɨ ngédro na pang, iku iké avangɨ ka sesa na pang, tédra druma na akangnɨkana. 15Ki Yésu lapanguringodria, <<Mongkocɨvana, si mongkélɨbaka na spasmismakɨ ni ki Hualrisai na ico si Hirudi.>>
16Rɨsama mbakbaka, <<Kini sɨpasobké ni tlunɨni ka tédramtia na pang.>>
17Yésu ka urgudria ku pakdrɨdrɨmadra, sukbuburungadria, <<Nakumu ikénia mbakbaka porké imɨcɨ na pang mia? Patmanɨmu iptromanɨ rigu, irigumu? Nakuni orumu skorurungu? 18Iké mwa na mca si icɨnglɨmu? Iké mwa na cingira si ibciringimu? Inguringomu. 19Ku apcipcirali na pang pavlavlali bwi ku rima kzulu na ico pkanɨ ku depɨ? Iku sungkanamu na mapsapsi apidra pasɨtamu na sboro?>>
Labridria <<Mngesle kdrusa na sboro.>>
20Ki Yésu ka lakbuburulaa, <<Iku apcirali pitu na pang bwi pkanɨ ku thɨpatɨ kzulu na ico, si apidra pasɨtamu sboro na psapsi?>>
Labri ku séto, <<Pitu na sboro.>>
21Sukédra Yésu kbuburudria, <<Patmanɨmu, irigulaa?>>
Pakragagi Bithesaita maliecɨ na ico
22Ku muknédranga mua Béthesaida ka, iké na ico umɨcɨ sesa na maliecɨ mua tlucbungadra ki Yésu, ktubi depaniamia. 23Ki Yésu orakɨ rimédra ku maliecɨ ɨmɨcɨdria mua ckɨlɨ rborbo, palaléla songré pké mɨcédra, lasaké laa rimédra depɨ pké tabotɨnadra, lakbuburudria, <<Udrumusu cɨnglɨ makainunga?>>
24Lapsévagarɨ cɨnglɨ, msobaka, <<Ucɨnglɨ kɨkɨ na ico, amé na idrɨngrɨsɨ na ngatu, dodadavce.>>
25Ki Yésu larala ku rimédra pké mcédra. Ku maliecɨ cɨnglɨdra, svivringa cɨnglɨ, iku makainunga uduru ptabɨdrɨngɨ cɨnglɨ. 26Ki Yésu ka mwanga sviri liadria, la ptabɨdrɨngɨngadria musobaka, <<Adra isviringa mwa ckɨckɨlɨ.>>
Pitiru ugunga Yésu na amani Kirisito mia
(Matai 16.13-20; Luka 9.18-21)
27Ku Yésu si sétodra avétha Kaisariya Pilipi ku médidali na ckɨckɨlɨ mwa. Iké dadɨranɨ, lakbuburudria, <<Drumanɨ na ico ka acikini mangkwa?>>
28Labri, <<Iké na masobka amani ku pababɨno ku Yuhani mia; iké na masobka amani Éliya mia; likénaa masobka amani sesa na maburosi.>>
29Ki Yésu ka lakbuburudrialaa, <<Mumu? Molɨva msobaka acikɨkɨ?>>
Ki Pitiru labri, <<Kirisito musu.>>
30Ki, Yésu ka laptapɨdrɨngɨ ngadria tilila musadra iprigu na makaiconga técavɨnali.
Angirigunga ki Yésu ku nuptérubuadra si nu sakamduanadra
(Matai 16.21-28; Luka 9.22-27)
31Ki Yésu ka lasikérodru buburu ku sétodra, <<Vlakɨdra na Ico madro ku nupdradrɨsngadra spatérubu, ku cioro, utatarasɨnga sidepɨ lɨgɨsɨ, si ku ubrubru Sésio na singsi ka masmadrɨdria, si laptémududria, spaktrulu na viénɨ ka nu sielama.>> 32Kini makadepɨnga pata pɨdrɨngɨnga msobaka. Ki Pitiru la blibli Yésu na péthili, adra itɨmainia liadria. 33Ki Yésu langvargi, cɨnglɨ sétodra, mgaucu Pitiru na, <<Satang, giya! Pakdrɨdrɨmasu ka ikɨmani pakdrɨdrɨmani Ticomtia, kdrɨdrɨmɨdra na ico kidri.>>
34Ki, Yésu ka lakokodria makaiciconga si sétodra nanga muknia tlucbungali, tililadria, <<Ina ikédra na ico kuksapara mangkwa ka, ngébonga songkélinga mia, udu ku ziuzikadra mukné ksapara kwa. 35Ina pakdrɨdrɨmɨ kungipsopra skodripilima, morngé nuktatédra ma skodripidra, ina kiakéngkwa si Hukuing tatédra ku skodripidra, morngé kmani ktormanɨ na skodripi. 36Ina ico kumidra mra kɨné kétakmɨnga tbɨlɨnga, si labongudria ku skodripidra, ka iké ku tlunɨdra? 37Aci ku nuduruadra kidri mra borthi psivri ku skodripidra? 38Ikné mamlimla si makurathɨ psiala na zidai, ina iké na ico kiakén kwa si bɨkéli mromle, Vlakɨdra na Ico iké Mamidria na pkilvu si mabulanga koludra na Pɨlɨngɨ muknédranga ngeresɨ ka, tmémadria mromle.>>
Currently Selected:
Maruku 8: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
