Maruku 14
14
Taptumé yiadra ptémudu Yésu na
(Matai 26.1-5; Luka 22.1-2; Yuhani 11.45-53)
1Ku niyuwala ku drusa vienɨ na Tribɨta na Lɨgɨsɨ si tovaradra na asɨmakɨ lɨgɨsɨ, ku utatarasɨnga sidepɨ lɨgɨsɨ si ubrubru Sésio na singsi ka otɨnangɨ thulungu pora Yésu na, taptémudu mania. 2Rɨsama msobka, <<Tasadra ipɨkai na tlgɨlɨgsa puara, nisadra kɨné icico iboelɨ mingicingici mia.>>
Ki Yésu iké Potani késesɨbe
(Matai 26.6-13; Yuhani 12.1-8)
3Ki Yésu ikédra Bithani ku magɨthagɨthe cemɨne dadra ki Simon. Iku icɨngcɨngdra kuenɨ, iké sesa na abéya mukani ɨmɨcɨ margi sesa cukini, adringi pasɨtɨ na sakura makcɨngé macsu matkadrɨngé na narta sesɨbɨ, la puidra ku cukini, mradria sesɨbɨ bulu pké orudra ki Yésu. 4Iké ku ikédria inunu na ico ka ikrabrabrɨ, la bakbaka, <<Tuménɨnia talora sesɨbɨ ka iké ku tulunɨni? 5Kɨné sesɨbɨ duruma nia longé turu ɨdé na gingi, lara kɨné pésu sapsopara ku matérubu melɨlɨmɨ na ico ka nikragilaa!>> Sukédra ki icico ka mangicingici dria ku abéya.
6Makasi ku Yésu masobka, <<Pkin giaravania! Monavɨne ngania ptikcɨngé? Kini ka kiakéngkwa depɨ sesa margi na sarké. 7Iku tumaninia ka iké mwa stalesɨ terɨsɨ melɨlɨmɨ na ico, ina iyomimu ka, niduru mumu psopradria, makasi idurukɨmwa stalesɨ teresɨ. 8Kini ka pakuculunga prɨvkéni depɨ, aranikɨné skacsucsu sasɨbe bulu pwa buetɨli ka kiakéngkwa nukamudali ubulukwa ptolé ptarme. 9Kuptapɨdrɨngɨ mua tila, kɨné kétakmɨnga tbɨlɨnga, Hukuing muidra prabu ku mkadédanga, makaiciconga tila musobaka ku makadopa dranga, mra nguringodria.>>
Ki Yuda olengé Yésu na
(Matai 26.14-16; Luka 22.3-6)
10Ku mngesle kudrusa sétodra ki Yésu, iké sesa tiliké Iskariot na ico ki Yuda, kidri ka amua kcɨnglɨ utatarasɨnga sidepɨ lɨgɨsɨ, korama longé Yésu na buidria. 11Kidri ku bicringidra Yuda na spasobkédra, sukrabrabrɨnga, iyolia bwidria pésu. Skérodru ningadria ka, ki Yuda laslape na viénɨ kolengé Yésu na mia.
Ki Yésu si sétodra angɨresɨ mdanɨ ku Tribɨta na Lɨgɨsɨ tkiubu
(Matai 26.17-25; Luka 22.7-14, 21-23; Yuhani 13.21-30)
12Tovaradra asɨmakɨ lɨgɨsɨ ku palalénga na vienɨ, amani culuani na iyu ku Tribɨta na Lɨgɨsɨ vienɨ, sétodra mukani kbuburu Yésu na, <<Ikadra ku niwayasunɨma ptarmeswa Tribɨta na Lɨgɨsɨ kiubu?>>
13Ki, Yésu lauru ku drusa sétodra, tumiadria musobakamia, <<Mua mdanɨ ku skabranɨ, nupdradrɨsɨngɨ ma mumu tangɨsa na ico drodrɨse sesa cukini na acɨlé, muksaparadria. 14Ina mɨdanɨdra sesa na danɨ, mukbubura ku pédanadria, <Ki Singsi masobka, kɨkɨ si sétoli ka nukaranɨme kuenɨ Tribɨta na Lɨgɨsɨ na kiubu ka ikaku csirekenadra brabra?> 15Numɨcɨma mwa mragɨr cɨnglɨ sesa na paskɨskɨtanɨ nga tradro na csireka; mukiadria ptramenɨma.>>
16Ku drusa séto ka sugianga, mwa mdanɨ ku skabranɨ, iku madrɨsɨ ngadra na makadepɨnga tumai ku tilanɨnidria ki Yésu; sukéngadria ptarme Tribɨta na Lɨgɨsɨ na kiubu.
17Kukasusungu midranga, ku Yésu si mngsle kudrusa sétodra lakné. 18Iku inunudra kuenɨ, ki Yésu masobka, <<Kuptapɨdrɨngɨ mwa tilila, imu iké kɨné, terɨsɨkwa kuenɨ, iké sesa na ico nolɨngé mankwa.>>
19Rɨsama mkorthe kdrɨdrɨmɨdra, mtangɨsngɨsa kbuburudria, <<Ikɨmani kɨkɨ yo?>>
20Ki Yésu ka labri, <<Amani mumu ku tamangsalɨ kudrusa na ico ku sesa; akiku tresali kuenɨdra ku iké sara na pang ka amani kidri. 21Tumé ku spasobkédra Sésio, Velakɨdra na Ico ka nukiptharama; makasi iku olɨngé Vlakɨdra na Ico ka nukéma ku spatérubuadra! Kɨné ico lasadra iktévlakɨ ka margilaa!>>
Kiubudra Pɨlɨngɨ
(Matai 26.26-30; Luka 22.14-20; 1 Kurintu 11.23-25)
22Iku kuenɨdra, ki Yésu ka amara na pang, palé bwi ptormanɨ takdrɨngésu mia sukbu, la pcipciri ku pang, pavlavla bwi sétodra, musobaka, <<Mukana, kɨné ka tabotɨnali.>>
23Lara kopu, pavétha Ticomtia takdrɨngésu midranga, labédria; rɨsalia ungulu. 24Ki Yésu masobka, <<Kɨné ka amani ku lobuli, amani sparigigu Ticomtia si ico ku tatméyiadra na lobu, kiaké makaiconga apulobu. 25Kuptapɨdrɨngɨ mau tilila, nungulianga kɨkɨ kɨné budo bɨva, siektɨ mwa iké dédadra Ticomtia ungulu bova bɨva ku vienɨ.>>
26Uthɨné ngɨsa na thɨné, subuelɨnga, muwa Kanlang rgɨrgɨ.
Ki Yésu masobkanga Pitiru ka nurgiankwa ma
(Matai 26.31-35; Luka 22.31-34; Yuhani 13.36-38)
27Ki Yésu ka masobkadria, <<Mumu ka nusvagé mamunkwa, tumékné Sésio msobaka, <Ticomtia ptémuduma ku paknunuengɨ na ico, si maka iyunga nuthrakpuma gia.> 28Makasi ina sielélinga modripi, nupalalé makɨmwa mua Galrilri.>>
29Ki Pitiru masobka, <<Kumidra gia na ico svagé swa, ka nusvagiya kswa.>>
30Ki Yésu lapsobaka Pitiru na, <<Kuptapɨdrɨngɨ swa tilila, sesa ngiubu skupsalɨdralaa torukukanɨ, nuktrulu mamusu iligukɨnia miankwa.>>
31Ki Pitiru sarké patapɨdrɨngɨ na bɨka msobaka, <<Komédra langoprakswa mamdu, nuduria kɨkɨ irigu kswamia!>>
Druma ku sétodra ka rɨsama tumidria msobaka.
Iké Gesimani sukubu
(Matai 26.36-46; Luka 22.39-46)
32Ikidri ku muidra sesa na téka, sporacɨdra ka Géthesémani; ki Yésu ka lapsobaka ku sétodra, <<Mukia kɨné inunu, drodrongkwa sukbu.>>
33Sumɨcɨ Pitiru, Yakobu, si Yuhani mdɨdɨrɨ mwa. Laskérodru mloru mkorthe kdrɨdrɨmɨdra, 34Lapsobakadria, <<Maloru kwa mkurathɨ kdrɨdrɨmɨli, apkamudukwanga. Mukia kɨné isubrili, mupcunua!>>
35Avétha tlucbunga ikpielɨ drosalɨ, itlakrubngu iké déda, kitubi Ticomtia msobaka, ina iyo misu, adra ipdra drɨsngɨkwa kɨné spatérubu. 36Kitubi msobaka, <<Mao, Maminɨma, makadepɨnga ka udurumusu; kitubi kɨkɨ swa kɨné spatérubu na kopu paelania! Makasi, adra ingtuluru ku kdrɨdrɨmɨli, pangiarava ktumé yiasu.>>
37Ku sviridranga, lacɨnglɨ ku turu sétodra siené sirekɨ; lapsobaka Pitiru na, <<Simon, sirekɨ musu? Indurumusu pcunu icizikang mia?>> 38Lapsobaka laa, <<Mupcunua sukbu, mungamuu ktannɨnge. Kdrɨdrɨmɨmu komédra iyo mia, makasi tabuetɨnamu ka mamɨrɨ.>>
39Lagia avétha dovdavce, lasarké tumai na bka sukbu. 40Yienɨnga lavétha mua ku sétodra, cɨnglɨdra ka tumadra siené sirekɨ. Rɨsamia iduru musomacɨ maca, irigu kutméyadra margi msobakbaka.
41Ki Yésu ku skutlurudra siviri, lapsobakadria, <<Sierke la mumu, obailanɨ mumu? Mukɨtɨnga, amuanga na zikan, Vlakɨdra na Ico ka klangémanga iké pasrélé na ico ku rimédra! 42Icikɨla, tagia! Cɨngla, iku nolɨngé mangkwa na ico ka mukaninga!>>
Képora Ki Yésu
(Matai 26.47-56; Luka 22.47-53; Yuhani 18.3-12)
43Ki Yésu ikédrala msobakbaka, mngesle kudrusa sétodra ku Yuda ka mukani. Iké madro na ico ɨmɨcɨ saldru si satita ngeresɨdria mukɨné, kidri ka amani ku utatarasɨnga sidepɨ lɨgɨsɨ, ubrubru Sésio na singsi, si cioro ku mukani. 44Iku nolɨngéma Yésu na ka palalénga bwidria pangodringi prigu, lapsobaka, <<Ku uwali umumu ka, amani tarayiamu na ico, muporadria, ptapɨdrɨngɨ cɨnglɨ drodro, giadria ɨmcɨ.>>
45Ki Yuda ku muknédra, aibungunga mua tlucbungadra ki Yésu, kokodria, <<Singsi!>> si lamumudria. 46Kidri ka supuaranga ruthuku Yésu na. 47Iku iké bila ingdɨlɨ na ico, iké sesa na ico usbutu saldru buelɨ, pavétha tadradronga sidepɨ lɨgɨsɨ ku koludra thiebɨ, kothɨpe ngɨsa ku cingirédra. 48Ki Yésu lapsobakadria, <<Mumu ka ɨmɨcɨ na saldru si satita mukuné porakwa, pakngiaro mumukua makurathɨ na icomia? 49Makavienɨnga kɨkɨ iké dani Ticomtia buburu na ico, stalersɨ terɨsɨmwa, si iporamukwa. Makasi, spasobkéni Sésio ka nungturlu miya mboelɨ.>>
50Kɨné ka, iku ikainga sétodra ka ugiadria svagé, abɨbɨrɨ.
51Iké sesa thɨbarɨ, sipalmɨmɨrɨ ngɨsa na kropɨla, ibibila ksapara Yésu na. Suporangadria, 52Makasi obongudria ku sipalmɨmɨrɨ dra na kropɨla, suplénanara nga pidɨke abɨbɨrɨ.
Iké tikaka kaigi ksaibangɨ
(Matai 26.57-68; Luka 22.54-55, 63-71; Yuhani 18.13-14, 19-24)
53Kidri ka amara Yésu na ɨmcɨ mua ku tadradronga sidepɨ lɨgɨsɨ ku dadra; ku ikaingadria na utatarasɨnga sidepɨ lɨgɨsɨ, cioro si ubrubru Sésio na singsi ikédria isarubu. 54Ki Pitiru édavlinga ksapara Yésu na, siektɨ mua ku tadradronga sidepɨ lɨgɨsɨ dadra tbɨtɨba, tresɨ mdraru ku kébi bɨcerka inunu, tépuru ididivi. 55Ku utatarasɨnga sidepɨ lɨgɨsɨ si ngurubua ikédria kaigi pakɨdrɨdrɨmɨ silɨpe ku matkadrɨngé psaila kokso Yésu na, nupsaptémuda nidria, makasi ikunu ku matkadrɨngé psaila. 56Iké madro na ico mubuelɨ pdraku tuménia mia, makasi iku spasobkédra ka iptumamai.
57Iku yénɨnga iké ikipiya na ico icɨkalɨ, pdraku msobka tuménia mia Yésu na, 58<<Ubicringi kɨnamɨ nia spasobkéni, <Noramakɨ nia kɨné apéthani sarké riméni na ico danɨ ku dani Ticomtia visɨre, turu na vienɨ péthama ngɨsa sarké riméni na ico pétha danɨ ku dani Ticomtia.> >> 59Wakmani maninga kɨné patmangɨninia kokso, ku spasobkédra ka ipauwanɨ.
60Sukédra tadradronga sidepɨ lɨgɨsɨ iké tlucbungadra ku icico icikɨle, kbuburu Yésu na, <<Iku icico kokso yani swa, tédra ku kutumé yasu biri?>>
61Ki Yésu ka lakcibɨne, tédra iksesanɨya na bka. Ki tadradronga sidepɨ lɨgɨsɨ lakula ladriaa kbuburu, <<Ikmani musu ku Kirisito, amani ku pakilivata Vlakɨdra Ticomtia?>>
62Ki Yésu ka ubri, <<Amani kɨkɨ! Nucɨngɨlɨ ma mumu Vlakɨdra na Ico iké kɨcɨnga Pɨlɨngɨ vnanɨ inunu, kiudu ku tbɨlɨnga krungu midide!>>
63Ku tadradronga sidepɨ lɨgɨsɨ ka ubriti ku kpingdra, msobaka, <<Miti ka tatédrama na ico tumidriamianga! 64Ubciringi mumu ku spasobkéni rɨmɨ tkorthe Ticomtia na bka. Mola msobaka nutumaratania?>>
Rɨsama saibangmia iké nia cumi, ptémudania.
65Laké druma na ico ka osngaré dria, lasusbu nia mcéni, lacɨbnɨnia, kbuburunia, <<Nala lovlava, aci ku ustiti swa?>> Iku odro kébi ka labliblidria, latpisidria.
Pitiru ka irigu Yésu na
(Matai 26.69-75; Luka 22.56-62; Yuhani 18.15-18, 25-27)
66Drienɨnga ka, ki Pitiru isibrili iké rodru bɨlate tbɨtɨba. Iké tadradronga sidepɨ lɨgɨsɨ ku sesa koludra abéya dodavce mukuné. 67Cɨnglɨ Pitiru na iké ididvi, patapɨdrɨngɨ msévétha cɨnglɨ, msobaka, <<Amani musu ku sɨtresɨdra ki Nazarethe Yésu!>>
68Ki Pitiru ka iyo iya msobaka, <<Irigukɨkɨ, aci ku spasobkésu.>> Msobaka, suklipngɨnga mua tlucbunga blatɨ. Ikudria, sutrokukanɨ nga.
69Isipielɨ, si ku koludra abéya lacɨnglɨla driaa, latililadria ku ingdɨlɨ iké bila na ico, <<Kɨné ico ka sɨtresɨni!>> 70Ki Pitiru ka iyo iya.
Isipielɨlaa, iku ingdɨlɨ iké bila na ico lakula thudulu msobaka Pitiru na, <<Nudulria musu ikmani sɨtresɨli kidrimia, tili Galrilri musu!>>
71Ki Pitiru ka latlɨgɨsɨ msobaka, <<Irigukɨkɨ spasobkému kdroo na ico! Iku spasobkéli na niptakdrɨngé na bka, Ticomtia ka ptésvongo mangkwa!>>
72Ikudria, skupsalɨdra torkukanɨ; ki Pitiru langoringo nga ku spasobkéni dria ki Yésu na bka, <<Torkukanɨ sku psalɨdria, nuktruluma musu ilrigu kwa.>> Ki Pitiru ka ikɨthɨrɨ si sutubinga.
Currently Selected:
Maruku 14: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
