Maruku 13
13
Plalé musobaka nukoripima dani Ticomtia
(Matai 24.1-2; Luka 21.5-6)
1Ki Yésu slikédra dani Ticomtia mbuelɨ mukné, iké sesa sétodra masobka nia, <<Singsi, cɨngla skataradro kɨné alapi, sakura mragi tédananɨ!>>
2Ki Yésu masobka, <<Mumu ka pacɨngcɨnglɨ mumu kɨné sakura mragi na tédanani? Kɨné tékani maka lalapinga nunguculuma nia ovravra, nuksɨsaniya lapi isubrili iké druma sesa garɨ.>>
Spatérbu si spatikurathɨ
(Matai 24.3-14; Luka 21.7-19)
3Ki Yésu iké Kanlang rgɨrgɨ, mtatlucbungu inunu dani Ticomtia. Pitiru, Yakobu, Yuhani si Anderé langikmani kbuburudria, 4<<Alatililanɨma, nɨgɨne mbuelɨ tuménia depɨ? Ina mbuelɨ ni makakuanga ka aci ku nukéma sparigu ni?>>
5Ki Yésu ka lapsobakadria, <<Mumu ka mungi kocɨvana, msobaka iktangnɨnge na ico. 6Nukéma madro na ico tenɨnge pdraku sérce ku aracɨli, msobaka, <Kɨkɨ ka Kirisito mia>, tuminia tenɨnge pdraku na ico. 7Adra ikérkai ku tapara na macacɨbéré mthɨgé si arigua mu na médaveli macacɨbéré mrɨkmɨ akuludru. Kɨné depɨ ka nutumémiyanga; makasi ikmani msobaka drikisi ka tathanɨni muanga. 8Ku sesa na minzuku nupcacɨbéré ma druma na minzuku; iku sesa na koka nuwama mɨcabri ku druma sesa na koka; makatékanga ka iké urunu si abési tédra akananɨ. Kɨné depɨ na nutumémini ka tuméma na bébé nutuvalɨke mini ksésé sikiurodru ktɨtɨrɨ.
9<<Mungikocɨvana, nukéma na ico poramua, si bwidria ku tékika saibang, nukélia mumudria ku tika tisarbubua na Yudai ico ksatiti. Kiarkénkwa, nukélia mu ingdɨlɨ tulucubungadra ku orsosodo si tlalénga, kiaké na Hukuing plrigu. 10Makasi Hukuing palaliala mra prabu buyi makaiciconga. 11Ina porédramwa, laramwa ɨmɨcɨ pavétha tékika saibangmini, musadra ipalalé mopungu mrɨkmɨ nusapsobakali mia; muidrangadria ka, Ticomtia ku tumiayiadra ka, mutumiadira msobaka; iku spasobkému ikmani ku bkému, amani Séré ku tumiayanimwa msobaka. 12Idrianɨnga ka, ina ico ka nolɨngéma ku lɨmaususédra, ptémudu pkédria, mama ka tumémadria vlavlakɨdra; iku vlavlakɨdra ka ptuméma driaa ku tévlakɨdria; vlavlakɨdra si tévlakɨdria ka matétɨbarama, ptémudu pkédria. 13Kiakéngkwa, rɨsanema mlathɨkɨmwa. Makasi ina kédili na ico ka nuktormanama.>>
Tradro na spatérbu
(Matai 24.15-18; Luka 21.20-24)
14<<Nucɨngɨlɨma mumudria <Nusakorpiani tkakuratha makainunga> ingdɨlɨ iké ku idurani ingɨdɨlɨ téka.>> (Ina usipi ka nirugu tulunɨni kɨné spasobkénimia.) <<Idrianɨnga ka, iku iké Yudai ka, nugiama abɨbɨrɨ mwa rgɨrgɨ kilɨpngɨ; 15iké danɨ cɨravi, adra idide, iyuvayia mdanɨ mwa mra ku makainunga; 16iku iké tomuma, adra isiviriya mra ku ɨbɨlɨ. 17Iku vivienɨ, mabibi na abéya si pathula rulé na titɨna ka nuptérubuma! 18Mukutubia Ticomtia nisadra kɨné depɨ ikai na kelakcɨra mboelɨ. 19Iku drianɨ vienɨ ku spatérubu siliké ku péthéni Ticomtia kɨné buala tédrala tuménia, drienɨnga ka nukatédramaa. 20Lasa ikɨmani Pɨlɨngɨ ptékɨnɨnia spatérubu na vienɨ, tédra na ico nukodripima. Makasi, kiaké kini apirani koluni na ico, kini ka patékɨnɨnga dria vienɨ.
21<<Ina ikédrana ico tuménimua msobaka, <Cɨngɨla, iké kɨné Kirisito! Iké kdroo Kirisito!> musadra itkabɨkanɨdria. 22Tumani ka nuboelɨma ikmani matkadrɨngé na Kirisito si ikmani matkadrɨngé na maburosi; kidri ka sarké ku depɨdra Pɨlɨngɨ kcɨngadra sdepɨ, nusaduradra pdraku ku apiradra vlavlakɨdra Ticomtia na ico. 23Mungkocɨvana! Palalénga kɨmwa tila kɨné makakuanga depɨ tumanɨdra.>>
Nuknianɨdra ku Vlakɨdra na Ico
(Matai 24.29-31; Luka 21.25-28)
24<<Ikidri spatérubu na vienɨ gidranga ribte, nukasunguma avé, ku drɨmarɨ ka nuliliepianga, 25ku cacɨngalɨ ka nusilikéma tbɨlɨnga midide, ku tbɨlɨnga maka tumaneninga na depɨ ka nungurbuama avlɨvɨlɨ. 26Idrianɨnga ka, Vlakɨdra na Ico nubuelɨma, sitɨ na kɨcɨnga si pkilvu kiudu na kurungu mɨlɨbɨ mukuné. 27Kini ka nurulia ku koludra na Pɨlɨngɨ mua kétakmɨnga tbɨlɨnga, siliké kɨné déda muadria ku tathanɨni déda, sorubu ku apiradranga na vlakɨdra ico.
Suburburudra ku ipohana si ipumadru na ngatu
(Matai 24.32-35; Luka 21.29-33)
28<<Nusilikéma mumu kburburu ku ipohana si ipumadru na ngatu ku sburburudra paiku. Ku piringi ka nubuelɨ ma rɨdɨrɨdɨ tanmlɨskɨsɨkɨ, buelɨdranga bova na spungu ka, nurugumangamu nudlémanga mua klarpanɨngamia. 29Tumai, cɨnglɨmu kɨné tumani ka nurugumianga nudléma muanga vienɨ#13.29 <<nudléma muanga vienɨ>> si tuméné <<nuknémanga kini>>., ikénga bilingtava. 30Muptapɨdrɨngɨnga nguringo, kɨné zidai na ico nikanmudula ka, makadepɨnga ka nubuelɨma. 31Kɨné tbɨlɨnga si déda ka nukorpima mtatédra, kɨné bikéli ka nuduria moropi mtatédra.>>
Ku vivienɨ si Zikang ka tédra na ico nuruguma
(Matai 24.36-44)
32<<Ku nukladra vienɨ si zikang, tédra na ico urgu; ku tbɨlɨnga koludra na Pɨlɨngɨ ka iriguu; ku Vlakɨdra iriguu, tkathadra Mama ka urugu. 33Mungikocɨvana, mupcunua, tumaninia ka nurugiamu nɨgɨne ku nukunianɨni. 34Tumé na sesa ico gia médɨvélé mua ku uvadra, mra makadepɨnga bwi ku koludra pisidepɨ, pavɨlavɨla makaiconga na depɨ, laurudria ku odro danɨ mokocuvana danɨ biringtavamia. 35Sukéni, mumu ka mupcunua, nakuniyadra ka nurugiamu ku nusviriadra zikang ku pédana, kmanimini na ngiubu, kmanimini na bɨcɨcɨrka, kmanimini na nukɨlierɨ mini, kmanimini na rosunina avé. 36Ina pakcimodranga siviri mukné, adra ipcɨnglɨdria sirekɨmu. 37Spasobkélimua na bka ka tumé Spasobkéli na makaiconga, mumu ka mupcunua!>>
Currently Selected:
Maruku 13: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
