Maruku 15
15
Iké tlucubungadra ki Pilato ksaibangɨ
(Matai 27.1-2, 11-14; Luka 23.1-5; Yuhani 18.28-38)
1Skamisienɨnga ku mierɨ, ki utatarasɨnga sidepɨ lɨgɨsɨ aribungu ngeresɨ cioro, ubrubru Sésio na singsi si ku ikainga kaigi mbakbaka, ɨktɨdranga ku tatɨméyiadra. Lara krɨngɨ Yésu na, emɨcɨ, bwi Pilato na. 2Ki Pilato lakbuburudria, <<Tlalédra draswa na Yudai ico?>>
Ki Yésu labilri, <<Kɨné ka spasopkésu.>>
3Ku utatarasɨnga sidepɨ lɨgɨsɨ madro koksoyani Yésu na, 4ki Pilato lakula laa kbuburu Yésu na, <<Cɨngɨla, kidri ku kokso maswa madro na psaila yaniswa, tédra nubriasu ya?>>
5Ki Yésu ka icsesanɨyia msobaka; markɨmɨ sukura ki Pilato.
Kisaibange skamuda
(Matai 27.15-26; Luka 23.13-25; Yuhani 18.39--19.16)
6Ina muidranga Tribɨta na Lɨgɨsɨ, Pilato ka singiarodria ku makaiconga kitubianɨdra pɨbalɨtɨ sesa kikrɨngɨ na ico mia. 7Icɨcɨngɨ iké sesa na ico aracɨdra ka Barabas, teres ku molulucu si patémudu na ico kɨrngɨ. 8Ku icico israbudra, kitubi Pilato na ptumiadria ku tumamanɨta kɨné makasarkénga. 9Ki Pilato ka lakbuburudria, <<Pigiadria ku Tlalédra na Yudai ico ma mumu?>> 10Makasi angirigunga ki Pilato, utatarasɨnga sidepɨ lɨgɨsɨ ka malɨvarɨ pathara sukéni mra ɨmɨcɨ Yésu na bwidria.
11Makasi utatarasɨnga sidepɨ lɨgɨsɨ ka uséngdodria ku makaiconga, kulkuldru Pilato na kérkianɨma pigia Barabas na mia. 12Ki Pilato lakububuru ladria ku makaiconga, <<Tuménidria, poracamu <Tlalédra na Yudai ico>, kɨné ico, nutmarali nia?>>
13Lapsakoranga koko kidri, <<Mrania tɨtɨsɨ pké ziuzika!>>
14Kibrubru Pilato, <<Aciku psaila ni?>>
Sakukuraliya koko, <<Mrania tɨtɨsɨ pké ziuzika!>>
15Ki Pilato ka kérké ku pingcorogi ico marginiangkwa mia, si supgianga Barabas na, laru sutita Yésu na mia, si labé ico mwa tɨtɨsɨ pké ziuzika lia.
Popingi ka patingungoethɨ Yésu na
(Matai 27.27-31; Yuhani 19.2-3)
16Ku popingi amara Yésu na pdanɨ dani sotuke tbɨtɨba, sorubudria. 17Lapsikpingi Yésu na padelengɨ na kpingi, lasarké na pocnɨcnɨkɨ na vedrɨ tkravathɨ, psékarvthɨ dria. 18Latɨmagarɨ dria skubu, msobaka, <<Pkarva Tlalé ni ku Yudai ico!>> 19Lasarké na uvé sutiti ku orudra, lasɨngarédria, pokuru sukbudria. 20Pténgungoethɨ ningadria, wakpingidria ku padelengɨ na kpingi, labéladria psikpingi ku memnedra, si larania balte tɨtɨsɨ pké ziuzika.
Kitɨcsɨ Yésu iké ziuzika
(Matai 27.32-44; Luka 23.26-43; Yuhani 19.17-27)
21Ku ikédra dadɨranɨ, lapdradrɨsɨngɨ sesa na ico, aracɨdra ka Simon, salɨkéla rgɨrgɨ na ckɨckɨlɨ mwa lɨdreke skabranɨ, sorngatɨnga dria tobrétha Yésu na sungiela ziuzikamia. (Ki Simon ka Kurinai, mamidria ki Alikɨsangta si Lruhu.) 22Laradria Yésu na ɨmɨcɨ mua sesa na déda, Keketa madria, tlunɨdra ka <<Golgotha>>. 23Ikénidria, amara subua pébu na bɨva bwi ponngulu Yésu na, makasi Yésu ka ingulu. 24Si laranga Yésu na tɨtɨsɨ pké ziuzika, lakozibiki, mvalɨvala ku memneni. 25Ku miyerɨnga vngatɨ toké, la tɨtɨsɨnga Yésu na pké ziuzika. 26Ku psailadra usulatɨ piké na ngatu garɨ, <<Tlalé ni na Yudai ico.>> 27Iké ku drusa na pasrésrélé ico pteresɨ Yésu na tɨtɨsɨ pké ziuzika, sesa ka iké vnanɨdra, sesa ka iké vrienɨdra.#15.27 Iké druma na burenɨ sulatɨ pabiki 28 bɨka <<Tuméninia, spasobkéni Sésio <Kidri ka pikédria pteresɨ na psalia> na bɨka muboelɨnga.>> (Cɨngɨla Luka 22.37.)
29Ina ongkédria ribte na ico ka téva rɨmɨ Yésu na, magigi msobaka, <<Henge, musu ka nuvsarɨ ma dani Ticomtia, si spaktrulu ka nukula ma pétha! 30Kɨnénga slikia ziuzika midide, ngipsopra!>>
31Ku utatarasɨnga sidepɨ lɨgɨsɨ si ubrubru Sésio na singsi ka utévadriaa, la bakbaka, <<Kini ka paspara na ico, si iduru ngipsopra! 32Kirisito, ku tlalédra Israél, kɨné ka silikia ziuzika midide, ni cɨngɨlɨ kɨnamɨ, si nitkabɨkanɨ kɨnamɨ!>>
Ku terɨsadra Yésu ktɨtɨsɨ ziuzika na ico tumai urɨmɨdriaa.
Tkamudadra ki Yésu
(Matai 27.45-56; Luka 23.44-49; Yuhani 19.28-30)
33Ku vévanɨdranga, masungu krubungu makadédanga, udɨlé na turu toké. 34Muidranga véva turu na toké, ki Yésu supsako ranga koko, <<Iloi, Iloi, lamasapaketani?>> tlunɨni ka, <<Ticokwa, Ticokwa, nakusu svagé bongukwa?>>
35Ki bila ingɨdɨlɨ na ico iké ubicringi, lapsobaka, <<Bicringa, okoko Éliya na!>> 36Iké sesa na ico pidɨke mua, mradria ku atɨberanɨ na tɨdrakɨ piké mangilingili bɨva krɨngɨ piké uvé, puwa ngidividra ki Yésu, msobaka, <<Drodrɨva, tacngɨlɨ Éliya na nuduru midra mukuné pidide nia!>>
37Ki Yésu lakɨvalɨ psakoranga koko, suktɨkɨnga nekɨdra.
38Iku akɨranɨ iké dani Ticomtia na memne na maku, siliké garɨ mua rodru nbiriti maudrusa. 39Iku ingɨdɨlɨ iké ziuzika tlucbunga na otatrasɨ popingi, lacɨngɨlɨ kokodra ki Yésu#15.39 Iké druma na burenɨ isulte <<ukoko>>. si tkamudadra, supsobakanga, <<Kɨné ico ka matɨkadrɨngé Vlakɨdra Ticomtia!>>
40Ikéla patɨnanɨla na bébibé édavlinga cɨngɨlɨ, iké tili Magedala Malriya, lakélaa gégi Yakobu si Yosépe ku ningdria Malriya, si Salromi. 41Ikédrala Yésu Galrilri ka kisapra dirangaa, skoludria. Ikéla druma patɨnanɨla na bébibé ksapara Yésu na ngeresɨ mukuné Yérusalrim.
Nurbulanidria Yésu na
(Matai 27.57-61; Luka 23.50-56; Yuhani 19.38-42)
42-43Kukasusungu midranga, mukani Arimathai ico Yosépe; ikini ka amani ku pakilivadra tɨmagarɨ na gingi, kéthemera Ticomtia kcɨngani nukuniani pubuelɨ. Kidri vienɨ ka ptarame na vienɨ (amani ku nodɨlé midranga Tésasɨdra vienɨ). Ki Yése ka ségɨrangɨ mwa cɨngɨlɨ Pilato na, kitubidria kora ɨmɨcɨ psivri tabuetɨni ki Yésu mia. 44Ki Pilato ka ubicringi mamudunga Yésu mia, sakura markɨmɨ. La koko otatrasɨ popingi nanga mia, kbuburudria tɨkamudadra ki Yésu ka tiklamna ngama#15.44 Iké druma na burenɨ isulte <<tiklamɨnanga>>.. 45Siliké otatrasɨ popingi mra toromana tililanɨni, ki Pilato lara tabuetɨnadra ki Yésu bwi Yosépe na. 46Ki Yésepe ka lalengé morsa na memne, laradria tabuetɨnadra ki Yésu, ripcu sarké morsa memne, pké sesa apéthani sarké ilibi adringi na tabubla, laralaa ngɨsa alapi thogathegé bobnge, sarké tutu tabubula sodadana. 47Ku Magedala na Malriya si ningnia ki Yosépe Malriya ka iké tpikanidria Yésu na drodro cɨngɨlɨ.
Currently Selected:
Maruku 15: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
