Maruku 11
11
Ki pakilivu mdanɨ Yérusalrim
(Matai 21.1-11; Luka 19.28-40; Yuhani 12.12-19)
1Ki Yésu si sétodra ka dolédranga Yérusalrim, muidranga Kanlang rgɨrgɨ ku Béthepagé si Bithani. Ki Yésu mwaliadria drusa séto thamdalne mia, 2latiladria, <<Mua liadria skackɨckɨlɨ. Ina mdanɨmu, nucɨngɨlɨmamu na sesa ikiudanɨla na rigi ikédria ikɨrngɨ. Mradria wakɨrngɨ, bilibili pwakné. 3Ina ikédra ico kbuburumwa, <Nakumu sdepɨ kɨné depɨ?> mutiladria, <Nusarké mania Pɨlɨngɨ#11.3 <<Pɨlɨngɨ>> si tuméné <<uthɨdenia ico>>., rɨpɨngɨninga sarkédria rigi ka nulribunguma sovri.> >>
4Iku muidranga, lacɨngɨlɨ dadɨranɨ brila iké sesa na rigi ikrɨngɨ piké bilingtava blatɨ. Iku icngɨcngɨdra uakrɨngɨ tési, 5iké ikpiya na ico ingɨdɨlɨ kbuburudria, <<Nakumu uakrɨngɨ nia rigi?>>
6Kidri ka langtuluru biri ku tumiadria yiadra ki Yésu, ki icico ka mra bilibili lrigi liadria. 7Kidri ka la bilibili rigi mua tékadra ki Yésu, lara kpingdra piké bkuludra rigi pétoto, lakiudunga ki Yésu. 8Iké madro ico sarké kpingdra sopa piké dadɨranɨ, iké druma na ico salɨké tumuma thiebɨ spungu piringi piké dadɨranɨ sopa. 9Ki thamdalɨne si ibibila na ico uthɨpɨrɨ koko, <<Pkrava Ticomtia! Iku potalu aracɨdra na Pɨlɨngɨ ka nikoréni skadrarudra Ticomtia buidria kidri! 10Nikoréni skadrarudra Ticomtia buidria ku nuknéma tɨpacungulata dédadra ki Davidi! Pkrava Ticomtia iké tbɨlɨnga!>>
11Ki Yésu muidranga Yérusalrim, mdanɨdranga dani Ticomtia, luwa pacɨngcɨnglɨla. Si viénɨ lakasungunga, langeresɨ mɨngesɨle kdrusa sétoni mbalɨte mua Bithani.
Tilɨgɨsɨ dria ku ipohana si ipumadru na ngatu
(Matai 21.18-19)
12Ku skamisienɨnga, kidri ka salɨké Bithani sviri cɨkɨlɨ, ikédra dadɨranɨ, abési ki Yésu. 13Cɨnglɨdra tlucubunga ku ikédvélé na téka iké sesa ipohana si ipumadru na ngatu, sakura pospungu, suvéthanga, kucɨngɨlɨdria ku ngatu garɨ ikai na mdromia. Muidra tlucubungadra ngatu, wacɨngɨlɨ spungu, nakudrayadra ka drianɨ ikmani ku pumadru na ziki. 14Ki Yésu ka latlovéthadria ku ngatu msobaka, <<Slikéma kɨné mua yienɨnga, tatédramanga ico ukanɨ mdrosu!>>
Ku sétodra rɨsaliya bicringi kɨné bka.
Ki Yésu patbula ku dani Ticomtia
(Matai 21.12-17; Luka 19.45-48; Yuhani 2.13-22)
15Muidranga Yérusalrim, ki Yésu mdanɨdra dani Ticomtia surangadria ku olɨngalɨngé ikainga dani Ticomtia na ico pigiabaltɨ. Obcolodria tbarbarthia pésu na ico ku cukuédra si olɨngalɨngé na bugo anurudra. 16Adrama makaiconga lobɨca na makainunga iké dani Ticomtia tbɨtɨba psavrivri. 17Lapsobakadria buburu, <<Iké Sésio asultani poké Ticomtia bkédra msobaka, <Kɨné dali ka kmanima ku makaiciconga csucsu kɨbadra>, laranga mumudria ptumé na tkiupupa téka!>>
18Ku utatarasɨnga sidepɨ lɨgɨsɨ si ubrubru Sésio na singsi bicringidra kɨné babka, supakdrɨdrɨmɨnga ku nutumarata ptémudu Yésu na mia. Makasi akuludrudria, iku tumanidria makaiconga rɨsaliya pkilvu ku sburbrudra.
19Ku msamɨsmɨninga, Yésu si sétodra ka amua ckɨlɨ bɨlate.
Pasiliké ku ipohana si ipumadru na ngatu ku sbuburudra
(Matai 21.20-22)
20Ku skamisienɨnga mierɨ, ki Yésu si sétodra ka langkédria dadɨranɨ ribte, cɨngɨlɨdra ku ipohana si ipumadru na ngatu amicidra ka mapcé mamdu. 21Ki Pitiru anguringo kɨné aribɨtani makadepɨnga, lapsobaka Yésu na, <<Singsi, cɨngɨla, iku tilɨgɨsasu ku ipohana si ipumadru na ngatu mapcénga.>>
22Ki Yésu ubridria, <<Tkabɨkana kdrɨdrɨmɨsu Ticomtia. 23Kuptapɨdrɨngɨ mau tilila, ina tumému kɨné rgɨrgɨ msobaka, <Icikɨla, mruduku tɨbarumia!> ina kdrɨdrɨmɨni kva vingvingi, tkabɨkanɨ spasobkésu ka nutumémianga iké, kɨné dɨdepɨ ka kiakémamua nutumémianga iké. 24Sukédra, kutilamua, sukbumu, maka kitubianɨmu, tkabɨkanɨ ktormanɨngamia, durumamu ktormana ku kitubianɨmu. 25Ina ingɨdɨlɨmu sukbu, palalia parɨpɨ ku pasrélémua, tuméninia ku Mamimwa garɨ ka parɨpɨma muaa psaila mu.>>#11.25 Iké burenɨ na sulatɨ pabki na 26, <<Ina niparɨpɨmu ku pasailadra na ico, iku iké garɨ Mamimwa ka tumai nuparɨpiamuaa psaila mu.>> (Cɨngɨla Matai 6.15.)
Kibruburu kɨcɨngadra ki Yésu
(Matai 21.23-27; Luka 20.1-8)
27Kidri ka lakunéla mua Yérusalrim. Ki Yésu ikédra dani Ticomtia dodavceka, ki utatarasɨnga sidepɨ lɨgɨsɨ si ubrubru Sésio na singsi, si cioro mukné cɨngɨlɨdria. 28Kibrubrudria, <<Aci ku potolanɨsu na kɨcɨnga kɨné dɨdepɨ? Aci ku ubéswa na kɨcɨnga sɨdepa kɨné depɨmia?>>
29Labri ki Yésu, <<Kulamua kbuburu sesa na bka, ina birimungkwa, tilamakmua aciku patlurneli na kɨcɨnga sdɨdepɨ kné. 30Tilakwa, ki pababɨno Yuhani ku kɨcɨngadra salɨkanɨdra? Salɨké tɨbɨlɨnga Ticomtia si salɨkia na ico mukuné?>>
31Kidri ka soskérodrunga mokakdre musobaka, <<Nutumamarata biri? Ina musobakéta <Salɨké garɨ Ticomtia mukné mia> nupsobaka ma, <Tuméninia nakumu itkabɨkanɨ Yuhani na?> 32Makasi durumamiti msobaka <Salɨké na ico mukné> mia?>> Akuludrudria ku icico nubrimadria, tumanidria ka rɨsama tkabɨkanɨ ki Yuhani na maburosi mia. 33Si labri Yésu na, <<Irigu kɨnamɨ.>>
Ki Yésu ka masobkadria, <<Tuménidria, nutililia kmua ku patlurneli na kɨcɨnga depɨ kɨné dɨdepɨ.>>
Currently Selected:
Maruku 11: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
