Maruku 12
12
Makurathɨ késɨdeme tonma na ico spaiku
(Matai 21.33-46; Luka 20.9-19)
1Ki Yésu lasarké na spaiku buburudria, msobaka, <<Iké sesa na ico akɨmolo ngɨsa budongi, orvadrɨ papaingulu, iké tonma kukuru na sesa pika sɨngɨ tɨbava, tovnanɨ na sesa tɨdradrɨva, si iku budongi pkésdeme tonma na ico, sugianga mbalɨte mwa brɨlɨlé. 2Muidranga tarara na budo ziki, uru sesa ku koludra muadria ku késɨdeme tonma na ico mra ku drurusu. 3Iku késɨdeme tonma na ico surthukunga koludra, orde sutitidria, psivridria tédra ku amɨcadrayia. 4Ku pitoma na ico ka laru skadrusua koludra; kidri koludra ka usititi mcukre orudra, larmɨdria tévalaa. 5Iku pitoma na ico urula ku sesa koludra muamia, laradria ptémudu. Kidri ka latumédria biri tkrothe na ico, iké na usititi, iké patémdu. 6Iku pitoma na ico ka sesanga mathariadranga vlakɨdra sovlé. Lubébri lanɨnga urudria mua cɨnglɨ ku késɨdeme toma na ico, pakdrɨdrɨmɨ, <Kidri ka nurguma tidɨkrɨ cɨnglɨ vlakɨli sovlé mia.> 7Makasi iku késɨdeme tonma na ico mabkabka tumékɨné, <Kɨné ico ka amani ku pitonmana nukcunguluma stoma, nanga, taptémudunia, Kini ziasangni ka kmanimanga miti!> 8Laporadria vlakɨdra sovlé, si ptémudu ngadria, mra ku tabotɨnadra bongu baltɨ budongi.>>
9Ki Yésu kibrubru, <<Kɨné tumaninia, pitomana budongi ka nutmamara dranga? Kini ka nukné mianga pitémudu ngiculu kɨné ku késedeme tonma na ico, lara budongi pkésdeme druma na ico. 10Isispilamu kɨné asulatani pké Sésio?
Tédadanɨ ku abongani kɨné lapi,
amaninga ku makcɨngénga tɨngadra na lapi.
11Sarkikéni kɨné Pɨlɨngɨ,
kɨné acɨngɨlata ka sakura angula.>>
12Tumaninia ka Yudai ico otatarasɨ urugu spasobkédra paiku ki Yésu ka magaucudria, si taporania lia. Makasi akuludru na ico, sugianga svagédria.
Ku puzéking sbéni Kaisar na mongdai
(Matai 22.15-22; Luka 20.19-26)
13Iké druma na Hualrisai ico si Hirudi tang ico kiuru mua cɨnglɨ Yésu na, pakdrɨdrɨmɨ tapsalkédria ku spasobkédra silɨpe ku tumémusu yadra ptikurathɨdria. 14Masobkadria tumékɨné, <<Singsi urugu knamɨswa matkadrɨngé técavɨnasu; kumidra na ico patumanɨdra pakdrɨdrɨmɨswa, icɨnglɨ ptalu tmaca, ptapɨdrɨ ngɨnga mra ku spasobkédra Ticomtia buburu na ico. Alatilila nɨma, mwa Roma Tɨlalé Kaisar mara zéking ikɨmani na patlikwanɨ mtia ku Horécɨ ta? Pzékingi mamti, si nupzékin giamti?>>
15Ki Yésu urgudria cɨnglɨ ku tapthara yadra, si masobka, <<Nakumu pakdrɨdrɨmɨ tapiti kurathɨ miangkwa? Mra sesa gingi bwikwa pcɨnglɨ!>>
16Labédria na sesa gingi, ki Yésu lakbuburu, <<Kɨné siasing garɨ si aracɨ ka acikini?>>
Labridria, <<Idra Kaisar.>>
17Ki Yésu masobka, <<Ina tuméninia ka, mra makainu dranga Kaisar bui Kaisar na, mra makainu dranga Ticomtia bui Ticomtia.>>
Iku bicringidra kɨné babɨka, rɨsama mrɨkmɨ.
Porké ku siela na mongdai
(Matai 22.23-33; Luka 20.27-40)
18Iké na itɨkabkanɨ ku siela modripi na depɨ iku Sadukai ico ka mukani cɨnglɨ Yésu na. 19Kidri masobka, <<Singsi, ki Mosi kiakénɨma sulte horécɨ, <Ina sesa na ico mamududranga, subrili asiradra, tédra na vlakɨ, ku gilidria sovlé nurama ku ababura mradria siri, niké ku tulurunɨdra mcungulu ki kakinia mia.> 20Ku drienɨ ka iké tapitu na lɨmaususé: tkatkanga laspalɨnga nɨnga, manmdu, tédra na asibiladra vlakɨ; 21Ku skadrusa ka lasiri ku ababura asiradra kakidria, si lakanmdu, tédra asibiladra vlakɨ; ku sakturu ka tumai. 22Ku tapitu na lɨmaususé ka rɨsama siridria ku abéya, rɨsalia manmdu, isibili tvaleke yia. Ku ibirilanga ka lakamudunga abéya. 23Kɨné tuméninia, ikédra siela modripi ni viénɨ, kidri lɨmaususé siliké ku tkamudadra siela ka, kɨné abéya ka aci ku matɨkadrɨngé ku pisirania? Tumanɨninia ka tapitu lɨmaususé rɨsamanga sirinia.>>
24Ki Yésu ka ubridria, <<Pasrélé mumu, nakuni? Tumaninia ka ilrigumumu Sésio, si ilrigu ku kɨcɨnga ni Ticomtia. 25Ku salɨké dranga mamdu si lasiela, tuméma garɨ tbɨlɨnga ku koludra na Pɨlɨngɨ, isiri si iksirii. 26Poké na mamudu ico si siela modripi na depɨ, isisipi la mumu ku asultadra Mosi porké na tacɨnɨcɨnɨka sélobu na tbuburu? Ticomtia ka masobka Mosi na, <Ikɨka Ticodria ku Abraham, si Ticodria ki Isake, si Ticodria ki Yakobu.> 27Ku tulunɨni spasobkéni, ki Ticomtia ka amani modripi na ico ku Ticomtia, ikɨmani ku mamudu na ico ku Ticomtia. Pasrélémumu ngurubua!>>
Tɨradradronga ku musadra itumainia yiadra
(Matai 22.34-40; Luka 10.25-28)
28Iké sesa na ubrubru Sésio na singsi ubicringidria ku mokakdredra, tumanidria ki Yésu sibirinidria ku Satukai na ico ka sakura margi, si sukunénga avétha Yésu na pubuelɨ sesa na mongdai, <<Ku musadra adraitɨmainia yadra ka aci ku sesa na makɨcɨngénga?>>
29Ki Yésu ka ubri, <<Ku sesa ka, <Israél, biciringa! Pɨlɨngɨ ku Ticonɨma ka tkathaninga na Pɨlɨngɨ. 30Musu ka pkacula ku kdrɨdrɨmɨsu, ku kathariasu, ku kilivkasu, si kcɨnga mdalɨme Pɨlɨngɨ ku Ticoswa.> 31Ku skadrusa ka, <Mdalɨma ku spégisu, tumé ku skadlamɨsu swa.> Tédra druma na adraitɨmainia yiadra ku makcɨngéla.>>
32Iku ubrubru Sésio na singsi musobaka Yésu na, <<Singsi, matɨkadrɨngé spasobkésu! Tuminia ku spasobkésu, Ticomtia ka sesa kini, tkathani tédra druméni. 33Pkacula ku kdrɨdrɨmɨsu, ku kathariasu, ku kcɨngasu mdalame Ticomtia, mdalɨma ku spégisu, ptumé skadɨlamɨ su swa. Kɨné ka ina iké csuksukba kéngkéng sukubu si druma subé Ticomtia ka makcɨngéladria.>>
34Ki Yésu ka ucɨnglɨdria ku sibiridra ikédria na rigilne, lapusobakadria, <<Musu ka ikédvélénga musa ku dédadra ki Ticomtia.>>
Siliké kɨné muwana drienɨnga, tédra na ico nuduruma kbrubrulaa Yésu na makcɨngé bɨka.
Porké Kirisito na mongdai
(Matai 22.41-46; Luka 20.41-44)
35Ki Yésu ku ikédra dani Ticomtia buburu na ico ka pubuelɨ sesa na mongdai, <<Ku ubrubru Sésio na singsi ka nakuni musobaka Kirisito ka amani ku mocunguladra ki Davidi miya? 36Ki Davidi ku yienɨ ka mokangdodria na Séré msobaka:
Pɨlɨngɨ ka tumé Pɨlɨngɨ li msobaka:
Iké musu vɨnanɨ li inunu,
drodrɨ vangkwa mra ku berasu ikɨlɨlɨbɨ iké kukusu.
37Ki Davidi ka angikɨmani <Pɨlɨngɨ> kɨkɨmiya, ki Kirisito nakudra amani ku tpacunguladra ki Davidi?>>
Mukocɨvana tɨkpɨ ku ubrubru na Sésiyo singsi
(Matai 23.1-36; Luka 20.45-47)
Ku makaiciconga madɨlamɨ bicringi sbuburudra ki Yésu. 38Ikédra buburudria ka, masobka, <<Mukocɨvana tɨkpɨ ku ubrubru Sésio na singsi; kidri ka madɨlamɨ skupingi na mathɨngedanga na ɨbɨlɨ ongké tkadravadra na ico nicɨnglɨkwamia, madɨlamɨ iké tkadravadra na ico sukubu margragi mumu mia. 39Lakdalɨme iké tika tisarbubua na Yudai ico ku skiululanɨ tanura si téka isarubu ngékne tɨradradronga tanura. 40Uresɨ dria ku makainudranga ababura ku zaisangdra danɨ, si skubudra ka téthɨngedanga nirigu cɨnglɨng kwamia. Ikidri ka nukémianga sakura makcɨngé nuksavongadra.>>
Spatromanadra ku ababura kéngkéngdra
(Luka 21.1-4)
41Ki Yésu ingnu iké dani Ticomtia ku csɨkɨla tlucbunga, cɨnglɨdria ku tumanɨdra podringi tkéngkénganɨ pésu na hako. Madro na sapésuanɨ ico podringi madro na pésu. 42Ku ibrilanga lké sesa na molɨlɨmɨ ababura mukné, podringi drusa tikɨcɨnɨ dong lɨmazi, tumé na tikɨcɨnɨ sesa na pésu. 43Ki Yésu la koko sétodra mukuniamia, psobakadria, <<Kuptapɨdrɨngɨ mwa tilila, kɨné molɨlɨmɨ ababura podringa ni patarumana tkéngkénganɨ pésu na hako ka madroladria druma na ico. 44Iku druma na ico ka paslikédria ku skadraru ni kiaranga buelɨ bwi; makasi kini ka sakura molɨlɨmɨ, angiculudria ku ikaingadria sasékacuani pkaculu bwi ptormanɨ.>>
Currently Selected:
Maruku 12: Maolin23
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023
