متى 27

1وفي وقت الفجر تناقشو كل رؤساء الكهنة وشيوخ الشعب وقرروا يقتلوا يسوع. 2فربطوه وأخذوه وسلموه للحاكم بيلاطس.

3ولما عرف الخاين يهوذا إنهن حكموا بالموت ع يسوع ندم وقام ورجّع المصاري، رجّع ال 30 قطعة فضة، لرؤساء الكهنة وللشيوخ. 4وقالهن: غلِطت وسلّمتكو إنسان بريء. فردّوا وقالولو: مش ذنبنا؟ هاي مشكلتك. 5فراح ورمى المصاري في الهيكل وبعدين راح وشنق حالو. 6وبعد ما لمّوا رؤساء الكهنة المصاري قالوا بنفعش نحطها في التقدمة لأنها مصاري دم. 7فتشاورا وقرروا يشتروا بالمصاري حقل الفُخاري ويعملوه مقبره للغربا. 8عشان هيك صارت الناس لحد اليوم يسمّو هداك الحقل: حقل الدم. 9وهيك تحققت كلمات النبي إرميا اللي قال: أخذوا 30 قطعة من الفضة وهذا هو حق الإنسان بحسب مجموعة من قادة إسرائيل. 10ودفعوا المصاري حق حقل الفخاري زي ما وصّاني الرب.

11ولما وقف يسوع قدام الحاكم، سألو الحاكم: إنت ملك اليهود؟ فَرَد يسوع وقالو: إنت اللي قلت. 12وكانوا رؤساء الكهنة والشيوخ بتشكوا عليه بس هو ما حكاش إشي. 13فقالو بيلاطس: مش سامع كيف بشهدوا ضدك؟ 14ما جاوبُش وما دافعش عن نفسه بِولا كلمة. فاستغرب الحاكم كثير.

15وكانت عادة الحاكم إنو في كل عيد يطلّع واحد من المساجين، اللي بيختاروه الناس. 16وفي هداك الوقت كان في مسجون معروف اسمو يسوع باراباس. 17ولما تجمّعوا الناس سألهن بيلاطس: مين بتختاروا أطلّع من الحبس، يسوع باراباس وِلّا يسوع اللي بقولو عنّو المسيح؟ 18كان بيلاطس عارف إنهن بِغارو من يسوع وعشان هيك سلموه. 19ولما قعد بيلاطس ع كرسي القضاء وصلتو رسالة من مرتو بتقولو فيها: شو بدك بهذا الإنسان الأمين مع الله لأني اليوم حلمت بكابوس وكنت متضايقة كثير عشانه. 20بس رؤساء الكهنة والشيوخ اقنعوا الشعب إنهن يطلبوا تحرير باراباس والموت ليسوع. 21وسأل بيلاطس الشعب: مين اللي بدكو أحرّرو من هدول ال 2؟ فجاوبوه: باراباس. 22فقالهن بيلاطس: شو بدكو أعمل بيسوع اللي بقولو عنو المسيح؟ فقالو الشعب: اصلبو. 23بس هو سأل: طيب شو الجريمة اللي عملها؟ فزاد صياح الشعب وهني يقولو: اصلبو. 24لما شاف بيلاطس إنو فش فايدة من الحكي والناس عم بتهوش أكثر أخذ مَيْ وغسل إيديه عشان يعلن قدام الشعب ويقول: أنا بريء من دم هذا الإنسان والذنب ذنبكو. 25فجاوبه كل الشعب وقالو: دمو علينا وع ولادنا. 26بعد ما سمع جوابهن طلعلهن باراباس من الحبس. وجلد يسوع وسلمه لجنوده عشان ينصلب.

27وأخذوا الجنود يسوع لقصر الحاكم وتجمعوا عليه هناك مجموعة كبيرة من الجنود 28وشلّحوه أواعيه ولبّسوه عباية رومانية لونها نبيذي 29وعملوا من نبات مشوِّك تاج وحطوه ع راسو ومسّكوه عصاي في إيدو اليمين وبعدين ركعوا قدامو وهني بتمسخروا عليه وبقولولو: يعيش ملك اليهود. 30وبزقوا عليه واخذوا منو العصاي وصاروا يضربوه ع راسو 31وبعد هاي الإهانات شلّحوه العباي الرومانية ولبّسوه أواعيه وأخذوه عشان ينصلب.

32وهني رايحين شافو زلمة من مدينة قيروان اسمو سمعان وجبروه إنو يحمل خشبة الصليب اللي حملها يسوع. 33وُوِصلوا لمحل اسمو الجلجثة ومعنى الاسم الجمجمة. 34واعطوه هناك نبيذ مخلوط مع مادة مُرّة. فلما داق المشروب رفض إنو يشربه. 35ولما صلبوه تقاسموا أواعيه بيناتهن بحسب كل واحد وحظّو. 36وقعدوا عند الصليب يحرسوه. 37وكتبوا شو تهمته فوق راسو. كتبوا: هذا هو يسوع ملك اليهود. 38وصلبوا معاه 2 قطّاع طرق، واحد ع يمينو والثاني ع شمالو. 39والناس اللي كانت تُمرء من هناك كان يسبّو عليه ويهينوه بالإشارات. 40وكانو يقولولو: يا اللي بِدّمر الهيكل وبعدين بتبنيه في 3 أيام، إذا إنت ابن الله خلّص نفسك وانزل عن الصليب. 41وكمان رؤساء الكهنة وجماعة الكتبة والشيوخ كان يتمسخروا عليه ويقولو: 42خلّص الناس بس بقدرش يخلّص حالو. مش هو ملك إسرائيل خليه إسه ينزل عن الصليب عشان نآمن فيه. 43اتكل ع الله وبقول أنا هو ابن الله طيب إسه خلي الله ينجيه عشان يبرهن إنو راضي عنو. 44وكمان قطّاع الطرق اللي انصلبو معو كانو يهينوه زي الباقيين.

45ومن الساعة 12 الظهر للساعة 3 بعد الظهر صارت كل البلد عتمة. 46والساعة 3 صيّح يسوع بكل قوته وقال: إيلي إيلي لما شبقتاني ومعناها إلهي إلهي ليش تركتني؟ 47في ناس واقفين هناك لما سمعوه فكروا إنو بنادي إيليا. 48وطوالي ركض واحد من الجنود واخذ سفنجة مِتْشربة نبيذ رخيص وحطها على عصاي ومدها عشان يِشَرْبُو. 49فقالولو الجنود: "استنى تنشوف إذ بييجي إيليا وبنقذو". 50وصيّح يسوع كمان مرّة بكل قوته ومات. 51وقتها تمزّعت بُرداية قدس الأقداس لنصين وانشقت من فوق لتحت لشقفتين. وصارت هزة أرضية وتشققت الصخور. 52وانفتحت القبور وصار في قيامة جسدية لكثيرين من القديسين اللي ماتوا. 53وبعد ما قام يسوع قاموا من قبورهن ودخلوا للمدينة المقدسة وشافوهن عدد كبير من الناس. 54ولما الضابط الروماني ال مسؤول عن 100 جندي والجنود اللي كانوا يُحرسوا معو يسوع شافو الهزة الأرضية والأشياء اللي صارت خافوا كثير وصار يقولو: عنجد، هذا هو ابن الله. 55وكان في عدد منيح من الستات الواقفات بيطّلعوا من بعيد. هدول الستات تركوا الجليل مع يسوع عشان يخدموه. 56وكان معهن مريم المجدلية، ومريم إم يعقوب ويوسف، ومَرْة زبدي.

57ولما صارت الدنيا ليل أجا يوسف، وهو زلمة غني من منطقة الرام وكان تلميذ ليسوع. 58وراح يوسف لعند بيلاطس وطلب جثة يسوع. فأمر بيلاطس خدامه إنهن يعطوه إياها. 59أخذ يوسف الجثة ولفها بقماش كتان نظيف 60ودفن الجثة في القبر الجديد اللي حفره في الصخر. كان مفروض يكون قبره. وقبل ما يترك دحرجوا حجر كبير على باب القبر. 61وكانت مريم المجدلية هناك ومعها مريم الثانية وكانوا قاعدات عند القبر.

62وبعد ما تجهّزت الناس وفات السبت، اجتمعوا رؤساء الكهنة وجماعة الفريسيين مع بيلاطس 63وقالولو: يا سيدنا، تذكرنا إنو يسوع المُخادع لما كان عايش قال إنو راح يقوم بعد 3 أيام. 64فَطَلِّع قرار بحراسة القبر ل 3 أيام عشان ما يجوش تلاميذو يسرقوا الجثة وبعدين يقولو للناس إنو قام من الأموات فبتصير الكذبة الجديدة أسوأ من اللي قبلها. 65فقالهن بيلاطس: بعطيكو حرّاس. روحوا وأحرسوا القبر زي ما بتشوفوا مناسب. 66فراحوا يحرسوا القبر وحطوا الختم مع الحراس.

Currently Selected:

متى 27: CGB

Highlight

Compare

Copy