متى 26

1ولما خلّص يسوع كل هادا الحكي قال لتلاميذو: 2بتعرفوا إنو بعد يومين راح يكون الڤسح. وراح يحبسو ابن الإنسان ويصلبوه. 3وفي هداك الوقت تجمعوا الرئاسة الدينية مع شيوخ الشعب في قصر رئيس الكهنة اللي اسمو قيافا. 4وتآمروا كيف يستعملوا الخداع عشان يعتقلو يسوع ويقتلوه. 5فقالو: بلاش نمسكو في العيد عشان ما يهوشِش الشعب.

6ولما كان يسوع في قرية بيت عنيا، في بيت سمعان اللي كان أبرص. 7أجت لعندو مرَة معها قنينة ريحة غالية كثير ودارتها ع راسو وكان قاعد ع الأكل 8ولما شافوها التلاميذ انقهرو وقالو: ليش هذا التبذير؟ 9كان منقدر نبيعو بسعر كبير ونعطي المصاري للفقرا. 10فهمهن يسوع وقالهن: ليش بتضايقوها؟ عملت معي إشي منيح. 11وانتو رح تلاقو الفقرا في كل وقت بس مش راح أكون معكو دايما. 12هي دارت قنينة الريحة ع جسمي عشان تحضرني للدفن. 13عنجد بقولكو: راح يتذكروها ويحكوا عن شو عملت في كل محل ببشروا فيه بالإنجيل، وفي كل العالم.

14وفي هداك الوقت راح يهوذا الإسخريوطي لعند الرئاسة الدينية. وكان يهوذا واحد من ال 12 رسول. 15وقالهن: قديش بتعطوني عشان أسلمكو يسوع؟ فدفعولو 30 شقفة فضة. 16ومن سيعتها صار يدوّر على اللحظة المناسبة عشان يسلمهن يسوع.

17وأجو التلاميذ لعند يسوع في أول يوم من العيد اللي بمنعوا فيه خميرة الخبز، وسألوه: وين بدك نحضّر وجبة الڤصح؟ 18فقالهن: روحو عالبلد ولوين بقولكو وقولو للزلمة هناك، معلمنا بقولك: أجا وقتي ورح أنا وتلاميذي نعمل وجبة الڤصح عندك. 19وعملو التلاميذ شو وصّاهن يسوع وحضروا وجبة الڤصح. 20ولما صارت الدنيا ليل قعد يسوع والرسل ال 12 ع الأكل. 21وهني عم بيوكلو قالهن: عنجد بقولكو: واحد منكو راح يخوني. 22فانضغطوا كثير وصاروا كل واحد منهن يقول: يا رب، صح مش أنا الخاين؟ 23فجاوب وقال: منغمس الخبز مع بعض ومن نفس الصحن وهو راح يخوني. 24ابن الإنسان مش رح يضل هون وراح يصير فيه زي ما هو مكتوب بس يا ويلو الإنسان اللي بخونو. كان أحسنلو لو إنو منولدش. 25فجاوب يهوذا الخاين وقال: يا معلمنا، أنا هو؟ قالو يسوع: إنت اللي قلت.

26وهني عم بيوكلو أخذ يسوع خُبزِه وبارك وكسرها وأعطى الشُقف لتلاميذو وقالهن: خذوا كلوا. هذا هو جسدي 27واخذ الكاس وشكر الله وقدمها إلهن وقال: اشربوا كلكو منها 28لأنو هذا النبيذ هو دمي، دم العهد اللي راح ينسفك عشان تنغفر خطايا الناس. 29وبعلِن إلكو إنو من إسه مش راح أشرب نبيذ لحد ما يجي اليوم اللي بشرب معكو فيه نبيذ جديد في ملكوت أبوي. 30وبعد ما رنموا راحو ع جبل الزيتون.

31وفي هداك الوقت قال يسوع للرسل: في هاي الليلة، كلكو راح يتزعزع إيمانكو فيّ لأنو الله بقول في كلمته: لما أنا بقتل الراعي بتتفرق غنمات الرعية 32بس بعد القيامة راح أسبقكو للجليل. 33رد عليه بطرس وقالو: حتى ولو الكل بتزعزع إيمانهن فيك أنا ولا مرة وللأبد مش راح يتزعزع إيماني فيك. 34فقالو يسوع: عنجد بقولك، في هاي الليلة وقبل صياح الديك راح تنكرني 3 مرات. 35فقالو بطرس: مش راح انكرك حتى إذا كنت مجبور أموت معاك. وهيك حكوا كل التلاميذ.

36وفي هداك الوقت راح يسوع مع تلاميذو لمحل اسمو جثسيماني. وقال هناك لتلاميذو: خليكو هون لحد ما أروح هناك وأصلي. 37وأخذ معو بطرس وولاد زبدي ال 2، وبدي يحزن ويكتئب. 38وقتها قالهن: راح أموت من كثرة الحزن. خليكو هون واسهرو معي. 39ومشي شوي وركع يصلي ووجهو ع الأرض وقال: يا بابا، إذا ممكن إنك تعفيني من شرب كاس الآلام . . . بس الأولوية لإرادتك مش إرادتي. 40ورجع للتلاميذ ولقاهن ال 3 نايمين فقال لبطرس: هيك ما قدرتش تفيق معي ولو ساعة واحدة؟ 41فيقوا وصلو عشان متفوتوش في تجربة. إرادة الروح بتتعطل بضعف الجسد. 42وراح مرة تانيه وصلى وقال: يا بابا، إذا مش ممكن تعفيني ولازم أشرب كاس الآلام فموافق علّي بدك إياه. 43ورجع ولقاهن كمان مرة نايمين ومش قادرين يفتحو عينيهن. 44فتركهن كمان مرة وراح يصلي للمرة الثالثة وصلى نفس الكلمات. 45وبعدين رجع للتلاميذ وقالهن: لحد إسه نايمين ومستريحين؟ أجا الوقت والخطاة راح يعتقلوا ابن الإنسان. 46قوموا نروح. هادَ اللي بخوني وصل.

47وأول ما خلص حكي إلا يهوذا جاي. كان يهوذا واحد من التلاميذ ال 12 بس أجا ومعو ناس كثار حاملين سيوف وعصي. كانوا جايين باسم الرئاسة الدينية وشيوخ الشعب. 48وكان الخاين متفق معهن على علامة، قالهن: اعتقلوا الشخص اللي ببوسو. 49وراح يهوذا لعند يسوع أول ما شافه وقالو: مرحبا يا معلم، وباسه. 50فقالو يسوع: يا صاحبي، ليش إجيت؟ ووقتها مسكوا يسوع واعتقلوه. 51فقام واحد من التلاميذ سحب سكينتو وضرب خدَّام رئيس الكهنة وقطعلو دانو. 52فقالو يسوع: رجّع سكينتك لمحلها لأنو طريق السيف نهايتها الموت. 53بتفكر أنو أنا بقدرش إسه أطلب من أبوي إنو يبعث 12 جيش ملايكة أو أكثر؟ 54بس وقتها كيف بدها تتحقق الكُتب ويتم اللي لازم يصير؟ 55وفي نفس اللحظة قال يسوع للناس: فكركو لازم تهجموا علي كأني قطاع طرق وتعتقلوني بسيوف وعصي؟ كل يوم وفي الهيكل كنت قاعد بعلم بس ما اعتقلتونيش. 56بس لازم يصير هيك عشان تتحقق كلمات الأنبيا في الكُتب. ووقتها تخلو عنو التلاميذ وهربوا.

57وبعد ما قبضوا عليه راحو لعند قيافا رئيس الكهنة. وكانوا جماعة الكتبة والشيوخ مجتمعين هناك. 58ولحقهن بطرس من بعيد لحد ما فات لساحة بيت رئيس الكهنة وقعد هناك مع الحرّاس ليشوف شو راح يصير. 59وكان في اجتماع لرؤساء الكهنة ولكل مجمع السانهدرين اليهودي. وبدوّروا على أي كذاب يشهد ضدو عشان يطلعوا قرار بقتلو. 60بالأول ملقوش اللي بدهن إياه. وتقدموا كذابين كثار وبالآخر لاقوا شخصين. 61وقالو هدول الشخصين: هو قال إنو بيقدر يدمر هيكل الله ويبنيه في 3 أيام. 62فوقف رئيس الكهنة وسألو: بِدكاش تجاوب وترد ع شو بشهدو ضدك؟ 63بس يسوع كان ساكت. فقالو رئيس الكهنة: باسم الله الحي وإنت تحت القسم قول إذا إنت المسيح ابن الله. 64فجاوبوه يسوع: إنت اللي بتقول. وأنا كمان بقولكو: من إسه راح تشوفو ابن الإنسان قاعد عن يمين الله القدير وجاي راكب ع غيوم السما. 65ووقتها مزع رئيس الكهنة أواعيه وقال: بعد هذا الكُفر فش حاجة لكمان شهود؟ إسه إنتو سمعتو هذا الكافر. 66شو حكمكو؟ ففي ناس ردت وقالت: بستحق الموت. 67وبعدها بزقوا ع وجهو وضربوه بوكسات وكفوف. 68وصاروا يقولولو: تنبألنا يا مسيح، مين اللي ضربك؟

69وكان بطرس قاعد بره في ساحة البيت وأجت لعندو واحدة من الخدّامات وقالتلو: وانت كمان من جماعة يسوع الجليلي. 70فأنكر وقال قدام الكل: مش عارف شو ها الحكي الفاضي. 71وقام ومشي لعند البوابة فشافتو خدّامة تانية وقالت للناس اللي هناك: هذا الزلمة كان مع يسوع الناصري. 72فأنكر بطرس مرة تانية وحلف إنو بعرفش يسوع. 73وبعد شوي قربوا عليه ناس من اللي كانوا واقفين وقالولو: عنجد إنت واحد من جماعتو لأنو لهجتك كشفتك. 74وقتها بدي بطرس يلعن ويحلف إنو بعرفش يسوع. وطوالي صيّح الديك. 75فتذكر بطرس كلمات يسوع لما قالو: قبل ما يصيح الديك راح تنكرني 3 مرات. فترك بطرس المنطقة وراح وانفجر بالبِكا.

Currently Selected:

متى 26: CGB

Highlight

Compare

Copy