متى 22

1وصار يسوع كمان مرة يحكي معهن بأمثال فقالهن: 2ملكوت السموات زي واحد ملِك عمل احتفالات وقت عُرس ابنو 3وبعث خدامو عشان يعزموا المعازيم على احتفالات العُرُس، بس المعازيم مش ناويين يروحو. 4وبعث كمان مرة خدام تانيين وقالهن: قولوا للمعازيم: الأكل صار جاهز. وصارت الثيران والعجول مدبوحة. وكل إشي جاهز. تعالو على احتفالات العرس. 5والمعازيم طنّشو العزيمة. واحد انشغل بأرضو والثاني بتجارتو 6وفي مجموعة سبّوو على خدام الملك وحتى قتلوهن. 7غضب الملك وبعث جنوده اللي قضوا على هدول السفاحين وحرقو مدينتهن. 8وبعدين قال لخدامو: الحفلة جاهزة بس المعازيم بستهالوش العزيمة. 9عشان هيك روحو ع شوارع البلد واعزمو أي واحد بتشفوه على احتفالات العرس. 10طلعوا خدام الملك ع الشوارع وعزمو كل واحد شافوه: المنيح مع العاطل. وتعبّت الحفلة من المعازيم الجاهزين للأكل. 11ولما فات الملك يتفقد المعازيم شاف واحد منهن مش لابس أواعي حفلة العرس. 12فقالو: يا ضيف، كيف فُتِت لهون وأنت مش لابس أواعي حفلة العرس؟ فسكت الزلمة. 13سيعتها قال الملك للمساعدين: اربطو اجريه وإيديه وارموه بره في العتمة. هناك الناس بتبكي وسنانها بطقطق. 14ومع إنو المعازيم كثار إلا إنو المختارين قلال.

15وعملو جماعة الفريسيين اجتماع وتناقشو كيف يوقعو يسوع بالحكي. 16بعتوا أتباعهن مع أتباع هيرودس عشان يقولو: يا معلم، منعرف إنك حقاني وصادق في تعليمك لطرق الله وبهمكاش حدا ومش هدفك ترضي الناس 17فقُلْنَا رايك: مسموح عند ربنا إنو ندفع ضريبة قيصر ولّا لأ؟ 18فهم يسوع مؤامرة الشر فقالهن: يا موجهنين، ليش بتتآمرو علي؟ 19أرجوني العملة اللي بتستعملوها للضريبة. فجبولو دينار روماني. 20فقالهن: صورة مين هاي ومين كتب عليها هذا الكلام؟ قالولو: قيصر. 21فقالهن: عشان هيك أعطو لقيصر اللي إلو واعطوا لألله اللي إلو. 22فلما سمعوا جوابه تعجبوا وبعدين راحوا وتركوه.

23في نفس اليوم اجو الصدوقيين يحكو مع يسوع. هدول الجماعة اللي بآمنوش بالقيامة. 24وقالولو: يا معلم، قال موسى: إذا واحد مات وما عندُش ولاد خلي ارملة الميت تتجوز أخوه ويجيبو ولاد يحملوا اسم الميت. 25وكان في 7 إخوة. تجوز الأول وبعدين مات وترك أرملتو بدون ولاد 26فتجوزها الأخو الثاني وبعدين الثالث. وتجوزت ال 7 إخوة 27وبعد ما ماتو كل الإخوة ماتت المرة 28طيب في القيامة مين من السبعة بكون جوزها؟ لأنها تجوزت السبعة. 29رد عليهن يسوع وقالهن: انحرفتو عن الحق لأنكو مش عارفين لا كلمة الله ولا قدرته. 30في القيامة فش جيزة وجواز لأنو الناس بتكون زي الملايكة اللي في السما 31وبالنسبة لموضوع قيامة الأموات، ما قريتوش النص لما الله بقول: 32أنا هو الله الكائن مع إبراهيم واسحق ويعقوب؟ الله إله كائن مع أحياء مش أموات. 33ولما سمعوا الناس تعجبوا من تعليم يسوع.

34ولما سمعوا الفريسيين إنو سكّت الصدوقيين تجمّعوا مع بعض 35وكان معهن واحد خبير بالكتب المقدسة فعشان يورط يسوع سألو: 36يا معلم، شو أهم وصية في كلمة الله؟ 37فقالو: حب الرب إلهك من كل قلبك ومن كل نفسك ومن كل عقلك. 38هاي هي أهم وأعظم وصية. 39وثاني أهم وصية إلها نفس الأهمية: حب قريبك زي ما بتحب حالك. 40كل كتب التوراة والأنبيا بتعتمد على هدول الوصيتين.

41ولما كانوا الفريسيين مجتمعين سألهن يسوع: 42شو بتفكروا عن المسيح؟ ابن مين هو؟ جاوبوه: ابن داود. 43فسألهن: طيب كيف داود بقيادة الروح بعطيه لقب "رب" 44وبقول: قال الرب لربي: اقعد ع يميني لحدما أحط اعدائك تحت اجريك 45فإذا كان داود بناديه "رب" كيف بكون ابنه؟ 46وما قدرش حدا يجاوبو بولا كلمة ومن هداك اليوم ولا حدا تجرأ يورطو بسؤال.

Currently Selected:

متى 22: CGB

Highlight

Compare

Copy