متى 21

1ولما قرَّبو ع أورشليم ووصلوا عبيت فاجي اللي ع جبل الزيتون بعت يسوع 2 من تلاميذو 2وقالهن: روحو ع القرية القُدّامكو وأول ما توصلو هناك راح تلاقو حمارة مربوطة وابنها معاها فِكوهن وجبوهن لعندي 3وإذا سألكو حدا شو بتعملو؟ جاوبوه وقَلولو إنو السيد محتاج لإلهن، فراح طوالي يبعتهن معاكو. 4وبهاي الأشياء بتتحقق كلمة الله لما قال النبي: 5"قولو للصّبية صهيون: هادَ ملكك جاي راكب على حمارة وابنها معها. 6راحو التلميذين وعملو زي م طلب يسوع 7وجابو الحمارة وابنها وحطو عليهن أواعي وقعد يسوع عليهن. 8وأغلبية الناس عملو أواعيهن سجادة في الشارع وفي ناس كسّرو أغصان الشجر وفرشوها في الطريق 9والناس اللي قدام يسوع واللي وراه كانو يصيحو ويقولو: المجد لابن داود. هو المبارك اللي جاي باسم الرب. إسه خلاص الأعالي. 10ولما دخل ع أورشليم صارو كل سكان المدينة ع أعصابهن وصاروا يسألو بعض: مين هذا؟ 11في ناس جاوبت: هادا هو النبي يسوع اللي من الناصرة اللي في الجليل.

12ولما فات يسوع ع الهيكل طرد كل الناس اللي كانوا يبيعوا ويشتروا هناك. وقلب طاولات صرافين المصاري وكراسي بياعين الحمام. 13وقالهن، الله بيقول في كلمتو: "الهيكل تبعي هو بيت للصلاة"، بس انتو عملتوه مغارة للحرامية. 14وبعدها اجا لعندو ناس عُميان وناس عُرج وشفاهن في الهيكل. 15ولما الرئاسة الدينية وجماعة الكتبة شافو العجايب وسمعو الأولاد اللي في الهيكل بصيحو وبقولو: إسه الخلاص تبع ابن داود، انقهروا 16وقالو ليسوع: سامع شو بقولو؟ فقالهن يسوع: سامع بس ما عمركوش قريتو إنو: "راح يخلي الله التسبيح ينسمع من تُم الأولاد والأطفال"؟ 17وبعدها تركهن وترك مدينة أورشليم وراح على بيت عنيا ونام هناك.

18ورجع الصبح ع أورشليم وكان جُعان 19وشاف شجرة تين في الطريق فقرب عليها بس فيهاش تين وملاقاش فيها إلا الورق. وأول ما قالها: مش راح تحملي تين للأبد، يبست الشجرة. 20فتعجبوا التلاميذ من ها الشوفه وقالو: كيف الشجرة ذبلت بهاي السرعة؟ 21فقالهن يسوع: عنجد بقولكو: إذا بتشكّوش وبكون عندكو إيمان سيعتها مش بس بتُأمروا الشجرة إنها تيبس بتقدروا كمان تقولو لهذا الجبل انتقل من هون للبحر وبيتحقق كلامكو. 22وإذا بكون عندكو إيمان راح يكون في استجابة لكل طلبة صلاة بتطلبوها.

23ورجع يسوع ع الهيكل وصار يعلم. فأجو شيوخ الشعب والرئاسة الدينية وسألوه: مين اعطاك الحق وشو السلطة اللي معك حتى تعمل هاي الأشياء؟ 24فجاوبهن يسوع وقالهن: أنا عندي حديث معاكو. زي ما إنتو سألتو عن مصدر السلطة اللي بعمل فيها هذه الأشياء، أنا كمان بسألكو: 25من وين أخذ يوحنا الحق إنو يعمّد؟ من السما والا من الناس؟ تخرفوا بينات بعض وقالوا: إذا جاوبنا "من السما" راح يقولنا طب ليش ما آمنتوش في؟ 26وإذا قلنا "من الناس "منخاف من الشعب لأنهن مقتنعين أنو يوحنا نبي. 27فجاوبو يسوع وقالولوه: منعرفش الجواب. فقالهن وأنا كمان مش راح أجاوبكو وأقولكو مين اعطاني الحق إنو أعمل هاي الأشياء.

28وبحب اسمع رايكو عن إنسان عندو ولدين. أجا الأبو لعند الولد الأول وقالو: يا ابني، روح اشتغل اليوم في كرم العنب 29فَرَد وقالو: بديش، بس بعدين غيّر رايو وراح. 30أجا الأبو للولد الثاني وعاد نفس الطلب. فرد وقالو: أمرك سيدي، بس ما راحش. 31مين الولد اللي رد ع أبوه؟ فجاوبوه: الأول. فقالهن يسوع: عنجد بقلكو، اللي بلمّوا ضرايب روما والزانيات راح يسبقوكو ع ملكوت الله. 32لأنو يوحنا أجا وفرجاكو طريق العدل الإلهي وما قبلتوش رسالتو. بس اللي بلموا ضرايب روما والزانيات قبلوها. وإنتو شوفتو إيمانهن وما غيرتوش رايكو عشان تقبلوا رسالتو ليوحنا.

33واسمعوا كمان مثل: غرس شيخ العيلة كرم عنب وحط سياج حواليه وحفر حفرة في الصخر عشان يعصر العنب وبنى برج مراقبة وقبل ما يسافر أجّر الأرض لـمزارعين. 34ولما صار وقت قطف العنب بعث شغيلتو للمزراعين عشان يوخذ حصتو من العنب 35بس المزارعين مسكوا الشغيلة وضربوهن وقتلو وراجدوا على ناس منهن. 36رجع وبعث كمان شغيلة أكثر من الأول وعملوا المزارعين فيهن نفس الإشي. 37فقام في الآخر بعثلهن ابنو وقال راح يحترموا ابني. 38لما شافوا المزارعين ابنو قالوا: هذا هو الوريث، تعالوا نقتلو وهيك أرضو بتصير إلنا. 39فمسكوه ورموه بريت كرم العنب وقتلوه. 40فشو راح يعمل فيهن صاحب الكرم لما بيرجع؟ 41قالولو: هيك أشرار راح يموّتهن موتة شِنْعَة وبعدين راح يأجر الكرم لمزارعين تانيين اللي بيدفعولو حصتو من الثمر وقت ما يقطفو العنب. 42فقالهن يسوع: ما قريتوش النص المكتوب فيه: "الحجر اللي فكروه البنائين مش نافع، طلع هو أهم حجر. هذا ترتيب ربنا وعيونا بتشوف وبتتعجب؟". 43عشان هيك بقولكو إنو الله راح يوخذ مملكتو منكو وراح يعطيها لشعب مثمر. 44واللي بيوقع على هذا الحجر راح يتكسّر واللي بيوقع الحجر عليه راح يتفتت. 45لما الرئاسة الدينية وجماعة الفريسيين سمعوا هاي الأمثال عرفوا إنو بيحكي عليهن. 46فصاروا بدهن يحبسوه بس خافوا لأنو الناس آمنو إنو نبي.

Currently Selected:

متى 21: CGB

Highlight

Compare

Copy