متى 20

1وملكوت السموات زي زلمة عندو أرض وأول ما طلع الصبح راح يدور ع شغيلة لكرم العنب تبعو 2وبعد ما اتفق معاهن على سعر الشغل ليوم واحد ودّاهن عكرم العنب تبعو 3ولما صارت الساعة 9 طلع كمان مرة وشاف شغيلة تانين واقفين في الشارع بدون شغل 4فقالهن: تعالو أنتو كمان اشتغلو في كرم العنب وبدفعلكو شو بطلعلكو 5فراحو معو. وطلع كمان مرة الساعة 12 الظهر وبعدين الساعة 3 وعمل نفس الإشي. 6ولما صارت الساعة 5 طلع كمان مرة ولاقى شغيلة واقفين فقالهن: ليش واقفين هون طول النهار بدون شغل؟ 7فقالولو: فش حدا شغّلنا. فقالهن: طيب تعالو إنتو كمان على كرم العنب. 8ولما صارت الدنيا ليل قال صاحب الكرم للمحاسب: نادي الشغيلة وادفعلهن المصاري وإبدا من اللي أجو بالآخر لحد ما توصل للي أجو بالأول. 9فأجو شغيلة الساعة 5 وأخذ كل واحد معاش يوم شغل. 10ولما أجو شغيلة أول النهار فكروا إنو قبضتهن راح تكون أكبر. بس هني كمان أخذ كل واحد منهن معاش يوم شغل 11لما شافوا القبضة تمئتوا على اللي شغّلهن 12وقالو: الشغيلة اللي أجو بالآخر اشتغلوا بس ساعة واحدة وقبضتهن زينا إحنا اللي تحملنا حم الشمس طول النهار 13فرد صاحب الكرم ع واحد منهن وقالو: يا صاحبي أنا ما ظلمتكاش. مش اتفقت معك ع معاش يوم شغل؟ 14فَخُذْ مصرياتك وروّح. أنا بدي أدفع للشغيل اللي أجا بالآخر قد ما دفعتلك. 15أو فكرك بحقليش اتصرف بمصرياتي زي ما بدي؟ أنا كريم وإنت ليش عينك حسوده؟ 16وبهاي الطريقة بصيروا اللي كانوا بالآخر من الأوائل واللي كانوا من الأوائل صفو بالآخر.

17وفي الطريق لأورشليم أخذ يسوع تلاميذو ال 12 ع جنب وقالهن: 18أنا طالع ع أورشليم. وابن الإنسان راح يرموه بإيدين الرئاسة الدينية وجماعة الكتبة وراح يحكمو عليه بالموت. 19وبعدين رح يسلموه للوثنيين اللي راح يتمسخرو عليه ويجلدوه ويصلبوه بس رح يقوم في اليوم الثالث.

20وفي هداك الوقت اجت مرة زبدي مع ولادها ال 2 وركعت قدام يسوع عشان ولادها. 21فقالها يسوع: شو بدك؟ قالتلو: اوعدني إنو ولادي ال 2 اللي قدامك يقعدوا واحد ع يمينك والتاني ع شمالك في ملكوتك. 22رد يسوع ع ولادها وقال: إنتو مش عارفين شو بتطلبو. مستعدين تشربو الكاس اللي راح أشربها؟ فقالولو: مستعدين. 23فقالهن: راح تشربو من الكاس اللي راح اشربها بس بقدرش أوافق ع طلب مين يقعدوا عيميني ومين ع شمالي لأنو المحل محجوز للي اختارهن ابوي. 24ولما وصل خبر التلميذين للتلاميذ ال 10 انقهرو. 25فناداهن يسوع وقالهن: بتعرفو إنو حكام الشعوب الوثنية بيتحكّمو بالناس والعظما عندهن هني اللي بيتسلطو غصبن عن راس الناس 26إنتو مش لازم تكونو هيك وإذا واحد فيكو بدو يكون عظيم لازم يكون الخدام بيناتكو 27واللي بدو يكون في أعلى مكانة لازم يقبل يكون في أوطى مكانة بيناتكو. 28صيروا زي ابن الإنسان اللي مأجاش عشان الناس تخدمو بس عشان هو يخدمهن ويضحي بنفسو حتى يحرر ناس كثار.

29ولما كان يسوع وتلاميذو عم بيطلعو من أريحا لِحقهِن عدد كبير من الناس 30وكان في كمان 2 عميان قاعدين في الشارع. فلما سمعو إنو يسوع عم بيمشي في نفس الشارع صارو يصيحو ويقولو: ارحمنا يا سيد يا ابن داود. 31فسكتوهن الناس وصيحوا عليهن بس هني صارو يصيحو بصوت أعلى ويقولو: ارحمنا يا سيد يا ابن داود. 32فوقّف يسوع وناداهن وسألهن: إيش بدكو مني؟ 33قالولو: يا رب، بدنا نشوف. 34شفق يسوع عليهن وأول ما لمس عينيهن صارو يشوفو ومشيو وراه.

Currently Selected:

متى 20: CGB

Highlight

Compare

Copy