Лебийлиле 17
17
Къанны сыйлылыгъы
1Раббий Муссагъа былай айтханды:
2– Харуннга, аны уланларына эм битеу Исраил улулагъа былай айт:
Раббийни буюргъаны буду:
3Исраилни халкъындан бир адам къонушда неда къонушну тышында бугъа#17:3 Неда: «ийнек»., къозу неда эчки сойса, 4алай а аны Тюбешиу Чатырны эшигини аллына, Раббийге къурман этер ючюн, аны Раббийни Мекямыны аллына келтирмесе, ол мурдарлыкъ этип къан тёкгеннге саналлыкъды. Къан тёкгени себепли, ол халкъ арасындан жокъ этилсин. 5Бу жорукъгъа кёре, Исраил улула ачыкъ аулакълада эте тургъан къурманларын, энди, Раббийни аллына келтирсинле. Ала аланы Тюбешиу Чатырны эшигини аллына, дин къуллукъчугъа келтирсинле да, аланы Раббийге саламатлыкъ къурманнга кессинле. 6Дин къуллукъчу къанны Тюбешиу Чатырны эшигини аллында болгъан Раббийни къурман жерине бюрксюн, жауун да, Раббийге жагъымлы ийис этер ючюн, кюйдюрсюн. 7Энди исраиллиле, саякъ айланып, теке сыфатлы тейрилеге къурманла келтирмесинле.
Бу исраиллилеге, битеу келлик тёлюлеге ёмюрлюк жорукъ болсун.
8Алагъа дагъыда былай айт:
Исраил халкъны адамы болсун, неда арагъызда жашагъан тыш адам эсе да, толусунлай кюйдюрюлген не башха тюрлю къурман кессе, 9алай а, аны Раббийге къурман этер ючюн, аны Тюбешиу Чатырны эшигини аллына келтирмесе, ол адам халкъ арасындан жокъ этилсин.
Къанны харамлыгъы
10Исраил халкъдан неда арагъызда жашагъан тыш адам къанны ашха хайырланса, Мен бетими ол къан ашагъан адамгъа къажау айландырлыкъма да, аны халкъ арасындан жокъ этерикме. 11Нек дегенде, чархны жаны – къанындады. Мен аны сизге, сиз къурман жерде тазалау этер ючюн, белгилегенме. Бу къан жанны тазалайды. 12Ол себепден, Мен Исраилни халкъына айтама: сизден биригиз да къанны ашха хайырланмагъыз, арагъызда жашагъан тыш адам да, алай.
13Исраил улуладан неда арагъызда жашагъан тыш адам, ууда ашха жараулу бир хайыуан неда къанатлы тутса, аны къанын жерге тёгюп, юсюн топуракъ бла жапсын. 14Нек дегенде, чархны жаны – къанындады. Къанды аны жаны. Ол себепден, Мен Исраилни халкъына айтама: бир жанлыны къанын ашха хайырланмагъыз. Хар бир чархны жаны – аны къаныды. Аны ашха хайырланнган адам жокъ этилсин.
15Кеси адамыгъыз неда тыш адам кеси ёлген хайыуанны неда жаныуар талагъан хайыуанны этин ашаса, ол адам кийимин жуусун, кеси да жууунсун. Ол ингирге дери харам болур; андан сора таза болур. 16Ол адам кийимин жуумаса, кеси да жууунмаса уа, терслигине жууаплы болур.
Currently Selected:
Лебийлиле 17: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
