Лебийлиле 18
18
Эрлик-тишилик жорукъла
1Раббий Муссагъа былай айтханды:
2– Исраил улулагъа сёлешип, былай айт:
Мен – сизни Раббий Аллахыгъызма. 3Сиз алгъын жашагъан Мисирде этилгенин юлгюге алмагъыз. Мен сизни элтген Кенанда этилгенин да, алай. Аланы адетлерине кёре жашамагъыз. 4Мени хукмуларымы толтуругъуз, Мени жорукъларымы тутугъуз. Мен – сизни Раббий Аллахыгъызма. 5Мени жорукъларымы эм Мени хукмуларымы тутугъуз. Аланы тутхан адам аланы хайырындан жашар. Мен – Раббийме.
6Бир адам да жууукъ жетген тиширыу бла жатмасын. Мен – Раббийме.
7Атангы къатыны бла жатып, атангы бедишлик этме. Ол – сени анангды; аны бла жатма.
8Атангы къатыны бла жатма. Ол – атанга бедишликди.
9Эгечинг бла, атангы къызы бла неда анангы къызы бла жатма. Ала сени юйюнгде неда башха юйде туугъан эселе да, ала бла жатма.
10Уланынгы къызы бла неда къызынгы къызы бла жатма – ол санга бедишликди.
11Атангдан туугъан, атангы къатыныны къызы бла жатма. Ол – сени эгечингди. Аны бла жатма.
12Атангы эгечи бла жатма. Ол – атангы жууугъуду.
13Анангы эгечи бла жатма. Ол – анангы жууугъуду.
14Атангы къарындашыны къатыны бла жатып, атангы къарындашын бедишлик этме. Ол – атангы эгечи кибикди.
15Келининг бла жатма. Ол – уланынгы къатыныды, аны бла жатма.
16Къарындашынгы къатыны бла жатып, къарындашынгы бедишлик этме.
17Къатын бла да, аны къызы бла да жатма. Аны уланыны къызы бла неда аны къызыны къызы бла да жатма. Ала санга жууукъ жетедиле. Бу – аманлыкъды.
18Къатыннга бла аны эгечине, араларында эришиу болмаз ючюн, бирча юйленме. Сени къатынынг сау чакъда, аны эгечи бла жатма.
19Къатынынг хайыз кёрюп, харамлы болгъан заманда, аны бла жатма.
20Башха адамны къатыны бла жатып, алай бла огъунгу тёксенг, кесинги харам этериксе.
21Сабийлеринги Молек тейриге къурманнга отда кюйдюрме, Аллахынгы Атын бедишлик этме. Мен – Раббийме.
22Эр киши бла, тиширыу бла жатхан кибик, жатма. Ол къутсузлукъду.
23Хайыуан бла жатма. Алай этип, огъунгу тёксенг, кесинги харам этериксе. Тиширыу да хайыуанны тюбюне бармасын. Ол къутсузлукъду.
24Битеу бу затла бла кесинги харам этме. Мен аллыгъыздан къыстагъан миллетле кеслерин алай харам этип тургъандыла. 25Аны ючюн бу жер харам болгъанды. Мен аны аманлыгъын кёрюп, анга азап чекдирдим. Энди бу жер аны юсюнде жашагъанланы къусуп атады. 26Сиз а Мени жорукъларымы бла Мени хукмуларымы тутугъуз, кеси адамыгъыз да, арагъызда жашагъан тыш адамыгъыз да, бу къутсуз затланы этмегиз. 27Бу жерде сизден алгъа жашагъан адамла бу къутсуз затланы этип, бу жер харам болгъанды. 28Сиз да бу жерни харам этип башласагъыз, ол, сизден алгъа жашагъан миллетлени къусуп атханы кибик, сизни да алай къусуп атар.
29Быллай къутсуз затла этген адамланы жанлары халкъ арасындан жокъ этилликдиле. 30Алайды да, Мени жорукъларымы тутугъуз, сизден алгъа жашагъанланы къутсуз адетлерине кёре жашамагъыз, кесигизни ала бла харам этмегиз. Мен – Раббийме, сизни Аллахыгъызма.
Currently Selected:
Лебийлиле 18: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
